موطل مائينوتا

ܡܸܛܠ ܡܲܐܝܼܢܘܼܬܼܵـܐ: ܚܲܕ ܡܠܘܿܐܵܐ ܝ݇ܠܸܗ ܡܸܠܝܵܐ ܡܼܢ ܡܲܪ̈ܬܝܵܢܘܵܬܼܵܐ ܕܩܛܸܦܠܝܼ ܡܼܢ ܓܵܘ ܟܬܵܒܼܵܐ ܡܫܲܡܗܵܐ (ܕܡܲܓܼܢܵܛܝܼܤ ܪܘܼܚܵܢܵܝܬܵܐ) ܕܲܥܒܼܝܼܕ ܠܩܲܫܝܼܫܵܐ ܐܲܢܕܪܸܐܘܼܤ ܩܲܠܲܦܘܼܪܵܐ ܒܫܸܢ݇ܬܵܐ ܕ(1910). ܘܒܘܼܬ ܚܸܠܝܘܼܬܼܵـܐ ܕܒܘܼܤܵܡܵܐ ܘܤܸܩܠܵܐ ܘܛܲܥܡܵܐ ܕܚܙܸܐܠܝܼ ܓܵܘ ܚܲܒܪܵܢܘܼܗ‌ܝ ܫܒܼܸܩܠܝܼ ܒܠܸܫܵܢܵܐ ܐܵܪܵܡܵܝܵܐ: ܘܠܵܐ ܒܤܸܡܠܵܐܠܝܼ ܠܩܲܫܕܘܼܪܸܐ ܠܡܦܲܫܘܼܩܸܗ ܕܠܵܐ ܡܒܲܠܒܸܠ ܘܬܵܠܸܩ ܡܼܢ ܛܲܟܼܤܵܐ ܕܒܘܼܤܵܡܵܐ. ܘܫܒܼܸܩܠܝܼ ܠܩܲܪܝܵܢܵܐ ܚܲܒܝܼܒܼܵܐ ܕܗܵܘ ܡܦܵܫܸܩܠܸܗ ܩܵܐ ܓܵܢܸܗ ܐܲܝܟܼ ܨܸܒܼܝܵܢܸܗ ܩܲܕ ܒܘܼܫ ܙܵܘܕܵܐ ܡܦܵܪܸܡܠܸܗ.....

♱ ܕܲܥ ܕܡܲܐܝܼܢܘܼܬܼܵـܐ ܕܵܘܘܿܢܵܐ ܗ݇‌ܝܼ ܒܝܼܫܵܐ ܕܲܡܒܲܨܪܵܐ ܠܲܛܢܵܢܵܐ ܐܲܠܵܗܵܝܵܐ: ܘܡܲܡܚܠܵܐ ܠܥܲܡ̈ܠܸܐ ܪ̈ܘܼܚܵܢܵܝܸܐ ܘܦܲܓܼܪ̈ܵܢܵܝܸܐ. ܘܐܲܝܢܵܐ ܕܲܟܼܪܝܼܗ ܒܵܗ̇: ܠܝܼܬܠܸܗ ܪܘܵܙܵܐ ܘܲܢܝܵܚܵܐ ܠܵܐ ܒܥܵܠܡܵܐ ܗܵܢܵܐ ܘܠܵܐ ܒܗܵܘ ܕܲܥܬܼܝܼܕ. ܒܗ̇‌ܝ ܕܲܟܼܬܝܼܒܼ ܒܐܘܼܪܵܝܬܵܐ: ܕܐܲܠܵܗܵܐ ܫܘܼܒܼܚܵܐ ܠܛܲܝܒܘܼܬܸܗ: ܠܘܼܩܕܼܵܡ ܠܐܝܼ ܒܒܼܵܪܘܿܝܘܼܬܼ ܥܵܠܡܵܐ. ܟܸܢ ܐܸܬܿܬܿܢܝܼܚ ܒܝܵܘܡܵܐ ܫܒܼܝܼܥܵܝܵܐ. ܘܗܵܕܸܐ ܠܡܲܟܵܤܘܼ ܠܡܲܐܝܼܢܸ̈ܐ ܐܲܡܝܼܪܵܐ: ܘܠܵܘ ܕܐܲܠܵܗܵܐ ܠܵܐܸܐ. ܚܵܤ ܠܸܗ. ܘܲܡܫܝܼܚܵܐ: ܫܘܼܒܼܚܵܐ ܠܸܗ: ܠܵܐ ܥܲܠ̣ ܠܬܸܫܒܘܼܚܬܵܐ ܕܐܲܒܼܘܼܗ‌ܝ: ܐܸܠܵܐ ܡܼܢ ܒܵܬܲܪ ܕܨܵܡ ܘܨܲܠܝܼ ܘܲܤܒܲܠ ܚܲܫܸ̈ܐ ܡܲܪܝܼܪܸ̈ܐ ܘܡܝܼܬܼ ܒܲܙܩܝܼܦܵܐ. ܘܗܵܟܲܢܵܐ ܐܵܦ ܬܲܠܡ̈ܝܼܕܼܵܘܗ‌ܝ ܘܤܲܗ̈ܕܼܵܘܗ‌ܝ ܘܩܲܕܝܼ̈ܫܵܘܗ‌ܝ: ܠܵܐ ܐܸܫܬܲܡܲܗܘ ܬܲܠܡܝܼ̈ܕܸܐ ܘܤܵܗ̈ܕܸܐ ܘܩܲܕܝܼ̈ܫܸܐ: ܘܠܵܐ ܥܲܠ̣ܘ ܠܲܢܝܵܚܬܵܐ ܕܡܵܪܗܘܿܢ: ܐܸܠܵܐ ܡܼܢ ܒܵܬܲܪ ܕܲܠܐܝܼܘ ܘܤܲܝܒܲܪܘ ܪܸܒܿܘܿ ܢܸܤܝܘܿܢ̈ܝܼܢ. ܐܲܒܼܘܼܢ ܐܵܕܼܵܡ ܠܵܐ ܐܸܬܼܚܲܤܝܲܬ̤ ܚܛܝܼܬܸܗ: ܐܸܠܵܐ ܡܼܢ ܒܵܬܲܪ ܕܵܠܐܝܼ ܬܫܲܥܡܵܐܐ ܘܲܬܼܠܵܬܼܝܼܢ ܫܢܝܼ̈ܢ. ܗܵܒܹܝܠ ܠܵܐ ܐܸܫܬܲܡܲܗ ܤܵܗܕܵܐ: ܐܸܠܵܐ ܡܼܢ ܒܵܬܲܪ ܕܲܠܐܝܼ ܒܩܸܛܠܵܐ ܕܲܛܠܘܼܡܝܵܐ. ܚܢܘܿܟܼ ܠܵܐ ܐܸܫܬܲܢܝܼ ܠܦܲܪܕܵܝܤܵܐ: ܐܸܠܵܐ ܡܼܢ ܒܵܬܲܪ ܕܲܠܐܝܼ ܒܲܥܒܼܵܕܸ̈ܐ ܕܲܡܝܲܬܿܪܘܼܬܼܵܐ. ܢܘܿܚ ܠܵܐ ܐܸܬܿܬܿܢܝܼܚ ܡܼܢ ܚܢܘܼܩܝܵܐ ܘܐܸܫܬܵܘܙܲܒܼ: ܐܸܠܵܐ ܡܼܢ ܒܵܬܲܪ ܕܲܠܐܝܼ ܡܵܐܐ ܫܢܝܼ̈ܢ ܒܲܥܒܼܵܕܼܵܐ ܕܩܹܒܼܘܼܬܼܵܐ. ܝܲܥܩܘܿܒܼ ܠܵܐ ܥܬܲܪ ܘܠܵܐ ܒܲܪܟܸܗ ܐܲܠܵܗܵܐ: ܐܸܠܵܐ ܡܼܢ ܒܵܬܲܪ ܐܲܪܒܲܥܤܪܸ̈ܐ ܫܢܝܼ̈ܢ ܒܪܵܥܝܘܼܬܼܵܐ. ܝܵܘܤܸܦ ܠܵܐ ܐܸܬܼܢܲܨܲܚ: ܐܸܠܵܐ ܡܼܢ ܒܵܬܲܪ ܕܤܲܝܒܲܪ ܥܫܘܼܩܝܵܐ ܘܠܹܐܘܬܼܵܐ. ܡܘܼܫܸܐ ܠܵܐ ܐܸܬܼܪܵܘܪܲܒܼ ܕܲܪܓܼܸܗ: ܐܸܠܵܐ ܡܼܢ ܒܵܬܲܪ ܕܤܲܝܒܲܪ ܡܘܼܪܡܵܪܵܐ ܡܼܢ ܒܢܲܝ̈ ܥܲܡܸܗ ܘܫܲܪܟܵܐ. ܘܡܼܢ ܗܵܠܹܝܢ ܐܸܫܬܲܪܪܲܬ ܗ̇‌ܝ ܕܐܸܡܲܪ ܕܵܘܝܼܕܼ: ܕܙܵܪ̈ܥܲܝ ܒܕܸܡܥܬܼܵܐ ܒܚܲܕܘܼܬܼܵܐ ܚܵܨܕܝܼܢ.

