܀ ܨܘܡܐ ܫܪܝܼܪܐ ܀

ܩܲܕ ܨܲܝܡܵܚ ܨܵܘܡܵܐ ܫܲܪܝܼܪܵܐ ܘܦܵܐܸܫ ܩܒܝܼܠܵܐ ܒܡܵܪܝܵܐ ܘܠܵܐ ܐܵܙܸܠ ܚܘܼܪܵܝ: ܐܵܢܸܢܩܵܝܬܵܐ ܝ݇ܠܵܐ ܕܨܵܘܡܲܢ ܗܵܘܝܼ ܡܙܝܼ̈ܓܼܸܐ ܓܵܘܸܗ (ܨܠܘܼܬܵܐ، ܐܸܪܘܵܢܵܐ، ܚܘܼܒܵܐ، ܡܲܟܝܼܟܼܘܼܬܵܐ، ܕܸܟܼܝܘܼܬܵܐ).

1 ܨܵܘܡܵܐ ܘܨܠܘܼܬܵܐ... ܨܵܘܡܵܐ ܕܡܙܝܼܓܼܵܐ ܝ݇ܠܸܗ ܒܨܠܘܼܬܵܐ، ܟܸܐ ܗܵܘܸܐܠܸܗ ܚܲܝܠܵܐ: ܘܟܸܐ ܪܵܝܸܡ ܘܐܵܤܸܩ ܘܥܵܒܸܪ ܩܲܕ݇ܡ ܟܘܼܪܤܝܵܐ ܕܫܵܦܵܩܲܬ: ܘܠܹܐ ܦܵܠܸܛ ܡܼܢ ܬܵܡܵܐ ܗܲܠ ܕܫܵܩܸܠ ܠܡܲܛܠܲܒܸܗ. ܒܨܵܘܡܵܐ ܘܨܠܘܼܬܵܐ، ܟܸܐ ܡܵܨܸܗ ܐ݇ܢܵܫܵܐ ܡܗܘܼܝܡܢܵܐ ܠܡܲܢܚܘܼܦܸܐ ܠܤܵܛܵܢܸ̈ܐ ܘܠܬܒܼܵܪܵܐ ܠܚܲܝܠܵܝܗ‌ܝ ܘܠܬܠܵܚܵܐ ܠܫܘܼܠܛܵܢܵܝܗ‌ܝ. ܘܡܵܪܲܢ ܡܘܼܕܥܸܐܠܸܗ ܕܗ̇ܘ ܚܲܝܠܵܐ ܒܘܼܫ ܓܘܼܪܵܐ ܕܒܝܼܸܗ ܡܵܨܵܚ ܠܓܼܠܵܒܵܐ ܠܤܵܛܵܢܵܐ ܐܝܼܠܸܗ (ܨܵܘܡܵܐ ܘܨܠܘܼܬܵܐ..ܡܲܬܲ‌ܝ 21:17). ܨܵܘܡܵܐ ܕܡܙܝܼܓܼܵܐ ܝ݇ܠܸܗ ܒܨܠܘܼܬܵܐ: ܡܵܨܸܗ ܒܛܲܝܒܘܼܬܵܐ ܕܐܲܠܵܗܵܐ ܠܫܪܵܝܵܐ ܠܗ̇ܘ ܩܸܬܪܵܐ ܒܘܼܫ ܓܘܼܪܵܐ: ܤܵܒܵܒ ܐܲܠܵܗܵܐ ܡܲܚܸܒܵܢܵܐ ܝ݇ܠܸܗ ܕܒܢܲܝ̈ـܢܵܫܵܐ: ܘܠܹܐ ܡܲܚܦܸܠ ܡܼܢ ܨܠܘܼܬܵܐ ܡܦܲܪܦܸܠܵܢܬܵܐ ܕܡܙܝܼܓܼܬܵܐ ܝ݇ܠܵܗ̇ ܒܨܵܘܡܵܐ ܘܡܲܟܵܦܬܵܐ ܕܓܵܢܵܐ.

ܐܝܼܡܵܢ ܕܕܥܹܐܠܸܗ ܢܒܼܝܼܵܐ ܠܚܲܝܠܵܐ ܕܨܠܘܼܬܵܐ ܕܡܙܝܼܓܼܬܵܐ ܝ݇ܠܵܗ̇ ܒܨܵܘܡܵܐ، ܡܘܼܩܘܸܚܠܸܗ ܘܐ݇ܡܸܪܸܗ (ܩܲܕܫܘܼܢ ܨܵܘܡܵܐ: ܩܪܸܐܡܘܼܢ ܟܸܢܫܵܐ: ܓ̰ܡܸܥܡܘܼܢ ܚܘܲܪ̈ܕܸܩܢܸܐ......ܠܒܲܝܬܵـــــــܐ ܕܡܵܪܝܵܐ ܐܲܠܵܗܘܿܟܼܘܿܢ: ܘܡܲܩܘܸܚܘܼܢ ܠܡܵܪܝܵܐ....ܝܘܼܐܹܝܠ 14:1). ܨܵܘܡܵܐ ܘܨܠܘܼܬܵܐ ܠܹܐ ܐܵܬܝܼ ܠܦܪܵܫܵܐ ܡܼܢ ܐܘܼܕܵܠܸ̈ܐ. ܒܘܼܬ ܕܐܵܗܵܐ ܓܵܘ ܚܲܝܵܢ ܥܝܵܕܵܝܸ̈ܐ، ܒܸܬ ܚܵܙܵܚ ܒܝܵܘܡܵܢܸ̈ܐ ܕܨܵܘܡܵܐ ܕܥܘܼܡܪܵܢܲܢ ܟܸܐ ܡܵܐܠܝܼ ܡܼܢ ܡܗܘܼܝ̈ܡܢܸܐ.

2 ܨܵܘܡܵܐ ܘܐܸܪܘܵܢܵܐ.... ܒܝܵܘܡܵܢܸ̈ܐ ܕܨܵܘܡܵܐ: ܦܸܠܚܵܢܵܐ ܕܪܘܼܚܵܐ ܓܵܪܲܓ ܗܵܘܸܐ ܚܲܝܠܵܢܵܐ: ܩܲܕ ܡܵܨܸܗ ܒܲܪܢܵܫܵܐ ܠܗܲܝܘܼܪܸܐ ܠܡܸܤܟܸܢܸ̈ܐ ܒܚܲܕܘܼܬܵܐ ܟܲـــــــــــــــــܕ ܒܸܕܟܼܵܪܵܐ ܕܡܵܪܲܢ ܒܸܐ݇ܡܵܪܵܐ ܝ݇ܠܸܗ (ܛܘܼܒܼܵܐ ܠܗ̇ܘ ܕܝܵܗ݇ܒܸܠ: ܙܵܘܕܵܐ ܡܼܢ ܠܗ̇ܘ ܕܫܵܩܸܠ...ܦܪܲܟܤܝܼܤ 35:20). ܘܫܠܝܼܚܵܐ ܡܲܙܗܘܼܪܲܢ ܝܼܠܸܗ ܘܒܸܐ݇ܡܵܪܵܐ (ܐܲܠܵܗܵܐ ܟܸܐ ܡܲܚܸܒ ܠܝܵܗ݇ܒܼܵܢܵܐ ܚܸܕܝܵܐ...2ܩܘܿܪ̈ܢܬܵܝܸܐ 7:9). ܐܸܢ ܡܲܕܡܝܼܵܚܠܵܗ̇ ܨܠܘܼܬܵܐ ܪܘܼܚܵܢܵܝܬܵܐ: ܒܛܲܝܪܵܐ ܕܟܸܐ ܪܵܝܸܡ ܘܦܵܪܸܚ، ܒܲܤ ܨܵܘܡܵܐ ܘܐܸܪܘܵܢܵܐ ܓܘܼܠܦܵܢܵܐ ܝ݇ܢܵܐ ܕܒܝܼܵܝܗ‌ܝ ܟܸܐ ܦܵܪܚܵܐ ܨܠܘܼܬܵܐ. ܤܵܒܵܒ ܐܸܢ ܬܘܼܠܸܩܠܸܗ ܛܲܝܪܵܐ ܠܬܸܪܘܵܝ ܓܘܼܠܦܵܢܸ̈ܐ، ܝܵܢ ܠܚܲܕ݇ ܡܸܢܵܝܗ‌ܝ: ܕܵܐܟܼܝܼ ܒܸܬ ܦܵܪܸܚ؟. ܗܲܕܟܼܵܐ ܐܘܼܦ ܐ݇ܢܵܫܵܐ ܡܗܘܼܝܡܢܵܐ: ܐܸܢ ܠܝܼܬ ܨܵܘܡܵܐ ܘܐܸܪܘܵܢܵܐ ܓܵܘ ܨܠܘܼܬܸܗ: ܒܸܬ ܗܵܘܝܵܐ ܨܠܘܼܬܸܗ ܙܲܒܘܼܢ!!. ܒܸܐ݇ܡܵܪܵܐ ܝ݇ܠܸܗ ܚܲܟܝܼܡܵܐ (ܥܲܟ̰ܡܵܢܵܐ ܕܢܵܬܸܗ ܡܼܢ ܡܲܩܘܵܚܬܵܐ ܕܡܸܤܟܸܢܵܐ: ܐܘܼܦ ܗ̇ܘ ܒܸܬ ܩܵܪܸܐ: ܘܠܸܐ ܦܵܐܸܫ ܓ̰ܘܼܘܸܒܵܐ...ܡܲܬ̈ܠܸܐ 13:21). ܘܡܵܪܝܵܐ ܡܲܠܘܼܦܲܢ ܝܼܠܸܗ ܥܲܠ ܦܘܼܡܵܐ ܕܐܸܫܲܥܝܵܐ ܢܒܼܝܼܵܐ ܒܘܼܬ ܨܵܘܡܵܐ ܘܒܸܐ݇ܡܵܪܵܐ ( ܗܵܐ: ܠܵܐ ܐܵܗܵܐ ܨܵܘܡܵܐ ܕܓܵܒܸܢܸܗ........ ܠܩܨܵܝܵܐ ܠܟܦܝܼܢܵܐ ܠܲܚܡܘܼܟܼ؟ ܘܕܡܸܤܟܸ̈ܢܸܐ ܛܪ̈ܝܼܕܸــܐ ܡܲܐܘܸܪܸܬ ܠܒܲܝܬܵــــܐ؟ ܟܲــــــــــــــــــܕ ܚܵܙܸܬ ܫܘܼܠܚܵܝܵܐ ܘܟܵܤܸܬܠܸܗ: ܘܡܼܢ ܒܸܤܪܘܼـــــܟܼ ܠܵــــــܐ ܛܵܫܸܬ ܓܵܢܘܼܟܼ...ܐܸܫܲܥܝܵܐ 6:58-7). ܘܗܲܝܓܵܗ̇ ܦܘܼܪܥܵܢܘܿܗ̇ ܒܸܬ ܗܵܘܸܐ (ܒܸܬ ܬܲܪܸܥ ܐܲܝܟܼ ܡܵܘܪܸܫܵܐ ܒܲܗܪܘܼܟܼ: ܘܒܵܤܲܡܬܘܼܟܼ ܓ̰ܲܠܕܸܐ ܒܸܬ ܡܲܓ̰ܝܼܢܵܗ̇: ܘܒܸܬ ܐܵܙܵܠ݇ܐ ܩܲܕ݇ܡܘܼܟܼ ܙܲܕܝܼܩܘܼܬܘܼܟܼ: ܚܸܩܪܵܐ ܕܡܵܪܝܵܐ ܒܸܬ ܓ̰ܲܡܥܝܼܠܘܼܟܼ. ܗܲܝܓܵܗ̇ ܒܸܬ ܩܵܪܸܬ ܘܡܵܪܝܵܐ ܒܸܬ ܓ̰ܲܘܸܒ: ܒܸܬ ܡܲܩܘܸܚܸܬ ܘܒܸܬ ܐܵܡܸܪ: ܗܵܐ: ܐܵܢܵܐ..ܐܸܫܲܥܝܵܐ 8:58-9).

3 ܨܵܘܡܵܐ ܘܚܘܼܒܵܐ... ܨܵܘܡܵܐ ܓܵܪܲܓ ܗܵܘܸܐ ܡܙܝܼܓܼܵܐ ܒܡܲܚܲܒܬܵܐ ܕܐ݇ܚܸܪ̈݇ܢܸܐ. ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܐܸܢ ܤܵܦܸܢ ܦܲܓܼܪܝܼ ܕܦܵܐܸܫ ܡܘܼܩܕܵܐ: ܘܚܘܼܒܵܐ ܠܵܐ ܗܵܘܸܐ ܒܝܝܼ: ܡܸܢܕܝܼ ܠܹܐ ܝ݇ܘܸܢ ܒܸܙܝܵܕܵܐ...1ܩܘܿܪ̈ܢܬܵܝܸܐ 3:13). ܠܹܐ ܝ݇ܠܵܐ ܡܸܬܼܗܵܘܢܵܢܬܵܐ ܕܒܲܪܢܵܫܵܐ ܨܵܐܸܡ ܡܼܢ ܡܹܐܟܼܘܼܠܬܵܐ ܕܒܸܤܪܵܐ: ܘܗܲܪ ܒܗ̇‌ܝ ܥܕܵܢܵܐ ܗܵܘܸܐ ܒܸܐ݇ܟܼܵܠܵܐ ܒܸܤܪܵܐ ܕܐܵܚܘܼܢܸܗ. ܘܡܵܪܝܵܐ ܡܲܠܘܼܦܵܢ ܝܼܠܸܗ ܒܘܼܬ ܐܵܢܸܢܩܵܝܘܼܬܵܐ ܕܨܵܘܡܵܐ ܘܚܘܼܒܵܐ ܟܲܕ ܒܸܐ݇ܡܵܪܵܐ (ܗܵܐ: ܠܵܐ ܐܵܗܵܐ ܨܵܘܡܵܐ ܕܓܵܒܸܢܸܗ؟ ܠܡܲܪܦܘܼܝܸܐ ܬܵܢܲܦܸ̈ܐ ܕܒܝܼܫܘܼܬܵܐ: ܠܫܪܵܝܵܐ ܚܢܝܼܩܸ̈ܐ ܕܢܝܼܪܵܐ: ܘܠܫܵܕܘܼܪܸܐ ܡܘܼܠܝܸܨܸ̈ܐ ܐܵܙܲܕܸ̈ܐ؟ ܘܟܠ ܢܝܼܪܵܐ ܩܲܛܥܝܼܬܘܼܢ؟...ܐܸܫܲܥܝܵܐ 6:58).

4 ܨܵܘܡܵܐ ܘܡܲܟܝܼܟܼܘܼܬܵܐ... ܨܵܘܡܵܐ: ܠܹܐ ܝ݇ܠܸܗ ܐܲܚܟ̰ܝܼ ܕܪܲܝܥܫܵܚ ܒܟܸܦܢܵܐ ܘܡܲܤܠܝܼܵܚ ܠܦܲܓܼܪܲܢ: ܐܸܠܵܐ ܕܡܲܤܠܝܼܵܚ ܐܘܼܦ ܠܓܵܢܵܬܲܢ ܩܲܕ݇ܡ ܡܵܪܝܵܐ، ܩܲܕ ܡܪܵܚܸܡ ܘܫܵܒܸܩ ܠܚܛܝܼܵܬܲܢ ܘܫܵܩܸܠ ܠܟܲܪܒܸܗ ܡܸܢܲܢ ܕܵܐܟܼܝܼ ܕܩܘܼܘܸܡܠܵܗ̇ ܥܲܡ ܐ݇ܢܵܫܸ̈ܐ ܕܢܝܼܢܘܸܐ. ܕܵܘܝܼܕ ܢܒܼܝܼܵܐ ܡܘܼܤܠܝܼܠܸܗ ܓܵܢܸܗ ܒܨܵܘܡܵܐ (ܡܲܙܡܘܼܪܵܐ 13:35)، ܘܐܘܼܦ ܒܸܐ݇ܡܵܪܵܐ ܝ݇ܠܸܗ (ܘܒܟܼܸܐܠܝܼ ܒܨܵܘܡܵܐ ܓܵܢܝܼ...ܡܲܙܡܘܼܪܵܐ 10:69). ܐܝܼܡܵܢ ܕܟܪܸܒܠܸܗ ܐܲܠܵܗܵܐ ܡܼܢ ܐܵܚܵܒܼ ܡܲܠܟܵܐ: ܡܘܼܩܘܸܚܠܸܗ ܠܡܵܪܝܵܐ

ܘܡܘܼܤܠܝܼܠܸܗ ܠܓܵܢܸܗ ܘܠܒܼܸܫܠܸܗ ܤܲܩܵܐ ܘܨܸܡܠܸܗ ܘܕܡܸܟܼܠܸܗ ܒܤܲܩܵܐ. ܘܐ݇ܡܸܪܸܗ ܡܵܪܝܵܐ ܠܐܸܠܝܼܵܐ ܬܸܫܒܝܵܝܵܐ (ܚܙܸܐܠܘܼܟܼ ܕܡܘܼܟܸܦܵܐܠܸܗ ܓܵܢܸܗ ܐܵܚܵܒܼ ܡܼܢ ܩܲܕ݇ܡܝܼ؟ ܤܵܒܵܒ ܕܡܘܼܟܸܦܵܐܠܸܗ ܓܵܢܘܼܗ‌ܝ ܡܼܢ ܩܲܕ݇ܡܝܼ: ܠܸܐ ܡܲܝܸܬ݇ܢ ܒܝܼܫܬܵܐ ܒܝܘܼܡܵܢܘܼܗ‌ܝ...1ܡܲܠܟܸ̈ܐ 29:21).

