غبطة البطريرك يونان يحتفل بقداس عيد العنصرة      وفد من النجف يزور البطريركية الكلدانية      مراد من مدينة زحلة: متمسكون بالطرح الفيدرالي      توضيح من البطريرك ساكو حول “الصرخة المدويّة” المنسوبة الى الكاردينال روبرت سارا حول القداس      هجوم جديد على كنيسة في إسطنبول وسط عداء متزايد تجاه المسيحيين      البابا فرنسيس يوجه رسالة إلى مركز أستالي اليسوعي لخدمة اللاجئين لمناسبة تقديمه تقريره السنوي      الاحتفال بالقداس الالهي بمناسبة عيد صعود الرب يسوع الى السماء في كنيسة ام النور / عنكاوا      أنشطة روحية في مواجهة العزلة (نبذة عن نشاطات أبرشية مار أدي الكلدانية في كندا)      رئيس الجمهورية الارمني أرمين سركيسيان يزور نصب ساردارابات التذكاري بيوم ذكرى تأسيس الجمهورية ال1 ب1918      البرنامج الإذاعي للاتحاد الآشوري العالمي يلتقي الدكتور رون سوسيك مؤلف الكتاب المسمى "النبوءة الآشورية"      صحة كوردستان تعتزم إعلان إجراءات جديدة لمكافحة كورونا وتكشف مظاهر خطورة المرحلة الحالية      رسالة قداسة البابا فرنسيس بمناسبة اليوم الإرسالي العالمي ٢٠٢٠      بحزن وإحباط.. ميسي يتحدث عن "كرة قدم جديدة" بعد كورونا      حكومة إقليم كوردستان تعلن تفاصيل الحظر الشامل للتجوال      كيف يمكن لواشنطن أن تتجنب حربا مباشرة مع إيران ووكلائها في العراق؟ مجلة أميركية تجيب      ما فرقه الوباء تجمعه الدنمارك بـ"صك عبور العشاق"      وسط الاحتجاجات الحاشدة... قرار صارم من ترامب بشأن "أنتيفا"      بيان صادر عن مجلس رؤساء الكنائس في الأردن حول التدابير الإحترازية والوقائية داخل الكنائس      عدّاد كورونا يواصل الارتفاع والإصابات تكسر حاجزاً جديداً في كوردستان      تظاهرات تجتاح مدناً أمريكية عدة وسط أعمال عنف
| مشاهدات : 475 | مشاركات: 0 | 2020-05-07 09:25:35 |

܀ܫܡܝܐ ܡܕܝܼܢ݇ܬـܐ ܝ݇ܠܐ ܕܒܪܢܫܐ܀

الشماس يوسف نورو

 

                                                            ܒܝܕ ܡܫܡܫܢܐ: ܝܘܤܦ ܢܘܪܘ

 

ܡܵܢܝܼ ܡܵܨܸܐ ܕܥܵܒܸܪ ܠܫܡܲܝܵܐ، ܘܡܵܢܝܼ ܝ݇ܠܸܗ ܕܠܹܐ ܥܵܒܸܪ؟.                                    ܚܲܕ݇ ܒܘܼܩܵܪܵܐ ܝ݇ܠܸܗ ܪܵܒܵܐ ܐܵܢܸܢܩܵܝܵܐ ܘܡܲܙܕܸܥܝܵܢܵܐ. [ܐܵܢܸܢܩܵܝܵܐ] ܤܵܒܵܒ ܓܵܘܸܗ ܚܒܼܝܼܫܵܐ ܝ݇ܢܵܐ ܟܠܵܝ̈ܗ‌ܝ ܒܢܲܝ̈ـܢܵܫܵܐ. [ܘܡܲܙܕܸܥܝܵܢܵܐ] ܤܵܒܵܒ ܐ݇ܤܝܼܪܵܐ ܝ݇ܠܸܗ ܒܚܲܝܵܝܗ‌ܝ ܐܵܒܵܕܝܼܢܵܝܸ̈ܐ.

♰ ܫܡܲܝܵܐ ܒܲܝܬܵܐ ܝ݇ܠܵܐ ܕܒܲܪܢܵܫܵܐ...                                             ܐܸܢ ܐܲܠܵܗܵܐ ܒܸܢܝܵܐ ܗ݇ܘܵܐ ܩܵܐ ܓܵܢܸܗ ܒܲܝܬܵܐ ܥܲܠ ܐܲܪܥܵܐ، ܕܐܝܼܗ݇ܘܵܐ ܗܲܝܟܠܵܐ ܕܓܵܘ ܥܲܬܝܼܩܬܵܐ ܘܥܹܕܬܵܐ ܕܓܵܘ ܚܲܕܬܵܐ، ܐܸܠܵܐ ܓܵܘ ܫܡܲܝܵܐ ܡܗܘܼܕܸܪܸܐ ܩܵܬܲܢ ܒܲܝܬܵܐ. ܕܵܐܟܼܝܼ ܕܐ݇ܡܸܪܸܗ (ܒܸܐ݇ܙܵܠܵܐ ܝ݇ܘܸܢ ܕܗܲܕܪܸܢܘܿܟܼܘܿܢ ܕܘܼܟܵܐ... ܘܐܲܝܟܵܐ ܕܐܵܢܵܐ ܐܝܼܘܸܢ: ܐܘܼܦ ܐܲܚܬܘܼܢ ܗܵܘܝܼܬܘܼܢ...ܝܘܼܚܲܢܵܢ 2:14-3).                        ܡܲܥܓ̰ܸܒܲܢܬܵܐ ܝ݇ܠܵܐ: ܕܗ̇‌ܝ ܕܘܼܟܵܐ ܕܓܵܘܘܿܗ̇ ܐܲܠܵܗܵܐ ܝ݇ܠܸܗ، ܐܘܼܦ ܐܲܚܢܵܢ ܒܸܬ ܗܵܘܵܚ ܬܵܡܵܐ.              ܘܐܝܼܡܵܢ ܕܚܵܬܸܡ ܥܵܠܡܵܐ ܘܒܵܛܸܠ [ܒܸܬ ܗܵܘܸܐ ܐܲܠܵܗܵܐ ܕܟܠ، ܓܵܘ ܟܠ] ܘܠܹܐ ܦܵܐܸܫ ܫܒܼܘܼܩ ܡܼܢ ܐܲܬܪܵܐ ܕܫܡܲܝܵܐ ܘܥܹܕܬܵܐ ܕܒܘܼܟܼـܪܸ̈ܐ ܓܵـــــܘ ܫܡܲܝܵܐ!!. ܘܓܵܘ ܐ݇ܪܵܙܵܐ ܩܲܕܝܼܫܵܐ: ܡܼܢ ܒܵܬ݇ܪ ܕܟܹــــܐ ܐܵܡܸܪ ܟܵܗܢܵــــܐ [ܡܲܪܡܘܼܢ ܥܲܝܢܘܿܟܼܘܿܢ] ܟܹܐ ܡܓ̰ܲܘܸܒ ܛܵܝܸܦܵܐ [ܠܟܸܤܠܘܼܟܼ ܐܲܠܵܗܵܐ].

