ܓܫܩܝܬ̈ـܐܓܘ ܚܝ̈ܐ ܕܡܪܬܝ ܡܪܝܡ ܒܬܼܘܼܠܬـܐ

ܗ̇‌ܝ ܩܸܒܼܘܼܬܵܐ ܕܩܵܘ̈ܠܸܐ ܕܛܘܼܪܨܵܐܠܸܗ ܡܘܼܫܸܐ ܕܵܐܟܼܝܼ ܕܦܝܼܫܠܸܗ ܡܘܼܕܥܝܼܵܐ ܒܐܲܠܵܗܵܐ ܥܲܠ ܛܘܼܪܵܐ... ܡܛܘܼܪܸܨܬܵܐ ܗ݇ܘܵܐ ܡܼܢ ܩܲܝܤܵܐ ܕܠܹܐ ܚܵܪܸܒܼ ܘܤܵܦܸܤ ܘܡܘܼܪܟ̰ܝܼܥܬܵܐ ܒܕܲܗܒܼܵܐ ܨܸܦܝܵܐ ܡܼܢ ܓܵܘܵܐ ܘܡܼܢ ܒܲܕܲܪ. ܘܐܵܗܵܐ ܒܸܪܡܵܙܵܐ ܗ݇ܘܵܐ ܠܕܸܟܼܝܘܼܬܵܐ ܘܨܸܦܝܘܼܬܵܐ ܕܡܲܪܝܲܡ ܒܬܼܘܼܠܬܵܐ ܘܩܲܕܝܼܫܬܵܐ، ܕܦܝܼܫܠܵܗ̇ ܡܘܼܚܫܸܬܵܐ ܕܗܵܘܝܵܐ ܝܸܡܵܐ ܩܵܐ ܡܸܠܬܼܵܐ ܕܐܲܠܵܗܵܐ. ܘܓܵܘ ܩܸܒܼܘܼܬܵܐ ܐܝܼܬ ܗ݇ܘܵܐ ܠܲܚܡܵܐ ܕܡܸܢܸܗ ܐ݇ܟܼܸܠܘܼܢ ܒܢܲܝ̈ ܝܼܤܪܵܝܸܠ ܐܲܪܒܥܝܼ ܫܸܢܸ̈ܐ ܓܵܘ ܒܲܪܝܼܵܐ. ܘܡܵܪܲܢ ܐ݇ܡܸܪܸܗ (ܐܵܢܵــــܐ ܝ݇ܘܸܢ ܠܲܚܡܵܐ ܕܚܲܝܸ̈ـــــܐ. ܐܲܒܼܵܗܵܬܘܿܟܼܘܿܢ ܐ݇ܟܼܸܠܘܼܢ ܡܲܢܢܵܐ ܓܵܘ ܒܲܪܝܼܵܐ ܘܡܝܼܬܠܘܼܢ...ܝܘܼܚܲܢܵܢ 48:6-49). ܒܲܤ: ܗ̇ܘ ܐܝܼܠܸܐ ܡܲܢܢܵܐ ܫܲܪܝܼܪܵܐ ܘܐܵܒܵܕܝܼܢܵܝܵܐ [ܕܨܠܸܐܠܸܗ ܡܼܢ ܫܡܲܝܵܐ ܩܲܕ ܡܸܢܸܗ ܐܵܟܼܸܠ ܒܲܪܢܵܫܵܐ ܘܠܵܐ ܡܵܐܸܬ]. ܘܩܸܒܼܘܼܬܵܐ ܕܡܟܘܼܤܝܼܬܵܐ ܒܕܲܗܒܼܵܐ ܨܸܦܝܵܐ، ܛܘܼܦ̮ܤܵܐ ܗ݇ܘܵܐ ܕܒܬܼܘܼܠܬܵܐ ܩܲܕܝܼܫܬܵܐ ܕܫܪܸܐܠܸܗ ܥܲܠܘܿܗ̇ ܪܘܼܚܵܐ ܕܩܘܼܕܫܵܐ، ܘܡܩܘܼܕܫܵܐܠܸܗ ܘܕܘܼܟܼܝܵܐܠܸܗ ܘܡܸܠܝܵܐܠܸܗ ܫܵܦܵܩܲܬ. ܘܒܵܬ݇ܪ ܗܵܕܵܐ ܦܩܸܕܠܸܗ ܡܵܪܝܵܐ ܩܵܐ ܡܘܼܫܸܐ ܕܡܲܬܸܒܼܠܘܼܢ ܠܘܼܚܸ̈ܐ ܕܢܵܡܘܼܤܵܐ ܐܵܢܝܼ̈ ܕܦܝܼܫܵܐ ܗ݇ܘܵܘ ܟܬܝܼܒܸ̈ܐ ܒܤܸܒܥܵܐ ܕܐܲܠܵܗܵܐ ܓܵܘ ܩܸܒܼܘܼܬܵܐ. ܘܐܝܼܡܵܢ ܕܫܪܸܐܠܸܗ ܡܸܠܬܼܵـܐ ܓܵܘ ܡܲܪܒܥܵܐ ܕܒܬܼܘܼܠܬܵܐ: ܠܵܐ ܫܪܸܐܠܸܗ ܐܲܝܟܼ ܠܘܼܚܸ̈ܐ ܝܵܢ ܐܲܝܟܼ ܚܲܒܪ̈ܵܢܸܐ ܟܬܝܼܒܼܸ̈ܐ، ܐܸܠܵܐ ܫܪܸܐܠܸܗ ܡܸܠܬܼܵـܐ ܐܝܼܬܼܝܵܝܬܵܐ ܕܐܝܼܗ݇ܘܵܐ ܓܵܘ ܥܘܼܒܵܐ ܕܒܵܒܵܐ ܒܟܠ ܥܕܵܢܵܐ. [ܠܵܐ ܡܸܬܼܚܲܙܝܵܢܵܐ ܘܕܠܵܐ ܙܲܒܼܢܵܐ] ܗܘܸܐܠܸܗ ܓܵܘ ܥܘܼܒܵܐ ܕܡܲܪܝܲܡ ܡܚܘܼܝܸܕܵܐ ܒܐܲܠܵܗܘܼܬܸܗ ܒܦܲܓܼܪܵܐ ܕܐ݇ܢܵܫܘܼܬܲܢ ܘܫܩܸܠܸܗ ܨܘܼܪܬܲܢ ܘܟܝܵܢܲܢ. ܓܵܘ ܟܵܪ݇ܤܵܐ ܕܒܬܼܘܼܠܬܵـܐ ܗܘܸܐܠܸܐ ܚܘܼܝܵܕܵܐ ܕܠܸܐ ܡܵܨܝܼ ܚܲܒܪ̈ܵܢܸܐ ܕܗܲܡܙܸܡܝܼ ܒܘܼܬ ܕܝܼܸܗ ܘܠܵܐ ܡܲܠܲܐܟܼܸ̈ܐ ܘܪ̈ܲܒܲܝ ܡܲܠܲܐܟܼܸ̈ܐ ܕܨܲܠܡܸܢܝܼ ܝ݇ܠܸܗ. ܘܐܲܢܸ̈ܐ ܥܸܤܪܵܐ ܦܘܼܩܕܵܢܸ̈ܐ ܐܝܼܗ݇ܘܵܘ ܓܵܘ ܟܵܪ݇ܤܵܐ ܕܩܸܒܼܘܼܬܵܐ ܠܤܲܗܕܘܼܬܵܐ ܕܒܢܲܝ̈ ܝܼܤܪܵܝܸܠ، ܘܦܝܼܫܠܘܼܢ ܡܝܘܼܩܪܸ̈ܐ ܓܵܘ ܕܵܘܪܸ̈ܐ ܐܲܝܟܼ ܩܵܢܘܼܢܸ̈ܐ ܐܲܠܵܗܵܝܸ̈ܐ. ܐܲܪܒܥܵܐ ܦܘܼܩܕܵܢܸ̈ܐ ܩܵܕ݇ܡܵܝܸ̈ܐ ܡܲܕܥܘܼܝܵܐ ܝ݇ܢܵܐ ܒܘܼܬ ܘܵܠܝܼܬܵܐ ܕܒܲܪܢܵܫܵܐ ܠܟܸܤ ܐܲܠܵܗܵܐ، ܘܗܲܝܓܵܗ̇ ܢܵܡܘܼܤܵܐ ܕܚܲܡܫܵܐ

ܦܘܼܩܕܵܢܵܐ ܝ݇ܠܸܗ ܕܐܲܠܵܗܵܐ ܠܟܸܤ ܒܢܲܝ̈ـܢܵܫܵܐ ܠܡܝܵܩܲܪܬܵܐ ܕܒܵܒܵܐ ܘܝܸܡܵܐ (ܥܒܼܘܼܕ ܐܝܼܩܵܪܵܐ ܠܒܵܒܘܼܟܼ ܘܝܸܡܘܼܟܼ: ܩܵܐ ܕܝܵܪܟܼܝܼ ܝܵܘܡܵܢܘܼܟܼ ܥܲܠ ܐܲܪܥܵܐ ܕܡܵܪܝܵܐ ܐܲܠܵܗܘܼܟܼ ܒܝܼܵܗ݇ܒܼܵܐ ܝ݇ܠܸܗ ܐܸܠܘܼܟܼ...ܡܲܦܩܵܢܵܐ 12:20). ܓܵܘ ܪܵܒܵܐ ܕܵܘܪܸ̈ܐ ܒܸܬ ܚܵܙܵܚ ܕܐܵܗܵܐ ܦܘܼܩܕܵܢܵܐ ܪܵܒܵܐ ܦܝܼܫܵܐ ܗ݇ܘܵܐ ܡܝܘܼܩܪܵܐ: [ܡܲܠܟܵܐ ܫܠܝܼܡܘܼܢ ܐܝܼܡܵܢ ܕܬܹܐܠܵܗ̇ ܝܸܡܸܗ ܠܟܸܤܠܸܗ ܩܸܡܠܸܗ ܡܪܸܫ ܟܘܼܪܤܝܼܸܗ ܘܤܓܼܸܕܠܸܗ ܐܸܠܘܿܗ̇ ܘܡܘܼܬܒܼܵܐܠܸܗ ܠܕܸܦܢܸܗ ܒܐܝܼܩܵܪܵܐ]. ܓܵܘ ܟܠܵܝܗ‌ܝ ܕܵܘܪܸ̈ܐ ܝܸܡܵܐ ܐܝܼܬܗ݇ܘܵܐ ܠܵܗ̇ ܚܲܕ݇ ܫܵܘܦܵܐ ܓܘܼܪܵܐ ܘܡܝܘܼܩܪܵܐ ܓܵܘ ܚܲܝܸ̈ܐ ܕܩܲܕܝܼܫܸ̈ܐ ܘܐܘܼܦ ܡܼܢ ܓܲܒܼܪܸ̈ܐ ܡܫܲܡܗܸ̈ܐ. ܘܡܘܼܪܝܸܙܠܘܼܢ ܩܵܬܘܿܗ̇ ܝܵܘܡܵܢܸ̈ܐ ܘܥܹܐܕܵܘܵܬܸ̈ـܐ: ܘܟܠܵܗ̇ ܐܵܗܵܐ ܒܸܐ݇ܬܵܝܵܐ ܗ݇ܘܵܐ ܡܼܢ ܦܘܼܩܕܵܢܵܐ ܐܲܠܵܗܵܝܵܐ. ܐܸܢ ܐܝܼܬܗ݇ܘܵܐ ܛܘܼܦ̮ܤܸ̈ܐ ܡܼܢ ܕܲܥܒܲܪ ܕܒܝܼܵܝܗ‌ܝ ܒܢܲܝ̈ـܢܵܫܵܐ ܟܸܐ ܫܬܲܒܼܗܸܪ ܗ݇ܘܵܐ ܓܵܘ ܡܝܵܩܲܪܬܵܐ ܕܝܸܡܵܐ. ܒܲܤ: ܟܵܡܝܼܠܘܼܬܵܐ ܕܐܵܗܵܐ ܐܝܼܩܵܪܵܐ ܦܝܼܫܠܸܗ ܬܘܼܡܸܡܵܐ ܓܵܘ ܡܵܘܠܵܕܵܐ ܕܡܫܝܼܚܵܐ ܡܼܢ ܒܬܼܘܼܠܬܵܐ. ܘܐܸܢ ܒܲܩܪܵܚ ܕܵܐܟܼܝܼ ܬܘܼܡܸܡܠܸܗ ܝܼܫܘܿܥ ܡܫܝܼܚܵܐ ܠܐܵܗܵܐ ܦܘܼܩܕܵܢܵܐ ܥܲــــــــــܡ ܝܸܡܸܗ ܒܬܼܘܼܠܬܵܐ ܘܩܲܕܝܼܫܬܵܐ؟ ܠܹܐ ܡܵܨܵܚ ܒܪܸܥܝܵܢܲܢ ܠܝܼܵܗ݇ܒܼܵܐ ܦܘܼܢܵܝܵܐ ܕܕܵܐܟܼܝܼ ܡܝܘܼܩܪܵܐܠܸܗ ܘܡܘܼܪܡܵܐܠܸܗ ܠܥܘܼܠܘܼܠ ܡܼܢ ܫܡܲܝܸ̈ܐ ܘܡܼܢ ܬܸܓܼܡܸ̈ܐ ܕܡܲܠܲܐܟܼܸ̈ܐ. ܘܕܵܐܟܼܝܼ ܡܝܘܼܩܪܵܐܠܸܗ ܒܘܼܫ ܡܼܢ ܟܠ؟ ܐܵܗܵܐ ܒܸܬ ܚܵܙܵܚܠܵܗ̇ ܓܵܘ ܚܲܝܸ̈ܐ ܐܵܒܵܕܝܼܢܵܝܸ̈ܐ... ܕܵܐܟܼܝܼ ܕܡܘܼܕܥܝܼܵܐܠܸܗ ܓܵܘ ܓܸܠܝܵܢܵܐ (ܒܲܟܼܬܵܐ ܕܠܒܼܝܼܫܬܵܐ ܫܸܡܫܵܐ: ܘܤܲܗܪܵܐ ܬܚܘܼܬ ܐܲܩܠܘܿܗ̇: ܘܥܲܠ ܪܸܫܘܿܗ̇ ܬܵܐܓ̰ ܕܬܪܸܥــــܤܲــܪ ܟܘܿܟܼܒܸ̈ܐ...ܓܸܠܝܵܢܵܐ 1:12). ܫܸܡܫܵܐ ܠܹܐ ܡܩܲܫܕܸܪ ܒܲܪܢܵܫܵܐ ܠܦܵܪܘܼܓ̰ܸܐ ܒܝܼܘܿܗ̇، ܐܝܼܢܵܐ ܡܲܪܝܲܡ ܠܒܼܝܼܫܬܵܐ ܠܫܸܡܫܵܐ. ܫܘܼܒܼܚܵܐ ܠܫܸܡܵܐ ܕܐܲܠܵܗܵܐ، ܕܐܵܗܵܐ ܥܘܼܠܘܼܠ ܝܼܠܵܐ ܡܼܢ ܪܸܥܝܵܢܵܐ ܕܒܲܪܢܵܫܵܐ ܘܡܲܠܲܐܟܼܵܐ. ܘܐܸܢ ܥܹܕܬܵܐ ܡܝܲܩܪܵܐ ܠܡܲܪܝܲܡ ܒܬܼܘܼܠܬܵܐ ܓܵܘ ܨܠܵܘܵܬܘܿܗ̇ ܘܬܸܫܒܘܼܚܝܵܬܘܿܗ̇: ܐܵܗܵܐ ܫܪܵܪܵܐ ܝ݇ܠܵܐ ܘܗܲܩ. ܘܐܸܢ ܐܲܡܪܵܚ ܫܡܲܝܵܐ ܝ݇ܠܵܐ ܕܬܸܪ̈ܬܵܝ، ܤܵܒܵܒ ܡܲܥܡܪܵܐ ܝ݇ܠܵܗ̇ ܕܐܲܠܵܗܵܐ ܘܩܲܕܝܼܫܘܼܗ‌ܝ: ܫܪܵܪܵܐ ܝ݇ܠܵܐ ܘܗܲܩ. ܘܐܸܢ ܐܲܡܪܵܚ ܕܟܠܵܝܗ‌ܝ ܚܲܠܥܲܬܸ̈ـܐ ܕܦܝܼܫܠܘܼܢ ܡܤܘܼܩ̈ܠܸܐ ܒܝܼܵܝܗ‌ܝ ܩܲܕܝܼܫܸ̈ܐ، ܓ̰ܡܸܥܠܘܼܢ ܓܵܘܵܟܼܝ ܘܩܲܕ݇ܡ ܤܲܩܠܝܼܠܵܟܼܝ: ܐܵܗܵܐ ܫܪܵܪܵܐ ܝ݇ܠܵܐ ܘܗܲܩ. ܐܸܢ ܡܵܪܲܢ ܝܼܫܘܿܥ ܡܫܝܼܚܵܐ ܕܦܝܼܫܠܸܗ ܝ݇ܠܝܼܕܵܐ ܡܸܢܘܿܗ̇ ܡܝܘܼܩܪܵܐܠܸܗ ܒܐܲܠܵܗܘܼܬܸܗ.. ܒܲܤ: ܟܠܵܝܗ‌ܝ ܡܲܛܠܲܒܘܿܗ̇ ܠܟܸܤܠܸܗ ܦܝܵܫܵܐ ܝ݇ܢܵܐ ܩܒܝܼܠܸ̈ܐ ܘܦܲܪܦܲܠܝܵܬܘܿܗ̇ ܒܘܼܬ ܚܵܬܸܪܲܢ ܟܸܐ ܫܲܡܥܹܐܠܘܼܢ. ܒܘܼܬ ܕܐܵܗܵܐ ܟܸܐ ܛܲܠܒܵܚ ܡܸܢܘܿܗ̇ ܒܟܠ ܝܵܘܡܵܐ ܘܤܵܥܲܬ ܘܕܲܩܝܼܩܵܐ ܘܪܦܵܦܵܐ، ܤܵܒܵܒ ܓܵܘ ܗܲܝܡܵܢܘܼܬܵܐ ܒܸܗܘܵܝܵܐ ܝ݇ܘܵܚ ܒܢܘܼܢܸ̈ܐ ܘܝܵܪ̈ܘܼܬܸܐ ܓܵܘ ܡܫܝܼܚܵܐ، ܘܡܲܪܝܲܡ ܒܸܗܘܵܝܵܐ ܝ݇ܠܵܐ ܝܸܡܲܢ ܘܒܝܹܬܼ ܓܵܘܤܲܢ، ܘܒܘܼܬ ܚܵܬܸܪܘܿܗ̇ ܟܸܐ ܢܵܛܸܪ ܠܥܵܠܡܵܐ܀