5 ܨܵܘܡܵܐ ܘܕܸܟܼܝܘܼܬܵܐ... ܗ̇ܘ ܕܫܬܲܒܼܗܸܪ ܒܨܵܘܡܸܗ: ܘܡܲܚܸܒ ܕܡܲܚܙܸܗ ܓܵܢܸܗ ܩܲܕ݇ܡ ܒܢܲܝ̈ـܢܵܫܵܐ ܕܨܝܼܡܵܐ ܝ݇ܠܸܗ ܩܲܕ ܩܵܒܸܠ ܐܝܼܩܵܪܵܐ ܘܫܘܼܒܼܚܵܐ، ܐܵܗܵܐ ܦܝܼܫܵܐ ܝ݇ܠܸܗ ܡܸܚܝܵܐ ܒܡܲܪܥܵܐ ܕܫܘܼܒܼܗܵܪܵܐ ܘܚܸܩܪܵܐ ܒܲܛܝܼܠܵܐ ܘܢܲܤܒܲܝ̈ ܒܐܲܦܘܼܬܵܐ. ܘܒܩܵܒܲܠܬܵܐ ܕܐܝܼܩܵܪܵܐ ܡܼܢ ܐ݇ܢܵܫܸ̈ܐ ܩܵܒܘܼܠܵܐ ܝ݇ܠܸܗ ܠܗܵܩܸܗ ܒܘܼܬ ܟܸܟ̰ܚܵܐ ܕܨܵܘܡܵܐ، ܘܐܵܗܵܐ ܐܝܼܠܸܗ ܗܵܩܵܐ ܡܘܼܤܠܝܼܵܐ ܘܒܲܛܝܼܠܵܐ. ܘܡܵܪܲܢ ܩܲܕ݇ܡ ܡܵܠܸܦܠܲܢ ܕܗܵܘܵܚ ܙܗܝܼܪܸ̈ܐ ܡܼܢ ܕܐܵܗܵܐ ܡܲܪܥܵܐ ܡܬܲܠܩܵܢܵܐ ܟܲܕ ܒܸܐ݇ܡܵܪܵـــــــــــــܐ (ܐܝܼܡܵܢ ܕܨܲܝܡܝܼܬܘܼܢ: ܠܵܐ ܗܵܘܝܼܬܘܼܢ ܦܫܝܼܡܸ̈ܐ ܐܲܝܟܼ ܢܲܤܒܲܝ̈ ܒܐܲܦܸ̈ܐ: ܤܵܒܵܒ ܕܟܸܐ ܡܲܤܪܝܼ ܠܚܘܼܠܩܵܝ: ܕܦܵܝܫܝܼ ܚܸܙܝܸ̈ܐ ܠܒܢܲܝ̈ـܢܵܫܵܐ ܕܒܸܨܝܵܡܵܐ ܝ݇ܢܵܐ. ܬܪܘܼܨܵܐ ܒܸܐ݇ܡܵܪܵܐ ܝ݇ܘܸܢ ܐܸܠܘܿܟܼܘܿܢ ܕܩܘܼܒܸܠܘܼܢ ܗܵܩܵܝ...ܡܲܬܲ‌ܝ 16:6). ܘܗܲܝܓܵܗ̇ ܡܲܪܥܘܼܫܲܢ ܝܼܠܸܗ ܐܲܝܟܼ ܒܵܒܵܐ ܩܲܕ ܠܵܐ ܬܵܠܸܩ ܗܵܩܲܢ ܐܲܠܵܗܵܝܵܐ ܒܘܼܬ ܨܵܘܡܵܐ ܟܲܕ ܒܸܐ݇ܡܵܪܵܐ (ܐܝܼܢܵܐ ܐܲܢ݇ܬ: ܐܝܼܡܵܢ ܕܨܲܝܡܸܬ: ܚܲܠܸܠ ܦܵܬܘܼܟܼ ܘܡܫܘܼܟܼ ܪܸܫܘܼܟܼ ܕܠܵܐ ܦܵܝܫܸܬ ܚܸܙܝܵܐ ܠܒܢܲܝ̈ـܢܵܫܵܐ ܕܒܸܨܝܵܡܵܐ ܝ݇ܘܸܬ: ܐܸܠܵܐ ܠܒܵܒܘܼܟܼ ܕܒܛܸܫܘܵܐ: ܘܒܵܒܘܼܟܼ ܕܚܵܙܸܐ ܒܛܸܫܘܵܐ: ܗ̇ܘ ܒܸܬ ܦܲܪܥܝܼܠܘܼܟܼ...