هواجس مسيحية من تحوّل الدولة العراقية إلى دينيّة: حتى المسلم العلماني لا يستطيع العيش فيها      قداسة كاثوليكوس عموم الأرمن كاريكين الثاني يدعو إلى الوحدة والتضامن      غبطة البطريرك يونان يحتفل بقداس أحد بشارة العذراء مريم ويقيم جنازاً للمثلّث الرحمات المطران مار إيوانيس لويس عوّاد      البطريرك الراعي: الواقع الحالي المتداعي في لبنان أسفرت عنه ولا تزال سياسة الانحياز      المجلس الشعبي الكلداني السرياني الاشوري يهنئ الايزيديين بمناسبة اختيار بابا شيخ جديد      بالصور .. ميركي      السيد "جوزيف هاويل" عمدة مدينة (هيوم) في ملبورن الاسترالية يستمر في زياراته لابناء شعبنا      البابا فرنسيس وشيخ الأزهر أحمد الطيب يغردان معاً من أجل الأخوة الإنسانية      مجلس كنائس الشرق الأوسط يواصل رسالته الإنسانيّة في بيروت الجريحة      خطر تحويل الكنائس الأرمنيّة تحت الاحتلال الأذربيجاني إلى مساجد      "بحر" صنعه الإسمنت.. افتتاح أعمق مسبح في العالم      ليلة إبراهيموفيتش.. هدفان "خرافيان" وصدمة مفاجئة      وفد من إقليم كوردستان يزور بغداد خلال أيام      قريبا.. توقيع عقد اكبر مشروعين في العراق      الولايات المتحدة.. قتلى في عملية طعن داخل كنيسة بكاليفورنيا      البابا يوجه رسالة فيديو إلى الشبان المشاركين في الحدث الدولي "Economy of Francesco"      مسرور بارزاني يشارك في مؤتمر "أولويات اقتصاد إقليم كوردستان لما بعد كورونا" الذي ستنظمه غرفة التجارة الأمريكية      سباق الهدافين المخضرمين بين رونالدو وإبراهيموفيتش مستمر      الولايات المتحدة تنشر قاذفات B-52H في قواعدها في الشرق الاوسط      الكاردينال بارولين: الحوار بين الأديان ضروري ضد معاداة السامية
| مشاهدات : 722 | مشاركات: 0 | 2020-05-19 10:49:14 |

ܤܘܼܠܩܐ ܕܡܪܢ ܠܫܡܝܐ

الشماس يوسف نورو

 

                                                                          ܒܝܕ ܡܫܡܫܢܐ: ܝܘܤܦ ܢܘܼܪܘ

 

ܡܼܢ ܩܲܕ݇ܡ ܩܝܵܡܬܵܐ: ܡܵܪܲܢ ܪܵܒܵܐ ܓܵܗܸ̈ܐ ܡܘܼܕܸܥܝܵܐ ܗ݇ܘ̣ܵܐ ܩܵܐ ܬܲܠܡܝܼܕܘܼ̈ܗ‌ܝ ܒܘܼܬ ܩܝܵܡܬܸܗ ܕܒܸܬ ܗܵܘܝܵܐ ܗ݇ܘ̣ܵܐ ܡܼܢ ܒܵܬ݇ܪ ܬܠܵܬܵܐ ܝܵܘܡܵܢܸ̈ܐ ܡܒܵܬ݇ܪ ܡܵܘܬܸܗ. ܐܝܼܢܵܐ ܡܼܢ ܒܵܬ݇ܪ ܩܝܵܡܬܵܐ، ܫܘܼܪܵܐ ܝ݇ܠܸܗ ܡܲܕܥܘܼܝܸܐ ܒܘܼܬ ܤܘܼܠܵܩܸܗ: ܕܗܕܝܼܪܵܐ ܗ݇ܘ̣ܵܐ ܠܸܗܘܵܝܵܐ ܡܒܵܬ݇ܪ ܐܲܪܒܥܝܼ ܝܵܘܡܵܢܸ̈ܐ ܡܼܢ ܒܵܬ݇ܪ ܩܝܵܡܬܸܗ.                    ܩܵܡܘܼܕܝܼ ܐ݇ܤܸܩܠܸܗ ܠܫܡܲܝܵܐ ܒܝܵܘܡܵܐ ܕܐܲܪܒܥܝܼ ܡܼܢ ܒܵܬ݇ܪ ܩܝܵܡܬܵܐ؟                    ܕܵܐܟܼܝܼ ܕܨܸܡܠܸܗ ܐܲܪܒܥܝܼ ܝܵܘܡܵܢܸ̈ܐ ܠܡܚܲܕܘܼܬܸܐ ܠܓܒܼܝܼܠܬܵܐ ܕܒܲܪܢܵܫܵܐ: ܗ̇‌ܝ ܕܟܸܐ ܦܵܝܫܵܐ ܟܡܝܼܠܬܵܐ ܓܵܘ ܡܲܪܒܥܵܐ ܕܝܸܡܵܐ ܡܒܵܬ݇ܪ ܐܲܪܒܥܝܼ ܝܵܘܡܵܢܸ̈ܐ. ܝܵܥܢܝܼ: ܟܠ ܚܲܕ ܝܵܘܡܵܐ ܕܨܵܘܡܵܐ ܠܡܕܵܟܼܵܝܬܵܐ ܕܚܲܕ ܝܵܘܡܵܐ ܕܚܛܝܼܬܵܐ ܡܼܢ ܓܵܘ ܓܒܼܝܼܠܬܵܐ ܕܒܲܪܢܵܫܵܐ (ܚܙܝܼ ܡܸܐܡܪܵܐ ܥܲܠ ܚܲܕܒܫܲܒܵܐ:2: ܕܨܵܘܡܵܐ. ܟܬܵܒܼܵܐ ܕܘܲܪܕܵــــــܐ ܒܝܲܕ ܡܲܠܦܵܢܵܐ ܡܫܲܡܗܵܐ: ܓܝܼܘܲܪܓܝܼܤ ܘܲܪܕܵܐ). ܗܲܕܟܼܵܐ ܩܵܐ ܐܲܪܒܥܝܼ ܝܵܘܡܵܢܸ̈ܐ ܡܼܢ ܒܵܬ݇ܪ ܩܝܵܡܬܵܐ ܡܚܘܼܕܸܬܠܸܗ ܘܕܘܼܟܼܝܼܠܸܗ ܘܬܘܼܪܤܝܼܠܸܗ ܐܘܼܦ ܠܪܸܥܝܵܢܵܝܗ‌ܝ ܡܼܢ ܕܘܼܒܵܪ̈ܘܼܝܵܬܸـܐ ܠܡܗܵܕܲܪܬܵܝܗ‌ܝ ܩܵܐ ܒܸܢܝܵܢܵܐ ܕܥܹܕܬܵܐ. ܟܲܕ ܡܫܲܪܘܼܪܸܐ ܠܩܝܵܡܬܸܗ ܦܲܓܼܪܵܢܵܝܬܵܐ ܘܒܝܼܵܗ݇ܒܼܵܝܗ‌ܝ ܠܸܒܵܐ ܘܚܲܠܘܼܢܵܝܗ‌ܝ. ܘܐܲܝܟܼ ܢܸܫܪܵܐ ܕܟܸܐ ܡܵܠܸܦ ܠܙܲܥܝܘܼܗ‌ܝ ܦܪܲܚܬܵܐ، ܗܲܕܟܼܵܐ ܡܲܠܘܼܦܵܝܗ‌ܝ ܝܼܗ݇ܘ̣ܵܐ ܩܲܕ ܐܝܼܡܵܢ ܕܓܲܪܘܸܤܝܼ ܓܵܘ ܗܲܝܡܵܢܘܼܬܵܐ ܦܲܪܚܝܼ ܘܐܲܤܩܝܼ ܘܡܵܛܝܼ ܠܟܸܤܠܸܗ.                                                                   