܀ ܝܸܡܵܝܘܼܬܵܐ ܕܒܬܼܘܼܠܬܵـܐ ܀

(ܒܪܝܼܟܼܬܵܐ ܓܵܘ ܒܲܟܼܬܵܬܸ̈ـܐ...ܠܘܼܩܵܐ 28:1). ܒܫܲܪܝܼܪܘܼܬܵܐ ܡܝܘܼܩܸܪܬܵܐ ܝ݇ܠܵܗ̇ ܘܡܒܘܼܪܸܟܼܬܵܐ. ܦܝܼܫܠܵܗ̇ ܡܘܼܪܸܡܬܵܐ ܠܥܘܼܠܘܼܠ ܡܼܢ ܫܡܲܝܵܢܵܝܸ̈ܐ ܒܡܲܟܝܼܟܼܘܼܬܘܿܗ̇ ܡܥܲܓ̰ܒܲܢܬܵܐ ܘܒܕܸܟܼܝܘܼܬܵܐ ܕܠܸܒܘܿܗ̇. ܡܵܢܝܼ ܡܵܨܸܐ ܕܗܲܡܙܸܡ ܒܘܼܬ ܕܝܼܵܟܼܝ؟ ܘܡܵܢܝܼ ܡܵܨܸܐ ܕܦܵܪܸܡܠܘܼܢ ܐ݇ܪ̈ܵܙܵܟܼܝ؟! ܐܲܢ݇ܬ ܕܗܘܸܐܠܵܟܼܝ ܓܢܘܼܢܵܐ ܫܡܲܝܵܢܵܐ ܩܵܐ ܚܸܬܢܵܐ ܐܲܠܵܗܵܝܵܐ. ܐܝܼܬ ܩܲܕܝܼܫܸ̈ܐ ܕܗܘܸܐܠܘܼܢ ܩܘܼܪܒܵܐ ܠܐܲܠܵܗܵܐ ܒܚܲܝܠܵܐ ܕܪܘܼܚܵܐ، ܐܝܼܢܵܐ ܐܘܼܦ ܚܲܕ݇ ܠܵܐ ܚܙܸܐܠܸܗ ܕܡܸܠܬܼܵܐ ܗܘܸܐܠܸܗ ܒܪܘܼܢܵܐ ܓܵܘ ܟܵܪ݇ܤܵܐ!. ܐܝܼܬ ܩܲܕܝܼܫܸ̈ܐ ܕܚܹܐܠܘܼܢ ܓܵܘ ܨܠܘܼܬܵܐ: ܘܒܝܼܵܗ̇ ܡܛܹܐܠܘܼܢ ܠܟܸܤ ܡܵܪܝܵܐ، ܐܝܼܢܵܐ ܐܘܼܦܚܲܕ݇ ܠܵܐ ܩܘܼܒܸܠܸܗ ܠܡܵܪܝܵܐ ܓܵܘ ܟܵܪ݇ܤܵܐ ܘܗܘܸܐܠܸܗ ܩܘܼܪܒܵܐ ܐܸܠܸܗ ܐܲܝܟܼ ܗܲܕܵܡܸ̈ܐ ܕܦܲܓܼܪܵܐ. ܛܥܸܢܵܟܼܝ ܓܵܘ ܟܵܪ݇ܤܵܟܼܝ.. ܡܘܼܡܸܨܠܵܟܼܝ ܡܼܢ ܨܲܕܪܵܟܼܝ ܕܸܟܼܝܵܐ.. ܡܓܘܼܪܘܸܤܠܵܟܼܝ ܐܲܝܟܼ ܒܲܪܢܵܫܵܐ. ܡܬܘܼܓܒܸܪܵܟܼܝ ܠܗ̇ܘ ܕܟܸܐ ܬܲܓܒܸܪ ܠܟܠܵܗ̇ ܒܪܝܼܬܵܐ.. ܡܘܼܟܼܸܠܵܟܼܝ ܠܗ̇ܘ ܕܟܸܐ ܡܵܐܟܼܸܠ ܠܟܠ ܡܵܪܵܐ ܕܦܲܓܼܪܵܐ. ܒܠܲܝܠܵܘܵܬܸ̈ـܐ ܠܵܐ ܕܡܸܟܼܠܵܟܼܝ ܗܘܸܐܠܵܟܼܝ ܥܲܡܸܗ ܐܲܝܟܼ ܡܲܠܲܐܟܼܸ̈ܐ ܕܠܹܐ ܟܵܐܠܝܼ ܡܼܢ ܡܲܤܘܼܩܸܐ ܬܸܫܒܘܼܚܬܵܐ ܐܸܠܸܗ. ܥܘܼܠܘܼܠ ܝܼܘܵܬܝ ܡܼܢ ܡܲܠܲܐܟܼܸ̈ܐ ܤܵܒܵܒ ܗܘܸܐܠܵܟܼܝ ܝܸܡܵܐ ܩܵܬܸܗ. ܐܲܠܵܗܵܐ ܡܘܼܬܸܒܼܠܸܗ ܟܝܵܢܵܐ ܕܝܸܡܵܝܘܼܬܵܐ ܓܵܘ ܒܲܟܼܬܵܬܸ̈ـܐ: ܘܥܒܼܝܼܕܵܐܠܸܗ ܚܕܵܐ ܪܥܲܫܬܵܐ ܚܲܝܠܵܢܬܵܐ ܩܵܬܵܝܗ‌ܝ. ܒܪܵܬܵܐ ܙܥܘܼܪܬܵܐ ܟܸܐ ܡܫܲܗܘܸܬܬܵܐ ܕܗܵܘܝܵܐ ܝܸܡܵܐ. ܘܛܵܐܲܠܬܵܐ ܕܟܸܐ ܡܲܚܒܵܐܠܵܗ̇ ܐܝܼܠܵܐ [ܒܘܼܩܬܵܐ] ܩܲܕ ܚܲܫܒܼܵܗ̇ ܠܓܵܢܘܿܗ̇ ܐܲܝܟܼ ܝܸܡܵܐ. ܘܬܸܦܝܼܠܵܐ ܙܥܘܼܪܵܐ ܓܵܘ ܥܲܝܢܵܐ ܕܝܸܡܸܗ ܐܝܼܠܸܗ ܒܪܝܼܬܵܐ ܫܲܦܝܼܪܬܵܐ ܒܟܠ ܬܵܗܲܪ ܕܐܝܼܠܸܗ. ܝܵܐ ܡܲܪܝܲܡ ܒܬܼܘܼܠܬܵـܐ: ܕܵܐܟܼܝܼ ܗ݇ܘܵܐ ܓܵܫܲܩܬܵܟܼܝ ܥܲܠ ܒܪܘܼܢܵܟܼܝ ܡܓܘܼܫܡܸܢܵܐ؟ ܘܒܲܪܢܵܫܵܐ ܠܝܼܬܠܸܗ ܩܲܝܵܤ ܩܲܕ ܡܵܛܸܐ ܠܗ̇‌ܝ ܪܥܲܫܬܵܟܼܝ ܒܘܼܬ ܒܪܘܼܢܵܟܼܝ.. ܫܘܼܒܼܚܵܐ ܐܸܠܸܗ܀

܀ ܟܡܵܐ ܝ݇ܢܵܐ ܫܲܦܝܼܪܸ̈ܐ ܐ݇ܪ̈ܵܙܵܟܼܝ ܀

ܝܵܐ ܒܬܼܘܼܠܬܵܐ: ܐܲܢ݇ܬ ܚܙܸܐܠܵܟܼܝ ܠܡܲܟܝܼܟܼܘܼܬܵܐ ܕܒܪܘܼܢܵܟܼܝ: ܘܕܵܐܟܼܝܼ ܡܘܼܤܦܸܩܠܸܗ ܓܵܢܸܗ ܡܼܢ ܫܘܼܒܼܚܵܐ ܒܘܼܬ ܚܵܬܸܪܲܢ: ܘܚܘܼܡܝܵܝܠܵܟܼܝ ܓܵܘ ܠܸܒܵܟܼܝ ܤܵܒܵܒ ܐܘܼܦܚܲܕ݇ ܠܹܐ ܡܵܨܸܐ ܕܦܵܪܸܡܠܘܼܢ. ܠܸܫܵܢܵܐ ܕܡܲܠܲܐܟܼܸ̈ܐ ܠܵܐ ܡܨܸܐܠܸܐ ܠܗܲܡܙܘܼܡܸܐ، ܐܝܼܡܵܢ ܕܚܙܸܐܠܘܼܢ ܐܲܠܵܗܵܐ ܕܐܲܠܵܗܸ̈ܐ ܘܡܵܪܵܐ ܕܡܵܪ̈ܵܘܵܬܸܐ ܠܡܲܤܦܘܼܩܸܐ ܓܵܢܸܗ ܡܼܢ ܫܘܼܒܼܚܵܐ ܕܐܲܠܵܗܘܼܬܸܗ ܘܒܸܗܘܵܝܵܐ ܒܕܘܼܡܝܵܐ ܕܒܲܪܢܵܫܵܐ ܘܡܲܬܘܼܝܸܐ ܓܵܢܸܗ ܗܲܠ ܡܵܘܬܵܐ، ܡܵܘܬܵܐ ܕܨܠܝܼܒܼܵܐ.