♰ ܐܲܠܵܗܵܐ ܠܹܐ ܡܲܟܠܸܐ ܠܒܲܪܢܵܫܵܐ ܡܼܢ ܠܸܥܒܼܵܪܵܐ ܠܫܡܲܝܵܐ...                           ܒܘܼܬ ܚܵܬܸܪ ܕܡܲܕܸܪ ܠܒܲܪܢܵܫܵܐ ܠܫܵܘܦܸܗ ܩܵܕ݇ܡܵܝܵܐ ܓܵܘ ܫܡܲܝܵܐ: ܕܒܸܚܠܸܗ ܠܒܪܘܼܢܸܗ ܝܼܚܝܼܕܵܝܵܐ ܒܘܼܬ ܚܵܬܸܪܲܢ. ܘܐܝܼܡܵܢ ܕܫܩܸܠܸܗ ܠܓܘܼܫܡܵܐ ܐ݇ܢܵܫܵܝܵܐ، ܡܘܼܚܸܒܠܸܗ ܠܚܲܛܵܝܸ̈ܐ ܘܐ݇ܬܸܐܠܸܐ ܩܲܕ ܦܵܪܸܩܠܘܼܢ.                ܡܵܪܲܢ ܝܼܫܘܿܥ ܡܫܝܼܚܵܐ: ܩܲܕ݇ܡ ܝܵܗ݇ܒܼܸܠܲܢ ܛܘܼܦ̮ܤܵܐ ܡܥܲܓ̰ܒܵܢܵܐ ܒܘܼܬ ܚܘܼܒܸܗ ܩܵܐ ܚܲܛܵܝܸ̈ܐ. ܛܘܼܦ̮ܤܵܐ ܕܗ̇ܘ ܒܪܘܼܢܵܐ ܐܵܤܘܼܛܵܐ ܕܡܘܼܕܟܼܸܪܸܗ ܠܘܼܩܵܐ ܐܸܘܲܢܓܵܠܸܤܛܵܐ ܓܵܘ ܩܸܦܵܠܹܐܘܼܢ(15). ܘܗܲܕܟܼܵܐ ܐܘܼܦ ܦܵܛܪܘܼܤ ܫܠܝܼܚܵܐ ܡܲܕܥܘܼܝܵܐ ܝ݇ܠܸܗ ܒܘܼܬ ܚܘܼܒܵܐ ܕܐܲܠܵܗܵܐ ܩܵܐ ܚܲܛܵܝܸ̈ܐ (ܟܲܕ ܠܸܐ ܒܲܤܡܵܐܠܸܗ ܕܐ݇ܢܵܫܵܐ ܬܵܠܸܩ: ܐܸܠܵܐ ܕܟܠ ܐ݇ܢܵܫܵܐ ܠܬܝܵܒܼܘܼܬܵܐ ܐܵܬܸܐ...2ܦܵܛܪܘܼܤ 9:3).

 

 

ܘܠܵــــܐ ܡܥܲܓ̰ܒܵܚ ܕܐܲܠܵܗܵـــܐ (ܟܹـــــــــــــــܐ ܒܲܤܡܵܐܠܸܗ ܕܟܠܵܝ̈ܗ‌ܝ ܒܢܲܝ̈ـܢܵܫܵܐ ܕܚܲܝܝܼ ܘܐܵܬܝܼ ܠܕܵܝܥܬܵܐ ܕܤܲܪܲܤܬܘܼܬܵـــــــــܐ...1ܛܝܼܡܵܬܸܐܘܼܤ 4:2). ܐܲܠܵܗܵܐ: ܪܵܒܵܐ ܝܘܼܗ݇ܒܼܸܠܸܗ ܩܵܐ ܚܵܬܸܪ ܕܦܘܼܪܩܵܢܵܐ ܕܒܢܲܝ̈ـܢܵܫܵܐ. ܘܒܘܼܬ ܚܵܬܸܪ ܕܡܲܕܸܪܸܗ ܠܫܡܲܝܵܐ ܒܲܝܬܸܗ ܩܵܕ݇ܡܵܝܵܐ.

