ܦܢܛܝܩـܘܼܤܛـܐ

                                                                           ܒܝܕ ܡܫܡܫܢܐ:ܝܘܤܦ ܢܘܼܪܘܼ

ܦܢܛܝܼܩܘܼܤܛܸܐ: ܐܝܼܠܸܗ ܚܲܕ݇ ܡܼܢ ܫܲܒܼܥܵܐ ܥܹܐܕܵܘܵܬܸ̈ـܐ ܡܵܪ̈ܵܢܵܝܸܐ. ܘܦܝܼܫܵܐ ܝ݇ܠܸܗ ܩܸܪܝܵܐ ܒܥܹܐܕܵܐ ܕܚܲܡܫܝܼ.     ܦܲܢܛܝܼܩܘܼܤܛܸܐ: ܚܲܒܪܵܐ ܝ݇ܠܸܗ ܝܵܘܢܵܝܵܐ: ܝܵܥܢܝܼ: ܬܲܡܲܡܬܵܐ ܕ(50) ܝܵܘܡܵܢܸ̈ܐ، ܕܡܼܢ ܒܵܬ݇ܪ ܦܸܨܚܵܐ.          ܓܵܘ ܥܲܬܝܼܩܬܵܐ ܦܝܼܫܵܐ ܗ݇ܘ̣ܵــــــܐ ܕܸܥܝܵܐ ܒܥܹܐܕܵܐ ܕܫܵܒܼܘܼܥܸ̈ܐ: ܝܵܥܢܝܼ: (7) ܫܵܒܼܘܼܥܸ̈ܐ ܡܼܢ ܒܵܬ݇ܪ ܦܸܨܚܵܐ. (ܡܲܦܩܵܢܵܐ 2:34)  (ܬܸܢܝܵܢ ܢܵܡܘܼܤܵܐ 10:16).                                      ܦܝܼܫܵܐ ܗ݇ܘ̣ܵܐ ܕܸܥܝܵܐ ܒܚܲܕ݇ ܫܸܡܵܐ ܐ݇ܚܸܪ݇ܢܵܐ: ܥܹܐܕܵܐ ܕܒܘܼܟܼܪܘܼܬܵܐ (ܡܸܢܝܵܢܵܐ 26:28) ܝܵܥܢܝܼ: ܒܘܼܟܼܪܵܐ ܕܟܠܵܝ̈ܗ‌ܝ ܥܹܐܕܵܘܵܬܸ̈ـܐ ܕܟܸܐ ܡܙܲܝܚܝܼ ܗ݇ܘ̤ܵܘ ܠܗ݇ܘܼܢ. ܘܒܚܲܪܬܵــــܐ ܦܝܼܫܠܸܗ ܕܸܥܝܵܐ ܒܥܹܐܕܵــــܐ ܕܚܸܨܕܵܐ (ܡܲܦܩܵܢܵܐ 16:23) ܤܵܒܵܒ ܓܵܘ ܕܐܵܗܵܐ ܝܵܘܡܵܐ ܟܸܐ ܡܲܥܒܼܸܪܝܼ ܗ݇ܘ̤ܵܘ ܚܸܨܕܵܐ ܩܲܕ݇ܡܵܝܵܐ ܠܒܲܝܬܵܐ ܕܐܲܠܵܗܵܐ. ܘܗܲܪ ܒܐܵܗܵܐ ܝܵܘܡܵܐ ܟܸܐ ܕܵܟܼܪܝܼ ܗ݇ܘ̤ܵܘ ܠܥܸܤܪܵܐ ܦܘܼܩܕܵܢܸ̈ܐ ܕܝܘܼܗ݇ܒܼܵܝܠܸܗ ܐܲܠܵܗܵܐ ܩܵܐ ܡܘܼܫܸܐ ܥܲܠ ܛܘܼܪܵܐ ܕܤܝܼܢܵܝ.