ܡܲܬܲ‌ܝ 17:6-18). ܘܠܲܐܟܼܵܐ ܡܵܪܲܢ ܒܐܸܫܟܵܪܵܐ ܡܲܕܥܘܼܝܵܢ ܝܼܠܸܗ ܕܦܲܪܨܘܼܦܵܐܝܼܬ ܓܵܘ ܨܵܘܡܵܐ ܚܲܕܪܵܚ ܥܝܵܕܵܐܝܼܬ ܩܲܕ ܠܵܐ ܦܵܝܫܵܚ ܚܸܙܝܸ̈ܐ ܕܨܝܼܡܵܐ ܝ݇ܘܵܚ ܘܬܵܠܸܩ ܗܵܩܲܢ ܫܡܲܝܵܢܵܝܵܐ. ܐܝܼܢܵܐ ܪܘܼܚܵܢܵܐܝܼܬ ܡܲܕܥܘܼܝܵܢ ܝܼܠܸܗ.... ♱ ܡܚܲܠܲܠܬܵܐ ܕܦܵܬܵܐ... ܡܚܲܠܲܠܬܵܐ ܕܦܵܬܵܐ (ܝܵܥܢܝܼ) ܡܚܲܠܲܠܬܵܐ ܡܼܢ ܬܘܿܙ ܘܫܸܚܬܵܐ ܕܚܛܝܼܬܵܐ: ܤܵܒܵܒ ܓܵܘ ܦܵܬܵܐ ܐܝܼܬ ܪܸ̈ܓܼܫܸܐ ܦܝܼܫܸܐ ܚܸܙܝܸ̈ܐ. ܘܐܲܢܸܢܩܵܝܬܵܐ ܝ݇ܠܵܐ ܠܬܲܡܘܼܙܸܐ ܐܲܢܸ̈ܐ ܪܸ̈ܓܼܫܸܐ ܡܼܢ ܟܠ ܒܝܼܫܬܵܐ ܩܲܕ ܗܵܘܸܐ ܨܵܘܡܵܐ ܟܵܡܝܼܠ ܘܕܸܟܼܝܵܐ. ♱ ܓܵܘ ܦܵܬܵܐ ܐܝܼܬ ܪܸܓܼܫܵܐ ܕܚܙܲܝܬܵܐ (ܥܲܝܢܵܐ). ܓܵܪܲܓ ܡܲܨܸܡܲܚ ܠܥܲܝܢܵܐ ܘܬܲܡܸܙܲܚܠܵܗ̇ ܡܼܢ ܟܠ ܚܙܲܝܬܵܐ ܫܲܗܘܵܢܲܝܬܵܐ ܘܒܝܼܫܬܵܐ، ܩܲܕ ܗܵܘܸܐ ܠܸܒܵܐ ܕܸܟܼܝܵܐ ܘܦܲܓܼܪܵܐ ܬܲܡܝܼܙ ܘܪܸܥܝܵܢܵܐ ܡܩܘܼܕܫܵܐ. ♱ ܓܵܘ ܦܵܬܵܐ ܐܝܼܬ ܪܸܓܼܫܵܐ ܕܫܡܲܝܥܬܵܐ (ܢܵܬܵܐ). ܡܲܨܸܡܲܚܠܵܗ̇ ܡܼܢ ܫܡܲܝܥܬܵܐ ܕܕܘܼܓ̈ܠܸܐ ܘܒܘܼܚܬܵܢܸ̈ܐ: ܘܡܼܢ ܫܲܗܘܲܬܬܵܐ ܠܦܸܠܚܵܢܵܐ ܕܒܝܼܫܬܵܐ، ܘܡܲܦܠܸܚܵܚܠܵܗ̇ ܩܵܐ ܫܡܲܝܥܬܵܐ ܠܗܸܡܸܙܡܵܢܸ̈ܐ ܕܐܲܠܵܗܵܐ. ♱ ܓܵܘ ܦܵܬܵܐ ܐܝܼܬ ܪܸܓܼܫܵܐ ܕܢܫܲܡܬܵܐ (ܢܵܚܝܼܪܵܐ). ܡܲܨܸܡܲܚܠܸܗ ܡܼܢ ܫܩܵܠܵܐ ܪܝܼܚܵܐ ܕܤܸܪܝܘܼܬܵܐ ܘܟ̰ܲܦܵܠܘܼܬܵܐ ܕܠܵܐ ܩܲܢܝܵܐܠܲܢ ܚܛܝܼܬܵܐ، ܘܐܘܼܦ ܡܼܢ ܡܸܐܟܼܘܼܠܝܵܬܸ̈ـܐ ܒܲܤܝܼܡܸ̈ܐ ܩܲܕ ܠܵܐ ܩܲܢܝܵܐܠܲܢ ܫܲܗܘܲܬܬܵܐ ܕܡܸܐܟܼܘܼܠܬܵܐ.

♱ ܓܵܘ ܦܵܬܵܐ ܐܝܼܬ ܪܸܓܼܫܵܐ ܕܦܘܼܡܵܐ ܘܠܸܫܵܢܵܐ. ܡܲܨܸܡܲܚܠܸܗ ܡܼܢ ܗܸܡܸܙܡܵܢܸ̈ܐ ܠܵܐ ܒܲܤܝܼܡܸ̈ܐ: ܡܼܢ ܕܘܼܓ̈ܠܸܐ ܘܡܲܤܠܵܝܬܵܐ ܘܕܝܵܢܬܵܐ. ܐܸܠܵܐ ܡܲܦܠܸܚܵܚܠܸܗ ܩܵܐ ܨܠܘܼܬܵܐ ܘܬܸܫܒܘܼܚܬܵܐ ܠܐܲܠܵܗܵܐ. ܤܵܒܵܒ ܟܠ ܗܲܡܙܲܡܬܵܐ ܒܵܛܝܼܠ ܒܸܬ ܝܵܗ݇ܒܸܠ ܒܲܪܢܵܫܵܐ ܦܘܼܪܥܵܢܵܐ ܒܘܼܬ ܕܝܼܘܿܗ̇ ܒܝܵܘܡܵܐ ܕܕܝܼܘܵܢ. ♱ ܡܫܲܚܬܵܐ ܕܪܸܫܵܐ... ܡܫܲܚܬܵܐ ܕܪܸܫܵܐ (ܝܵܥܢܝܼ) ܬܲܡܲܙܬܵܐ ܕܪܸܫܵܐ ܘܡܕܵܟܼܵܝܬܸܗ ܡܼܢ ܟܠ ܪܸܥܝܵܢܵܐ ܒܝܼܫܵܐ، ܤܵܒܵܒ ܪܸܥܝܵܢܵܐ ܟܸܐ ܡܲܓܼܠܸܛ ܠܠܸܒܵܐ. ܒܲܤ ܡܘܼܚܸܒܝܼ: ܠܵܐ ܦܲܪܡܝܼܵܚܠܸܗ ܨܵܘܡܵܐ ܕܐܝܼܠܸܗ ܐܲܚܟ̰ܝܼ ܩܛܲܝܥܬܵܐ ܕܡܼܢ ܡܸܐܟܼܘܼܠܝܵܬܸ̈ـܐ. ܘܨܵܘܡܵܐ ܓܵܪܲܓ ܫܵܩܸܠ ܡܵܪܝܵܐ ܡܸܢܸܗ ܪܝܼܚܵܐ ܕܕܒܲܚܬܵܐ ܕܨܵܘܡܵܐ ܫܲܪܝܼܪܵܐ، ܪܝܼܚܵܐ ܕܤܘܼܙܓܵܪܵܐ܀܀܀

ܒܝܲܕ ܡܫܲܡܫܵܢܵܐ: ܝܘܤܦ ܢܘܼܪܘܼ

مشاركاتكم (0)