♰ ܡܘܼܕܝܼ ܝ݇ܢܵܐ ܥܲܠܠܵܬܵـܐ ܕܟܸܐ ܡܲܟܠܝܼ ܠܒܲܪܢܵܫܵܐ ܡܼܢ ܠܥܒܼܵܪܵܐ ܠܫܡܲܝܵܐ...              ܚܛܝܼܬܵـــܐ: ܚܛܝܼܬܵܐ ܓܵܘ ܦܲܪܡܵܝܬܘܿܗ̇ ܓܵܘܵܢܵܐܝܼܬ: ܐܝܼܠܵܐ ܡܲܤܠܵܝܬܵܐ ܠܐܲܠܵܗܵܐ ܩܲܕܝܼܫܵܐ، ܗ̇ܘ ܕܒܟܝܵܢܸܗ ܠܹܐ ܒܲܤܡܵܐܠܸܗ ܒܒܝܼܫܬܵܐ. ܚܛܝܼܬܵܐ: ܡܲܤܠܵܝܬܵܐ ܝ݇ܠܵܐ ܠܚܘܼܒܸܗ ܕܐܲܠܵܗܵܐ: ܟܸܐ ܒܲܤܡܵܐܠܸܗ ܒܝܼܵܢ ܘܐܲܚܢܵܢ ܟܸܐ ܥܲܪܩܵܚ ܡܸܢܸܗ. ܘܠܹܐ ܟܵܐܠܸܗ ܡܼܢ ܠܟ̰ܝܵܕܲܢ ܠܚܘܼܒܸܗ، ܘܐܲܚܢܵܢ ܟܸܐ ܡܲܕܸܪܵܚ ܒܵܐܠܲܢ ܡܸܢܸܗ. ܚܘܼܒܸܗ ܠܝܼܬܠܸܗ ܦܘܼܪܩܵܢܵܐ. ܘܟܠ ܕܥܵܒܸܕ ܚܛܝܼܬܵܐ: ܒܸܥܒܼܵܪܵܐ ܝ݇ܠܸܗ ܡܼܢ ܢܵܡܘܼܤܵܐ (1ܝܘܼܚܲܢܵܢ 4:3). ܒܸܦܠܵܛܵܐ ܝ݇ܠܸܗ ܘܒܸܪܚܵܩܵܐ ܝ݇ܠܸܗ ܡܼܢ ܩܵܘܠܵܐ ܕܐܲܠܵܗܵܐ. ܘܡܵܪܲܢ ܩܲܕ݇ܡ ܡܵܠܸܦܠܲܢ ܘܐ݇ܡܸܪܸܗ (ܐܸܢ ܡܲܚܸܒܝܼܬܘܼܢ ܠܝܼ ܦܘܼܩܕܵܢܝܼ  ܢܛܘܼܪܘܼܢ). ܘܐܸܢ ܠܵܐ ܢܲܛܪܵܚ ܠܦܘܼܩܕܵܢܘܼܗ‌ܝ، ܠܹܐ ܝ݇ܘܵܚ ܡܲܚܘܼܒܘܼܗ‌ܝ ܘܒܸܗܘܵܝܵܐ ܝ݇ܘܵܚ ܒܥܸܠܕܒܼܵܒܼܘܼܗ‌ܝ. ܘܐܵܪܵܐ: ܟܸܐ ܗܵܘܝܵܐ ܕܚܲܛܵܝܸ̈ܐ ܚܲܝܝܼ ܥܲܡ ܐܲܠܵܗܵܐ ܓܵܘ ܫܡܲܝܵܐ؟.                                  ܘܚܛܝܼܬܵܐ: ܚܸܫܟܵܐ ܝ݇ܠܵܐ. ܟܸܐ ܡܫܲܘܬܸܦ ܚܸܫܟܵܐ ܥܲܡ ܒܲܗܪܵܐ؟.                                 ܐܲܠܵܗܵܐ ܒܲܗܪܵܐ ܝ݇ܠܸܗ ܘܟܸܐ ܥܵܡܸܪ ܓܵܘ ܒܲܗܪܵܐ: ܐܲܝܢܝܼ ܕܐ݇ܢܵܫܵܐ ܠܹܐ ܡܵܨܸܐ ܕܩܲܪܒܸܢ ܐܸܠܸܗ (1ܛܝܼܡ 16:6). ܠܝܼܬ ܫܲܘܬܵܦܘܼܬܵܐ ܒܹܝܠ ܕܸܟܼܝܸ̈ـܐ ܘܚܲܛܵܝܸ̈ܐ.. ܤܵܒܵܒ ܚܲܛܵܝܸ̈ܐ ܒܢܘܼܢܸ̈ܐ ܕܤܵܛܵܢܵܐ ܝ݇ܢܵܐ (ܐܲܚܬܘܼܢ ܡܼܢ ܒܵܒܵܐ ܐܵܟܼܸܠܩܲܪܨܵܐ ܝ݇ܬܘܼܢ: ܘܫܲܗܘܲܬܝܵܬܸ̈ـܐ ܕܒܵܒܘܿܟܼܘܿܢ ܪܸܙܵܝܘܿܟܼܘܿܢ ܝܼܠܸܐ ܠܸܥܒܼܵܕܵܐ...ܝܘܼܚܲܢܵܢ 44:8).          ܚܛܝܼܬܵܐ: ܟܹܐ ܦܲܠܫܵܐ ܕܲܪܩܘܼܒܼܠ ܨܸܒܼܝܵܢܵܐ ܕܐܲܠܵܗܵܐ. ܘܐܲܚܢܵܢ ܕܦܝܼܫܵܐ ܝ݇ܘܵܚ ܒܸܪ̈ܝܸܐ ܡܼܢ ܥܘܼܦܪܵܐ ܟܹــــــــــܐ ܡܲܪܝܸܟܼ ܒܹܐܢܸܗ ܥܲܠܲـــــــــܢ. ܚܛܝܼܬܵܐ: ܟܸܐ ܡܲܟܠܝܼܵܐܠܲܢ ܡܼܢ ܠܸܥܒܼܵܪܵܐ ܠܫܡܲܝܵܐ. ܡܵܪܲܢ ܓܵܘ ܗܸܡܸܙܡܵܢܘܼܗ‌ܝ ܩܲܕ݇ܡ ܡܵܠܸܦܠܲܢ ܒܘܼܬ ܬܲܪܥܵܐ ܥܝܼܩܵܐ ܕܟܹܐ ܡܲܡܛܝܼܠܲܢ ܠܫܡܲܝܵܐ.                              ܡܩܘܼܪܒܸܢܸܗ ܚܲܕ݇ ܠܟܸܤ ܡܵܪܲܢ ܘܐ݇ܡܸܪܸܗ ܐܸܠܸܗ (ܡܵܪܲܢ: ܚܲܕ݇ܟ̰ܵܐ ܝ݇ܢܵܐ ܐܵܢܝܼ̈ ܕܦܲܪܩܝܼ؟.)ܐܵܡܸܪ ܐܸܠܸܗ (ܚܠܘܼܨܘܼــܢ ܠܸܥܒܼܵܪܵܐ ܒܬܲܪܥܵܐ ܥܝܼܩܵܐ). [ܬܲܪܥܵܐ ܥܝܼܩܵܐ] ܒܸܪܡܵܙܵܐ ܝ݇ܠܸܗ ܠܐܘܼܪܚܵܐ ܕܚܲܝܸ̈ܐ: ܒܘܼܬ ܕܐܵܗܵܐ ܒܸܬ ܚܵܙܵܚ ܕܪܵܒܵܐ ܒܸܪ݇ܚܵܫܵܐ ܝ݇ܢܵܐ ܒܬܲܪܥܵܐ ܪܘܝܼܚܵܐ ܠܵܒܠܵܢܵܐ ܠܬܠܵܩܵܐ. ܘܐܲܝܟܼ ܕܐܸܢ ܟܹܐ ܐܲܡܪܝܼ [ܩܵܡܘܼܕܝܼ ܡܲܥܝܸܩܵܚ ܓܵܢܵܬܲܢ ܒܨܵܘܡܸ̈ܐ ܝܵܪ̈ܝܼܟܼܸܐ، ܘܒܸܨܠܵܘܵܬܸ̈ـܐ ܘܒܩܪܵܝܬܵܐ ܕܟܬܵܒܼܵܐ ܩܲܕܝܼܫܵܐ؟ ܩܵܡܘܼܕܝܼ ܠܵܐ ܚܵܕܪܵܚ ܐܲܝܟܼ ܒܢܘܼܢܸ̈ܐ ܕܥܵܠܡܵܐ؟ ܩܵܡܘܼܕܝܼ ܡܲܥܝܘܼܩܵܐ ܝ݇ܬܘܼܢ ܥܲܠܲܢ ܒܟܠ ܡܸܢܕܝܼ؟]. ܐܲܝܟܼ ܕܐܲܢܸ̈ܐ ܪܸ̈ܥܝܵܢܸܐ ܟܹܐ ܙܲܪܥܸܗ ܤܵܛܵܢܵܐ ܓܵܘ ܒܲܪܢܵܫܵܐ.

 

 

 

