ܒܝܕ ܡܫܡܫܢܐ: ܝܘܤܦ ܢܘܼܪܘܼ
ܤܘܼܓܼܦܵܢܵܐ: ܝܵܥܢܝܼ: ܡܲܪܥܵܐ، ܟܘܼܪܗܵܢܵܐ.. ܐܸܕܝܘܼܡ ܐܵܗܵܐ ܤܘܼܓܼܦܵܢܵܐ، ܒܸܫܪܵܝܵܐ ܝَܠܸܗ ܓܵܘ ܟܲܪܡܵܐ ܕܬܸܫܡܸܫܬܵܐ: ܐܸܢ ܓܵܘ ܫܲܘܬܵܦܘܼܬܵܐ ܝܵܢ ܥܹܕܬܵܐ ܝܵܢ ܒܲܝܬܵܐ. ܡܲܚܪܘܼܒܼܵܐ ܝَܠܸܗ ܐܲܝܟܼ ܩܲܡܨܵܐ ܕܟܸܐ ܡܲܚܪܸܒܼ ܠܟܲܪ̈ܡܵܢܸܐ. ܟܸܐ ܡܵܚܸܐ ܠܟܠ ܩܝܼܢܘܼܬܵܐ ܘܠܟܠ ܛܥܘܼܢܬܵܐ، ܘܠܸܐ ܫܵܒܼܸܩܠܵܗ̇ ܫܒܼܘܼܩ ܡܼܢ ܐܲܪܥܵܐ ܤܦܝܼܩܬܵܐ. ܗܲܕܟܼܵܐ: ܐܘܼܦ ܬܸܫܡܸܫܬܵܐ ܕܪܘܼܚܵܐ ܟܸܐ ܡܵܚܸܐ ܠܵܗ̇ ܚܪܵܒܼܵܐ ܘܟܸܐ ܬܵܠܸܚ ܠܫܘܼܪ̈ܵܢܸܐ ܕܪܘܼܚܵܐ: ܐܸܢ ܠܵܐ ܦܵܝܫܵܗ̇ ܢܛܝܼܪܬܵܐ (ܒܫܸܗܲܪܬܵܐ ܘܨܵܘܡܵܐ ܘܨܠܘܼܬܵܐ). ܡܲܟܤܸܠܵܢܘܼܬܵܐ ܘܫܸܢܬܵܐ ܕܢܵܛܘܼܪܸ̈ܐ، ܥܸܠܬܵܐ ܝَܠܵܗ̇ ܩܲܕَܡܵܝܬܵܐ ܕܙܲܒܛܵܢܬܵܐ ܕܚܲܝܠܵܘܵܬܸ̈ܐ ܕܚܸܫܟܵܐ ܠܚܲܩܠܵܐ ܕܬܸܫܡܸܫܬܵܐ ܘܠܓܘܼܡܵܐ ܕܩܲܕܝܼܫܘܼܬܵܐ. ܘܵܝ ܥܲܠܲܢ: ܐܸܢ ܐܲܚܢܵܢ ܐܝܼܘܵܚ ܥܸܠܬܵܐ: ܕܵܐܟܼܝܼ ܒܸܬ ܓ̰ܲܘܸܒܵܚܠܸܗ؟ ܘܕܵܐܟܼܝܼ ܒܸܬ ܗܲܡܙܸܡܵܚ؟ ܠܝܼܬܠܲܢ ܫܒܼܘܼܩ ܡܼܢ ܤܲܩܸ̈ܐ ܘܩܸܛܡܵܐ ܘܒܸܟܼܝܵܐ ܘܨܵܘܡܵܐ ܘܨܠܘܼܬܵܐ. ܒܵܟܼܝܼ ܟܵܗ̈ܢܸܐ ܚܸܠܡܲܵܬܟܵܪܸ̈ܐ ܕܡܲܕܒܚܵܐ، ܘܡܲܩܘܸܚܝܼ ܘܐܲܡܪܝܼ (ܡܪܵܚܸܡ ܝܵܐ ܡܵܪܝܵܐ) ܩܲܕ ܡܪܵܚܸܡ ܥܲܠ ܛܵܝܸܦܸܗ ܘܥܲܠ ܦܸܤܩܵܐ ܕܡܲܪܥܝܼܬܸܗ. ܘܡܼܢ ܡܲܚܦܲܵܠܬܵܐ ܕܢܵܛܘܼܪܸ̈ܐ ܥܲܠ ܒܲܝܬܵܐ، ܥܒܸܪܸܗ ܐܵܗܵܐ ܤܘܼܓܼܦܵܢܵܐ (ܡܲܪܥܵܐ) ܡܼܢ ܓܘܼܡܵܐ ܠܓܘܼܡܵܐ: ܘܡܘܼܦܠܸܚܠܸܗ ܠܟ̰ܲܟܘܼܗܝ ܡܲܡܝܸܬܵܢܸ̈ܐ ܗܲܠ ܕܡܛܸܐܠܸܗ ܠܦܲܥܘܵܐ ܩܝܼܢܵܐ ܘܫܘܼܪܸܐܠܸܗ ܠܡܲܚܪܘܼܒܸܐ ܠܛܥܘܼܢܝܵܬܸ̈ܐ ܛܝܼܡܵܢܸ̈ܐ. ܘܐܵܗܵܐ ܡܲܪܥܵܐ ܡܚܸܐܠܸܗ ܠܦܘܼܩܕܵܢܵܐ ܓܘܼܪܵܐ ܘܩܲܕَܡܵܝܵܐ (ܚܘܼܒܵܐ). ܦܪܸܫܠܸܗ ܒܹܝܠ ܠܸܒܵܘܵܬܸ̈ܐ ܡܘܼܚܸܒܸ̈ܐ.. ܘܩܘܼܛܩܸܛܠܸܗ ܠܚܲܕَ ܦܲܓܼܪܵܐ ܠܤܵܗَܡܸ̈ܐ. ܐܵܗܵܐ ܤܘܼܓܼܦܵܐ (ܡܲܪܥܵܐ) ܦܪܸܤܠܸܗ ܓܵܘ ܥܹܕܬܵܐ ܒܙܲܒܼܢܵܐ ܕܫܠܝܼܚܸ̈ܐ: ܘܡܚܘܼܠܸܢܸܗ ܓܵܘ ܕܘܼܟܵܢܸ̈ܐ ܙܲܒܘܼܢܸ̈ܐ ܕܥܹܕܬܵܐ، ܓܵܘ ܪܸܐܙܸܐ ܕܫܲܪ̈ܘܵܝܸܐ ܕܗܲܝܡܵܢܘܼܬܵܐ ܒܗ̇ܝ ܥܕܵܢܵܐ. ܘܨܸܒܥܵܐ ܕܤܵܛܵܢܵܐ ܟܸܐ ܡܲܓ̰ܘܸܓ̰ܵܐ ܗَܘ̣ܵܐ ܠܐܵܗܵܐ ܡܲܪܥܵܐ ܩܵܐ ܕܪܵܝܵܐ ܦܘܼܠܵܓܼܸ̈ܐ ܘܠܬܲܠܘܼܩܸܐ. ܐܝܼܢܵܐ ܠܵܐ ܡܨܸܐܠܸܗ ܠܩܲܪܒܘܼܢܸܐ ܠܗ̇ܘ ܓܹܝܢَܒܵܐ ܕܫܠܝܼܚܸ̈ܐ. ܠܵܐ ܡܨܸܐܠܸܗ ܠܸܥܒܵܪܵܐ ܓܵܘ ܚܘܼܒܵܝܗܝ ܫܠܝܼܚܵܝܵܐ ܘܐܸܘܲܢܓܵܠܵܝܵܐ. ܤܵܒܵܒ ܐܝܼܗَܘ̤ܵܘ ܚܲܕَ ܓܵܢܵܐ ܘܚܲܕَ ܠܸܒܵܐ. ܦܵܘܠܘܼܤ ܫܠܝܼܚܵܐ ܦܠܸܫܠܸܗ ܒܚܲܝܠܵܐ ܕܲܪܩܘܼܒܼܠ ܕܐܵܗܵܐ ܡܲܪܥܵܐ ܩܲܕ ܠܵܐ ܦܵܪܸܤ ܗَܘ̣ܵܐ ܓܵܘ ܥܹܕܬܵܐ ܘܐَܡܸܪܸܗ (ܤܵܒܵܒ ܗܸܫ ܦܲܓܼܪܵܐ ܝَܬܘܼܢ: ܤܵܒܵܒ ܟܲܕ ܐܝܼܬ ܓܵܘܘܿܟܼܘܿܢ ܒܲܚܸܠܵܢܘܼܬܵܐ: ܘܡܲܩܪܵܨܘܼܬܵܐ: ܘܕܘܼܒܵܪ̈ܘܼܝܵܬܸܐ: ܠܹܐ ܝَܬܘܼܢ ܦܲܓܼܪ̈ܵܢܸܐ ܘܐܲܝܟܼ ܒܸܪܢܵܫܵܐ ܒܸܚܕܵܪܵܐ؟ ܤܵܒܵܒ ܐܝܼܡܵܢ ܕܐܵܡܸܪ ܚܲܕَ: ܐܵܢܵܐ ܕܦܵܘܠܘܼܤ ܝܼܘܸܢ: ܘܐَܚܸܪَܢܵܐ: ܐܵܢܵܐ ܕܐܲܦܵܠܘܿ ܝܼܘܸܢ: ܠܹܐ ܝَܬܘܼܢ ܐَܢܵܫܸ̈ܐ؟ ܒܲܤ ܡܵܢܝܼ ܝَܠܸܗ ܐܲܦܵܠܘܿ؟ ܘܡܵܢܝܼ ܝَܠܸܗ ܦܵܘܠܘܼܤ؟ ܐܸܠܵܐ ܚܸܠܡܲܬܟܵܪܸ̈ܐ ܕܒܝܼܵܝܗܝ ܗܘܼܡܸܢܘܿܟܼܘܿܢ: ܘܠܟܠ ܚܲܕَ ܐܲܝܟܼ ܕܝܘܼܗَܒܸܠܸܗ ܐܸܠܸܗ ܡܵܪܝܵܐ. ܐܵܢܵܐ ܢܨܸܒܼܠܝܼ، ܘܐܲܦܵܠܘܿ ܡܘܼܫܬܸܐܠܸܗ: ܐܸܠܵܐ ܐܲܠܵܗܵܐ ܓܘܼܪܘܸܤܠܸܗ. ܒܲܤ: ܠܵܐ ܗ̇ܘ ܕܢܵܨܸܒܼ ܡܸܢܕܝܼ ܝَܠܸܗ: ܘܠܵܐ ܗ̇ܘ ܕܡܲܫܬܸܐ: ܐܸܠܵܐ ܐܲܠܵܗܵـــــــܐ ܕܟܸܐ ܓܲܪܘܸܤ...1ܩܘܿܪ̈ܲܢܬܵܝܸܐ 3:3-7). ܠܲܐܟܼܵܐ: ܚܸܟܼܡ̱ܬܵܐ ܫܠܝܼܚܵܝܬܵܐ ܓܼܠܸܒܠܵܗ̇ ܠܐܵܗܵܐ ܡܲܪܥܵܐ ܚܲܝܠܵܢܵܐ ܡܼܢ ܫܘܼܪܵܝܵܐ: ܘܡܼܢ ܕܐܵܗܵܐ ܒܸܠܝܵܦܵܐ ܝَܘܵܚ، ܕܗܲܝܡܵܢܘܼܬܵܐ ܫܲܪܝܼܪܬܵܐ ܡܸܬܼܡܲܨܝܵܢܬܵܐ ܝَܠܵܗ̇ ܠܬܒܼܵܪܵܐ ܘܠܛܲܚܛܘܼܚܸܐ ܠܐܵܗܵܐ ܢܸܟܼܠܵܐ ܤܵܛܵܢܵܝܵܐ. ܦܵܘܠܘܼܤ ܫܠܝܼܚܵܐ ܒܸܓܠܵܝܵܐ ܝَܠܸܗ ܠܩܝܼܘܲܢܕܝܼܢܘܼܤ ܕܐܵܗܵܐ ܐܘܼܪܚܵܐ ܥܲܠ ܚܲܝܸ̈ܐ ܪ̈ܘܼܚܵܢܵܝܸܐ ܕܒܢܘܼܢܸ̈ܐ ܕܐܲܠܵܗܵܐ، ܤܵܒܵܒ ܒܸܬ ܫܲܚܠܸܦܵܐ ܠܗَܘܼܢ ܠܦܲܓܼܪ̈ܵܢܵܝܸܐ ܘܒܸܬ ܚܲܕܪܝܼ ܐܲܝܟܼ ܒܢܲܝ̈ـܢܵܫܵܐ. ܝܵܥܢܝܼ: ܒܸܬ ܕܵܝܪܝܼ ܠܒܲܪܢܵܫܵܐ ܥܲܬܝܼܩܵܐ. ܐܵܦܸܢ ܕܗܵܘܝܼ ܫܠܝܼܚܸ̈ܐ ܕܸܟܼܝܸ̈ܐ، ܐܝܼܢܵܐ ܐܸܢ ܦܵܠܛܝܼ ܡܼܢ ܐܘܼܪܚܵܐ ܕܕܸܟܼܝܘܼܬܵܐ، ܒܸܪܚܵܩܵܐ ܝَܢܵܐ ܡܼܢ ܪܘܼܚܵܢܵܝܘܼܬܵܐ ܐܵܦܸܢ ܕܚܲܝܝܼ ܓܵܘ ܨܵܘܡܵܐ ܘܨܠܘܼܬܵܐ، ܘܠܹܐ ܡܵܨܝܼ ܠܦܪܵܡܵܐ ܐܘܼܦ ܠܗܸܡܸܙܡܵܢܸ̈ܐ ܪ̈ܘܼܚܵܢܵܝܸܐ. ܘܐܵܗܵܐ ܡܲܪܥܵܐ: ܟܸܐ ܡܫܲܚܠܸܦ ܠܗَܘܼܢ ܠܦܲܓܼܪ̈ܵܢܵܝܸܐ، ܐܵܦܸܢ ܕܦܵܝܫܝܼ ܚܸܙܝܸ̈ܐ ܪ̈ܘܼܚܵܢܵܝܸܐ، ܘܟܸܐ ܦܵܝܫܝܼ ܡܸܠܝܸ̈ܐ ܡܼܢ ܒܲܚܸܠܵܢܘܼܬܵܐ ܘܟܲܪܒܵܐ ܘܦܘܼܠܵܓܼܵܐ. ܘܐܲܢܸ̈ܐ ܡܲܪ̈ܥܸܐ: ܟܸܐ ܕܵܪܝܼ ܓ̰ܘܼܢܓ̰ܵܪܵܐ ܘܚܪܵܒܼܵܐ ܘܙܲܒܘܼܢܘܼܬܵܐ ܘܬܠܵܩܵܐ ܓܵܘ ܦܲܓܼܪܵܐ ܕܥܹܕܬܵܐ. ܡܘܼܚܸܒܝܼ: ܟܸܐ ܚܲܫܒܸܬ ܒܲܪܢܵܫܵܐ ܕܓܲܢܝܵܢܵܐ ܝَܠܸܗ ܠܚܲܕَ ܓܝܹܢَܒܵܐ، ܘܟܵܪܘܼܒܵܐ، ܠܝܼܬܠܸܗ ܐܲܢܸ̈ܐ ܡܲܪ̈ܥܸܐ؟ ܘܐܸܢ ܐܵܗܵܐ ܩܘܼܘܸܡܠܵܗ̇ ܓܵܘ ܡܗܘܼܝ̈ܡܢܸܐ ܕܕܵܘܪܵܐ ܩܲܕَܡܵܝܵܐ ܕܫܠܝܼܚܘܼܬܵܐ، ܟܲܕ ܥܹܕܬܵܐ ܓܵܘ ܚܲܝܠܘܿܗ̇ ܘܕܸܟܼܝܘܼܬܘܿܗ̇، ܡܘܼܕܝܼ ܒܸܬ ܩܲܘܸܡ ܐܸܢ ܐܸܕܝܘܼܡ ܐܲܢܸ̈ܐ ܡܲܪ̈ܥܸܐ ܡܵܚܝܼ ܠܡܗܘܼܝ̈ܡܢܸܐ ܕܐܲܢܸ̈ܐ ܕܵܘܪܸ̈ܐ؟.. ܒܲܚܸܠܵܢܘܼܬܵܐ ܘܦܘܼܠܵܓܼܸ̈ܐ ܘܟܲܪܒܵܐ: ܡܗܘܼܨܸܠܘܼܢ ܠܪܚܲܩܬܵܐ ܕܡܼܢ ܐܘܼܕܵܠܸ̈ܐ، ܘܬܠܸܚܠܘܼܢ ܠܚܘܼܒܵܐ، ܘܡܘܼܤܠܝܼܠܘܼܢ ܠܐܘܼܕܵܠܸ̈ܐ. ܘܚܲܕَܟܡܵܐ ܦܝܼܫܠܗَܘܼܢ ܩܸܪ̈ܝܸܐ ܒܗܲܪ̈ܵܛܝܼܩܸܐ ܘܒܗܲܝܡܵܢܘܼܝܵܬܸ̈ܐ ܠܵܐ ܫܲܪܝܼܪܸ̈ܐ. ܘܥܲܡ ܟܠ ܕܐܵܗܵܐ ܟܸܐ ܡܫܵܘܬܦܝܼ ܓܵܘ ܩܘܼܕܵܫܸ̈ܐ ܘܢܲܤܒܼܝܼ ܡܼܢ ܐَܪ̈ܵܙܸܐ ܩܲܕܝܼܫܸ̈ܐ ܘܟܸܐ ܡܲܟܪܸܙܝܼ ܘܡܲܠܦܝܼ ܘܗܲܡܙܸܡܝܼ ܒܗܸܡܸܙܡܵܢܸ̈ܐ ܕܐܲܠܵܗܵܐ. ܐܲܠܵܗܵܐ ܟܸܐ ܦܵܠܸܚ ܒܡܸܨܥܵܝܘܼܬܲܢ، ܟܸܐ ܡܲܟܪܸܙ ܒܡܸܨܥܵܝܘܼܬܲܢ، ܘܟܸܐ ܦܵܠܸܚ ܓܵܘܵܢ. ܘܐܸܢ ܡܲܟܝܼܟܼܘܼܬܵܐ ܠܝܼܬ: ܡܲܪܥܵܐ ܕܫܘܼܒܼܗܵܪܵܐ ܟܸܐ ܡܓܲܪܘܸܤ: ܘܤܵܛܵܢܵܐ ܒܘܼܫ ܟܸܐ ܒܲܪܒܸܙ ܠܒܲܪܙܲܪܥܘܼܗܝ ܘܦܸܠܚܵܢܘܼܗܝ ܟܸܐ ܡܓܲܪܘܸܤ. ܐܝܼܢܵܐ ܐܲܠܵܗܵܐ ܟܸܐ ܢܵܛܸܪ ܠܥܸܕܬܸܗ ܡܼܢ ܦܲܚܸ̈ܐ ܕܒܝܼܫܵܐ. ♱ ܡܲܪܥܵܐ ܕܡܲܚܙܵܝܬܵܐ ܕܓܵܢܵܐ... ܐܵܗܵܐ ܝَܠܸܗ ܒܥܸܠܕܒܼܵܒܼܵܐ ܩܲܕَܡܵܝܵܐ ܓܵܘ ܬܸܫܡܸܫܬܵܐ ܕܡܫܝܼܚܵܐ. ܘܓܵܘ ܚܘܼܒܵܐ ܕܡܲܚܙܵܝܬܵܐ ܕܓܵܢܵܐ، ܟܸܐ ܗܵܘܝܵܐ ܟܘܼܤܝܼܬܵܐ (ܛܫܝܼܬܵܐ) ܓܵܢܵܐ ܕܘܼܓܠܵܢܬܵܐ. ܘܐܵܗܵܐ ܟܸܐ ܡܲܪܚܸܩܵܐܠܸܗ ܒܲܪܢܵܫܵܐ ܡܼܢ ܟܠܵܝܗܝ ܛܥܘܼܢܝܵܬܸ̈ܐ ܕܡܫܝܼܚܵܐ. ܘܡܵܪܲܢ ܩܲܕَܡ ܡܵܠܸܦܠܲܢ ܕܗܵܘܵܚ ܙܗܝܼܪܸ̈ܐ ܡܼܢ ܡܲܚܲܒܬܵܐ ܕܓܵܢܵܐ ܓܵܘ ܟܵܪܘܼܙܘܼܬܵܐ ܕܒܪܸܫ ܛܘܼܪܵܐ. ܨܵܝܡܵܚ ܘܡܨܵܠܵܚ ܘܥܲܒܼܕܵܚ ܪ̈ܲܚܡܸܐ، ܐܝܼܢܵܐ ܠܵܐ ܩܲܕ ܦܵܝܫܵܚ ܚܩܝܼܪܸ̈ܐ ܒܒܢܲܝ̈ـܢܵܫܵܐ. ܪܵܒܵܐ ܟܸܐ ܚܵܕܝܼ ܒܗܸܡܸܙܡܵܢܸ̈ܐ ܒܲܛܝܼܠܸ̈ܐ ܕܚܸܩܪܵܐ، ܘܟܸܐ ܬܲܠܩܝܼ ܠܚܲܕܘܼܬܵܐ ܕܫܡܲܝܵܐ، ܟܸܐ ܦܲܫܛܝܼ ܐܝܼܕܵܬܵܝܗܝ ܩܵܐ ܒܢܲܝ̈ـܢܵܫܵܐ ܩܲܕ ܫܲܩܠܝܼ ܡܼܢ ܕܘܼܓܠܸ̈ܐ ܕܐܝܼܬܠܘܼܢ، ܘܟܸܐ ܬܲܠܩܝܼ ܘܚܲܤܪܝܼ ܠܝܵܗَܒܼܵܠܬܵܐ ܕܡܫܝܼܚܵܐ، ܤܵܒܵܒ ܠܹܐ ܡܵܨܝܼ ܠܫܩܵܠܵܐ ܬܪ̈ܵܝ ܗܵܩܸ̈ܐ!!! ܦܪ̈ܝܼܫܸܐ: ܐܝܼܡܵܢ ܕܤܦܸܩܠܗَܘܼܢ ܡܼܢ ܪܘܼܚܵܐ ܘܗܘܸܐ ܠܗَܘܼܢ ܐܲܝܟܼ ܩܲܒܼܪ̈ܵܘܵܬܸܐ ܡܸܠܝܸ̈ܐ ܓܲܪ̈ܡܸܐ ܚܡܝܼܩܸ̈ܐ، ܫܘܼܪܸܐ ܠܗَܘܼܢ ܡܤܲܩܘܼܠܸܐ ܠܒܲܕܲܪ ܒܪ̈ܲܢܓܸܐ ܦܪ̈ܝܼܫܸܐ ܦܪ̈ܝܼܫܸܐ ܩܲܕ ܦܵܝܫܝܼ ܚܸܙܝܸ̈ܐ ܐܲܝܟܼ ܙܲܕܝܼܩܸ̈ܐ. ܐܲܒܼܵܗܵܬܲܢ ܩܲܕܝܼܫܸ̈ܐ: ܟܸܐ ܠܲܒܼܫܝܼ ܗَܘܵܘ ܓ̰ܘܼܠܸ̈ܐ ܒܸܠܝܸ̈ܐ: ܐܝܼܢܵܐ ܡܼܢ ܓܵܘܵܝܸ̈ܐ ܥܲܬܝܼܪܵܐ ܗَܘܵܘ. ܦܝܼܫܠܵܐ ܛܠܝܼܒܬܵܐ ܡܼܢ ܚܲܕَ ܡܼܢ ܩܲܕܝܼܫܸ̈ܐ ܕܠܵܒܸܫ ܠܒܸܫܬܵܐ ܕܚܵܫܚܵܐ ܠܬܦܵܩܵܐ ܒܡܲܠܟܵܐ: ܐܵܡܸܪ ܐܸܠܵܝܗܝ: ܐܵܢܵܐ ܒܐܵܗܵܐ ܠܒܼܝܼܫܬܝܼ ܒܠܝܼܬܵܐ ܟܠܝܘܼܡ ܟܸܐ ܬܲܦܩܸܢ ܒܡܫܝܼܚܵܐ. ܒܲܤ ܥܲܬܝܼܪܘܼܬܵܐ ܕܚܲܕَ ܟܵܗܢܵܐ ܠܹܐ ܝَܠܵܐ ܓܵܘ ܠܒܼܸܫܬܵܐ ܐܸܠܵܐ ܓܵܘ ܪܘܼܚܵܐ!!!. ܡܸܢܕܝܼܵܢܸ̈ܐ ܕܒܲܕܲܪ ܟܸܐ ܦܵܝܫܝܼ ܚܩܝܼܪܸ̈ܐ ܒܒܢܲܝ̈ـܢܵܫܵܐ، ܐܝܼܢܵܐ ܕܓܵܘܵܝܸ̈ܐ ܟܸܐ ܦܵܝܫܝܼ ܚܩܝܼܪܸ̈ܐ ܒܐܲܠܵܗܵܐ. ♱ ܡܲܪܥܵܐ ܕܬܘܼܟܼܠܵܢܵܐ ܥܲܠ ܙܘܼܙܵܐ..... ܙܘܼܙܵܐ ܩܵܐ ܒܢܘܼܢܸ̈ܐ ܕܥܵܠܡܵܐ ܐܝܼܠܸܗ ܚܲܝܠܵܐ. ܥܲܬܝܼܪܸ̈ܐ ܟܸܐ ܡܫܲܠܛܝܼ، ܘܡܸܤܟܸܢܸ̈ܐ ܟܸܐ ܦܵܝܫܝܼ ܛܚܝܼܢܸ̈ܐ. ܘܥܲܬܝܼܪܘܼܬܵܐ ܕܟܵܗܢܵܐ ܐܝܼܠܵܗ̇ ܓܵܘ ܪܘܼܚܵܐ، ܡܸܢܕܝܼ ܕܠܹܐ ܡܵܨܸܐ ܙܘܼܙܵܐ ܠܸܥܒܼܵܕܸܗ: ܘܡܸܢܕܝܼ ܕܠܹܐ ܡܵܨܝܼ ܠܸܥܒܼܵܕܸܗ ܟܠܵܝܗܝ ܚܲܝ̈ܠܸܐ ܕܕܘܼܢܝܸܐ: ܟܸܐ ܡܵܨܸܗ ܟܵܗܢܵܐ ܠܸܥܒܼܵܕܸܗ ܒܡܸܨܥܵܝܘܼܬܵܐ ܕܡܫܝܼܚܵܐ: ܕܵܐܟܼܝܼ ܕܐَܡܸܪܸܗ ܫܸܡܥܘܼܢ ܩܵܐ ܗ̇ܘ ܤܲܩܲܬ (ܤܸܐܡܵܐ ܘܕܲܗܒܼܵܐ ܠܝܼܬܠܲܢ، ܐܝܼܢܵܐ ܗ̇ܘ ܡܸܢܕܝܼ ܕܐܝܼܬܠܝܼ ܕܝܵܗَܒܸܢܘܼܟܼ ܒܫܸܡܵܐ ܕܡܫܝܼܚܵܐ ܩܘܿܡ: ܘܗܲܪ ܒܗ̇ܝ ܥܕܵܢܵܐ ܩܸܡܠܸܗ). ܒܡܘܼܕܝَ ܫܸܡܵܐ ܒܸܬ ܦܵܝܫܵܐ ܩܪܝܼܬܵܐ ܬܸܫܡܸܫܬܵܐ ܕܤܦܝܼܩܬܵܐ ܝَܠܵܗ̇ ܡܼܢ ܨܠܘܼܬܵܐ؟!! ܩܵܐ ܪܵܒܵܐ ܡܸܢܕܝܼܵܢܸ̈ܐ ܒܲܛܝܼܠܸ̈ܐ ܐܝܼܬܠܲܢ ܥܕܵܢܵܐ، ܐܝܼܢܵܐ ܩܵܐ ܨܠܘܼܬܵܐ ܠܝܼܬܠܲܢ ܥܕܵܢܵܐ، ܘܐܵܗܵܐ ܐܝܼܠܵܗ̇ ܚܲܕَ ܡܼܢ ܥܲܠܕܵܝܵܬܸ̈ܐ ܕܤܵܛܵܢܵܐ. ܟܸܐ ܡܲܪܚܸܩܠܲܢ ܡܼܢ ܨܠܘܼܬܵܐ، ܟܸܐ ܡܵܠܸܦܠܲܢ ܕܦܸܠܚܲܢܵܐ ܒܘܼܫ ܐܲܢܸܢܩܵܝܵܐ ܝَܠܸܗ ܡܼܢ ܨܠܘܼܬܵܐ. ܘܗ̇ܘ ܟܸܐ ܝܵܕܥܸܗ ܕܦܸܠܚܵܐ ܕܠܵܐ ܨܠܘܼܬܵܐ ܗܵܒܵܤ ܝܼܠܸܗ. ܡܨܵܠܵܚ ܒܪܘܼܚܵܐ ܫܲܚܝܼܢܬܵܐ ܐܲܝܟܼ ܥܲܙܪܵܐ ܟܵܗܢܵܐ، ܘܢܚܲܡܝܵܐ ܛܲܢܵܢܵܐ، ܘܕܵܢܝܼܐܸܝܠ ܕܸܟܼܝܵܐ. ܘܗܲܝܓܵܗ̇ ܒܸܬ ܩܲܒܠܵܚ ܥܘܼܕܪܵܢܵܐ ܘܐܝܼܕܵܐ ܕܐܲܠܵܗܵܐ ܒܸܬ ܤܲܚܒܸܪܵܐܠܲܢ. ܕܸܡܵܐ ܕܗܵܒܹܝܠ ܡܲܩܘܘܼܚܵܐ ܗَܘ̣ܵܐ ܠܐܲܠܵܗܵܐ: ܐܝܼܢܵܐ ܕܸܡܵܐ ܕܡܫܝܼܚܵܐ ܕܦܝܼܫܠܸܗ ܬܘܼܦܚܵܐ ܒܘܼܬ ܚܲܛܵܝܸ̈ܐ ܟܸܐ ܗܲܡܙܸܡ ܒܘܼܫ ܡܼܢ ܕܗܵܒܹܝܠ. ܘܟܸܐ ܦܵܫܸܛ ܐܝܼܕܵܬܸ̈ܗ ܥܲܠ ܨܠܝܼܒܼܵܐ ܩܲܕ ܓ̰ܲܡܥܹܐܠܲܢ ܘܚܵܦܸܩܠܲܢ ܓܵܘ ܚܘܼܒܸܗ܀
ܒܝܕ ܡܫܡܫܢܐ: ܝܘܤܦ ܢܘܼܪܘܼ