ܡܵܢܝܼ ܝ݇ܠܸܗ ܪܘܼܚܵܐ ܕܩܘܼܕܫܵܐ؟                                                       ܐܝܼܠܸܗ ܪܘܼܚܵܐ ܩܲܕܝܼܫܵܐ ܕܐܲܠܵܗܵܐ (ܐܲܦܸܤܵܝܸ̈ܐ 30:4) ܘܒܵܪܵܒܵܪ ܐܝܼܠܸܗ ܥܲܡ ܒܵܒܵܐ ܘܒܪܘܼܢܵܐ ܒܐܝܼܬܼܝܵܐܝܼܬ ܘܒܚܲܝܠܵܐ. ܘܐܵܗܵܐ ܪܘܼܚܵܐ ܕܩܘܼܕܫܵܐ ܫܪܸܐܠܸܗ ܒܪܸܫ ܬܲܠܡܝܼ̈ܕܸܐ ܒܝܵܘܡܵܐ ܕܚܲܡܫܝܼ (ܦܪܲܟ 1:2-4). ܘܐܝܼܠܸܗ ܗ̇ܘ ܪܘܼܚܵܐ ܕܩܘܼܘܸܠܸܗ ܡܵܪܝܵܐ ܕܒܸܬ ܫܵܕܸܪܸܗ ܕܵܐܟܼܝܼ ܕܐ݇ܡܸܪܸܗ ܥܲܠ ܠܸܫܵܢܵܐ ܕܝܘܼܐܹܝܠ ܢܒܼܝܼܵܐ (ܒܸܬ ܫܲܦܚܸܢ ܪܘܼܚܝܼ ܥܲܠ ܟܠ ܒܸܤܪܵܐ: ܘܒܸܬ ܢܵܒܝܼ ܒܢܘܼܢܘܿܟܼܘܿܢ ܘܒܢܵܬܘܿܟܼܘܿܢ: ܚܘܲܪ̈ܕܸܩܢܘܿܟܼܘܿܢ ܚܸܠܡܸ̈ܐ ܒܸܬ ܚܲܠܡܝܼ: ܘܓ̰ܘܲܢܩܘܿܟܼܘܿܢ ܚܸܙܘܸ̈ܐ ܒܸܬ ܚܵܙܝܼ...ܝܘܼܐܸܝܠ 28:2) ܘܫܸܡܥܘܼܢ ܟܹܐܦܵܐ ܡܫܘܼܪܸܪܸܐ ܘܡܘܼܕܥܹܐܠܸܗ ܕܐܵܗܵܐ ܢܒܼܝܼܘܼܬܵܐ ܦܝܼܫܠܵܗ̇ ܡܬܘܼܡܸܡܬܵܐ ܒܝܵܘܡܵܐ ܕܚܲܡܫܝܼ (ܦܪܲܟܤܝܼܤ 16:2-17) ܘܝܘܼܚܲܢܵܢ ܫܠܝܼܚܵܐ ܡܲܕܥܘܼܝܵܢ ܐܝܼܠܸܗ ܕܪܘܼܚܵܐ ܕܩܘܼܕܫܵܐ ܒܵܪܵܒܵܪ ܐܝܼܠܸܗ ܥܲܡ ܒܵܒܵܐ ܘܒܪܘܼܢܵܐ ܐܝܼܡܵܢ ܕܐ݇ܡܸܪܸܗ (ܘܐܵܢܝܼ ܕܤܵܗܕܝܼ ܓܵܘ ܫܡܲܝܵܐ ܬܠܵܬܵܐ ܝ݇ܢܵܐ: ܒܵܒܵܐ ܘܒܪܘܼܢܵܐ ܘܪܘܼܚܵܐ ܕܩܘܼܕܫܵܐ: ܘܐܲܢܸ̈ܐ ܬܸܠܘܼܢܬܵ‌ܝ ܚܲܕ݇ ܝܼܢܵܐ...1ܝܘܼܚܲܢܵܢ 8:5).         ܪܘܼܚܵܐ ܕܩܘܼܕܫܵܐ ܦܝܼܫܵܐ ܝ݇ܠܸܗ ܕܸܥܝܵܐ ܒܪܘܼܚܵܐ ܕܚܲܝܸ̈ܐ (ܪ̈ܗ݇ܘܿܡܵܝܸܐ 2:8) ܘܚܲܙܩܝܼܐܹܝܠ ܢܒܼܝܼܵܐ ܒܸܐ݇ܡܵܪܵܐ ܝ݇ܠܸܗ ܟܸܐ ܡܲܚܸܗ ܠܡܝܼܬܸ̈ـܐ (ܚܲܙܩܝܼܐܹܝܠ 9:37). ܘܡܵܢܝܼ ܡܵܨܸܐ ܕܡܲܚܸܗ ܠܡܝܼܬܸ̈ـܐ ܘܡܲܩܸܡ ܠܗ݇ܘܼܢ ܫܒܼܘܼܩ ܡܼܢ ܚܲܕ݇ ܐܲܠܵܗܵܐ!!!!!!!.