ܒܥܸܠܕܒܼܵܒܼܵܐ ܕܐܲܠܵܗܵܐ [ܤܵܛܵܢܵܐ] ܐܝܼܬܠܸܗ ܪܵܒܵܐ ܐܘܼܪ̈ܚܵܬܸܐ ܠܥܲܠܕܘܼܝܸܐ ܒܲܪܢܵܫܵܐ. ܟܠܵܝܗ‌ܝ ܦܲܢܕܘܼܗ‌ܝ ܡܟܘܼܤܝܵܐ ܝ݇ܢܵܐ ܩܲܕ ܡܲܕܥܸܗ ܠܒܲܪܢܵܫܵܐ ܕܠܝܼܬ ܡܸܢܕܝܼ ܫܸܡܸܗ ܤܵܛܵܢܵܐ. ܘܟܸܐ ܐܵܡܸܪ ܩܵܐ ܒܢܲܝ̈ـܢܵܫܵܐ (ܠܵܐ ܗܲܡܸܢܝܼܬܘܼܢ ܕܠܹܐ ܥܲܒܼܪܝܼܬܘܼܢ ܠܫܡܲܝܵܐ، ܤܵܒܵܒ ܐܲܠܵܗܵܐ ܡܪܲܚܡܵܢܵܐ ܝ݇ܠܸܗ: ܘܪ̈ܲܚܡܘܼܗ‌ܝ ܟܸܐ ܡܵܛܝܼ ܠܟܠܚܲܕ݇ ܠܥܒܼܵܪܵܐ ܠܫܡܲܝܵܐ. ܟܸܐ ܚܲܫܒܼܝܼܬܘܼܢ ܕܸܡܵܐ ܕܬܘܼܦܸܚܠܸܗ ܝܼܫܘܿܥ ܒܘܼܬ ܚܵܬܸܪܘܿܟܼܘܿܢ ܒܸܬ ܐܵܙܸܠ ܚܘܼܪܵܝ...ܠܵܐ.... ܒܸــــــــــــــܬ ܥܲܒܼܪܝܼܬܘܼܢ ܠܫܡܲܝܵܐ). ܐܲܚܢܵܢ ܟܸܐ ܗܲܡܸܢܵܚ: ܕܐܲܠܵܗܵܐ ܡܪܲܚܡܵܢܵܐ ܝ݇ܠܸܗ، ܐܝܼܢܵܐ ܗܲܪ ܒܗ̇‌ܝ ܥܕܵܢܵܐ ܟܹܐܢܵܐ ܝ݇ܠܸܗ.  ܘܕܵܐܟܼܝܼ ܕܟܵܡܝܼܠ ܝܼܠܸܗ ܓܵܘ ܪ̈ܲܚܡܘܼܗ‌ܝ، ܗܲܕܟܼܵܐ ܐܘܼܦ ܓܵܘ ܟܹܐܢܘܼܬܸܗ. ܟܸܐ ܗܲܡܸܢܵܚ ܕܥܲܠ ܐܲܪܥܵܐ ܐܝܼܘܵܚ ܓܵܘ ܙܲܒܼܢܵܐ ܕܪ̈ܲܚܡܸܐ، ܘܬܲܪܥܵܐ ܕܬܝܵܒܼܘܼܬܵܐ ܒܕܵܝܸܡܘܼܬܵܐ ܦܬܝܼܚܵܐ ܝ݇ܠܸܗ ܟܡܵܐ ܕܚܲܝܵܐ ܝ݇ܘܵܚ ܓܵܘ ܦܲܓܼܪܵܐ. ܐܝܼܢܵܐ ܓܵܘ ܫܡܲܝܵܐ ܡܼܢ ܒܵܬ݇ܪ ܕܡܲܝܬܵܚ، ܟܸܐ ܡܫܵܪܸܐ ܙܲܒܼܢܵܐ ܕܟܹܐܢܘܼܬܵܐ. ܘܓܵܘ ܫܡܲܝܵܐ ܠܝܼܬ ܪ̈ܲܚܡܸܐ ܩܵܐ ܕܗ̇ܘ ܕܠܵܐ ܥܒܼܸܕܠܸܗ ܪ̈ܲܚܡܸܐ ܓܵܘ ܚܲܝܘܼܬܸܗ.

♰ ܡܵܢܝܼ ܝ݇ܢܵܐ ܐܵܢܝܼ̈ ܕܠܹܐ ܥܲܒܼܪܝܼ ܠܫܡܲܝܵܐ...                                         ܦܵܘܠܘܼܤ ܫܠܝܼܚܵܐ ܡܲܕܥܘܼܝܵܢ ܝܼܠܸܗ ܓܵܘ ܐܸܓܲܪܬܸܗ ܩܵܕ݇ܡܵܝܬܵܐ ܩܵܐ ܩܘܿܪ̈ܲܢܬܵܝܸܐ ܘܒܸܐ݇ܡܵܪܵܐ ܝ݇ܠܸܗ (ܝܵܢ ܠܹܐ ܝ݇ܬܘܼܢ ܒܸܕܥܵܝܵܐ: ܕܥܵܘܵܠܸ̈ܐ ܡܲܠܟܘܼܬܸܗ ܕܐܲܠܵܗܵܐ ܠܹܐ ܝܵܪܬܝܼ: ܠܵܐ ܚܵܛܝܼܬܘܼܢ. ܠܹܐ ܙܲܢܵܝܸ̈ܐ، ܘܠܵܐ ܤܲܓܼܕܵܢܸ̈ܐ ܕܨܵܢܲܡܸ̈ܐ، ܘܠܵܐ ܩܲܗ̈ܒܸܐ، ܘܠܵܐ ܡܘܼܚܪܸ̈ܒܼܸܐ، ܘܠܵܐ ܕܲܡܟܼܵܢܸ̈ܐ ܥܲܡ ܐܘܼܪ̈ܙܸܐ. ܘܠܵܐ ܛܲܡܲܥܟܵܪܸ̈ܐ، ܘܠܵܐ ܓܸܢܵܒܼܸ̈ܐ، ܘܠܵܐ ܪ̈ܵܘܵܝܸܐ، ܘܠܵܐ ܨܲܥܪ̈ܵܢܸܐ، ܘܠܵܐ ܟ̰ܵܠܘܼܓ̰ܸ̈ܐ، ܐܲܢܸ̈ܐ ܡܲܠܟܘܼܬܸܗ ܕܐܲܠܵܗܵܐ ܠܹܐ ܝܵܪܬܝܼ...1ܩܘܿܪ̈ܲܢܬܵܝܸܐ 9:6-10).

♰ ܙܵܠܘܼܡܸ̈ܐ...                                                          ܙܵܠܘܼܡܸ̈ܐ ܠܹܐ ܝܵܪܬܝܼ ܠܡܲܠܟܘܼܬܵܐ ܕܫܡܲܝܵܐ. ܘܐܘܼܦ ܠܵܐ ܨܲܥܪ̈ܵܢܸܐ. ܘܦܵܘܠܘܼܤ ܫܠܝܼܚܵܐ ܡܲܕܟܼܘܼܪܵܐ ܝ݇ܠܸܗ ܐܵܢܝܼ̈ ܕܠܹܐ ܥܲܒܼܪܝܼ ܠܡܲܠܟܘܼܬܵܐ (ܐܝܼܢܵܐ ܙܲܢܝܘܼܬܵܐ، ܘܟܠܵܗ̇ ܛܲܢܦܘܼܬܵܐ، ܘܛܲܡܲܥܟܵܪܘܼܬܵܐ، ܐܘܼܦ ܠܵܐ ܩܪܵܝܵܐ ܦܵܝܫܵܐ ܩܪܝܼܬܵܐ ܓܵܘܘܿܟܼܘܿܢ، ܐܲܝܟܼ ܕܚܲܫܚܵܐ ܠܩܲܕܝܼܫܸ̈ܐ. ܘܠܵܐ ܫܪܝܼܚܘܼܬܵܐ، ܘܠܵܐ ܗܲܡܙܸܡܵܢܸ̈ܐ ܕܐܲܗܡܲܩܘܼܬܵܐ، ܝܵــــــــــܢ ܪܸܫܚܲܢܕܘܼܬܵܐ، ܐܲܢܸ̈ܐ ܕܠܹܐ ܝ݇ܢܵܐ ܒܸܠܚܵܡܵܐ، ܐܸܠܵܐ ܡܒܵܕܲܠ ܕܐܲܢܸ̈ܐ ܫܵܟܲܪܬܵܐ. ܤܵܒܵܒ ܕܐܵܗܵܐ ܒܸܕܥܵܝܵܐ ܝ݇ܬܘܼܢ: ܕܟܠ ܙܲܢܵܝܵܐ: ܝܵܢ ܛܲܢܦܵܐ: ܝܵܢ ܛܲܡܲܥܟܲܪ: ܕܝܼܠܸܐ ܤܲܓܼܕܵܢܵܐ ܕܨܵܢܲܡܸ̈ܐ: ܠܝܼܬܠܹـــــــܗ ܝܵܪܬܘܼܬܵـــــܐ ܒܡܲــܠـܟــܘܼܬܵـــܐ ܕܡܫܝܼܚܵܐ ܘܕܐܲܠܵܗܵܐ.... ܐܲܦܸܤܵܝܸ̈ــܐ 3:5-5). ܘܓܵܘ ܐܸܓܲܪܬܸܗ ܩܵܐ ܓܵܠܵܛܵܝܸ̈ܐ ܒܸܐ݇ܡܵܪܵܐ ܝ݇ܠܸܗ (ܤܵܒܵܒ ܕܕܸܥܝܵܐ ܝ݇ܢܵܐ ܦܘܼܠܚܵܢܸ̈ܐ ܕܒܸܤܪܵܐ: ܕܝܼܢܵܐ: ܙܲܢܝܘܼܬܵܐ، ܛܲܢܦܘܼܬܵܐ، ܦܲܚܙܘܼܬܵܐ. ܤܓܼܲܕܬܵܐ ܕܨܵܢܲܡܸ̈ܐ، ܚܲܪܵܫܘܼܬܵܐ، ܕܸܫ̃ܡܸܢܵܝܘܼܬܵܐ، ܡܲܩܪܵܨܘܼܬܵܐ، ܩܲܝܪܲܬ، ܚܸܡܬܵܐ، ܥܵܨܵܝܵܬܼܵـܐ، ܦܲܠܵܝܵܬܼܵـܐ، ܕܘܼܒܵܪ̈ܘܼܝܵܬܼܵـܐ. ܒܲܚܸܠܵܢܘܼܬܵܐ، ܪܵܘܵܝܘܼܬܵܐ، ܙܡܵܪܵــــܐ، ܘܐܵܢܝܼ̈

 

 

ܕܠܐܲܢܸ̈ܐ ܕܵܡܝܼ. ܘܐܵܢܝܼ̈ ܕܐܲܢܸ̈ܐ ܦܵܠܚܝܼ: ܐܲܝܟܼ ܕܡܼܢ ܩܵܕ݇ܡܵܝܬܵܐ ܐ݇ܡܸܪܝܼ ܐܸܠܘܿܟܼܘܿܢ: ܐܘܼܦ ܒܩܵܕ݇ܡܵܝܬܵܐ ܒܸܐ݇ܡܵܪܵܐ ܝ݇ܘܸܢ: ܕܡܲܠܟܘܼܬܸܗ ܕܐܲܠܵܗܵܐ ܠܹܐ ܝܵܪܬܝܼ...ܓܵܠܵܛܵܝܸ̈ܐ 19:5-21). ܐܸܢ ܓܲܫܩܵܚ ܒܟܠܵܝ̈ܗ‌ܝ ܐܲܢܸ̈ــــــــܐ ܒܸܬ ܚܵܙܵܚ ܕܪܵܒܵܐ ܝ݇ܘܵܚ ܪܸܚܩܵܐ ܡܼܢ ܕܸܥܬܵܐ ܕܫܪܵܪܵܐ ܐܲܠܵܗܵܝܵܐ.

♰ ܦܲܠܵܝܵـܬܼܵــܐ...                                                               ܐܵܗܵܐ ܚܲܒܪܵܐ ܐܸܕܝܘܼܡ ܐܲܝܟܼ ܛܵܘܦܵܢܵܐ ܒܸܓܼܪܵܩܘܿܗ̇ ܝ݇ܠܸܗ ܥܹܕܬܵܐ: ܘܒܸܟ̰ܠܵܦܘܿܗ̇ ܠܪܵܒܵܐ ܦܲܠܵܝܵܬܼܵـܐ.            ܘܦܲܠܵܝܬܵܐ: ܟܸܐ ܟ̰ܲܠܦܵܐ ܠܥܹܕܬܵܐ ܒܫܸܡܵܐ ܕܗܲܝܡܵܢܘܼܬܵܐ، ܟܲܕ ܗܲܝܡܵܢܘܼܬܵܐ ܪܸܚܩܵܐ ܡܸܢܘܿܗ̇. ܘܒܐܵܗܵܐ ܐܘܼܪܚܵܐ ܟܠܵܝ̈ܗ‌ܝ ܒܸܚܤܵܪܵܐ ܝ݇ܢܵܐ ܠܫܡܲܝܵܐ. ܘܒܘܼܬ ܕܐܵܗܵܐ ܒܸܐ݇ܡܵܪܵܐ ܝ݇ܠܸܗ [ܚܸܡܬܵܐ، ܥܵܨܵܝܵܬܼܵـܐ، ܦܲܠܵܝܵܬܼܵـܐ، ܕܘܼܒܵܪ̈ܘܼܝܵܬܼܵـܐ]. ܘܐܲܢܸ̈ܐ ܟܠܵܝܗ‌ܝ ܠܹܐ ܥܲܒܼܪܝܼ ܠܫܡܲܝܵܐ. ܘܐܸܢ ܓܲܫܩܵܚ ܓܵܘ ܤܸܦܪܵܐ ܕܓܸܠܝܵܢܵܐ ܕܟܹܐ ܡܲܕܥܹܐܠܲܢ ܒܘܼܬ ܫܡܲܝܵܐ ܘܚܲܝܸ̈ܐ ܕܓܵܘܘܿܗ̇: ܒܸܬ ܚܵܙܵܚ ܕܝܘܼܚܲܢܵܢ ܩܲܕܝܼܫܵܐ ܒܸܟܬܵܒܼܵܐ ܝ݇ܠܸܗ ܤܸܕܪܵܐ ܕܥܲܠܠܵܬܼܵـܐ ܕܠܹܐ ܥܲܒܼܪܝܼ ܠܫܡܲܝܵــــــܐ (ܐܝܼܢܵܐ ܠܙܵܕܘܼܥܘܸ̈ܐ: ܘܠܵܐ ܡܗܘܼܡܢܸ̈ܐ: ܘܟ̰ܘܼܦܠܸܢܸ̈ܐ: ܘܩܵܛܘܼܠܸ̈ܐ: ܘܙܲܢܵܝܸ̈ܐ: ܘܚܲܪ̈ܵܫܸܐ: ܘܤܲܓܼܕܵܢܸ̈ܐ ܕܨܵܢܲܡܸ̈ܐ: ܘܟܠܵܝ̈ܗ‌ܝ ܕܲܓܵܠܸ̈ܐ: ܤܵܡܵܝܗ‌ܝ ܒܸــــــܬ ܗܵܘܸܐ ܓܵܘ ܕܗ̇‌ܝ ܝܵܡܵܐ ܕܝܼܠܵܐ ܒܢܘܼܪܵܐ ܘܟܸܒܪܝܼܬ: ܗ̇ܘ ܕܝܼܠܸܐ ܡܵܘܬܵܐ ܕܬܪ̈ܵܝ... ܓܸܠܝܵܢܵܐ 8:21). ܘܐܸܢ ܓܲܫܩܵܚ ܓܵــــܘ ܕܐܵܗܵـــــܐ ܤܸܓܼܠܵܐ ܒܸـــܬ ܚܵܙܵܚ ܕܒܸܐ݇ܡܵܪܵܐ ܝ݇ܠܸܗ [ܘܟܠܵܝܗ‌ܝ ܕܲܓܵܠܸ̈ܐ] ܒܲܤ ܐܘܼܦ ܐܸܢ ܕܘܼܓܠܵܐ ܚܘܵܪܵܐ ܝ݇ܠܸܗ، ܟܠܵܝ̈ܗ‌ܝ ܓܵܘ ܬܠܵܩܵܐ ܝ݇ܢܵܐ. ܘܒܵܬ݇ܪ ܕܚܙܸܐܠܲܢ ܕܐܝܼܬ ܪܵܒܵܐ ܥܲܠܠܵܬܼܵـܐ ܕܟܹܐ ܡܲܟܠܝܼ ܠܒܲܪܢܵܫܵܐ ܡܼܢ ܠܸܥܒܼܵܪܵܐ ܠܫܡܲܝܵܐ، ܒܸܬ ܚܵܙܵܚ ܕܐܝܼܬ ܐ݇ܚܸܪ̈݇ܢܸܐ ܤܵܒܵܒܸ̈ܐ ܕܟܹܐ ܟܨܐܠܝܼ ܓܵܘ ܐܘܼܪܚܵܐ ܕܒܲܪܢܵܫܵܐ ܘܡܸܢܵܝܗ‌ܝ......

