܀ ܚܲܡܠܵܢܸ̈ܐ ܓܵܘ ܥܝܼܩܘܼܬܵـܐ ܀

ܐܝܼܬ ܪܵܒܵܐ ܦܲܪ̈ܨܘܼܦܸܐ ܕܥܝܼܩܘܼܬܵܐ ܟܸܐ ܥܲܨܪܵܐ ܠܘܼܢ ܐܲܝܟܼ ܡܲܥܨܲܪܬܵܐ، ܘܟܸܐ ܡܲܟܟ̰ܸܚܵܐ ܠܘܼܢ ܦܲܓܼܪܵܢܵܐܝܼܬ ܘܪܘܼܚܵܢܵܐܝܼܬ. ܠܝܼܬ ܫܠܵܡܵܐ ܓܵܘ ܚܲܝܘܼܬܵܝܗ‌ܝ، ܝܵܘܡܵܢܵܝܗ‌ܝ ܟܸܐ ܥܲܒܼܪܝܼ ܐܲܝܟܼ ܝܘܼܩܪܵܐ ܕܛܘܼܪܵܐ. ܐܝܼܢܵܐ ܫܠܝܼܚܵܐ ܒܸܐ݇ܡܵܪܵܐ ܝ݇ܠܸܗ ܩܵܬܲܢ (ܗܵܘܝܼܬܘܼܢ ܒܸܚܡܵܠܵܐ ܒܝܲܠܨܘܼܒܼܘܿܟܼܘܿܢ.. ܪ̈ܗ݇ܘܿ 12:12). ܟܠ ܥܝܼܩܘܼܬܵܐ ܐܝܼܬܠܵܗ̇ ܚܘܼܬܵܡܵܐ، ܐܸܢ ܕܐܝܼܠܵܗ̇ (ܟܸܤܦܵܢܵܐܝܼܬ، ܝܵܢ ܫܵܘܬܵܦܵܐܝܼܬ، ܝܵܢ ܪܘܼܚܵܢܵܐܝܼܬ). ܥܝܼܩܘܼܬܵܐ ܟܸܐ ܕܵܡܝܵܗ̇ ܠܚܕܵܐ ܡܲܓ̰ܓܘܼܢܬܵܐ ܕܟܸܐ ܢܵܦܚܵܗ̇ ܘܒܚܲܪܬܵܐ ܟܸܐ ܦܲܩܥܵܗ̇ ܘܟܸܐ ܬܲܠܩܵܗ̇. ܒܘܼܬ ܕܐܵܗܵܐ: ܥܝܼܩܘܼܬܵܐ ܤܢܝܼܩܬܵܐ ܝ݇ܠܵܗ̇ ܠܤܲܝܒܪܵܢܘܼܬܵܐ ܘܚܘܼܡܠܵܢܵܐ. ܝܵܘܤܸܦ ܙܲܕܝܼܩܵܐ: ܢܦܝܼܠܵܐ ܗ݇ܘܵܐ ܓܵܘ ܪܵܒܵܐ ܥܝܼܩܘܼܝܵܬܸ̈ـܐ، ܐܵܦܸܢ ܕܕܸܟܼܝܵܐ ܗ݇ܘܵܐ. ܒܩܲܕ݇ܡܵܝܬܵܐ ܐ݇ܬܸܐܠܘܼܢ ܥܲܠܸܗ ܥܝܼܩܘܼܝܵܬܸ̈ـܐ ܡܼܢ ܐܵܚܘܼܢܘܵܬܸ̈ܗ ܕܩܲܕ݇ܡ ܙܲܒܢܝܼܠܸܗ ܐܲܝܟܼ ܪܹܝܓܵܐ: ܘܚܸܐܠܸܗ ܐܲܝܟܼ ܪܹܝܓܵܐ ܓܵܘ ܒܲܝܬܵܐ ܕܦܘܿܛܝܼܦܵܪ، ܐܝܼܢܵܐ ܡܵܪܝܵܐ ܥܲܡܘܼܗ‌ܝ ܝܼܗ݇ܘܵܐ. ܥܝܼܩܘܼܬܵܐ ܙܸܕܠܵܐ ܥܲܠܸܗ، ܥܒܼܸܕܠܘܼܢ ܓܘܼܢܗܵܟܲܪ ܒܥܸܠܬܵܐ ܕܙܲܢܝܘܼܬܵܐ ܘܕܪܸܐܠܘܼܢ ܒܒܸܝܬ ܐܲܤܝܼܪܸ̈ܐ. ܐܝܼܢܵܐ ܡܵܪܝܵܐ ܐܲܠܵܗܵܐ ܩܲܕ݇ܡ ܗܲܝܸܪܸܗ ܒܦܵܫܲܩܬܵܐ ܕܚܘܼܠܡܵܢܸ̈ܐ ܩܵܐ ܦܸܪܥܘܼܢ، ܘܦܠܸܛܠܸܗ ܡܼܢ ܒܹܝܬ ܐܲܤܝܼܪܸ̈ܐ، ܘܗܘܸܐܠܸܗ ܗ̇ܘ ܐ݇ܢܵܫܵܐ ܬܪܲܝܵܢܵܐ ܓܵܘ ܡܲܠܟܘܼܬܵܐ. ܛܵܝܸܦܵܐ ܕܝܼܤܪܵܝܸܠ ܚܹܐܠܘܼܢ ܓܵܘ ܥܝܼܩܘܼܬܵܐ ܩܫܝܼܬܵܐ ܕܪܝܼܓܘܼܬܵܐ: ܓܵܘ ܡܲܤܠܵܝܬܵܐ، ܘܓ̰ܘܼܢܓ̰ܵܪܵܐ، ܐܝܼܢܵܐ ܐܲܠܵܗܵܐ ܡܘܼܬܸܒܼܠܸܗ ܚܘܼܬܵܡܵܐ ܠܐܵܗܵܐ ܥܝܼܩܘܼܬܵܐ: ܘܐ݇ܡܸܪܸܗ ܩܵܐ ܡܘܼܫܸܐ (ܡܸܚܙܵܝܵܐ ܚܙܸܐܠܝܼ ܠܝܲܠܨܘܼܝ ܕܛܵܝܸܦܝܼ ܕܝܼܠܸܗ ܓܵܘ ܡܸܨܪܹܝܢ: ܘܡܲܩܘܵܚܬܵܝܗ‌ܝ ܫܡܸܥܠܝܼ ܡܼܢ ܩܲܕ݇ܡ ܡܲܦܠܸܚܵܢܘܼܗ‌ܝ ܕܫܘܼܚܪܵܐ: ܤܵܒܵܒ ܕܟܸܐ ܝܵܕܥܸܢ ܠܕܵܪ̈ܕܘܼܗ‌ܝ... ܡܲܦܩܵܢܵܐ 7:3). ܘܒܸܡܚܵܝܵܬܸ̈ـܐ ܪܵܒܵܐ ܕܕܵܪܩܘܼܒܼܠ ܦܸܪܥܘܼܢ، ܘܒܦܬܵܚܬܵܐ ܕܝܵܡܵܐ ܘܥܒܼܵܪܬܵܝܗ‌ܝ، ܦܪܸܩܠܘܼܢ ܡܼܢ ܕܐܵܢܝܼ̈ ܥܝܼܩܘܼܝܵܬܸ̈ـܐ.

ܐܸܢ ܡܵܪܝܵܐ ܡܘܼܬܸܒܼܠܸܗ ܩܲܝܵܤ ܠܥܝܼܩܘܼܬܵܐ ܕܛܵܝܸܦܵܐ ܡܛܲܪܛܸܡܵܢܵܐ، ܘܦܘܼܪܸܩܠܸܗ ܒܐܝܼܕܵܐ ܙܲܪܒܲܢܬܵܐ، ܒܲܤ: ܟܡܵܐ ܒܸܬ ܥܵܒܼܸܕ ܥܲܡ ܕܐܵܢܝܼ̈ ܕܡܤܲܝܒܪܝܼ ܓܵܘ ܥܝܼܩܘܼܬܵܐ!!. ܡܘܼܫܸܐ ܡܤܘܼܝܒܸܪܸܗ ܓܵܘ ܟܠܵܝܗ‌ܝ ܥܝܼܩܘܼܝܵܬܸ̈ـܐ ܕܩܘܼܒܠܵܝܠܸܗ ܡܼܢ ܗ̇ܘ ܛܵܝܸܦܵܐ ܡܛܲܪܛܸܡܵܢܵܐ ܩܸܫܝܵܐ ܕܩܕܵܠܵܐ، ܗܲܠ ܕܦܝܼܫܠܵܐ ܐ݇ܡܝܼܪܬܵܐ ܒܘܼܬ ܕܝܼܸܗ (ܡܲܟܝܼܟܼܵܐ ܗ݇ܘܵܐ ܪܵܒܵܐ: ܒܘܼܫ ܡܼܢ ܟܠ ܐ݇ܢܵܫܵܐ ܕܥܲܠ ܦܵܬܵܐ ܕܐܲܪܥܵܐ.. ܡܸܢܝܵܢܵܐ 