ܪܘܼܚܵܐ ܕܩܘܼܕܫܵܐ: ܩܢܘܼܡܵܐ ܕܚܲܝܵܐ ܝ݇ܠܸܗ: ܝܵܗ݇ܒܼܵܢܵܐ ܕܚܲܝܘܼܬܵܐ ܩܵܐ ܟܠܸܗ ܥܵܠܡܵܐ. ܘܗܲܕܟܼܵܐ ܟܸܐ ܡܵܘܕܝܼܵܚ ܓܵܘ ܨܘܼܪܬܵܐ ܕܗܲܝܡܵܢܘܼܬܵܐ ܘܟܸܐ ܐܲܡܪܵܚ (ܪܘܼܚܵܐ ܡܲܚܝܼܵܢܵܐ). ܘܟܠܵܝ̈ܗ‌ܝ ܢܒܼܝܼܵܘܵܬܼܵـܐ ܕܢܒܼܝܼܸ̈ܐ ܦܝܼܫܵܐ ܗ݇ܘ̤ܵܘ ܓܸܠܝܸ̈ܐ ܒܚܲܝܠܵܐ ܕܪܘܼܚܵܐ ܕܩܘܼܕܫܵܐ.                                                        ܪܘܼܚܵܐ ܕܩܘܼܕܫܵܐ: ܐܝܼܗ݇ܘ̣ܵܐ ܥܲܡ ܒܵܒܵܐ ܘܒܪܘܼܢܵܐ ܓܵܘ ܒܪܵܝܬܵܐ ܕܥܵܠܡܵܐ ܕܵܐܟܼܝܼ ܕܒܸܐ݇ܡܵܪܵـــــܐ ܝ݇ܠܸܗ ܕܵܘܝܼܕ ܢܒܼܝܼܵܐ (ܟܸܐ ܫܲܕܪܸܬ ܪܘܼܚܘܼܟܼ ܟܸܐ ܦܵܝܫܝܼ ܒܸܪ̈ܝܸܐ: ܘܟܸܐ ܚܲܕܸܬܸܬ ܦܵܬܵܐ ܕܐܲܪܥܵܐ...ܡܲܙܡܘܼܪܵܐ 30:104) ܘܒܟܠ ܕܘܼܟܵܐ ܝ݇ܠܸܗ (ܡܲܙܡܘܼܪܵܐ 7:139).                                                 ܪܘܼܚܵܐ ܕܩܘܼܕܫܵܐ: ܟܸܐ ܥܵܡܸܪ ܓܵܘ ܟܠ ܚܲܕ݇ ܒܲܪܢܵܫܵܐ ܡܗܘܼܝܡܢܵܐ: ܘܓܵܘ ܟܠܵܝ̈ܗ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ܝ ܐܲܬܪ̈ܵܘܵܬܸܐ ܕܥܲܠ ܦܵܬܵܐ ܕܐܲܪܥܵܐ، ܘܟܸܐ ܝܵܕܥܸܗ ܠܚܘܼܫܵܒܼܸ̈ܐ ܕܟܠ ܚܲܕ݇ ܒܲܪܢܵܫܵܐ!!!.                                    ܪܘܼܚܵܐ ܕܩܘܼܕܫܵܐ: ܐܝܼܠܸܗ ܪܘܼܚܵܐ ܕܤܲܪܲܤܬܘܼܬܵܐ، ܚܲܝܠܵܐ ܝ݇ܠܸܗ، ܦܵܪܲܩܠܝܼܛܵܐ، ܥܵܩܸܠܕܵܪܘܼܬܵܐ، ܫܵܦܵܩܲܬ، ܪܵܙܝܼܘܼܬܵܐ، ܦܲܪܡܵܝܬܵܐ، ܕܪܵܐܝ ܘܓܲܢ݇ܒܵܪܘܼܬܵܐ، ܕܕܥܵܝܬܵܐ ܘܙܕܘܼܥܬܵܐ ܕܐܲܠܵܗܵܐ.