ܐ݇ܡܸܪܸܗ ܩܵܐ ܡܲܪܝܲܡ ܡܲܓܼܕܠܵܝܬܵܐ (ܠܵܐ ܕܲܩܪܵܬܝ ܒܝܝܼ: ܤܵܒܵܒ ܗܸܫ ܠܹܐ ܝ݇ܘܸܢ ܐ݇ܤܝܼܩܵܐ ܟܸܤ ܒܵܒܵܐ: ܐܝܼܢܵܐ ܙܸܠ݇ܐ ܠܟܸـــــــܤ ܐܵܚܘܼܢܘܵܬ̈ܝܼ: ܘܐ݇ܡܘܼܪ ܐܸܠܵـــــــــܝܗ‌ܝ: ܒܸܐ݇ܤܵܠ݇ܩܵܐ ܝ݇ܘܸܢ ܠܟܸܤ ܒܵܒܝܼ ܘܒܵܒܘܿܟܼܘܿܢ: ܘܐܲܠܵܗ‌ܝܼ ܘܐܲܠܵܗܘܿܟܼܘܿܢ...ܝܘܼܚܲܢܵܢ 17:20). ܘܐܵܗܵܐ ܤܘܼܠܵܩܵܐ ܐܝܼܗ݇ܘ̣ܵܐ ܤܘܼܠܵܩܵܐ ܕܦܲܓܼܪܵܐ ܘܠܵܐ ܕܐܲܠܵܗܘܼܬܵܐ: ܤܵܒܵܒ ܐܲܠܵܗܘܼܬܵܐ ܠܹܐ ܐܲܤܩܵܐ ܘܨܲܠܝܵܐ: ܘܠܹܐ ܡܫܲܢܝܵܐ ܡܼܢ ܕܘܼܟܵܐ ܠܕܘܼܟܵܐ: (ܒܟܠ ܕܘܼܟܵܐ ܝ݇ܠܸܗ، ܠܝܼܬܠܸܗ ܩܲܝܵܤ). ܐܵܦܸܢ ܤܘܼܠܵܩܵܐ ܕܦܲܓܼܪܵܐ ܗ݇ܘ̣ܵܐ ܐܝܼܢܵܐ ܠܹܐ ܗ݇ܘ̣ܵܐ ܦܪܝܼܫܵܐ ܡܼܢ ܐܲܠܵܗܘܼܬܵܐ ܐܘܼܦ ܚܲܕ݇ ܪܦܵܦܵܐ.                ܡܵܪܲܢ ܒܤܘܼܠܵܩܸܗ ܠܫܡܲܝܵܐ ܠܵܐ ܩܲܕ݇ܡ ܫܵܒܸܩܠܲܢ ܒܢܲܦ̮ܫܲܢ: ܤܵܒܵܒ ܐ݇ܡܸܪܸܗ (ܗܵܐ: ܐܵܢܵܐ ܥܲܡܘܿܟܼܘܿܢ ܝ݇ܘܸܢ ܟܠܵܝ̈ ܝܵܘܡܵܢܸ̈ܐ: ܗܲܠ ܬܝܵܡܵܐ ܕܥܵܠܡܵܐ... ܡܲܬܲ‌ܝ 20:28). ܘܡܸܢ݇ܕܪܸܫ̄ ܐ݇ܡܸܪܸܗ (ܐܵܝܟܵܐ ܕܬܪ̈ܵܝ ܝܵܢ ܕܬܠܵܬ݇ـܐ ܓ̰ܸܡܥܝܵܐ ܝ݇ܢܵܐ ܒܫܸܡܝܼ: ܬܵܡܵܐ ܝ݇ܘܸܢ ܒܓܵܘܵܝ...ܡܲܬܲ‌ܝ 20:18).                                                                                                                                                                                                                                                                                                                                                   ܐ݇ܢܵܫܸ̈ܐ ܩܲܕܝܼܫܸ̈ܐ ܘܙܲܕܝܼܩܸ̈ܐ ܡܛܹܐܠܗ݇ܘܼܢ ܠܫܡܲܝܵܐ ܒܐܘܼܪܚܵܐ ܕܡܵܘܬܵܐ: ܤܵܒܵܒ ܡܵܘܬܵܐ ܩܲܕ݇ܡ ܫܵܢܸܐܠܗ݇ܘܼܢ ܡܼܢ ܐܲܪܥܵܐ ܠܫܡܲܝܵܐ. ܐܝܼܢܵܐ ܡܵܪܲܢ ܠܵܐ ܐ݇ܤܸܩܠܸܗ ܠܫܡܲܝܵܐ ܒܐܘܼܪܚܵܐ ܕܡܵܘܬܵܐ ܤܵܒܵܒ(ܩܸܡܠܸܐ ܡܼܢ ܓܵܘܵܐ ܕܡܝܼܬܸ̈ـܐ). ܐ݇ܡܸܪܘܼܢ ܝܗ݇ܘܼܕܵܝܸ̈ܐ (ܕܡܫܝܼܚܵܐ ܗܲܠ ܥܵܠܲܡ ܒܸܬ ܦܵܐܸܫ...ܝܘܼܚܲܢܵܢ 34:12). ܡܵܪܲܢ ܐ݇ܬܸܐܠܸܗ ܠܐܲܪܥܵܐ ܩܲܕ ܦܵܪܸܩ ܗ݇ܘ̣ܵܐܠܲܢ ܡܼܢ ܚܛܝܼܬܵܐ: ܘܒܵܬ݇ܪ ܕܡܘܼܟܡܸܠܸܗ ܠܦܘܼܪܩܵܢܲܢ ܒܨܠܲܒܼܬܵܐ ܘܡܵܘܬܵܐ ܐ݇ܤܸܩܠܸܗ ܠܫܡܲܝܵܐ ܡܐܵܝܟܵܐ ܕܐ݇ܬܸܐܠܸܗ.                                                                      ܐܸܢ ܟܸܐ ܗܲܡܸܢܵܚ ܕܐܲܚܢܵܢ ܡܼܢ ܒܵܬ݇ܪ ܡܵܘܬܲܢ ܒܸܬ ܐܲܤܩܵܚ ܠܫܡܲܝܵܐ ܐܵܝܟܵܐ ܕܐܝܼܠܸܗ ܡܫܝܼܚܵܐ: ܒܲܤ ܩܵܡܘܼܕܝܼ ܡܫܝܼܚܵܐ ܒܸܬ ܦܵܐܸܫ ܥܲܠ ܐܲܪܥܵܐ ܠܥܵܠܲܡ؟. ܝܵܢ ܕܵܐܟܼܝܼ ܒܸܬ ܐܵܙܵܠ݇ܚ ܐܲܚܢܵܢ ܠܫܡܲܝܵܐ ܕܠܵܐ ܡܫܝܼܚܵܐ؟.   ܡܵܪܲܢ ܐ݇ܤܸܩܠܸܗ ܠܫܡܲܝܵܐ ܤܵܒܵܒ ܡܼܢ ܫܡܲܝܵܐ ܨܠܝܼܠܸܗ.                                   ܝܸܤܘܼܪܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܒܫܡܲܝܵܐ ܐܝܼܠܸܗ ܒܐܲܪܒܥܵܐ ܥܲܠ̈ܠܵܬܼܵـܐ. 1 ܗ̇ܘ ܐܝܼܠܸܗ ܒܵܪܘܼܝܵܐ ܕܫܡܲܝܵܐ.   2 ܨܠܝܼܠܸܗ ܡܼܢ ܫܡܲܝܵܐ ܒܥܸܕܵܢܵܐ ܕܡܸܬܼܓܲܫܡܵܢܘܼܬܸܗ. 3 ܐ݇ܤܸܩܠܸܗ ܠܫܡܲܝܵܐ. 4 ܒܸܬ ܐܵܬܸܐ ܡܼܢ ܫܡܲܝܵܐ ܓܵܘ ܐ݇ܬܵܝܬܸܗ ܬܪܲܝܵܢܝܼܬܵܐ. ܘܗܲܕܟܼܵܐ ܟܸܐ ܡܵܘܕܝܼ ܒܢܘܼܢܸ̈ܐ ܕܥܹܕܬܵܐ ܩܲܕܝܼܫܬܵܐ ܓܵܘ ܨܘܼܪܬܵܐ ܕܗܲܝܡܵܢܘܼܬܵܐ: 1 ܗܲܝܡܘܼܢܵܐ ܝ݇ܘܵܚ ܒܐܲܠܵܗܵܐ ܒܵܒܵܐ ܥܵܒܼܘܼܕܵܐ ܕܟܠܵܝ̈ܗ‌ܝ ܐܵܢܝܼ̈ ܕܦܵܝܫܝܼ ܚܸܙܝܸ̈ܐ ܘܕܠܸܐ ܦܵܝܫܝܼ ܚܸܙܝܸ̈ܐ. 2 ܒܘܼܬ ܚܵܬܸܪ ܕܝܼܵܢ ܒܢܲܝ̈ـܢܵܫܵܐ ܨܠܝܼܠܸܗ ܡܼܢ ܫܡܲܝܵܐ. 3 ܦܝܼܫܠܸܗ ܩܒܼܝܼܪܵܐ ܘܩܸܡܠܸܗ ܘܐ݇ܤܸܩܠܸܗ ܠܫܡܲܝܵܐ. 4 ܗܕܝܼܪܵܐ ܝ݇ܠܸܗ ܠܸܐ݇ܬܵܝܵܐ ܠܕܝܵܢܵܐ ܠܚܲܝܸ̈ܐ ܘܠܡܝܼܬܸ̈ـܐ. ܘܡܵܪܲܢ ܐܵܗܵܐ ܒܓܵܢܸܗ ܓܸܠܝܵܐܠܸܗ ܐܝܼܡܵܢ ܕܐ݇ܡܸܪܸܗ (ܠܵܐ ܐ݇ܢܵܫܵܐ ܐ݇ܤܸܩܠܸܗ ܠܫܡܲܝܵܐ: ܐܸܠܵܐ ܗ̇ܘ ܕܨܠܝܼܠܸܗ ܡܼܢ ܫܡܲܝܵܐ ܒܪܘܼܢܵܐ ܕܐ݇ܢܵܫܵܐ: ܗ̇ܘ ܕܐܝܼܠܸܗ ܒܫܡܲܝܵܐ..