3:12). ܗ̇ܘ ܕܟܸܐ ܡܛܲܪܛܸܡ ܒܥܸܕܵܢܵܐ ܕܥܝܼܩܘܼܬܵܐ، ܟܸܐ ܟܵܟ̰ܸܚ ܓܵܘܵܢܵܐܝܼܬ ܡܼܢ ܪܸܥܝܵܢܸܗ ܘܠܸܒܸܗ ܘܢܲܦ̮ܫܵܢܵܐܝܼܬ ܠܸܐ ܗܵܘܸܐ ܓܵܘ ܫܠܵܡܵܐ، ܘܡܼܢ ܥܝܼܩܘܼܬܵܐ ܟܸܐ ܐܵܙܸܠ ܠܥܝܼܩܘܼܬܵܐ. ܒܵܒܲܢ ܐܲܒܼܪܵܗܵܡ ܢܦܸܠܸܗ ܓܵܘ ܥܝܼܩܘܼܬܵܐ ܓܘܼܪܬܵܐ ܕܦܪܵܡܬܵܐ ܕܒܪܘܼܢܸܗ، ܐܝܼܢܵܐ ܩܘܼܒܠܵܐ ܠܸܗ ܕܠܵܐ ܛܲܪܛܵܡܬܵܐ، ܘܓܵܘ ܡܲܨܝܲܬܬܵܐ ܘܗܲܝܡܵܢܘܼܬܵܐ ܫܩܸܠܸܗ ܠܒܪܘܼܢܸܗ ܠܕܒܼܵܚܸܗ ܩܵܐ ܡܵܪܝܵܐ، ܘܟܲܕ ܗܲܝܡܘܼܢܵܐ ܗ݇ܘܵܐ ܕܐܲܠܵܗܵܐ ܡܵܨܸܗ ܠܡܲܩܘܼܡܸܐ ܠܒܪܘܼܢܸܗ ܡܼܢ ܓܵܘܵܐ ܕܡܝܼܬܸ̈ـܐ. ܗܵܕܟܼܵܐ: ܐܲܒܼܪܵܗܵܡ ܡܤܘܼܝܒܸܪܸܗ ܓܵܘ ܥܝܼܩܘܼܬܵܐ. ܒܸܐ݇ܡܵܪܵܐ ܝ݇ܠܸܗ ܡܵܪܝܵܐ (ܒܸܬ ܦܵܝܫܝܼܬܘܼܢ ܤܸܢܝܸ̈ܐ ܡܼܢ ܟܠ ܐ݇ܢܵܫܵܐ ܤܵܒܵܒ ܕܫܸܡܝܼ: ܐܝܼܢܵܐ ܡܿܢ ܕܚܵܡܸܠ ܗܲܠ ܚܲܪܬܵܐ: ܗ̇ܘ ܒܸܬ ܚܲܝܸܐ... ܡܲܬܲ‌ܝ 22:10). ܚܲܕ݇ܟܡܵܐ ܟܸܐ ܚܲܡܠܝܼ ܩܵܐ ܚܕܵܐ ܥܕܵܢܵܐ ܙܥܘܼܪܬܵܐ، ܘܒܚܲܪܬܵܐ ܟܸܐ ܡܬܲܠܩܝܼ ܠܟܠ ܡܸܢܕܝܼ. ܐܝܼܢܵܐ ܗ̇ܘ ܕܟܸܐ ܗܲܡܸܢ ܒܡܵܪܝܵܐ، ܟܸܐ ܚܵܡܸܠ ܡܼܢ ܢܛܲܪܬܵܐ ܕܨܲܦܪܵܐ ܘܗܲܠ ܠܸܠܝܵܐ. ܕܵܐܟܼܝܼ ܕܒܸܐ݇ܡܵܪܵܐ ܝ݇ܠܸܗ (ܫܠܝܼ ܠܡܵܪܝܵܐ: ܘܦܘܼܫ ܒܗܸܒܼܝܼ ܒܝܼܸܗ... ܡܲܙܡܘܼܪܵܐ 7:37). ܘܠܹܐ ܝ݇ܠܵܐ ܛܫܝܼܬܵܐ ܡܼܢ ܐܘܼܦ ܚܲܕ݇، ܕܦܵܘܠܘܼܤ ܫܠܝܼܚܵܐ ܦܝܼܫܵܐ ܗ݇ܘܵܐ ܡܚܘܼܪܕܝܼܵܐ ܒܪܵܒܵܐ ܥܝܼܩܘܼܝܵܬܸ̈ـܐ، ܘܐ݇ܡܸܪܸܗ (ܐܸܠܵܐ ܒܟܠ ܡܸܢܕܝܼ ܡܲܚܫܸܚܵܚ ܓܵܢܲܢ ܐܲܝܟܼ ܚܸܠܡܲܬܟܵܪܸ̈ܐ ܕܐܲܠܵܗܵܐ: ܒܚܡܵܠܬܵܐ ܪܵܒܵܐ: ܒܐܘܼܠܨܵܢܸ̈ܐ: ܒܐܵܢܵܢܩܘܼܤ: ܒܥܹܩܘܼܘܸ̈ܐ. ܒܓ̰ܘܼܢܓ̰ܵܪܸ̈ـــــܐ: ܒܝܸܤܘܼܪܸ̈ـــــܐ: ܒܫܓܼܘܼܫܝܸ̈ܐ: ܒܓ̰ܵܦܸ̈ܐ: ܒܫܵܗܵܪ̈ܝܵܬܸــــܐ: ܒܨܵܘܡܸ̈ܐ.... 2ܩܘܿܪ̈ܲܢܬܵܝܸܐ 4:6-5). ܓܵܘ ܟܠܵܝܗ‌ܝ ܚܸܕܝܵܐ ܗ݇ܘܵܐ ܒܘܼܬ ܚܵܬܸܪ ܕܡܫܝܼܚܵܐ، ܒܸܐ݇ܡܵܪܵܐ ܝ݇ܠܸܗ (ܐܸܢ ܗܲܪ ܩܲܒܠܵܚ ܚܲܫܵܐ ܥܲܡܸܗ: ܕܐܘܼܦ ܥܲܡܸܗ ܦܵܝܫܵܚ ܚܩܝܼܪܸ̈ܐ.. ܪ̈ܗ݇ܘܿܡܵܝܸܐ 17:8).

ܒܘܼܬ ܚܵܬܸܪ ܕܐܵܗܵܐ ܚܸܩܪܵܐ، ܐ݇ܢܵܫܸ̈ܐ ܩܲܕܝܼܫܸ̈ܐ ܚܡܸܠܘܼܢ ܓܵܘ ܥܝܼܩܘܼܝܵܬܸ̈ـܐ. (ܦܵܘܚܸ̈ܐ ܚܲܝܠܵܢܸ̈ܐ ܟܸܐ ܡܵܨܝܼ ܠܸܫܥܵܫܵܐ ܦܵܥܘܵܐ ܙܥܘܼܪܵܐ ܕܓܵܘ ܐܝܼܠܵܢܵܐ: ܐܝܼܢܵܐ ܠܸܐ ܡܵܨܝܼ ܠܸܫܥܵܫܵܐ ܠܐܝܼܠܵܢܵܐ). ܟܠ ܕܐܵܙܸܠ ܒܐܘܼܪܚܵܐ ܕܡܵܪܝܵܐ، ܕܠܵܐ ܫܸܟ ܒܸܬ ܩܵܒܸܠ ܥܝܼܩܘܼܝܵܬܸ̈ـܐ. ܤܵܒܵܒ ܥܝܼܩܘܼܝܵܬܸ̈ـܐ، ܢܝܼܫܲܢܩܵܐ ܝ݇ܢܵܐ ܕܐܘܼܪܚܵܐ ܕܪܘܼܚܵܢܵܝܘܼܬܵܐ. ܘܡܵܪܲܢ ܒܓܵܢܸܗ ܐ݇ܡܸܪܸܗ (ܓܵܘ ܥܵܠܡܵܐ ܟܸــــــــܐ ܗܵܘܸܐ ܠܘܿܟܼܘܿܢ ܐܘܼܠܨܵܢܵܐ... ܝܘܼܚܲܢܵܢ 33:16). ܘܥܝܼܩܘܼܬܵܐ ܓܵܘ ܚܲܝܸ̈ܐ ܕܡܗܘܼܝܡܢܸ̈ܐ ܟܸܐ ܐܵܬܝܵܐ ܡܼܢ ܪܵܒܵܐ ܐܘܼܪ̈ܚܵܬܸـܐ، ܟܸܐ ܐܵܬܝܵܐ ܡܼܢ ܪ̈ܲܕܦܵܢܸܐ ܘܟܲܡܪ̈ܵܢܸܐ، ܡܼܢ ܐ݇ܢܵܫܸ̈ܐ ܒܝܼܫܸ̈ܐ ܘܡܲܓܼܠܸܛܵܢܸ̈ܐ، ܡܼܢ ܐ݇ܢܵܫܸ̈ܐ ܒܲܚܸܠܵܢܸ̈ܐ ܠܒܼܝܼܫܸ̈ܐ ܠܒܼܸܫܝܵܬܸ̈ـܐ ܕܦܵܐܪܸ̈ܐ، ܘܟܸܐ ܐܵܬܝܼ ܐܘܼܦ ܡܼܢ ܐ݇ܢܵܫܸ̈ܐ ܕܩܘܼܪܒܵܐ ܝ݇ܢܵܐ: ܒܙܠܘܼܡܝܵܐ ܩܵܐ ܕܪܵܝܬܵܐ ܕܚܪ̈ܵܒܸܐ ܘܒܘܼܠܒܵܠܸ̈ܐ. ܒܲܤ: ܕܵܐܟܼܝܼ ܚܲܡܠܵܚ ܓܵܘ ܥܝܼܩܘܼܬܵܐ؟. ܩܲܒܠܵܚܠܘܼܢ ܓܵܘ ܤܲܒܼܪܵܐ ܘܚܲܕܘܼܬܵܐ، ܓܵܘ ܗܲܝܡܵܢܘܼܬܵܐ ܕܒܝܼܵܗ̇ ܒܸܬ ܚܵܙܲܚ ܐܝܼܕܵܐ ܕܐܲܠܵܗܵܐ ܒܸܬ ܦܵܠܚܵܐ. ܤܵܦܪܵܚ ܒܠܸܒܵܐ ܦܬܝܼܚܵܐ، ܘܕܵܟܼܪܵܚ ܕܫܠܝܼܚܵܐ ܒܸܐ݇ܡܵܪܵܐ ܝ݇ܠܸܗ (ܟܠܵܝܗ‌ܝ ܡܸܢܕܝܼܵܢܸ̈ܐ ܟܸܐ ܦܵܠܚܝܼ ܥܲܡܵܝܗ‌ܝ ܠܛܵܒܼܬܵܐ... ܪ̈ܗ݇ܘܿܡܵܝܸܐ 28:8). ܘܗܲܝܓܵܗ̇ ܒܸܬ ܗܵܘܸܐܠܲܢ ܠܸܒܵܐ ܡܸܠܝܵܐ ܡܼܢ ܫܠܵܡܵܐ، ܘܟܡܵܐ ܕܥܝܼܩܘܼܝܵܬܸ̈ـܐ ܙܲܝܕܝܼ، ܫܠܵܡܵܐ ܟܸܐ ܙܵܐܸܕ. ܘܫܠܝܼܚܵܐ ܡܸܢ݇ܕܪܸܫ̄ ܡܲܠܘܼܦܵܢ ܝܼܠܸܗ ܘܒܝܼܵܗ݇ܒܼܵܢ ܤܲܒܼܪܵܐ ܘܒܸܐ݇ܡܵܪܵܐ ܝ݇ܠܸܗ (.... ܒܐܘܼܠܨܵܢܲܢ ܒܸܥܒܼܵܕܵܐ ܝ݇ܘܵܚ ܫܘܼܒܼܗܵܪܵܐ: ܕܒܸܕܥܵܝܵܐ ܝ݇ܘܵܚ ܕܐܘܼܠܨܵܢܵܐ ܒܸܦܠܵܚܵܐ ܝ݇ܠܸܗ ܚܡܵܠܬܵܐ ܒܝܼܵܢ.. ܪ̈ܗ݇ܘܿܡܵܝܸܐ 3:5). ܘܤܲܒܼܪܵܐ ܟܸܐ ܝܲܗ݇ܒܸܠܲܢ ܠܸܒܵܐ ܓܵܘ ܥܝܼܩܘܼܬܵܐ، ܕܵܐܟܼܝܼ ܕܐ݇ܡܸܪܸܗ ܫܠܝܼܚܵܐ (ܐܝܼܢܵܐ ܡܗܘܼܡܢܵܐ ܝ݇ܠܸܗ ܐܲܠܵܗܵܐ ܕܠܹܐ ܫܵܒܼܸܩ ܠܘܿܟܼܘܿܢ ܕܦܵܝܫܝܼܬܘܼܢ ܓ̰ܘܼܪ̈ܒܸܐ ܙܲܘܕܵܐ ܡܼܢ ܕܡܵܨܝܼܬܘܼܢ... 1ܩܘܿܪ̈ܲܢܬܵܝܸܐ 13:10).

ܫܡܫܢܐ: ܝܘܤܦ ܢܘܼܪܘܼ

مشاركاتكم (0)