ܡܘܼܕܝܼ ܝ݇ܠܸܗ ܡܲܥܢܵܝܵܐ ܕܦܵܪܲܩܠܝܼܛܵܐ؟                                                  ܐܝܼܠܸܗ ܚܲܒܪܵܐ ܝܵܘܢܵܝܵܐ: ܝܵܥܢܝܼ:( ܝܵܗ݇ܒܼܵܢܵܐ ܕܠܸܒܵܐ، ܤܢܸܓܼܪܵܐ، ܛܲܠܒܵܢܵܐ، ܒܲܥܝܵܢܵܐ ) ܩܵܐ ܗ̇ܘ ܕܐܝܼܬܠܸܗ ܗܲܝܡܵܢܘܼܬܵܐ ܫܲܪܝܼܪܬܵܐ ܘܢܵܛܸܪܸܗ ܒܕܸܟܼܝܘܼܬܵܐ!!!.                                           ܨܠܵܝܬܵܐ ܘܫܪܵܝܬܵܐ ܕܪܘܼܚܵܐ ܕܩܘܼܕܫܵܐ ܒܪܸܫ ܬܲܠܡܝܼ̈ܕܸܐ: ܐܝܼܗ݇ܘ̣ܵܐ ܫܘܼܪܵܝܵܐ ܕܦܸܠܚܵܢܵܐ ܕܥܹܕܬܵܐ ܡܫܝܼܚܵܝܬܵܐ. ܐܵܦܸܢ ܕܡܵܪܲܢ ܡܓܘܼܒܸܐܠܸܗ ܫܠܝܼܚܸ̈ܐ: ܐܝܼܢܵܐ ܠܵܐ ܫܒܼܝܼܩܵܝܠܸܗ ܕܡܲܟܪܸܙܝܼ ܗܲܠ ܕܫܪܸܐܠܸܗ ܪܘܼܚܵܐ ܕܩܘܼܕܫܵܐ ܥܲܠܵܝ̈ܗ‌ܝ ܤܵܒܵܒ ܡܸܢܸܗ ܒܸܬ ܩܲܒܠܝܼ ܗ݇ܘ̤ܵܘ ܚܲܝܠܵܐ ܘܥܵܩܸܠܕܵܪܘܼܬܵܐ ܩܵܐ ܦܪܵܤܬܵܐ ܕܗܲܡܙܲܡܬܵܐ ܕܦܘܼܪܩܵܢܵܐ. ܘܐܵܗܵܐ ܪܘܼܚܵܐ ܕܩܘܼܕܫܵܐ ܐܵܢܸܢܩܵܝܵܐ ܗ݇ܘ̣ܵܐ ܩܵܬܵܝ̈ܗ‌ܝ ܤܵܒܵܒ ܕܠܵܐ ܕܝܼܸܗ ܠܹܐ ܡܵܨܝܼ ܗ݇ܘ̤ܵܘ ܠܸܦܠܵܚܵܐ.                    ܘܪܘܼܚܵܐ ܕܩܘܼܕܫܵܐ: ܟܸܐ ܡܲܚܙܸܗ ܠܦܸܠܚܵܢܵܐ ܩܵܐ ܚܸܠܡܲܬܟܵܪܸ̈ܐ: ܕܵܐܟܼܝܼ ܕܛܠܸܒܠܸܗ ܡܼܢ ܦܝܼܠܝܼܦܘܼܤ ܕܩܲܪܒܸܢ ܠܟܸܤ ܟܵܠܸܤܟܵܐ ܘܡܲܥܡܸܕ ܠܗ̇ܘ ܓܲܒܼܪܵܐ ܕܡܼܢ ܟܘܼܫ (ܦܪܲܟܤܝܼܤ 28:8). ܘܗܲܕܟܼܵܐ ܛܠܸܒܠܸܗ ܪܘܼܚܵܐ ܕܩܘܼܕܫܵܐ ܐܘܼܦ ܡܼܢ ܦܲܛܪܘܼܤ ܩܲـــــــــــܕ ܨܵܠܸܗ ܘܐܵܙܸܠ ܥܲܡ ܕܐܵܢܝܼ̈ ܬܠܵܬܵـــــܐ ܓܲܒܼܪܸ̈ܐ ܕܒܸܛܥܵܝܵܐ ܗ݇ܘ̤ܵܘ ܒܵܬܼܪܸܗ (ܦܪܲܟܤܝܼܤ 19:10).