ܝܘܼܚܲܢܵܢ 13:3). ܡܵܪܲܢ ܐ݇ܤܸܩܠܸܗ ܠܫܡܲܝܵܐ ܡܼܢ ܤܵܒܵܒ ܬܘܼܡܸܡܠܸܗ ܦܸܠܚܵܢܸܗ ܕܥܲܠ ܐܲܪܥܵܐ. ܐ݇ܤܸܩܠܸܗ ܠܗ̇‌ܝ ܫܡܲܝܵܐ ܕܠܹܐ ܗ݇ܘ̣ܵܐ ܦܪܝܼܫܵܐ ܡܸܢܘܿܗ̇ ܐܘܼܦ ܒܥܸܕܵܢܵܐ ܕܡܸܬܼܓܲܫܡܵܢܘܼܬܸܗ ܘܨܠܵܝܬܸܗ ܥܲܠ ܐܲܪܥܵܐ، ܙܲܗܪܝܼܪܸ̈ܐ ܕܐܲܠܵܗܘܼܬܸܗ ܟܸܐ ܡܵܐܠܝܼ ܠܫܡܲܝܵܐ ܘܐܲܪܥܵܐ. ܘܐܝܼܡܵܢ ܕܨܠܝܼܠܸܗ ܠܐܲܪܥܵܐ، ܗܲܪ ܒܗ̇‌ܝ ܥܸܕܵܢܵܐ ܓܵܘ ܫܡܲܝܵܐ ܗ݇ܘ̣ܵܐ. ܘܐܝܼܡܵܢ ܕܐ݇ܤܸܩܠܸܗ ܠܫܡܲܝܵܐ ܗܲܪ ܒܗ̇‌ܝ ܥܸܕܵܢܵܐ ܥܲܠ ܐܲܪܥܵܐ ܗ݇ܘ̣ܵܐ. ܤܵܒܵܒ ܕܵܐܟܼܝܼ ܕܓܵܘ ܫܡܲܝܵܐ ܐܘܼܦ ܒܐܲܪܥܵܐ.               ܩܵܡܘܼܕܝܼ ܐ݇ܤܸܩܠܸܗ ܠܫܡܲܝܵܐ؟                                           ܩܵܐ ܚܲܡܫܵܐ ܗܲܓ̰ܲܬܸ̈ـܐ (ܐ) ܩܵܐ ܕܒܒܲܪܢܵܫܘܼܬܸܗ ܡܩܵܒܸܠ ܗ݇ܘ̣ܵܐ ܫܘܼܒܼܚܵܐ ܕܐܝܼܬ ܗ݇ܘ̣ܵܐܠܸܗ ܒܐܲܠܵܗܘܼܬܸܗ ܥܲܡ ܒܵܒܵܐ ܡܼܢ ܩܲܕ݇ܡ ܟܠܵܝ̈ܗ‌ܝ ܥܵܠܡܸ̈ܐ. (ܒ) ܩܵܐ ܕܡܫܵܕܸܪ ܗ݇ܘ̣ܵܐ ܪܘܼܚܵܐ ܕܩܘܼܕܫܵܐ. (ܓ) ܩܵܐ ܕܡܬܲܓܒܸܪ ܗ݇ܘ̣ܵܐ ܟܠ ܡܸܢܕܝܼ ܒܘܼܬ ܬܲܡܵܡܲܬܘܼܬܵܐ ܕܥܸܕܬܸܗ. (ܕ) ܩܵܐ ܕܡܗܵܕܸܪ ܗ݇ܘ̣ܵܐ ܕܘܼܟܬܵܐ ܩܵܐ ܕܝܼܵܢ. (ܗ) ܩܲܕ ܗܵܘܸܐ ܗ݇ܘ̣ܵܐ ܓܵܘ ܫܡܲܝܵܐ ܓܘܼܪܵܐ ܕܟܵܗܢܸ̈ܐ ܕܕܝܼܵܢ. (ܚܙܝܼ ܟܬܵܒܼܵܐ ܕܝܘܼܠܦܵܢܵܐ ܡܫܝܼܚܵܝܵܐ: ܩܵܬܝܼܩܝܼܤܡܘܼܤ. ܦܵܬܵܐ: ܡܗ، 45).                                                                                                                                                                                                                                                                                                                    ܩܵܡܘܼܕܝܼ ܐ݇ܤܸܩܠܸܗ ܒܝܵܘܡܵܐ ܕܚܲܡܫܲܒܫܲܒܵܐ؟                                 ܐܸܢ ܩܵܪܵܚ ܓܵܘ ܬܲܫܥܝܼܬܵܐ ܕܒܪܵܝܬܵܐ ܕܒܪܝܼܬܵܐ ܓܵܘ ܤܸܦܪܵܐ ܩܲܕ݇ܡܵܝܵܐ: ܒܸܬ ܚܵܙܵܚ ܕܝܵܘܡܵܐ ܕܚܲܡܫܲܒܫܲܒܵܐ ܐܝܼܠܸܗ ܗ̇ܘ ܝܵܘܡܵܐ ܩܲܕ݇ܡܵܝܵܐ ܕܒـــــܝܼܸــܗ  ܓܼܠܸܒܠܵܗ̇ ܚܲܕ݇ ܡܼܢ ܒܸܪ̈ܝܵܬܸـܐ ܕܐܲܠܵܗܵـــــــــܐ ܥܲܠ ܢܵܬܘܼܥܘܼܬܵــــــــــــܐ ܐܲܪܥܵܢܵــــــــــــــــܝܬܵــܐ (الضغط الجوي) ܤܵܒܵܒ ܒܝܵܘܡܵܐ ܕܚܲܡܫܵܐ ܒܪܸܐܠܸܗ ܐܲܠܵܗܵܐ ܠܦܵܪܲܚܬܵܐ ܘܐ݇ܡܸܪܸܗ ܒܦܘܼܡܸܗ ܩܲܕܝܼܫܵܐ: ܘܦܲܪܚܵܐ ܦܵܪܲܚܬܵܐ ܒܪܸܫ ܐܲܪܥܵܐ. ܘܒܐܵܗܵܐ ܡܫܲܪܘܼܪܵܐ ܗ݇ܘ̣ܵܐ ܕܪܘܼܚܵܐ ܕܒܲܪܢܵܫܵܐ ܒܸܬ ܦܲܪܚܵܗ̇ ܐܲܝـــــــــܟܼ ܦܵܪܲܚܬܵــــــــــــــــܐ ܘܡܲܛܝܵܗ̇ ܠܫܡܲܝܵܐ ܐܲܝܟܵܐ ܕܐܝܼܠܸܗ ܡܫܝܼܚܵܐ (ܐܲܝܟܵܐ ܕܐܝܼܘܸܢ ܐܵܢܵـــــــــܐ ܐܘܼܦ ܐܲܚܬܘܼܢ ܒܸܬ ܗܵܘܝܼܬܘܼܢ...ܝܘܼܚܲܢܵܢ 2:14-3).                                     ܓܵܘ ܨܠܘܼܬܵܐ ܕܨܲܦܪܵܐ ܕܚܲܕܒܫܲܒܵܐ ܕܒܵܬܲܪ ܤܘܼܠܵܩܵܐ ܦܝܵܫܵܐ ܝ݇ܠܵܗ̇ ܐ݇ܡܝܼܪܬܵܐ (ܘܐܲܤܸܩ ܥܲܡܸܗ ܒܐ݇ܪܵܙܵܐ ܠܟܠܵܗ̇ ܓܒܼܝܼܠܬܵܐ ܐ݇ܢܵܫܵܝܬܵܐ...ܚܙܝܼ ܚܘܼܕܪܵܐ ܦܵܬܵܐ: ܬܪܦܗ).                                        ܕܵܐܟܼܝܼ ܒܸܬ ܐܲܤܩܵܚ؟                                                 ܒܸܬ ܐܲܤܩܵܚ ܥܲܠ ܓܘܼܠܦܵܢܸ̈ܐ ܕܪܘܼܚܵܐ ܘܒܸܬ ܓܼܵܠܒܵܚ ܠܢܵܬܘܼܥܘܼܬܵܐ ܐܲܪܥܵܢܵܝܬܵܐ (الضغط الجوي). ܘܗ̇ܘ ܕܠܝܼܬܠܸܗ ܗܲܝܡܵܢܘܼܬܵܐ ܒܸܬ ܦܵܐܸܫ ܥܲܠ ܐܲܪܥܵܐ ܤܵܒܵܒ ܦܲܓܼܪܵܐ ܗܘܼܠܵܢܵܝܵܐ ܠܹܐ ܡܵܨܸܐ ܠܸܐ݇ܤܵـܩܵܐ ܠܫܡܲܝܵܐ...

 ܡܵܪܲܢ ܓܵܘ ܫܡܲܝܵܐ ܟܸܐ ܝܵܗ݇ܒܸܠ ܩܵܐ ܒܵܒܵܐ ܨܘܼܪܬܵܐ ܟܵܡܝܼܠ ܘܕܟܼܝܼܬܵܐ ܕܒܲܪܢܵܫܵܐ ܡܼܢ ܒܵܬ݇ܪ ܕܦܝܼܫܵܐ ܗ݇ܘ̣ܵܐ ܡܘܼܚܪܸܒܼܵܐ ܒܚܛܝܼܬܵܐ ܕܐܵܕܵܡ ܩܲܕ݇ܡܵܝܵܐ. ܕܵܐܟܼܝܼ ܕܐ݇ܡܸܪܸܗ ܦܵܘܠܘܼܤ ܫܠܝܼܚܵܐ (ܤܵܒܵܒ ܐܲܝܟܼ ܕܐܵܗܵܐ ܓܘܼܪܵܐ ܕܟܵܗܢܸ̈ܐ ܚܫܝܼܚܵܐ ܗ݇ܘ̣ܵܐ ܐܸܠܲܢ: ܕܸܟܼܝܵܐ: ܕܠܵܐ ܒܝܼܫܘܼܬܵܐ: ܕܠܵܐ ܡܘܼܡܵܐ ܦܪܝܼܫܵܐ ܡܼܢ ܚܲܛܵܝܸ̈ܐ: ܘܡܘܼܪܡܵܐ ܠܥܸܠ ܡܼܢ ܫܡܲܝܵܐ...ܥܸܒܼܪ̈ܵܝܸܐ 26:7).                                                         ܡܵܪܲܢ ܐ݇ܤܸܩܠܸܗ ܩܲܕ ܡܗܵܕܸܪ ܕܘܼܟܵܐ ܩܵܐ ܕܝܼܵܢ. ܕܠܵܐ ܫܸܟ ܪܝܼܓܵܐ ܟܸܐ ܡܗܵܕܸܪ ܕܘܼܟܵܐ ܩܵܐ ܡܵܪܸܗ. ܐܝܼܢܵܐ ܓܵܘ ܕܐܵܗܵܐ ܐ݇ܤܘܼܠܵܩܵܐ، ܒܸܚܙܵܝܵܐ ܝ݇ܘܵܚ ܕܡܵܪܲܢ ܡܗܵܕܘܼܪܵܐ ܝ݇ܠܸܗ ܕܘܼܟܵܐ ܩܵܐ ܪ̈ܝܼܓܵܘܵܬܸܗ: ܗܲܪ ܐܲܝܟܼ ܕܥܒܸܕܠܸܗ ܒܚܲܡܫܲܒܫܲܒܵܐ ܕܦܸܨܚܵܐ ܐܝܼܡܵܢ ܕܚܘܼܠܸܠܸܗ ܐܲܩܠܵܬܸܗ ܕܬܲܠܡܝܼܕܼܘܼ̈ܗ‌ܝ. ܡܵܪܲܢ ܠܵܐ ܐ݇ܡܸܪܸܗ ܐܵܢܵܐ ܒܸܪ݇ܚܵܫܵܐ ܝ݇ܘܸܢ ܒܚܲܝܠܵܐ ܕܐܲܠܵܗ‌ܝܼ ܝܵܢ ܕܒܵܒܝܼ: ܐܸܠܵܐ ܐ݇ܡܸܪܸܗ: ܐܵܢܵܐ ܒܸܪ݇ܚܵܫܵܐ ܝ݇ܘܸܢ: ܘܒܐܵܗܵܐ ܡܲܕܥܘܼܝܵܐ ܗ݇ܘ̣ܵܐ ܕܐܲܠܵܗܵܐ ܗ݇ܘ̣ܵܐ ܘܐܝܼܬ ܗ݇ܘ̣ܵܐܠܸܗ ܫܘܼܠܛܵܢܵܐ. ܘܟܡܵܐ ܒܲܤܝܼܡܬܵܐ ܒܸܬ ܗܵܘܝܵܐ ܗ̇‌ܝ ܕܘܼܟܵܐ ܕܡܵܪܲܢ ܒܓܵܢܸܗ ܒܸܬ ܡܗܵܕܸܪܵܐ ܩܵܬܲܢ!!! ܕܵܐܟܼܝܼ ܕܐ݇ܡܸܪܸܗ ܫܠܝܼܚܵܐ (ܤܵܒܵܒ ܒܸܕܥܵܝܵܐ ܝ݇ܘܵܚ: ܕܐܸܢ ܒܲܝܬܲܢ ܕܒܐܲܪܥܵܐ ܐܵܗܵܐ ܡܲܫܟܢܵܐ ܦܵܐܸܫ ܤܬܝܼܪܵܐ: ܐܝܼܢܵܐ ܐܝܼܬܠܲܢ ܒܸܢܝܵܢܵܐ ܕܡܼܢ ܐܲܠܵܗܵܐ: ܒܲܝܬܵܐ ܕܠܵܐ ܦܸܠܚܵܢܵܐ ܕܐܝܼܕܵܬܸ̈ـܐ ܒܫܡܲܝܵܐ ܠܥܵܠܲܡ...2ܩܘܿܪ̈ܲܢܬܵܝܸܐ 1:5).                                                                                                                                                                                                                                                                                                                                       ܡܵܪܲܢ ܐ݇ܤܸܩܠܸܗ ܠܫܡܲܝܵܐ ܩܲܕ ܡܵܪܸܡ ܠܠܸܒܵܘܵܬܲܢ ܘܪܸܥܝܵܢܲܢ ܠܫܡܲܝܵܐ. ܐ݇ܤܸܩܠܸܗ ܘܝ݇ܬܸܒܼܠܸܗ ܡܼܢ ܝܲܡܝܼܢܵܐ ܕܒܵܒܵܐ: ܕܵܐܟܼܝܼ ܕܩܲܕ݇ܡ ܚܵܙܸܐܠܸܗ ܐܸܤܛܲܦܵܢܘܼܤ ܡܫܲܡܫܵܢܵܐ ܒܥܸܕܵܢܵܐ ܕܤܵܗܕܘܼܬܸܗ. ܡܵܪܲܢ ܓܵܘ ܡܸܬܼܓܲܫܡܵܢܘܼܬܸܗ ܨܠܝܼܠܸܗ ܡܼܢ ܫܘܼܒܼܚܵܐ ܘܐܝܼܩܵܪܵܐ ܕܐܝܼܬ ܗ݇ܘ̣ܵܐܠܸܗ. ܘܓܵܘ ܐ݇ܤܘܼܠܵܩܸܗ ܕܸܪܸܗ ܠܫܘܼܒܼܚܵܐ ܘܐܝܼܩܵܪܵܐ ( ܐ݇ܡܸܪܸܗ ܡܵܪܝܵܐ ܠܡܵܪܝܼ: ܝ݇ܬܘܼܒܼ ܠܝܲܡܝܼܢܝܼ ܗܲܠ ܕܡܲܬܒܸܢ ܕܸܫ̃ܡܸܢܘܼܟܼ ܟܘܼܒܼܫܵܐ ܠܐܲܩܠܘܼܟܼ) ܗܲܕܟܼܵܐ: ܒܘܼܬ ܐܲܢܸܢܩܵܝܘܼܬܵܐ ܕܐܵܗܵܐ ܢܒܼܝܼܘܼܬܵܐ ܕܐܝܼܬܠܵܗ̇ ܝܸܤܘܼܪܵܐ ܒܤܘܼܠܵܩܵܐ ܕܡܵܪܲܢ: ܦܝܼܫܠܵܗ̇ ܡܘܼܕܟܼܸܪܬܵܐ (6) ܓܵܗܸ̈ܐ ܓܵܘ ܟܬܵܒܼܵܐ ܩܲܕܝܼܫܵܐ     (ܡܲܙܡܘܼܪܵܐ 1:110) (ܡܲܬܲ‌ܝ 44:22) (ܡܲܪܩܘܼܤ 36:12) (ܠܘܼܩܵܐ 42:20) (ܦܪܲܟ 34:2) (ܥܸܒܼܪ̈ܵܝܸܐ 13:11). ܘܒܘܼܬ ܕܐܵܗܵܐ ܥܹܐܕܼܵܐ ܕܤܘܼܠܵܩܵܐ ܓܵܘ ܤܘܼܪܓܵܕܵܐ ܕܥܹܕܬܵܐ ܟܸܐ ܢܵܦܸܠ ܒܫܵܒܼܘܼܥܵܐ (6) ܕܩܝܵܡܬܵـܐ. ܓܵܘ ܫܵܒܼܘܼܥܸ̈ܐ ܕܩܝܵܡܬܵܐ ܥܸܕܬܵܐ ܘܒܢܘܼܢ̈ܘܿܗ̇ ܟܸܐ ܡܙܲܝܚܝܼ ܒܩܝܵܡܬܵܐ ܕܡܵܪܲܢ ܘܟܸܐ ܡܗܲܕܪܝܼ ܓܵܢܵܝܗ‌ܝ ܠܙܵܝܘܼܚܸܐ ܒܤܘܼܠܵܩܵܐ ܕܡܵܪܲܢ ܩܲܕ ܥܲܡܸܗ ܐܲܤܩܝܼ ܠܫܡܲܝܵܐ.                                  ܘܒܘܼܬ ܕܐܵܗܵܐ ܐܲܒܼܵܗܵܬܲܢ ܟܸܐ ܡܤܲܩܠܝܼ ܗ݇ܘ̤ܵܘ ܠܒܢܵܬܸ̈ـܐ ܙܥܘܼܪܸ̈ܐ ܒܠܒܼܸܫܬܵܐ ܕܟܵܠܘܼܢܝܵܬܸ̈ـܐ ܘܚܵܕܼܪܝܼ ܗ݇ܘ̤ܵܘ ܠܒܲܬܘܵܬܸ̈ـܐ ܠܸܛܥܵܝܵܐ ܒܵܬ݇ܪ ܚܸܬܢܵܐ. ܘܐܵܗܵܐ ܡܲܠܘܼܦܵܢ ܐܝܼܠܵܗ̇ ܕܐܘܼܦ ܐܲܚܢܵܢ ܐܸܢ ܛܵܥܵܚ ܒܵܬ݇ܪ ܡܫܝܼܚܵܐ ܚܸܬܢܵܐ: ܓܵܪܲܓ ܗܵܘܵܚ ܐܲܝܟܼ ܕܵܐܢܝܼ ܒܢܵܬܸ̈ـܐ: ܙܥܘܼܪܸ̈ܐ ܘܕܸܟܼܝܸ̈ܐ ܕܠܸܒܵܐ ܩܲܕ ܡܲܫ̄ܟ̰ܚܲܚܠܸܗ.            ܤܘܼܠܵܩܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܠܫܡܲܝܵܐ: ܚܸܩܪܵܐ ܝ݇ܠܸܗ ܘܐܝܼܩܵܪܵܐ ܩܵܐ ܟܠܸܗ ܓܸܢܤܵܐ ܕܒܢܲܝ̈ـܢܵܫܵܐ: ܤܵܒܵܒ ܡܵܪܲܢ ܒܐ݇ܤܘܼܠܵܩܸܗ ܡܝܘܼܩܸܪܸܗ ܠܦܲܓܼܪܵܐ ܐ݇ܢܵܫܵܝܵܐ ܒܐܲܪܒܥܵܐ ܪ̈ܲܗܛܸܐ: (1) ܐܝܼܡܵܢ ܕܩܲܕ݇ܡ ܒܵܪܸܐܠܸܗ. (2) ܐܝܼܡܵܢ ܕܫܩܸܠܸܗ ܦܲܓܼܪܵܐ ܐܲܝܟܼ ܓܘܼܫܡܲܢ. (3) ܐܝܼܡܵܢ ܕܡܘܼܩܸܡܠܸܗ ܡܼܢ ܓܵܘܵܐ ܕܡܝܼܬܸ̈ـܐ. (4) ܐܝܼܡܵܢ ܕܡܘܼܤܸܩܠܸܗ ܠܫܡܲܝܵܐ. ܘܩܵܐ ܡܝܵܩܲܪܬܵܐ ܒܘܼܫ ܙܵܘܕܵܐ ܕܐܵܗܵܐ ܦܲܓܼܪܵܐ: ܡܵܪܲܢ ܒܸܬ ܢܵܛܸܪܸܗ ܠܥܵܠܲܡ܀܀܀

ܡܫܡܫܢܐ: ܝܘܤܦ ܢܘܼܪܘܼ

 

                                                                              











اربيل عينكاوه

  • رقم الموقع: 07517864154
  • رقم إدارة القناة: 07504155979
  • البريد الألكتروني للإدارة:
    info@ishtartv.com
  • البريد الألكتروني الخاص بالموقع:
    article@ishtartv.com
جميع الحقوق محفوظة لقناة عشتار الفضائية © 2007 - 2020
Developed by: Bilind Hirori
تم إنشاء هذه الصفحة في 2.6342 ثانية