♰ ܫܘܼܒܼܗܵܪܵܐ ܘܪܵܡܘܼܬܵܐ...                                                 ܗ̇‌ܝ ܚܛܝܼܬܵܐ ܩܵܕ݇ܡܵܝܬܵܐ ܕܟܸܐ ܡܲܟܠܝܼܵܐ ܡܼܢ ܠܸܥܒܼܵܪܵܐ ܠܫܡܲܝܵܐ: ܐܝܼܠܵܐ ܫܘܼܒܼܗܵܪܵܐ، ܤܵܛܵܢܵܐ ܓܘܼܪܵܐ ܕܡܲܠܲܐܟܼܸ̈ܐ ܢܦܸܠܸܗ ܒܥܸܠܬܵܐ ܕܪܵܡܘܼܬܵܐ. ܘܗܲܕܟܼܵܐ: ܒܸܬ ܚܵܙܵܚ ܒܲܪܢܵܫܵܐ ܗܲܪ ܒܗ̇‌ܝ ܚܛܝܼܬܵܐ ܟܸܐ ܢܵܦܸܠ. ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܐܲܠܵܗܵܐ ܟܹܐ ܟܵܐܠܸܗ ܕܲܪܩܘܼܒܼܠ ܕܪ̈ܵܡܸܐ، ܘܠܡܲܟܝܼܟܼܸ̈ܐ ܟܹܐ ܝܵܗ݇ܒܸܠܘܼܢ ܫܵܦܵܩܲܬ). ܐܲܠܵܗܵܐ ܠܹܐ ܒܲܤܡܵܐܠܸܗ ܒܚܛܝܼܬܵـــܐ ܘܒܝܼܫܬܵـــܐ. ܘܚܲܕ݇ ܡܼܢ ܚܛܝܼܵܬܸ̈ـܐ ܕܟܹܐ ܟܵܐܠܸܗ ܐܲܠܵܗܵܐ ܕܲܪܩܘܼܒܼܠܘܿܗ̇ ܐܝܼܠܵܐ [ܚܛܝܼܬܵܐ ܕܫܘܼܒܼܗܵܪܵܐ ܘܪܵܡܘܼܬܵܐ]. ܚܛܝܼܬܵܐ ܕܤܵܦܪܸ̈ܐ ܘܦܪ̈ܝܼܫܸܐ ܐܝܼܗ݇ܘܵܐ ܚܛܝܼܬܵܐ ܕܫܘܼܒܼܗܵܪܵܐ ܘܪܵܡܘܼܬܵܐ. ܘܡܵܪܲܢ ܡܘܼܕܥܝܼܵܐܠܸܗ ܐܝܼܡܵܢ ܕܐ݇ܡܸܪܸܗ (ܤܵܒܵܒ ܡܘܼܚܸܒܠܘܼܢ ܫܘܼܒܼܚܵܐ ܕܐ݇ܢܵܫܸ̈ܐ ܒܘܼܫ ܙܵܘܕܵܐ ܡܼܢ ܫܘܼܒܼܚܵܐ ܕܐܲܠܵܗܵܐ).

 

 

 

♰ ܠܵܐ ܡܗܘܼܡܢܸ̈ܐ...                                                    ܒܲܪܢܵܫܵܐ ܕܠܝܼܬܠܸܗ ܗܲܝܡܵܢܘܼܬܵܐ ܠܹܐ ܡܵܨܸܐ ܕܥܵܒܼܸܪ ܠܫܡܲܝܵܐ. ܗܲܝܡܵܢܘܼܬܵܐ ܒܦܘܼܪܩܵܢܵܐ ܕܡܘܼܩܪܸܒܼܠܸܗ ܡܵܪܲܢ ܥܲܠ ܙܩܝܼܦܵܐ. ܪܵܒܵܐ ܟܹܐ ܚܲܫܒܼܝܼ: ܕܐ݇ܢܵܫܸ̈ܐ ܛܵܒܼܸ̈ܐ ܐܵܦܸܢ ܕܠܝܼܬܠܘܼܢ ܗܲܝܡܵܢܘܼܬܵܐ: ܒܸܬ ܥܲܒܼܪܝܼ ܠܫܡܲܝܵܐ. ܐܵܗܵܐ ܠܹܐ ܝ݇ܠܵܐ ܫܲܪܝܼܪܬܵܐ. ܗܲܡܙܲܡܬܵܐ ܕܡܵܪܲܢ ܥܲܡ ܢܝܼܩܵܕܝܼܡܘܼܤ ܪܵܒܵܐ ܒܓܸܠܝܘܼܬܵܐ ܡܲܕܥܘܼܝܵܢ ܝܼܠܵܐ ܒܘܼܬ ܕܐܵܗܵܐ ܥܸܠܬܵܐ. ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܡܿܢ ܕܗܲܡܸܢ ܒܝܼܸܗ [ܡܫܝܼܚܵܐ] ܠܹܐ ܦܵܐܸܫ ܕܝܼܢܵܐ: ܘܗ̇ܘ ܕܠܵܐ ܗܲܡܸܢ ܡܼܢ ܓ̰ܲܠܕܸܐ ܕܝܼܢܵܐ ܝ݇ܠܸܐ...ܝܘܼܚܲܢܵܢ 18:3).                                                     ܡܘܼܚܸܒܝܼ.. ܥܕܵܢܵܐ ܝ݇ܠܵܐ ܕܪܵܝܥܫܵܚ ܠܓܵܢܲܢ. ܟܡܵܐ ܡܼܢ ܩܘܼܕܵܫܸ̈ܐ ܟܹܐ ܗܲܕܪܵܚܠܘܼܢ، ܘܟܡܵܐ ܡܼܢ ܟܵܪ̈ܘܼܙܘܼܝܵܬܸܐ ܟܹܐ ܫܲܡܥܵܚܠܘܼܢ، ܘܟܡܵܐ ܡܼܢ ܟܬܵܒܼܸ̈ܐ ܟܹܐ ܩܵܪܵܚܠܘܼܢ، ܘܪܵܒܵܐ ܓܵܗܸ̈ܐ ܟܹܐ ܢܵܤܒܼܵܚ ܡܼܢ ܦܲܓܼܪܵܐ ܘܕܸܡܵܐ ܩܲܕܝܼܫܸ̈ܐ ܕܡܵܪܲܢ، ܘܥܲܡ ܟܠܵܗ̇ ܕܐܵܗܵܐ: ܠܐܲܝܟܵܐ ܡܛܹܐܠܲܢ.. ܩܘܼܪܒܵܐ ܝ݇ܘܵܚ ܡܼܢ ܫܡܲܝܵܐ؟. ܝܵܐ ܪܲܒ ܐܝܼܘܵܚ ܥܲܡ ܕܐܵܢܝܼ̈ ܕܒܘܼܬ ܕܝܼܵܝܗ‌ܝ ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܐܝܼܢܵܐ ܕܘܼܒܵܪܸ̈ܐ ܕܝܼܵܢ ܒܫܡܲܝܵܐ ܝ݇ܢܵܐ...ܦܝܼܠܝܼܦܝܼܤܵܝܸ̈ܐ 20:3).    ܗܲܝܡܵܢܘܼܬܵܐ ܕܠܵܐ ܦܸܠܚܵܢܸ̈ܐ ܡܝܼܬܬܵܐ ܝ݇ܠܵܐ. ܡܫܝܼܚܵܝܘܼܬܵܐ ܠܹܐ ܝ݇ܠܵܐ ܒܸܛܠܵܒܵܐ ܡܸܢܲܢ ܐܲܚܟ̰ܝܼ ܗܲܝܡܵܢܘܼܬܵܐ، ܐܸܠܵܐ ܗܲܝܡܵܢܘܼܬܵܐ ܡܙܝܼܓܼܬܵܐ ܒܦܸܠܚܵܢܸ̈ܐ. ܦܝܼܫܬܵܐ ܝ݇ܠܵܐ ܐ݇ܡܝܼܪܬܵܐ [ܦܸܠܚܵܢܸ̈ܐ ܟܹܐ ܗܲܡܙܸܡܝܼ ܒܩܵܠܵܐ ܪܵܡܵܐ ܒܘܼܫ ܡܼܢ ܩܵܠܵܐ ܕܚܲܒܪ̈ܵܢܸܐ].