ܩܵܡܘܼܕܝܼ ܡܵܪܲܢ ܡܫܘܼܕܸܪܸܗ ܠܪܘܼܚܵܐ ܕܩܘܼܕܫܵܐ ܒܵܬ݇ܪ (10) ܝܵܘܡܵܢܸ̈ܐ ܕܐ݇ܤܘܼܠܵܩܸܗ؟                   ܓܝܼܘܲܪܓܝܼܤ ܘܲܪܕܵܐ: ܚܲܕ݇ ܡܼܢ ܡܲܠܦܵܢܸ̈ܐ ܡܫܲܡܗܸ̈ܐ ܕܥܹܕܬܵܐ ܗ̇ܘ ܕܚܸܐܠܸܗ ܓܵܘ ܡܕܝܼܢ݇ܬܵܐ ܕܐܲܪܒܝܼܠ ܒܕܵܘܪܵܐ (13).

ܗܲܕܟܼܵܐ ܝ݇ܠܸܗ ܒܸܐ݇ܡܵܪܵܐ ܓܵܘ ܟܬܵܒܼܵܐ ܕܘܲܪܕܵܐ: ܥܘܼܢܝܼܬܵܐ ܕܥܲܠ ܥܹܐܕܵܐ ܕܦܲܢܛܝܼܩܘܼܤܛܸܐ (ܤܵܒܵܒ ܓܵܘ ܬܸܫܥܵܐ ܝܵܘܡܵܢܸ̈ܐ: ܟܠ ܝܵܘܡܵܐ ܦܝܼܫܵܐ ܗ݇ܘ̣ܵܐ ܟܸܤ ܚܲܕ݇ ܡܼܢ ܬܸܓܼܡܸ̈ܐ ܕܡܲܠܲܐܟܼܸ̈ܐ ܐܵܢܝܼ̈ ܕܚܸܫܵܢܵܐ ܗ݇ܘ̤ܵܘ ܕܒܸܚܙܵܝܵܐ ܗ݇ܘ̤ܵܘ ܓ̰ܘܼܢܓ̰ܵܪܵܐ ܘܡܵܘܬܵܐ ܕܡܵܪܵܝܗ‌ܝ. ܘܩܲܕ ܡܲܚܙܵܐ ܗ݇ܘ̣ܵܐ ܩܵܬܵܝ̈ܗ‌ܝ ܕܲܪ̈ܒܵܬܸܐ ܕܐܝܼܕܵܬܘܼܗ‌ܝ ܘܦܲܓܼܪܘܼܗ‌ܝ).

ܩܵܡܘܼܕܝܼ؟                                                                     ܓܵܘ ܟܵܪܘܼܙܘܼܬܵܐ ܕܚܲܫܵܐ ܕܡܵܪܲܢ: ܟܬܵܒܼܵܐ ܕܲܩܕܵܡ ܘܕܒܼܵܬܲܪ:ܦܵܬܵܐ: 128: ܘܓܵܘ ܚܲܕ݇ ܡܼܢ ܒܲܬܘܵܬܸ̈ـܐ ܗܲܕܟܼܵܐ ܝ݇ܠܵܗ̇ ܒܸܐ݇ܡܵܪܵܐ (ܗ̇ܘ ܕܓܵܘ ܙܩܲܦܬܸܗ ܪܓܸܕܠܗ݇ܘܼܢ ܡܲܠܲܐܟܼܸ̈ܐ: ܘܪܸܡܙܵــــــــــܐ ܕܒܵܒܘܼܗ‌ܝ ܡܘܼܟܠܸܝܵܝܠܸܗ ܕܠܵܐ ܚܲܪܙܸܦܝܼ ܠܨܲܠܒܼܵܢܸ̈ܐ).                                                                     ܘܡܸܢ݇ܕܪܸܫ̄ ܓܵܘ ܥܘܼܢܝܼܬܵܐ ܕܠܸܠܝܵܐ ܕܚܲܕܒܫܲܒܵܐ ܕܒܵܬܲܪ ܤܘܼܠܵܩܵܐ: ܚܘܼܕܪܵܐ :ܦܵܬܵܐ: ܬܪܦܓ: ܒܸܐ݇ܡܵܪܵܐ ܝ݇ܠܵܗ̇ (ܚܲܝܠܵܘܵܬܸ̈ـܐ ܕܡܲܠܲܐܟܼܸ̈ܐ ܒܸܐ݇ܡܵܪܵܐ ܝ݇ܢܵܐ: ܡܵܢܝܼ ܝ݇ܠܸܗ ܐܵܗܵܐ ܡܲܠܟܵܐ ܕܐܝܼܩܵܪܸ̈ܐ.....ܘܪܵܒܵܐ ܡܲܛܠܲܒ ܗܘܸܐܠܵܐ ܐܸܠܵܝ̈ܗ‌ܝ ܥܲܠ ܤܘܼܠܵܩܘܼܟܼ).                                                         ܒܲܤ ܡܼܢ ܐܲܒܼܵܗܵܬܼܵـܐ ܒܸܠܝܵܦܵܐ ܝ݇ܘܵܚ ܕܬܸܫܥܵܐ ܝܵܘܡܵܢܸ̈ܐ: ܟܠ ܚܲܕ݇ ܝܵܘܡܵܐ ܦܝܵܫܵܐ ܗ݇ܘ̣ܵܐ ܟܸܤ ܚܲܕ݇ ܬܸܓܼܡܵܐ. ܘܒܝܵܘܡܵܐ (10) ܐܝܼܡܵܢ ܕܬܸܒܼܠܸܗ ܡܼܢ ܝܲܡܝܼܢܵܐ ܕܒܵܒܘܼܗ‌ܝ ܡܫܘܼܕܸܪܸܗ ܠܪܘܼܚܵܐ ܕܩܘܼܕܫܵܐ. 