ܐܲܢ݇ܬ ܝܵܐ ܛܘܼܒܼܵܢܝܼܬܵܐ ܟܸܐ ܓܲܫܩܵܬ ܗ݇ܘܵܐ ܒܝܼܸܗ ܘܓܵܘ ܓܵܢܵܟܼܝ ܪܘܼܡܚܵܐ ܕܓ̰ܘܼܢܓ̰ܵܪܸ̈ܐ: ܤܵܒܵܒ ܟܸܐ ܝܵܕܥܲܬ ܗ݇ܘܵܐܠܸܗ ܒܘܼܫ ܡܼܢ ܡܲܠܲܐܟܼܸ̈ܐ ܕܝܵܕܥܝܼ ܗ݇ܘ̤ܵܘܠܸܗ. ܐܵܢܝܼ̈ ܩܲܕ݇ܡ ܝܵܕܥܝܼܠܸܗ ܐܲܝܟܼ ܒܵܪܘܼܝܵܐ ܕܠܹܐ ܦܵܐܸܫ ܚܸܙܝܵܐ، ܘܐܲܝܟܼ ܢܘܼܗܪܵܐ ܕܠܹܐ ܡܵܨܝܼ ܠܩܲܪܒܘܼܢܸܐ ܠܟܸܤܠܸܗ. ܡܫܘܼܒܸܚܠܘܼܢ ܘܟܹܐ ܡܫܲܒܚܝܼܠܸܗ ܕܠܵܐ ܟܠܵܝܬܵܐ، ܟܲـــــــــܕ ܡܟܵܤܘܼܝܸܐ ܠܦܵܬܘܵܬܵܝܗ‌ܝ ܡܩܲܕ݇ܡ ܠܵܘܓ̰ܸܗ ܡܫܘܼܒܚܵܐ. ܐܝܼܢܵܐ ܐܲܢ݇ܬ ܝܵܐ ܒܬܼܘܼܠܬܵܐ ܟܸܐ ܓܲܫܩܵܬ ܗ݇ܘܵܐ ܓܵܘ ܦܵܐܬܸܗ ܘܟܸــــܐ ܚܵܙܝܵܬ ܗ݇ܘܵܐܠܸܗ (ܒܘܼܫ ܫܲܦܝܼܪܵܐ ܝ݇ܘܸܬ ܡܼܢ ܒܢܲܝ̈ـܢܵܫܵܐ...ܡܲܙܡܘܼܪܵܐ 2:45). ܛܥܸܢܵܟܼܝ ܥܲܠ ܕܪ̈ܲܥܢܵܢܵܟܼܝ ܕܸܟܼܝܸ̈ܐ، ܟܲܕ ܗ̇ܘ ܒܸܛܥܵܢܵܐ ܠܟܠܵܗ̇ ܒܪܝܼܬܵܐ ܒܡܸܠܬܸܗ ܚܲܝܠܵܢܬܵܐ. ܓܵܘ ܡܲܟܝܼܟܼܘܼܬܸܗ ܡܥܲܓ̰ܒܲܢܬܵܐ، ܡܬܘܼܓܒܸܪܵܟܼܝ ܐܲܝܟܼ ܝܵܠܵܕ݇ܐ ܙܥܘܼܪܵܐ، ܟܲܕ ܠܸܒܵܟܼܝ ܘܪܸܥܝܵܢܵܟܼܝ ܘܪܘܼܚܵܟܼܝ ܟܸܐ ܝܵܕܥܝܼ ܠܗ̇ܘ ܕܠܝܼܬܠܸܗ ܚܲܠܵܫܘܼܬܵܐ. ܐܝܼـܢܵــܐ ܡܲܟܝܼܟܼܘܼܬܸܗ ܡܘܼܙܝܸܕܠܵܐ ܠܡܲܟܝܼܟܼܘܼܬܵܟܼܝ. ܟܠܵܝܗ‌ܝ ܐܲܒܼܵܗܵܬܸ̈ـܐ ܩܲܕܝܼܫܸ̈ܐ ܡܫܲܗܘܘܼܬܵܐ ܗ݇ܘܵܘ ܕܓܲܫܩܝܼ ܗ݇ܘܵܘ ܠܫܪܵܪܵܐ ܐܲܠܵܗܵܝܵܐ: ܘܡܲܒܤܸܡܝܼ ܗ݇ܘ̤ܵܘ ܒܢܘܼܗܪܵܐ ܫܲܪܝܼܪܵܐ ܐܘܼܦ ܐܸܢ ܗܵܘܝܵܐ ܗ݇ܘܵܐ ܩܵܐ ܚܲܕ݇ ܪܦܵܦܵܐ. ܐܝܼܢܵܐ ܐܲܢ݇ܬ ܠܚܘܼܕܵܟܼܝ ܡܘܼܒܤܸܡܠܵܟܼܝ ܒܛܲܝܒܘܼܬܵܐ ܐܲܠܵܗܵܝܬܵܐ. ܘܡܲܪܓܵܢܝܼܬܵܐ ܕܓܵܘ ܕܐܵܗܵܐ ܗܲܡܙܲܡܬܵܐ [ܐܝܼܘܵܬ ܝܸܡܵܐ ܒܬܼܘܼܠܬܵܐ ܩܵܐ ܝܼܚܝܼܕܵܝܵܐ ܕܒܵܒܵܐ ܕܫܩܸܠܸܗ ܓܘܼܫܡܵܐ ܡܼــــــــܢ ܓܘܼܫܡܵܟܼܝ ܕܸܟܼܝܵܐ]. ܘܐܝܼܡܵܢ ܕܓܲܪܘܘܼܤܵܐ ܗ݇ܘܵܐ ܒܕܘܼܡܝܵܐ ܕܒܲܪܢܵܫܵܐ، ܟܸܐ ܚܵܙܝܵܬ‌ܝ ܗ݇ܘܵܐܠܸܗ ܡܓܲܪܘܘܼܤܸܐ ܓܵــــܘ ܛܲܝܒܘܼܬܵܐ ܘܩܵܘܡܬܵܐ. ܘܒܡܲܟܝܼܟܼܘܼܬܸܗ ܡܒܘܼܗܸܬܠܸܗ ܠܡܲܠܲܐܟܼܸ̈ܐ ܕܟܸܐ ܝܵܕܥܝܼ ܗ݇ܘ̤ܵܘܠܸܗ. ܐܝܼܡܵܢ ܕܛܘܼܥܹܐܠܵܟܼܝ ܒܵܬ݇ܪܸܗ ܒܡܸܐܙܲܠܬܘܿܟܼܘܿܢ ܠܐܘܿܪܸܫܠܸܡ ܘܡܘܼܫ̄ܟ̰ܸܚܠܵܟܼܝ ܒܵܬ݇ܪ ܬܠܵܬܵܐ ܝܵܘܡܵܢܸ̈ܐ ܓܵܘ ܗܲܝܟܠܵܐ ܕܒܵܒܸܗ ܝ݇ܬܝܼܒܼܵܐ ܒܹܝܠ ܡܲܠܦܵܢܸ̈ܐ ܡܒܵܩܘܼܪܵܝܗ‌ܝ ܘܡܒܲܗܘܼܬܵܝܗ‌ܝ. ܤܵܒܵܒ ܡܘܼܚܪܸܒܼܠܘܼܢ ܠܢܵܡܘܼܤܵܐ ܘܫܘܼܚܠܸܦܠܘܼܢ ܒܦܘܼܩܕܵܢܸ̈ܐ ܕܒܢܲܝ̈ـܢܵܫܵܐ، ܘܕܒܼܸܪܘܼܢ ܠܬܲܪܥܵܐ ܕܡܲܠܟܘܼܬܵܐ ܕܫܡܲܝܵܐ ܩܲܕ݇ܡ ܒܢܲܝ̈ـܢܵܫܵــــــــــܐ ܘܡܘܼܛܥܸܢܵܝܠܘܼܢ ܟܵܪ̈ܵܬܸܐ ܝܵܩܘܼܪܸ̈ܐ. ܘܐܝܼܡܵܢ ܕܡܘܼܫ̄ܟ̰ܸܚܠܵܟܼܝ ܐ݇ܡܸܪܵܟܼܝ ܐܸܠܸܗ (ܗܵܐ: ܐܵܢܵܐ ܘܒܵܒܘܼܟܼ ܒܥܸܩܘܼܝ ܒܸܛܥܵܝܵܐ ܝ݇ܘܵܚ ܗ݇ܘ̤ܵܘ ܐܸܠܘܼܟܼ) ܐ݇ܡܸܪܸܗ ܐܸܠܵܝܗ‌ܝ (ܠܹܐ ܝ݇ܬܘܼܢ ܒܸܕܥܵܝܵܐ ܕܓܵܘ ܒܲܝܬܵܐ ܕܒܵܒܝܼ ܘܵܓ̰ܝܼܒ ܝܼܠܵܐ ܐܸܠܝܼ ܕܗܵܘܸܢ؟). ܐ݇ܡܸܪܸܗ [ܠܹܐ ܝ݇ܬܘܼܢ ܒܸܕܥܵܝܵܐ].. ܝܵܐ ܪܲܒ ܡܵܢܝܼ ܡܵܨܸܐ ܠܫܪܵܝܵܐ ܚܵܬܡܵܐ ܕܤܸܦܪܸ̈ܐ؟!!. ܐܝܼܢܵܐ ܪܘܼܚܵܐ ܒܸܟܬܵܒܼܵܐ ܝ݇ܠܸܗ ܘܒܸܐ݇ܡܵܪܵܐ [ܕܐܲܢ݇ܬ ܟܸܐ ܚܵܡܝܵܬ ܗ݇ܘܵܐ ܠܟܠܸܗ ܐܲܢܸ̈ܐ ܓܵܘ ܠܸܒܵܟܼܝ] ܘܐܵܗܵܐ ܡܲܕܥܘܼܝܵܐ ܗ݇ܘܵܐ ܕܗܸܟ̰ ܠܝܼܬ ܗ݇ܘܵܐܠܵܟܼܝ ܕܘܼܒܵܪܘܼܬܵܐ [ܫܝܼܟܘܼܬܵܐ] ܒܘܼܬ ܫܠܝܼܚܘܼܬܸܗ ܘܦܘܼܪܩܵܢܸܗ. ܤܵܒܵܒ ܡܵܪܝܵܐ ܠܹܐ ܥܵܒܸܕ ܡܸܢܕܝܼ ܐܸܢ ܠܵܐ ܦܵܐܸܫ ܩܵܕ݇ܡܵܝܬܵܐ ܡܘܼܚܙܝܼܵܐ ܠܪ̈ܝܼܓܵܘܵܬܘܼܗ‌ܝ. ܕܵܐܟܼܝܼ ܕܐ݇ܡܸܪܸܗ (ܛܵܫܸܢ ܐܵܢܵـــــــــــــــܐ ܡܼܢ ܐܲܒܼܪܵܗܵܡ ܡܸܢܕܝܼ ܕܒܸܥܒܼܵܕܵܐ ܝ݇ܘܸܢ؟... ܒܪܝܼܬܵܐ 17:18). ܐܵܪܵܐ: [ܒܸܬ ܛܵܫܸܐ ܡܸܢܵܟܼܝ ܕܐܝܼܠܸܗ ܓܵܘ ܒܲܝܬܵܐ ܘܗܲܝܟܠܵܐ ܕܒܵܒܸܗ؟]. ܝܵܐ ܪܲܒ: [ܟܹܐ ܝܵܕܥܵܬ ܗ݇ܘܵܐ ܕܠܹܐ ܗ݇ܘܵܐ ܥܲܡ ܚܲܒܼܪ̈ܵܘܵܬܘܿܟܼܘܿܢ ܘܐ݇ܢܵܫܘܿܟܼܘܿܢ؟]. ܐܸܠܵܐ ܓܵܘ ܥܘܼܡܩܵܟܼܝ ܟܸܐ ܪܵܝܥܫܵܬ‌ܝ ܗ݇ܘܵܐ ܒܝܼܸܗ ܒܘܼܫ ܡܼܢ ܪܥܲܫܬܵܐ ܕܚܕܵܐ ܝܸܡܵܐ ܥܝܵܕܵܝܬܵܐ. ܗܘܸܐܠܸܗ ܙܲܒܛ ܥܲܠܵܟܼܝ: ܗ̇ܘ ܕܡܲܠܲܐܟܼܸ̈ܐ ܟܸܐ ܗܵܘܝܼ ܙܲܒܛ ܥܲܠܸܗ. ܘܡܲܨܝܲܬܬܸܗ ܥܲܠܵܟܼܝ: ܡܘܼܙܝܸܕܠܵܗ̇ ܠܡܲܨܝܲܬܬܵܟܼܝ ܐܝܼܡܵܢ ܕܡܘܼܟܸܦܠܵܟܼܝ ܠܪܸܫܵܟܼܝ ܘܐ݇ܡܸܪܵܟܼܝ (ܗܵــــــــܐ: ܚܸܕܲܡܬܸܗ ܕܡܵܪܝܵܐ: ܗܵܘܝܵܐ ܠܝܼ ܐܲܝــــــܟܼ ܗܸܡܸܙܡܵܢܘܼܟܼ..ܠܘܼܩܵܐ 38:1). ܡܲܨܝܲܬܬܸܗ ܥܲܠܵܟܼܝ ܟܸܐ ܡܲܙܝܸܕܵܐ ܗ݇ܘܵܐ ܠܐܝܼܩܵܪܵܟܼܝ، ܒܘܼܬ ܕܐܵܗܵܐ ܪܸܡܠܵܟܼܝ ܠܥܘܼܠܘܼܠ ܡܼܢ ܫܡܲܝܸ̈ܐ܀

܀ ܚܠܘܼܠܵܐ ܕܩܲܛܢܸܐ ܕܓܠܝܼܠܵܐ ܀

ܓܵܘ ܡܲܟܝܼܟܼܘܼܬܸܗ ܡܥܲܓ̰ܒܲܢܬܵܐ ܩܘܼܒܸܠܸܗ ܡܫܝܼܚܵܐ ܠܟ̰ܝܵܕܬܵܐ ܕܚܠܘܼܠܵܐ ܥܲܡ ܬܲܠܡܝܼܕ̈ܘܼܗ‌ܝ. ܓܵܘ ܡܸܬܼܓܲܫܡܵܢܘܼܬܸܗ ܓܵܪܲܓ ܒܵܪܸܟܼ ܗ݇ܘܵܐ ܠܟܠܵܝܗ‌ܝ ܐܘܼܪ̈ܚܵܬܸܐ ܕܸܟܼܝܸ̈ܐ ܕܚܲܝܘܼܬܵܐ. ܡܩܘܼܕܸܫܠܸܗ ܠܟܠ ܡܸܢܕܝܼ ܕܒܲܪܢܵܫܵܐ. ܡܩܘܼܕܸܫܠܸܗ ܠܡܸܐܟܼܘܼܠܬܵܐ ܘܠܫܬܵܝܬܵܐ، ܠܥܒܲܪܬܵܐ ܘܠܦܠܲܛܬܵܐ، ܠܟܸܟ̰ܚܵܐ ܘܡܲܢܝܵܚܬܵܐ، ܕܡܲܟܼܬܵܐ ܘܩܝܵܡܬܵܐ، ܘܓ̰ܘܲܓ̰ܬܵܐ ܘܚܕܲܪܬܵܐ ܕܥܲܠ ܐܲܪܥܵܐ. ܡܩܘܼܕܸܫܠܸܗ ܠܒܲܬܘܵܬܸ̈ـܐ ܒܫܪܵܝܬܸܗ ܓܵܘܵܝܗ‌ܝ، ܡܩܘܼܕܸܫܠܸܗ ܓܵܘ ܚܕܵܪܸܗ ܠܓ̰ܵܕܵܘܵܬܸ̈ـܐ ܕܡܕܝܼܢܵܬܸ̈ـܐ، ܠܚܲܩܠܵܢܸ̈ܐ، ܘܠܟܠ ܡܸܢܕܝܼ. ܒܘܼܤܸܡܠܸܗ ܠܤܸܡܝܸ̈ܐ ܘܓܲܪ̈ܒܼܵܢܸܐ ܘܤܲܩܲܬܸ̈ـܐ ܘܫܦܝܼ̈ܠܸܐ. ܫܩܸܠܸܗ ܠܡܲܪ̈ܥܸܐ ܘܥܝܼܩܘܼܝܵܬܸ̈ـܐ ܕܒܲܪܢܵܫܘܼܬܵܐ ܥܲܠ ܓܵܢܸܗ. ܡܩܘܼܕܸܫܠܸܗ ܠܚܠܘܼܠܵܐ ܕܩܲܛܢܸܐ ܕܓܠܝܼܠܵܐ ܒܗܕܝܼܪܘܼܬܸܗ، ܐܝܼܢܵܐ ܫܲܪܝܼܪܵܐܝܼܬ ܗ̇ܘ ܝܼܠܸܗ ܚܸܬܢܵܐ ܫܲܪܝܼܪܵܐ ܕܒܕܸܡܸܗ ܙܲܟܵܝܵܐ ܙܒܸܢܸܗ ܠܟܲܠܬܸܗ ܘܡܩܘܼܕܫܵܐܠܸܗ ܒܡܲܥܡܘܿܕܝܼܬܵܐ، ܘܫܩܝܼܠܵܐܠܸܗ ܩܵܐ ܓܵܢܸܗ ܟܲܠܬܵܐ ܫܲܪܝܼܪܬܵܐ، ܘܩܲܕ݇ܡ ܡܲܥܒܸܪܲܢ ܠܚܲܕܘܼܬܵܐ ܕܚܠܘܼܠܵܐ ܫܲܪܝܼܪܵܐ ܘܟ̰ܝܼܕܠܸܗ ܓܵܢܵܬܸ̈ـܐ ܡܓܘܼܒܝܸ̈ܐ ܒܬܼܘܼܠܵܬܸ̈ـܐ ܚܲܟܝܼܡܵܬܸ̈ـܐ ܕܦܠܸܛܠܘܼܢ ܠܐܘܼܪܚܵܐ ܕܚܸܬܢܵܐ. (ܒܥܸܕܵܢܵܐ ܕܗܕܝܼܪܘܼܬܸܗ ܓܵܘ ܚܠܘܼܠܵܐ ܒܨܸܪܸܗ ܚܲܡܪܵܐ ܗܘܼܠܵܢܵܝܵܐ، ܕܒܸܪܡܵܙܵܐ ܗ݇ܘܵܐ ܠܚܲܕܘܼܬܵܐ ܥܲܬܝܼܩܬܵܐ، ܘܓܵܘ ܒܨܲܪܬܵܐ ܕܚܲܡܪܵܐ ܒܨܸܪܵܗ̇ ܚܲܕܘܼܬܵܐ ܕܓܵܘ ܥܲܬܝܼܩܬܵܐ، ܘܒܛܸܠܵܗ̇ ܡܼܢ ܓܵܘ ܦܘܼܡܵܐ ܕܐ݇ܢܵܫܸ̈ܐ). ܐܝܼܢܵܐ ܡܲܪܝܲܡ ܒܬܼܘܼܠܬܵܐ ܘܩܲܕܝܼܫܬܵܐ ܛܠܸܒܠܵܗ̇ ܡܼܢ ܡܵܪܲܢ ܕܗܲܝܸܪܘܼܢ ܠܟ̰ܝܼܕܸ̈ܐ ܫܲܪܝܼܪܸ̈ܐ ܒܚܲܡܪܵܐ ܫܲܪܝܼܪܵܐ ܘܡܲܚܙܸܗ ܠܢܝܼܫܲܢܩܵܐ ܕܒܘܼܬ ܕܝܼܸܗ ܗܕܝܼܪܵܐ ܗ݇ܘܵܐ ܘܫܲܚܠܸܦ ܡܲܝܼ̈ـܵܐ ܠܚܲܡܪܵܐ [ܘܫܲܚܠܸܦ ܠܚܲܕܘܼܬܵܐ ܥܝܵܕܵܝܬܵܐ ܠܐܵܒܵܕܝܼܢܵܝܬܵܐ] ܘܓܵܠܸܗ ܠܫܪܵܪܵܐ ܕܚܸܬܢܵܐ ܫܲܪܝܼܪܵܐ ܝܵܗ݇ܒܼܵܢܵܐ ܕܚܲܕܘܼܬܵܐ.

ܘܟܲܕ ܥܒܸܕܠܸܗ ܐܵܗܵܐ، ܗܘܼܡܸܢܘܼܢ ܒܝܼܸܗ ܬܲܠܡܝܼܕܘܼ̈ܗ‌ܝ ܘܠܵܐ ܪܚܸܩܠܘܼܢ ܡܸܢܸܗ، ܘܗܘܸܐܠܘܼܢ ܒܘܼܫ ܩܘܼܪܒܵܐ ܥܲܠܸܗ ܗܲܠ ܨܠܲܒܼܬܵܐ. ܟܠܵܝ̈ܗ‌ܝ ܐܲܢܸ̈ܐ ܟܸܐ ܚܲܡܝܵܐ ܗ݇ܘܵܐܠܘܼܢ ܡܲܪܝܲܡ ܓܵܘ ܠܸܒܘܿܗ̇..ܘܗܲܕܟܼܵܐ ܥܒܸܪܵܗ̇ ܪܘܼܡܚܵܐ ܓܵܘ ܓܵܢܘܿܗ̇ ܕܵܐܟܼܝܼ ܕܡܢܘܼܒܸܐܠܸܗ ܫܸܡܥܘܼܢ ܟܵܗܢܵܐ ܘܤܵܒܼܵܐ ܐܝܼܡܵܢ ܕܛܥܸܢܸܗ ܠܡܵܪܲܢ ܥܲܠ ܕܪ̈ܲܥܢܵܢܘܼܗ‌ܝ܀

܀ ܪܵܒܵܐ ܒܲܟܼܬܵܬܸ̈ـܐ ܩܘܼܒܸܠܘܼܢ ܠܐܝܼܩܵܪܵܐ ܀

ܡܵܪܲܢ ܡܝܘܼܩܸܪܸܗ ܠܒܲܟܼܬܵܐ ܚܲܛܵܝܬܵܐ ܕܦܝܼܫܬܵܐ ܗ݇ܘܵܐ ܕܥܝܼܬܵܐ ܓܵܘ ܟܠܵܗ̇ ܡܕܝܼܢ݇ܬܵܐ. ܫܸܡܥܘܼܢ ܦܪܝܼܫܵܝܵܐ ܡܘܼܚܦܸܠܸܗ ܕܥܲܒܼܪܵܗ̇ ܓܵܘ ܒܲܝܬܸܗ، ܘܒܘܼܫ ܙܵܘܕܵܐ ܟܪܸܒܠܸܗ ܐܝܼܡܵܢ ܕܕܩܸܪܵܗ̇ ܒܐܲܩܠܵܬܸ̈ـܐ ܕܡܫܝܼܚܵܐ. ܐܝܼܢܵܐ ܡܵܪܲܢ ܓܵܘ ܪ̈ܲܚܡܘܼܗ‌ܝ ܐܲܝܟܼ ܦܵܪܘܼܩܵܐ ܕܚܲܛܵܝܸ̈ܐ ܠܵܐ ܝܘܼܗ݇ܒܼܸܠܸܗ ܩܵܬܘܿܗ̇ ܦܤܵܤܵܐ ܕܐܲܚܟ̰ܝܼ ܕܲܩܪܵܗ̇ ܒܐܲܩܠܵܬܸܗ، ܐܸܠܵܐ ܐܘܼܦ ܕܢܲܫܩܵܐܠܘܼܢ ܘܡܲܫܝܵܐܠܘܼܢ ܒܟܵܘܤܵܐ ܕܪܸܫܘܿܗ̇. ܘܡܘܼܫܬܸܩܠܸܗ ܠܐܵܢܝܼ̈ ܕܩܸܡܠܘܼܢ ܕܲܪܩܘܼܒܼܠܘܿܗ̇ ܘܐ݇ܡܸܪܸܗ ܐܸܠܵܝܗ‌ܝ (ܕܫܒܼܝܼܩܵܐ ܝ݇ܢܵܐ ܐܸܠܘܿܗ̇ ܚܛܝܼܵܬܘܿܗ̇ ܪܵܒܵܐ: ܤܵܒܵܒ ܕܡܘܼܚܸܒܠܵܗ̇ ܪܵܒܵܐ...ܠܘܼܩܵܐ 47:7). ܐܸܢ ܡܵܪܲܢ ܩܘܼܒܸܠܸܗ ܠܡܲܢܫܘܼܩܝܵܬܸ̈ـܐ ܕܚܲܛܵܝܬܵܐ ܥܲܠ ܐܲܩܠܵܬ̈ܘܼܗ‌ܝ.. [ܒܲܤ: ܡܘܼܕܝܼ ܒܘܼܬ ܡܲܢܫܘܼܩܝܵܬܸ̈ـܐ ܕܒܬܼܘܼܠܬܵܐ ܩܲܕܝܼܫܬܵܐ ܘܕܟܼܝܼܬܵܐ ܕܒܟܠ ܥܕܵܢܵܐ؟!!]. ܘܟܵܘܤܵܐ ܕܒܲܟܼܬܵܐ ܚܲܛܵܝܬܵܐ ܕܒܝܼܸܗ ܦܝܼܫܠܘܼܢ ܡܸܫܝܸ̈ܐ ܐܲܩܠܵܬܸ̈ـܐ ܕܦܵܪܘܼܩܲܢ ܘܦܝܼܫܠܸܗ ܚܫܝܼܒܼܵܐ ܐܵܗܵܐ ܥܒܼܵܕܵܐ ܩܵܬܘܿܗ̇ ܬܝܵܒܼܘܼܬܵܐ ܚܲܝܠܵܢܬܵܐ.. [ܒܲܤ: ܡܘܼܕܝܼ ܒܘܼܬ ܗ̇‌ܝ ܕܡܠܝܼܬܵܐ ܝ݇ܠܵܗ̇ ܫܵܦܵܩܲܬ ܘܕܟܸܐ ܛܲܥܢܵܐܠܸܗ ܐܲܝــܟܼ ܝܵܠܵܕ݇ܐ ܙܥܘܼܪܵܐ؟!!]. ܗ̇‌ܝ ܐܲܪܡܵܠܬܵܐ ܕܕܪܸܐܠܵܗ̇ ܬܪ̈ܵܝ ܙܘܼܙܸ̈ܐ: ܡܫ̄ܟ̰ܸܚܠܵܗ̇ ܐܝܼܩܵܪܵܐ ܟܸܤ ܡܵܪܲܢ ܒܘܼܬ ܦܸܠܚܵܢܘܿܗ̇..[ܒܲܤ: ܡܘܼܕܝܼ ܒܘܼܬ ܗ̇‌ܝ ܕܝܘܼܗ݇ܒܼܸܠܵܗ̇ ܓܵܢܘܿܗ̇ ܕܸܒܼܚܵܐ ܕܸܟܼܝܵܐ ܒܠܸܒܵܐ ܘܦܘܼܡܵܐ ܘܪܸ̈ܓܼܫܸܐ؟!!]. ܘܒܲܟܼܬܵܐ ܟܢܲܥܢܵܝܬܵܐ ܕܝܘܼܗ݇ܒܸܠܸܗ ܡܵܪܲܢ ܠܒܵܥܘܼܬܘܿܗ̇ ܡܒܵܬ݇ܪ ܕܗܘܸܐܠܵܗ̇ ܪܵܙܝܼ ܒܦܲܪ̈ܬܘܼܚܸܐ ܕܢܵܬܪܝܼ ܡܼܢ ܨܘܼܦܪܸ̈ܐ ܕܡܵܪ̈ܵܘܵܬܵܝܗ‌ܝ ܘܐܵܦܸܢ ܕܐܝܼܗ݇ܘܵܐ ܡܼܢ ܡܸܠܲܬܸ̈ـܐ ܕܦܝܼܫܵܐ ܗ݇ܘ̤ܵܘ ܡܘܼܤܠܝܼܸ̈ܐ ܒܥܲܝܢܵܐ ܕܝܗ݇ܘܼܕܵܝܸ̈ܐ، ܐܝܼܢܵܐ ܡܵܪܲܢ ܚܩܸܪܸܗ ܠܗܲܝܡܵܢܘܼܬܘܿܗ̇.. [ܒܲܤ: ܕܵܐܟܼܝܼ ܒܸܬ ܓܲܫܸܩ ܥܲܠ ܗܲܝܡܵܢܘܼܬܵܐ ܕܝܸܡܵܐ ܒܬܼܘܼܠܬܵܐ ܘܩܲܕܝܼܫܬܵܐ؟!!].

܀ ܒܬܼܘܼܠܬܵܐ ܓܵܘ ܗܲܝܟܠܵܐ ܀

ܬܘܼܡܸܡܠܵܗ̇ ܡܲܪܝܲܡ ܒܬܼܘܼܠܬܵܐ (40) ܝܵܘܡܵܢܸ̈ܐ ܡܼܢ ܒܵܬ݇ܪ ܡܗܵܨܲܠܬܘܿܗ̇ ܠܒܪܘܼܢܘܿܗ̇ ܡܸܠܬܼܵـܐ ܡܓܘܼܫܡܸܢܵܐ ܘܗ̇‌ܝ ܕܟܼܝܼܬܵܐ ܒܟܵܡܝܼܠܘܼܬܵܐ ܘܒܬܼܘܼܠܬܵܐ ܠܥܵܠܲܡ. ܫܩܸܠܵܗ̇ ܠܝܼܠܝܼܕܘܿܗ̇ ܘܪ݇ܚܸܫܠܵܗ̇ ܥܲܡ ܝܵܘܤܸܦ ܙܲܕܝܼܩܵܐ

ܠܗܲܝܟܠܵܐ ܕܡܵܪܝܵܐ.. [ܩܵܡܘܼܕܝܼ؟]. ܠܬܲܡܘܼܡܸܐ ܢܵܡܘܼܤܵܐ ܘܠܡܲܩܪܲܒܼܬܵܐ ܕܕܸܒܼܚܵܐ ܒܘܼܬ ܕܵܟܼܵܝܬܘܿܗ̇ ܕܵܐܟܼܝܼ ܕܦܩܸܕܠܸܗ ܡܘܼܫܸܐ. ܒܬܼܘܼܠܬܵܐ ܦܪܝܼܩܬܵܐ ܗ݇ܘܵܐ ܡܼܢ ܓܵܘ ܗܲܝܟܠܵܐ ܡܼܢ ܩܲܕ݇ܡ ܚܲܕ݇ܟܡܵܐ ܫܸܢܸ̈ܐ ܐܝܼܡܵܢ ܕܫܩܝܼܠܵܐ ܠܸܗ ܝܵܘܤܸܦ ܩܵܐ ܓܵܢܸܗ ܐܲܝܟܼ ܦܘܼܩܕܵܢܵܐ ܕܓܘܼܪܵܐ ܕܟܵܗ̈ܢܸܐ. ܐܝܼܢܵܐ ܐܝܼܡܵܢ ܕܕܸܪܵܗ̇ ܠܗܲܝܟܠܵܐ ܘܓܵܘ ܕܪ̈ܲܥܢܵܢܘܿܗ̇ ܝܼܠܝܼܕܘܿܗ̇ ܐܲܠܵܗܵܐ ܡܸܠܬܼܵـܐ.. ܟܠܵܝ̈ܗ‌ܝ ܕܓܵܘ ܗܲܝܟܠܵܐ ܩܲܕ݇ܡ ܝܵܕܥܝܼܠܵܗ̇ ܐܲܝܟܼ ܒܪܵܬܵܐ ܝܵܬܘܼܡܬܵܐ ܕܟܸܐ ܚܲܝܵܐ ܗ݇ܘܵܗ̇ ܓܵܘ ܗܲܝܟܠܵܐ ܘܐܵܕܝܼܵܐ ܐܝܼܬܠܵܗ̇ ܒܪܘܼܢܵܐ، ܘܗܕܝܼܪܬܵܐ ܝ݇ܠܵܗ̇ ܠܗܲܝܟܠܵܐ ܠܡܲܩܪܘܼܒܼܸܐ ܕܒܼܵܚܬܵܐ ܕܒܵܬ݇ܪ (40) ܝܵܘܡܵܢܸ̈ܐ. ܚܸܙܡܵܢܘܿܗ̇ ܘܝܵܕܥܵܢܘܿܗ̇ ܩܲܕ݇ܡ ܚܲܪܕܝܼܝܼ ܝ݇ܠܵܗ̇ ܐܲܝܟܼ ܥܵܕܲܬ ܕܚܲܕܘܼܬܵܐ. ܐܝܼܢܵܐ ܐܵܢܝܼ̈ ܕܐܝܼܬܠܘܼܢ ܚܙܵܝܬܵܐ ܪܘܼܚܵܢܵܝܬܵܐ ܕܥܹܐܠܘܼܢ ܠܐ݇ܪܵܙܵܐ ܐܲܠܵܗܵܝܵܐ: ܐܲܝܟܼ [ܫܸܡܥܘܼܢ ܤܵܒܼܵܐ، ܘܚܲܢܵܐ ܢܒܼܝܼܬܵܐ ܒܪܵܬܵܐ ܕܦܢܘܼܐܝܹܠ] ܗ̇‌ܝ ܕܐܲܪܡܸܠܬܵܐ ܗ݇ܘܵܐ (84) ܫܸܢܸ̈ܐ ܘܡܘܼܥܒܼܸܪܵܗ̇ ܚܲܝܘܿܗ̇ ܓܵܘ ܨܵܘܡܵܐ ܘܨܠܘܼܬܵܐ ܘܤܓܼܲܕܬܵܐ ܠܵܝܠܸܐ ܘܝܵܘܡܵܐ. ܐܲܢܸ̈ܐ ܚܙܸܐܠܘܼܢ ܠܤܲܒܼܪܵܐ ܕܦܝܼܫܵܐ ܛܥܝܼܢܵܐ ܥܲܠ ܕܪ̈ܲܥܢܵܢܸܐ ܕܝܸܡܸܗ. ܡܲܪܝܲܡ ܒܬܼܘܼܠܬܵܐ ܪ݇ܚܸܫܠܵܗ̇ ܠܗܲܝܟܠܵܐ ܠܡܲܩܪܘܼܒܼܸܐ ܙܵܘܓܵܐ ܕܝܵܘܢܸ̈ܐ ܝܵܢ ܙܲܥܝܸ̈ܐ ܕܝܵܘܢܸ̈ܐ، ܗ̇‌ܝ ܕܒܼܵܚܬܵܐ ܕܟܸܐ ܡܲܩܪܸܒܼܝܼܠܵܗ̇ ܡܸܤܟܸܢܸ̈ܐ ܘܤܢܝܼܩܸ̈ܐ ܕܛܵܝܸܦܵܐ. ܘܗܲܝܟܠܵܐ ܟܸܐ ܝܵܗ݇ܒܼܸܠ ܗ݇ܘܵܐ ܙܲܥܝܸ̈ܐ ܕܝܵܘܢܸ̈ܐ ܚܘܼܪܵܝ ܩܵܐ ܕܐܵܢܝܼ̈ ܕܠܝܼܬ ܗ݇ܘܵܐܠܘܼܢ ܠܸܦܪܵܥܝܵܐ. ܐܝܼܢܵܐ [ܡܲܪܝܲܡ ܛܥܝܼܢܬܵܐ ܗ݇ܘܵܐ ܠܦܸܐܪܵܐ ܕܐܲܠܵܗܵܐ ܕܒܼܵܚܬܵܐ ܫܲܪܝܼܪܬܵܐ ܥܲܠ ܕܪ̈ܲܥܢܵܢܘܿܗ̇]. ܗ̇ܘ ܕܒܵܬ݇ܪ ܚܲܕ݇ ܙܲܒܼܢܵܐ ܡܘܼܩܪܸܒܼܠܸܗ ܓܵܢܸܗ ܡܼܢ ܓܝܼܢ݇ܒܵܐ ܕܚܛܝܼܵܬܸ̈ـܐ ܕܟܠܸܗ ܥܵܠܡܵܐ. ܘܟܲܕ ܡܲܪܝܲܡ ܓܵܘ ܗܲܝܟܠܵܐ ܗ݇ܘܵܐ: ܡܩܘܼܪܒܸܢܸܗ ܫܸܡܥܘܼܢ ܤܵܒܼܵܐ ܒܡܗܲܕܝܵܢܘܼܬܵܐ ܕܪܘܼܚܵܐ ܕܩܘܼܕܫܵܐ، ܘܫܩܸܠܸܗ ܠܡܫܝܼܚܵܐ ܥܲܠ ܕܪ̈ܲܥܢܵܢܸܗ ܘܚܙܸܐܠܸܗ ܠܚܲܝܸ̈ܐ ܐܵܒܵܕܝܼܢܵܝܸ̈ܐ: ܘܛܠܸܒܠܸܗ ܡܵܘܬܵܐ ܕܦܲܓܼܪܵܐ ܡܼܢ ܡܵܪܝܵܐ ܩܲܕ ܐܵܙܸܠ ܒܫܠܵܡܵܐ. ܘܐܲܝܟܼ ܕܦܝܼܫܠܵܐ ܡܘܼܕܟܼܸܪܬܵܐ ܓܵܘ ܢܒܼܝܼܵܘܵܬܼܵـܐ ܒܘܼܬ ܡܫܝܼܚܵܐ ܕܒܸܬ ܦܵܬܸܚ ܠܥܲܝܢܵܬܸ̈ـܐ ܕܤܸܡܝܸ̈ܐ، ܫܸܡܥܘܼܢ ܤܵܒܼܵܐ ܗܘܸܐܠܸܗ ܒܘܼܟܼܪܵܐ ܕܤܸܡܝܸ̈ܐ ܕܥܲܝܢܵܬܘܼܗ‌ܝ ܦܝܼܫܠܘܼܢ ܦܬܝܼܚܸ̈ܐ. ܤܵܒܵܒ ܐܝܼܡܵܢ ܕܛܥܸܢܸܗ ܠܡܫܝܼܚܵܐ ܦܝܼܫܠܘܼܢ ܦܬܝܼܚܸ̈ܐ ܥܲܝܢܵܬܘܼܗ‌ܝ. ܘܡܸܢܕܝܼ ܩܵܕ݇ܡܵܝܵܐ ܕܚܙܸܐܠܸܗ ܐܝܼܗ݇ܘܵܐ ܨܠܝܼܒܼܵܐ، ܢܝܼܫܲܢܩܵܐ ܚܩܝܼܪܵܐ، ܗܲܕܟܼܵܐ [ܕܥܹܐܠܸܗ ܠܡܸܢܕܝܼ ܕܐܘܼܦܚܲܕ݇ ܠܵܐ ܕܥܹܐܠܸܗ]. ܘܥܲܠ ܐܝܼܕܵܬܸ̈ܗ ܛܥܸܢܸܗ ܠܓܘܼܪܵܐ ܕܟܵܗ̈ܢܸܐ ܘܕܸܒܼܚܵܐ ܓܵܘ ܚܕܵܐ ܥܕܵܢܵܐ. ܘܓܵܘܸܗ ܚܙܸܐܠܸܗ ܠܦܲܠܵܓܼ݇ܝܬܵܐ ܕܥܵܠܡܵܐ ܒܝܹܠ ܡܗܲܝܡܸܢܵܢܸ̈ܐ ܕܥܲܠ ܦܘܼܪܩܵܢܵܐ: ܘܤܲܪ̈ܒܼܵܢܸܐ ܕܦܘܼܪܩܵܢܵܐ. ܐܝܼܢܵܐ ܡܲܪܝܲܡ ܕܝܵܕܥܵܐ ܗ݇ܘܵܐ ܠܐ݇ܪ̈ܵܙܸܐ ܕܐܲܠܵܗܵܐ [ܟܠܸܐܠܵܗ̇ ܫܬܝܼܩܬܵܐ ܘܒܥܲܝܢܵܐ ܕܪܘܼܚܵܐ ܒܸܚܙܵܝܵܐ ܗ݇ܘܵܐ ܕܕܵܐܟܼܝܼ ܪܘܼܚܵܐ ܡܬܲܓܒܘܼܪܵܐ ܗ݇ܘܵܐ ܠܟܠ ܡܸܢܕܝܼ]. ܡܕܲܒܪܵܢܘܼܬܵܐ ܐܲܠܵܗܵܝܬܵܐ ܦܝܼܫܠܵܗ̇ ܓܠܝܼܬܵܐ ܝܵܘܡܵܐ ܒܵܬ݇ܪ ܝܵܘܡܵܐ ܘܬܲܓܒܸܪ ܕܐܲܠܵܗܵܐ ܦܝܵܫܵܐ ܝ݇ܠܵܐ ܡܘܼܚܙܝܼܬܵܐ ܩܵܐ ܕܸܟܼܝܸ̈ܐ ܘܤܲܦܪ̈ܵܢܸܐ ܠܝܵܗ݇ܒܼܵܠܬܵܐ ܕܠܸܒܵܐ. ܫܸܡܥܘܼܢ ܒܘܼܪܸܟܼܠܸܗ ܠܝܵܘܤܸܦ ܘܠܡܲܪܝܲܡ.. ܐܝܼܢܵܐ ܗܘܼܡܙܸܡܠܸܗ ܐܲܚܟ̰ܝܼ ܥܲܡ ܡܲܪܝܲܡ: ܘܐ݇ܡܸܪܸܗ ܐܸܠܘܿܗ̇ (ܒܓܵܢܵܐ ܕܝܼܵܟܼܝ ܒܸܬ ܥܲܒܼܪܵܐ ܪܘܼܡܚܵܐ). ܩܵܡܘܼܕܝܼ ܠܵܐ ܗܘܼܡܙܸܡܠܸܗ ܥܲܡ ܝܵܘܤܸܦ؟ ܤܵܒܵܒ ܝܵܘܤܸܦ ܠܝܼܬ ܗ݇ܘܵܐܠܸܗ ܫܵܘܬܵܦܘܼܬܵܐ ܓܵܘ ܡܵܘܠܵܕܵܐ ܒܬܼܘܼܠܵܝܵܐ ܕܡܵܪܲܢ، ܘܐܲܚܟ̰ܝܼ ܢܵܛܘܼܪܵܐ ܗ݇ܘܵܐ ܩܵܐ ܝܵܠܵܕ݇ܐ ܘܝܸܡܸܗ. ܐܸܢ ܨܠܲܒܼܬܵܐ ܘܡܵܘܬܵܐ ܘܩܝܵܡܬܵܐ ܕܡܫܝܼܚܵܐ ܚܒܼܝܼܫܵܐ ܗ݇ܘ̤ܵܘ ܓܵܘ ܡܸܬܼܓܲܫܡܵܢܘܼܬܸܗ ܡܼܢ ܡܲܪܝܲܡ ܒܬܼܘܼܠܬܵܐ: ܒܲܤ: ܡܲܪܝܲܡ ܡܫܘܼܘܬܸܦܠܵܗ̇ ܡܼܢ ܪ̈ܦܵܦܸܐ ܩܵܕ݇ܡܵܝܸܐ ܓܵܘ ܛܥܲܢܬܵܐ ܕܨܠܝܼܒܼܵܐ، ܗܲܠ ܗ̇ܘ ܝܵܘܡܵܐ ܕܟܠܹܐܠܵܗ̇ ܩܲܕ݇ܡ ܨܠܝܼܒܼܵܐ: ܘܪܘܼܡܚܵܐ ܥܒܼܸܪܵܗ̇ ܓܵܘ ܠܸܒܘܿܗ̇، ܒܚܲܕ݇ [ܐ݇ܪܵܙܵܐ ܥܲܡܘܼܩܵܐ ܕܥܘܼܠܘܼܠ ܝܼܠܸܗ ܡܼܢ ܦܲܪܡܵܝܬܵܐ]. ܘܡܸܢܕܝܼ ܕܥܲܤܩܵܐ ܝ݇ܠܸܗ ܠܪܸܥܝܵܢܵܐ: ܪܘܼܡܚܵܐ ܡܚܹܐܠܵܗ̇ ܠܠܸܒܘܿܗ̇ ܡܼܢ ܝܵܘܡܵܐ ܕܗܹܪܘܿܕܸܤ ܒܥܹܐܠܸܗ ܠܩܛܵܐܠܸܗ ܐܝܼܢܵܐ ܒܘܼܫ ܙܵܘܕܵܐ ܥܘܼܓ̰ܸܙܠܵܗ̇ ܒܡܚܵܝܬܵܐ ܕܪܘܼܡܚܵܐ ܐܝܼܡܵܢ ܕܚܙܸܐܠܵܗ̇ (ܐܲܝܟܼ ܦܸܐܪܵܐ ܠܦܪܵܡܬܵܐ ܕܝܼܠܸܐ ܠܘܼܒܠܵܐ: ܘܐܲܝܟܼ ܘܲܥܢܵܐ ܩܲܕ݇ܡ ܓܲܪܥܵܢܘܿܗ̇ ܕܝܼܠܵܐ ܫܬܝܼܩܬܵܐ: ܘܠܵܐ ܦܬܸܚܠܸܗ ܦܘܼܡܸܗ...ܐܸܫܲܥܝܵܐ 7:53). ܗܲܕܟܼܵܐ: ܓܵܘ ܟܠܵܝܗ‌ܝ ܐܲܢܸ̈ܐ ܩܵܘܵܡܝܵܬܸ̈ـܐ ܡܲܪܝܲܡ ܒܬܼܘܼܠܬܵܐ ܠܵܐ ܦܬܸܚܠܵܗ̇ ܠܦܘܼܡܘܿܗ̇: ܘܚܘܼܡܹܐܠܵܗ̇ ܠܫܸܬܩܘܿܗ̇ ܘܗ̇‌ܝ ܡܬܲܚܡܘܼܢܸܐ ܐܲܚܟ̰ܝܼ ܒܠܸܒܘܿܗ̇، ܘܡܵܢܝܼ ܒܸܬ ܦܵܪܸܡ ܠܐ݇ܪ̈ܵܙܘܿܗ̇ ܐܘܼܦ ܐܸܢ ܗܲܡܙܸܡܵܗ̇؟!!!. ܘܥܲܡ ܟܠܵܝ̈ܗ‌ܝ ܐܲܢܸ̈ܐ ܦܝܼܫܠܵܗ̇ ܡܝܘܼܩܸܪܬܵܐ ܘܪܸܡܠܵܗ̇ ܠܥܸܠ ܡܼܢ ܫܡܲܝܸ̈ܐ، ܘܡܵܢܝܼ ܡܵܨܸܐ ܕܗܲܡܙܸܡ ܒܘܼܬ ܚܸܩܪܘܿܗ̇!!. ܤܵܒܵܒ (ܠܒܼܝܼܫܬܵܐ ܫܸܡܫܵܐ ܘܤܲܗܪܵܐ ܬܚܘܼܬ ܐܲܩܠܵܬܘܿܗ̇..ܓܸܠܝܵܢܵܐ 1:12)܀܀܀

ܒܝܕ ܡܫܡܫܢܐ: ܝܘܤܦ ܫܡ: ܕܢܝܼܐܝܠ ܢܘܼܪܘܼ

مشاركاتكم (0)