♰ ܢܵܤܒܵܝ̈ ܒܐܲܦܸ̈ܐ...                                                       ܚܲܕ݇ ܤܵܗ݇ܡܵܐ ܝ݇ܢܵܐ ܡܼܢ ܕܐܵܢܝܼ̈ ܕܠܹܐ ܥܲܒܼܪܝܼ ܠܫܡܲܝܵܐ.                                         ܐ݇ܡܸܪܸܗ ܡܵܪܲܢ (ܪܵܒܵܐ ܒܸܬ ܐܲܡܪܝܼ ܐܸܠܝܼ ܒܗ̇ܘ ܝܵܘܡܵܐ [ܝܵܘܡܵܐ ܕܕܝܼܘܵܢ] ܡܵܪܝܼ ܡܵܪܝܼ ܒܫܸܡܘܼܟܼ ܠܵܐ ܢܘܼܒܸܐܠܲܢ؟ ܘܒܫܸܡܘܼܟܼ ܕܵܝܘܸ̈ܐ ܦܘܼܠܸܛܠܲܢ؟ ܘܒܫܸܡܘܼܟܼ ܚܲܝ̈ܠܸܐ ܪܵܒܵܐ ܥܒܸܕܠܲܢ؟ ܘܗܲܝܓܵܗ̇ ܒܸܬ ܡܵܘܕܸܢ ܐܸܠܵܝܗ‌ܝ: ܗܸܟ̰ ܠܵܐ ܝ݇ܕܸܥܠܝܼ ܐܸܠܘܿܟܼܘܿܢ: ܪܚܘܼܩܘܼܢ ܐܲܚܬܘܼܢ ܡܸܢܝܼ: ܦܵܠܵܚܸ̈ܐ ܕܥܵܘܠܵܐ...ܡܲܬܲ‌ܝ 22:7-23).           [ܠܵܐ ܝ݇ܕܸܥܠܝܼ ܐܸܠܘܿܟܼܘܿܢ] ܤܵܒܵܒ ܦܠܸܚܠܘܼܢ ܒܫܸܡܵܐ ܕܡܵܪܲܢ ܩܵܐ ܝܘܼܬܪܵܢܵܐ ܦܲܪܨܘܼܦܵܝܵܐ، ܘܒܢܵܤܒܵܝ̈ ܒܐܲܦܘܼܬܵܐ. ܒܘܼܬ ܕܐܵܗܵܐ ܡܗܵܕܲܪܬܵܐ ܕܓܵܢܵܐ ܠܸܥܒܼܵܪܵܐ ܠܫܡܲܝܵܐ ܟܸܐ ܡܫܲܪܝܵܐ ܡܼܢ ܚܲܝܸ̈ܐ ܕܥܲܠ ܐܲܪܥܵܐ.                ܘܥܲܠ ܐܲܪܥܵܐ ܡܵܨܸܬ ܕܝܵܕܥܸܬ ܒܡܸܨܥܵܝܘܼܬܵܐ ܕܦܸܠܚܵܢܘܼܟܼ ܐܸܢ ܒܸܬ ܥܲܒܼܪܸܬ ܠܫܡܲܝܵܐ ܝܵܢ ܠܵܐ. ܤܵܒܵܒ ܒܵܬ݇ܪ ܡܵܘܬܘܼܟܼ ܬܲܪܥܵܐ ܒܸܬ ܦܵܐܸܫ ܕܒܼܝܼܪܵܐ (ܡܲܬܲ‌ܝ 25). ܓܵܘ ܕܐܵܗܵܐ ܡܲܬܠܵܐ ܐܝܼܬ ܚܲܒܪܵܐ ܡܲܙܕܸܥܝܵܢܵܐ ܕܒܸܐ݇ܡܵܪܵܐ (ܘܬܲܪܥܵܐ ܕܒܼܸܪܸܐ). ܒܲܤ: ܐܸܢ ܒܲܥܝܸܬ ܕܥܲܒܼܪܸܬ ܠܫܡܲܝܵܐ ܓܵܪܲܓ ܝܵܕܥܸܬ ܠܡܵܪܝܵܐ ܠܲܐܟܼܵܐ ܥܲܠ ܐܲܪܥܵܐ.

 

 

ܐܸܢ ܐܝܼܠܵܢܵܐ ܕܛܥܘܼܢܬܵܐ ܕܟܹܐ ܙܲܪܥܝܼܠܵܗ̇ ܒܲܪܢܵܫܵܐ ܠܹܐ ܝܵܗ݇ܒܼܵܐ ܛܥܘܼܢܝܵܬܸ̈ـܐ ܐܸܠܵܐ ܒܵܬ݇ܪ ܚܲܕ݇ܟܡܵܐ ܘܫܸܢܸ̈ܐ،     ܗܲܕܟܼܵܐ: ܫܡܲܝܵܐ ܛܥܘܼܢܬܵܐ ܝ݇ܠܵܐ ܒܲܤܝܼܡܬܵܐ ܘܛܝܼܡܵܢܬܵܐ، ܓܵܪܲܓ ܙܲܪܥܵܚܠܵܗ̇ ܩܲܕ ܚܲܨܕܵܚܠܵܗ̇ ܒܝܵܘܡܵܐ ܕܫܘܼܢܵܝܵܢ. [ܘܐܵܢܝܼ̈ ܕܙܲܪܥܝܼ ܒܕܸܡܥܸ̈ܐ: ܒܸܬ ܚܵܨܕܝܼ ܒܚܲܕܘܼܬܵܐ]. ܘܠܹܐ ܝ݇ܠܵܐ ܕܟܠ ܕܐܝܼܬܠܸܗ ܥܒܼܵܕܸ̈ܐ ܛܵܒܼܸ̈ܐ ܒܸܬ ܥܵܒܼܸܪ ܠܫܡܲܝܵܐ، ܐܸܠܵܐ ܗܲܝܡܵܢܘܼܬܵܐ ܒܡܵܪܲܢ ܝܼܫܘܿܥ ܡܫܝܼܚܵܐ، ܘܒܡܵܘܠܵܕܵܐ ܬܪܲܝܵܢܵܐ [ܡܲܥܡܘܿܕܝܼܬܵܐ]. ܤܵܒܵܒ ܐܘܼܦ ܤܵܛܵܢܸ̈ـܐ ܟܹܐ ܗܲܡܸܢܝܼ ܘܫܵܝܥܫܝܼ (ܝܵܥܩܘܼܒܼ19:2). ܐܸܠܵܐ ܗܲܝܡܵܢܘܼܬܵܐ ܒܢܝܼܬܵܐ ܥܲܠ ܫܲܬܐܲܤܬܵܐ ܕܦܸܠܚܵܢܸ̈ܐ.  ܡܘܼܚܸܒܝܼ.. ܗܸܟ̰ ܠܵܐ ܦܵܝܫܵܚ ܡܥܘܼܠܕܝܼܸܐ ܒܤܵܛܵܢܵܐ ܘܚܲܫܒܼܵܚ ܕܗܲܝܡܵܢܘܼܬܵܐ ܒܢܝܼܬܵܐ ܝ݇ܠܵܐ ܐܲܚܟ̰ܝܼ ܥܲܠ ܕܸܟܼܝܘܼܬܵܐ. ܐܵܦܸܢ ܕܕܸܟܼܝܘܼܬܵܐ ܠܵܙܸܡ ܝܼܠܵܐ ܩܵܐ ܗܲܝܡܵܢܘܼܬܵܐ، ܐܝܼܢܵܐ ܦܸܠܚܵܢܸ̈ܐ ܫܲܬܐܲܤܬܵܐ ܝ݇ܢܵܐ ܕܗܲܝܡܵܢܘܼܬܵܐ.      ܒܪܝܼܬܵܐ ܥܲܬܝܼܩܬܵܐ ܢܦܸܠܵܗ̇، ܘܚܪܸܒܼܠܵܗ̇، ܘܠܹܐ ܥܲܒܼܪܵܗ̇ ܠܫܡܲܝܵܐ. ܤܵܒܵܒ ܚܪܵܒܼܵܐ ܠܹܐ ܝܵܪܸܬ ܠܵܐ ܚܪܵܒܼܵܐ. ܘܓܵܪܲܓ ܒܲܪܢܵܫܵܐ ܦܵܐܸܫ ܡܚܘܼܕܸܬܵܐ. ܘܐܵܗܵܐ ܟܹܐ ܦܵܝܫܵܐ ܡܬܘܼܡܸܡܬܵܐ ܒܡܫܝܼܚܵܐ ܘܓܵܘ ܡܫܝܼܚܵܐ.                 ܩܵܡܘܼܕܝܼ ܒܡܫܝܼܚܵܐ؟ ܒܸܐ݇ܡܵܪܵܐ ܝ݇ܠܸܗ ܫܠܝܼܚܵܐ (ܤܵܒܵܒ ܕܐܵܗܵܐ ܟܹܐ ܡܵܨܸܐ ܠܡܲܚܘܼܝܸܐ ܠܥܵܠܲܡ ܠܐܵܢܝܼ̈ ܕܩܲܪܒܸܢܝܼ ܒܐܝܼܕܸܗ ܠܐܲܠܵܗܵܐ: ܤܵܒܵܒ ܒܸܚܵܝܵܐ ܝ݇ܠܸܐ ܒܟܠ ܙܲܒܼܢܵܐ ܕܡܵܐܤܸܩ ܨܠܵܘܵܬܸ̈ـܐ ܡܒܵܕܵܠܵܝ..ܥܸܒܼܪ̈ܵܝܸܐ 25:7).     ܒܲܤ: ܐܵܢܝܼ̈ ܕܒܲܥܝܝܼ ܕܥܲܒܼܪܝܼ ܠܫܡܲܝܵܐ ܓܵܪܲܓ ܗܵܘܝܼ ܩܲܕܝܼܫܸ̈ܐ. ܕܵܐܟܼܝܼ ܕܡܲܕܥܘܼܝܵܢ ܝܼܠܸܗ ܫܠܝܼܚܵܐ ܘܒܸܐ݇ܡܵܪܵــܐ (ܩܲܕܝܼܫܘܼܬܵܐ ܕܒܸܐ ܕܝܼܵܗ̇ ܐ݇ܢܵܫܵܐ ܠܡܵܪܲܢ ܠܸܐ ܚܵܙܸܐ...ܥܸܒܼܪ̈ܵܝܸܐ 14:12). ܓܵܪܲܓ ܗܵܘܝܼ ܡܤܘܼܩ̈ـــܠܹـــܐ ܒܩܲܕܝܼܫܘܼܬܵܐ ܐܵܢܝܼ̈ ܕܒܲܥܝܝܼ ܕܥܲܒܼܪܝܼ ܠܫܡܲܝܵܐ (ܕܵܐܟܼܝܼ ܕܓܘܼܒܝܵܚܠܸܗ ܒܝܼܸܗ [ܓܵܘ ܡܫܝܼܚܵܐ] ܡܼܢ ܩܲܕ݇ܡ ܒܸܢܝܲܬܸـܐ ܕܥܵܠܡܵܐ: ܕܗܵܘܵܚ ܩܲܕܝܼܫܸ̈ܐ ܘܕܠܵܐ ܡܘܼܡܵܐ ܩܵܕ݇ܡܘܼܗ‌ܝ...ܐܲܦܸܤܵܝܸ̈ܐ 4:1). (ܗܘܸܐܡܘܼܢ ܩܲܕܝܼܫܸ̈ܐ ܒܟܠܵܝ ܚܕܵܪܘܿܟܼܘܿܢ܆ ܐܲܝܟܼ ܕܩܲܕܝܼܫܵܐ ܝ݇ܠܸܐ ܗ̇ܘ ܕܩܲܕ݇ܡ ܩܵܪܸܐܠܘܿܟܼܘܿܢ. ܤܵܒܵܒ ܕܟܬܝܼܒܼܵܐ ܝ݇ܠܸܐ: ܗܵܘܝܼܬܘܼܢ ܩܲܕܝܼܫܸ̈ܐ: ܤܵܒܵܒ ܕܐܵܢܵܐ ܩܲܕܝܼܫܵܐ ܝ݇ܘܸܢ... 1ܦܵܛܪܘܼܤ 15:1-16).   

ܐܲܠܵܗܵܐ ܩܲܕܝܼܫܵܐ، ܠܹܐ ܡܵܨܸܐ ܕܚܵܙܸܐܠܸܗ ܐܸܠܵܐ ܗ̇ܘ ܕܩܲܕܝܼܫܵܐ ܝ݇ܠܸܗ܀܀܀

ܒܝܕ ܡܫܡܫܢܐ: ܝܘܤܦ ܢܘܼܪܘܼ.











اربيل عينكاوه

  • رقم الموقع: 07517864154
  • رقم إدارة القناة: 07504155979
  • البريد الألكتروني للإدارة:
    info@ishtartv.com
  • البريد الألكتروني الخاص بالموقع:
    article@ishtartv.com
جميع الحقوق محفوظة لقناة عشتار الفضائية © 2007 - 2020
Developed by: Bilind Hirori
تم إنشاء هذه الصفحة في 1.9777 ثانية