ܘܩܵܡܘܼܕܝܼ ܫܪܸܐܠܸܗ ܒܪܸܫ ܬܲܠܡܝܼ̈ܕܸܐ ܒܕܘܼܡܝܵܐ ܕܢܘܼܪܵܐ؟                                      ܗܲܪ ܐܵܗܵܐ ܡܲܠܦܵܢܵܐ ܡܫܲܡܗܵܐ ܒܸܐ݇ܡܵܪܵܐ ܝ݇ܠܸܗ (ܢܘܼܪܵܐ ܟܸܐ ܕܵܡܝܵܗ̇ ܠܚܲܠܥܲܬ: ܕܠܝܼܬܠܵܗ̇ ܕܘܼܡܝܵܐ ܓܵܘ ܒܪܝܼܬܵܐ. ܟܸܐ ܝܲܗܒܼܵܗ̇ ܚܲܡܝܼܡܘܼܬܵܐ: ܘܟܸܐ ܒܲܗܪܸܢܵܗ̇ ܒܒܲܗܪܵܢܘܼܬܵܐ. ܒܝܼܵܗ̇ ܬܠܝܼܩܠܵܗ̇ ܩܲܪܝܼܪܘܼܬܵܐ: ܡܼܢ ܓܵܘ ܦܘܼܡܵܐ ܕܫܠܝܼܚܸ̈ܐ. ܘܦܝܼܫܠܗ݇ܘܼܢ ܛܥܝܼ̈ܨܸܐ ܐܲܝܟܼ ܨܸܒܥܵܬܸ̈ـܐ: ܓܵܘ ܢܲܬܝܵܬܸ̈ـܐ ܕܟܠ ܐܸܡܘܵܬܸ̈ـܐ. ܘܕܵܐܟܼܝܼ ܕܢܘܼܪܵܐ ܟܸܐ ܐܲܟܼܠܵܗ̇: ܪܵܒܵܐ ܤܵܗ݇ܡܸ̈ܐ ܘܠܹܐ ܒܲܨܪܵܗ̇. ܘܠܪܵܒܵܐ ܟܸܐ ܡܲܢܗܸܪܵܗ̇: ܘܡܼܢ ܫܪ̈ܵܓܼ݇ܝܵܬܸܐ ܠܹܐ ܒܲܨܪܵܗ̇. ܝܘܼܗ݇ܒܼܸܠܵܗ̇ ܩܵܬܵܝܗ‌ܝ ܒܲܗܪܵܐ: ܘܐܵܢܝܼ̈ ܦܪܸܤܠܗ݇ܘܼܢ ܠܒܲܗܪܵܐ. ܘܬܠܸܩܠܸܗ ܚܸܫܟܵܐ: ܒܗܸܡܸܙܡܵܢܸ̈ܐ ܡܲܚܝܼܵܢܸ̈ܐ).                  ܘܐܘܼܦ ܙܸܐ ܩܲܕ ܡܕܲܟܼܝܵܐ ܗ݇ܘ̣ܵܐ ܠܗ݇ܘܼܢ ܡܼܢ ܚܛܝܼܬܵܐ ܒܚܲܝܠܵܐ ܕܢܘܼܪܵܐ ܐܲܠܵܗܵܝܵܐ. ܘܒܘܼܬ ܕܐܵܗܵܐ ܫܸܡܥܘܼܢ ܟܹܐܦܵܐ ܫܚܸܢܸܗ ܘܓܵܘ ܟܵܪܘܼܙܘܼܬܸܗ ܡܘܼܕܸܪܸܗ (3000) ܓܵܢܵܬܸ̈ـܐ (ܦܪܲܟܤܝܼܤ 37:2-41).

ܚܲܡܫܵܐ ܪܸ̈ܡܙܸܐ ܕܪܘܼܚܵܐ ܕܩܘܼܕܫܵܐ ܐܝܼܢܵܐ (ܝܵܘܢܵܐ، ܡܝܼܵܐ، ܢܘܼܪܵܐ، ܙܲܝܬܵܐ، ܘܦܵܘܚܵܐ)

ܝܵܘܢܵܐ: ܦܝܼܫܠܵܗ̇ ܚܙܝܼܬܵܐ ܓܵܘ ܥܡܵܕܵܐ ܕܝܼܫܘܿܥ ܡܫܝܼܚܵܐ (ܡܲܬܲ‌ܝ 16:3)

ܡܝܼܵܐ: ܐܲܢܸ̈ܐ ܡܝܼܵܐ ܕܚܲܝܸ̈ܐ ܚܲܕܬܸ̈ـܐ: ܕܟܼܝܼܪܵܝܠܸܗ ܡܵܪܲܢ ܓܵܘ ܗܲܡܙܲܡܬܸܗ ܥܲܡ ܗ̇‌ܝ ܒܲܟܼܬܵـــــܐ ܫܲܡܪܵܝܬܵــــܐ (ܝܘܼܚܲܢܵܢ 10:4). ܘܪܡܵܙܬܵܐ ܕܡܝܼܵܐ ܠܪܘܼܚܵܐ ܕܩܘܼܕܫܵܐ: ܦܝܼܫܬܵــــܐ ܝ݇ܠܵܗ̇ ܓܠܝܼܬܵܐ ܓܵܘ ܡܲܥܡܘܿܕܝܼܬܵܐ (ܝܘܼܚܲܢܵܢ 5:3) (1ܩܘܿܪ̈ܲܢܬܵܝܸܐ 11:6).

ܢܘܼܪܵܐ: ܪܘܼܚܵܐ ܕܩܘܼܕܫܵܐ ܫܪܸܐܠܸܗ ܒܪܸܫ ܬܲܠܡܝܼܕܸܐ ܒܠܸܫܵܢܸ̈ܐ ܕܢܘܼܪܵܐ. ܘܟܬܵܒܼܵܐ ܒܸܐ݇ܡܵܪܵܐ ܝ݇ܠܸܗ (ܐܲܠܵܗܲܢ ܢܘܼܪܵܐ ܝ݇ܠܸܗ ܐܲܟܼܠܵܢܬܵܐ...ܥܸܒܼܪ̈ܵܝܸܐ 29:12)

ܙܲܝܬܵܐ: ܢܒܼܝܸ̈ܐ ܕܓܵܘ ܥܲܬܝܼܩܬܵـــــܐ ܒܡܸܫܚܵܐ ܡܩܘܼܕܫܵܐ ܟܸܐ ܦܵܝܫܝܼ ܗ݇ܘ̤ܵܘ ܡܫܝܼܚܸ̈ܐ. ܗܲܕܟܼܵܐ ܐܘܼܦ ܟܵܗܢܸ̈ܐ. (ܡܲܦܩܵܢܵܐ 25:30-31).

ܦܵܘܚܵܐ: ܦܵܘܚܵܐ ܟܸܐ ܡܵܚܸܗ ܐܲܝܟܵܐ ܕܒܲܤܡܵܐܠܸܗ (ܝܘܼܚܲܢܵܢ 8:3) ܐܝܼܡܵܢ ܕܫܪܸܐܠܸܗ ܪܘܼܚܵܐ ܒܪܸܫ ܬܲܠܡܝܼ̈ܕܸܐ: ܦܝܼܫܠܸܗ ܫܸܡܥܝܵܐ ܩܵܠܵܐ ܕܡܚܲܝܬܵܐ ܕܦܵܘܚܵܐ (ܦܪܲܟܤܝܼܤ 2:2-4) ܘܗܲܕܟܼܵܐ ܐܘܼܦ ܥܲܬܝܼܩܬܵــــــܐ (ܚܲܙܩܝܼܐܹܝܠ 9:37-10) ܘܡܵܪܲܢ ܐܝܼܡܵܢ ܕܝܘܼܗ݇ܒܼܸܠܸܗ ܫܘܼܠܛܵܢܵܐ ܕܟܵܗܢܘܼܬܵܐ ܩܵܐ ܬܲܠܡܝܼ̈ܕܸܐ ܢܦܸܚܠܸܗ ܓܵܘ ܦܲܬܘܵܬܵܝܗ‌ܝ (ܝܘܼܚܲܢܵܢ 22:20). ܘܐܵܗܵܐ ܢܦܵܚܬܵܐ ܐܝܼܗ݇ܘ̣ܵܐ ܦܵܘܚܵܐ܀܀܀܀܀܀܀܀

ܫܡܫܢܐ: ܝܘܤܦ ܢܘܼܪܘܼ