ܘܐܲܢ݇ܬ ܐܘܿ ܡܲܐܝܼܢܵܐ: ܨܵܒܸܐ ܐܲܢ݇ܬ ܕܒܸܠܥܵܕܼ ܟܲܫܝܼܪܘܼܬܼܵܐ ܘܠܹܐܘܬܼܵܐ ܬܸܫܟܲܚ ܪܘܵܙܵـــܐ ܦܲܓܼܪܵܢܵܝܵܐ ܘܢܲܦ̮ܫܵܢܵܝܵܐ: ܗܵ‌ܝ ܕܠܵܐ ܡܲܨܝܵܐ ܕܬܸܗܘܸܐ. ܘܡܵܪܝ ܒܸܪܢܵܪܕܘܿܤ ܩܲܕܝܼܫܵܐ ܐܸܡܲܪ: ܕܲܟܼܪܸܤܛܝܵܢܵܐ ܐܲܝܢܵܐ ܕܡܲܥܒܲܪ ܚܕܼܵܐ ܫܵܥܵܐ ܒܒܸܛܠܵܢܵܐ ܢܲܦ̮ܫܵܢܵܝܵܐ ܘܦܲܓܼܪܵܢܵܝܵܐ: ܥܬܼܝܼܕ ܕܢܸܬܲܠ ܦܸܬܼܓܼܵܡܵܐ ܚܠܵܦܹܝܗ̇ ܠܡܵܪܵܐ ܕܫܵܥܸ̈ܐ ܘܥܸܕܵܢܸ̈ܐ. ܡܸܛܠ ܕܡܲܐܝܼܢܵܐ ܡܸܬܼܪܲܚܲܩ ܡܼܢ ܦܲܪܨܘܼܦܵܐ ܕܐܲܠܵܗܵܐ ܘܡܸܫܬܲܟܲܪ ܘܡܸܤܬܿܢܸܐ ܘܗܵܘܸܐ ܡܲܚܪܡܵܐ ܡܼܢ ܡܵܘܗ̈ܒܼܵܬܼܵܐ ܐܲܠܵܗܵܝܵܬܼܵـܐ. ܘܡܸܬܿܬܿܪܝܼܡܵܐ ܡܸܢܸܗ ܛܲܝܒܘܼܬܼ ܡܪܲܝܡܵܐ. ܘܝܼܕܝܼܥܵܐ ܗܵܕܸܐ ܡܼܢ ܗܵ‌ܝ ܕܐܲܡܝܼܪܵܐ ܒܓܸܠܝܵܢܸܗ ܕܝܘܿܚܲܢܵܢ ܙܥܘܿܪܵܐ: ܕܐܸܡܲܪ ܡܫܝܼܚܵܐ ܠܡܹܛܪܵܦܘܿܠܹܝܛܵܐ ܕܐܵܦܸܤܘܿܤ: ܥܒܲܪ ܚܘܼܒܵܐ ܕܲܩܢܸܐ ܗ݇ܘܲܝܬܼ ܡܼܢ ܩܕܝܼܡ: ܚܘܼܪ ܡܼܢ ܐܲܝܟܵܐ ܗ݇‌ܝܼ ܡܲܦܘܼܠܬܼܵܟܼ ܘܩܘܿܡ ܒܲܬܼܝܵܒܼܘܼܬܼܵܐ: ܘܲܗܦܘܿܟܼ ܠܤܘܼܥܪ̈ܵܢܸܐ ܩܲܕܼܡܵܝܸ̈ܐ: ܘܐܸܠܵܐ ܐܵܬܸܐ ܐ݇ܢܵܐ ܥܠܲܝܟ ܒܲܥܓܲܠ: ܘܲܡܪܝܼܡ ܐ݇ܢܵܐ ܫܪܵܓܼܵـܟܼ ܡܼܢ ܕܘܼܟܬܸܗ. ܬܘܼܒܼ ܕܝܹܢ ܡܲܐܝܼܢܵܐ ܡܸܬܼܡ̱ܚܸܐ ܒܓܹܐܪܸ̈ܐ ܕܡܸܤܟܹܢܘܼܬܼܵܐ ܘܕܵܘܘܿܢܵܐ ܪܘܼܚܵܢܵܐܝܼܬܼ ܘܦܲܓܼܪܵܢܵܐܝܼܬܼ: ܐܲܝܟܼ ܕܐܲܡܝܼܪܵܐ ܒܡܲܬܼ̈ܠܸܐ: ܕܐܲܝܢܵܐ ܕܪܵܚܸܡ ܒܸܛܠܵܢܵܐ ܠܵܐ ܡܨܸܐ ܕܲܢܤܲܒܲܥ ܟܲܦܢܵܐ. ܘܩܲܪܝܼܪ ܝܵܬܼܵܐ ܘܡܲܐܝܼܢܵܐ: ܠܵܐ ܗ݇ܘ̣ܵܐ ܒܲܪ ܕܘܼܗܵܢܵܐ. ܘܲܫܠܹܝܡܘܿܢ ܐܸܡܲܪ ܕܒܸܛܠܵܢܵܐ ܡܵܘܠܸܕܼ ܒܝܼ̈ܫܵܬܼܵܐ ܤܲܓܝܼ̈ܐܵܬܼܵܐ. ܘܲܬܼܤܹܝܵܢܘܿܤ ܡܲܠܦܵܢܵܐ ܐܸܡܲܪ: ܕܐܲܝܢܵܐ ܕܲܒܠܲܥܒܿܘܼܬܼܵܐ ܡܸܫܬܲܟܲܪ: ܚܲܕܼ ܫܸܐܕܼܵܐ ܠܸܗ ܡܸܬܼܚܲܒܲܪ. ܘܲܕܡܸܬܼܥ̱ܢܸܐ ܒܒܸܛܠܵܢܵܐ: ܫܸܐܕܼܸ̈ܐ ܤܲܓܝܼ̈ܐܹܐ ܡܸܬܼܚܲܒܼܪܝܼܢ ܠܸܗ. ܬܘܼܒܼ ܕܝܹܢ ܟܠܗܘܿܢ ܡܲܠܦܵܢܸ̈ܐ ܫܲܪܲܪܘ ܕܐܲܝܢܵܐ ܕܲܚܒܼܢܵܢ: ܒܥܸܕܵܢ ܡܵܘܬܸܗ ܠܵܐ ܡܥܲܕܪܝܼܢ ܠܸܗ ܡܲܠܲܐܟܸ̈ܐ. ܘܡܲܨܝܵܐ ܕܢܸܟܼܦܘܿܪ ܒܗܲܝܡܵܢܘܼܬܸܗ. ܬܘܼܒܼ ܕܝܹܢ ܐܲܠܵܗܵܐ ܫܘܼܒܼܚܵܐ ܠܦܘܼܪ̈ܢܵܤܵܘܗ‌ܝ ܡܲܩܫܸܐ ܠܸܒܵܐ ܕܲܡܪ̈ܲܚܡܵܢܸܐ ܘܥܵܒܼ̈ܕܲܝ ܛܵܒܼܬܼܵܐ ܥܲܠ ܡܲܐܝܼܢܵܐ. ܘܪܵܚܸܡ ܒܸܛܠܵܢܵܐ ܕܠܵܐ ܢܪܲܚܡܘܼܢ ܥܠܵܘܗ‌ܝ. ܘܤܘܼܥܪܵܢܵܐ ܡܢܲܤܲܝ ܘܫܲܪܝܼܪ. ܘܲܫܠܹܝܡܘܿܢ ܚܲܟܝܼܡܵܐ ܠܲܚܒܸܢܵܢܵܐ ܠܘܵܬܼ ܫܵܘܫܡܵܢܵܐ ܡܫܲܕܲܪ ܕܢܹܐܠܲܦ ܟܲܫܝܼܪܘܼܬܵܐ: ܒܗ̇‌ܝ ܕܫܵܘܫܡܵܢܵܐ ܡܟܲܢܸܫ ܒܩܲܝܛܵܐ ܡܸܕܸܡ ܕܲܤܢܝܼܩ ܥܠܵܘܗ‌ܝ ܒܤܲܬܼܘܵܐ. ܐܵܦܸܢ ܠܲܝܬܿ ܡܲܠܦܵܢܵܐ ܕܡܲܠܸܦ ܘܡܲܪܬܸܐ ܠܸܗ. ܐܸܢܵܐ ܕܹܝܢ ܬܵܚܘܿܒܼܵܐ ܡܫܲܕܲܪ ܐ݇ܢܵܐ ܠܲܚܒܸܢܵܢܵܐ ܠܘܵܬܼ ܩܲܛܘܼ ܕܢܸܚܙܸܐ ܐܲܝܟܲܢܵܐ ܩܵܝܡܵܐ ܬܲܪܬܹܝܢ ܫܵܥ̈ܝܼܢ ܥܲܠ ܥܸܩܒܵܐ ܠܲܡܨܵܕܘܼ ܠܵܗ̇ ܥܘܼܩܒܿܪܵܐ ܫܝܼܛܵܐ. ܬܘܼܒܼ ܕܹܝܢ ܡܫܲܕܲܪ ܐ݇ܢܵܐ ܠܘܵܬܼ ܓܘܵܓܲܝ: ܕܐܲܝܟܲܢܵܐ ܠܵܐܝܵܐ ܘܙܵܩܪܵܐ ܘܡܲܓܪܵܐ ܪܘܼܚܵܐ ܝܵܘܡܵܐ ܘܲܬܼܪܹܝܢ ܠܲܡܨܵܕܘܼ ܠܵܗ̇ ܕܲܒܵܒܼܵܐ ܙܥܘܿܪܵܐ. ܘܐܸܢ ܠܵܐ ܪܥܸܐ ܒܗܵܠܹܝܢ ܟܠܗܹܝܢ: ܡܲܡܪܲܚ ܐ݇ܢܵܐ ܘܲܡܫܲܕܲܪ ܐ݇ܢܵܐ ܠܸܗ ܠܘܵܬܼ ܤܵܛܵܢܸ̈ܐ ܟܲܫܝܼܪܸ̈ܐ. ܕܢܸܚܙܸܐ ܗܲܪ ܬܲܡ̇ܢ ܕܐܲܝܟܲܢܵܐ ܗܸܢܘܿܢ ܫܸܐܕܸ̈ܐ ܠܵܐ ܝܵܗ݇ܒܿܝܼܢ ܫܸܢܬܵܐ ܠܥܲܝܢܲܝ̈ܗܘܿܢ: ܐܵܦܠܵܐ ܢܵܘܡܬܵܐ ܠܲܓܼܒܝܼܢܗܘܿܢ ܒܤܵܥܘܿܪܘܼܬܼ ܗܵܘ ܡܵܐ ܕܲܠܗܘܿܢ ܡܢܝܼܚ.

ܘܚܵܙܹܝܢܲܢ ܐܝܼܠܵܢܵܐ ܕܠܵܐ ܦܹܐܪܸ̈ܐ ܕܲܒܼܢܘܼܪܵܐ ܡܸܬܿܬܵܘܩܲܕܼ ܘܐܲܝܢܵܐ ܕܡܲܐܝܼܢ ܠܵܐ ܡܲܨܝܵܐ ܕܢܸܬܸܿܠ ܦܹܐܪܸ̈ܐ. ܡܵܕܹܝܢ ܐܵܦ ܗܘ̤ ܚܲܪܬܼܸܗ ܢܘܼܪܵܐ ܗ݇‌ܝܼ ܕܓܸܗܲܢܵܐ. ܘܝܘܼܚܲܢܵܢ ܦܘܼܡܵܐ ܕܕܲܗܒܼܵܐ ܐܸܡܲܪ: ܐܘܿ ܒܲܪܢܵܫܵܐ: ܐܸܠܘܼ ܩܢܸܐ ܗ݇ܘܲܝܬܿ ܥܲܒܼܕܵܐ ܕܠܵܐ ܓܢܲܒܼ ܐܵܦܠܵܐ ܩܵܛܘܿܠ ܐܵܦܠܵܐ ܙܲܢܵܝ ܐܵܦܠܵܐ ܪܵܘܵܝ ܐܵܦܠܵܐ ܡܨܚܝܵܢ ܐܵܦܠܵܐ ܫܟܼܝܼܚ ܒܸܗ ܚܲܕ ܙܢܵܐ ܒܝܼܫܵܐ: ܤܛܲܪ ܡܼܢ ܗܵ‌ܝ ܕܝܲܬܿܝܼܒܼ ܒܒܲܝܬܵܐ ܡܼܢ ܨܲܦܪܵܐ ܥܕܼܲܡܵܐ ܠܪܲܡܫܵܐ ܘܒܲܛܝܼܠ ܡܼܢ ܦܘܼܠܚܵܢܵܐ: ܐܵܪܵܐ ܟܲܝ ܠܵܐ ܡܲܦܸܩ ܗ݇ܘܲܝܬܿ ܠܸܗ ܡܼܢ ܒܲܝܬܵܟܼ ܒܵܬܲܪ ܢܸܓܼܕܸ̈ܐ. ܘܐܸܢ ܐ݇ܢܵܫ ܡܲܗܦܸـܟܼ ܥܠܲܝܢ ܘܐܵܡܲܪ ܕܲܠܡܵܢܵܐ ܢܸܓܼܕܸ̈ܐ ܘܡܲܦܲܩܬܵܐ: ܟܲܕ ܠܵܐ ܥܒܲܕܼ ܒܝܼܫܬܵܐ ܡܸܕܸܡ ܕܲܦܩܝܼܕܼ ܠܡܸܥܒܲܕܼ: ܘܡܵܪܝ ܐܝܼܪܵܢܝܼܡܘܿܤ ܐܸܡܲܪ: ܗܘܲܝܬܿ ܦܵܠܲܚ ܐܲܡܝܼܢܵܐܝܼܬܼ ܕܢܸܚܙܹܝܟ ܤܵܛܵܢܵܐ ܘܢܸܚܦܲܪ ܤܲܒܼܪܸܗ. ܘܐܸܡܲܪ ܡܵܪܝ ܬܐܘܿܡܵܐ ܬܸܐܘܿܠܘܿܓܼܘܿܤ: ܕܒܸܛܠܵܢܵܐ ܨܸܢܵܪܬܵܐ ܗ݇ܘܼ ܕܤܵܛܵܢܵܐ: ܕܒܼܵܗ̇ ܨܵܐܸܕ ܒܢܲܝ̈ـܢܵܫܵܐ ܚܠܵܦ ܢܘܼܢܸ̈ܐ. ܘܝܼܕܝܼܥܵܐ ܗܵܕܸܐ ܡܼܢ ܗܵ‌ܝ ܕܐܲܟܼܙܢܵܐ ܕܐܲܪܥܵܐ ܕܠܵܐ ܦܠܝܼܚܵܐ: ܠܵܐ ܡܵܘܬܝܵܐ ܐܸܠܵܐ ܟܘܼܒܸ̈ܐ ܘܩܘܼܪ̈ܛܒܸܐ: ܘܡܲܝ̈ܵܐ ܕܠܵܐ ܪܵܕܹܝܢ ܘܲܩܒܹܝܢ: ܠܵܐ ܡܵܘܠܕܝܼܢ ܐܸܠܵܐ ܐܘܼܪ̈ܕܥܸܐ ܘܤܲܪ̈ܛܵܢܸܐ ܘܪ̈ܵܩܸܐ ܘܲܚ̈ܘܵܘܵܬܼܵـܐ ܘܬܼܵܘ̈ܠܥܸܐ. ܗܵܟܲܢܵܐ ܐܵܦ ܡܲܐܝܼܢܵܐ ܘܲܚܒܸܢܵܢܵܐ ܠܵܐ ܡܵܘܠܸܕܼ ܤܛܲܪ ܡܼܢ ܒܝܼܫ̈ܵܬܼܵـܐ ܒܚܘܼܫܵܒܼܵܘܗ‌ܝ ܘܲܒܼܡܸܠܵܘܗ‌ܝ ܘܒܲܥܒܼܵܕܵܘܗ‌ܝ: ܘܢܸܬܼܒܲܩܸܐ ܒܗܵ‌ܝ ܕܐܸܡܲܪ ܡܫܝܼܚܵܐ ܕܐܵܒܼܝ ܥܕܲܡܵܐ ܠܗܵܫܵܐ ܥܵܒܸܕ ܐ݇ܢܵܐ ܐܲܡܝܼܢܵܐܝܼܬܼ. ܘܦܵܘܠܘܼܤ ܐܲܠܵܗܵܝܵܐ ܐܸܡܲܪ: ܕܡܲܠܲܐܟܼܸ̈ܐ ܒܐܲܡܝܼܢܘܼ ܥܢܹܝܢ ܒܬܸܫܡܸܫܬܵܐ ܕܐܸܬܼܓܲܥܠܲܬ̤ ܠܗܘܿܢ. ܘܐܵܓܼܘܼܤܛܝܼܢܘܿܤ ܩܲܕܝܼܫܵܐ ܐܸܡܲܪ: ܐܸܬܼܒܲܩܵܐ ܒܸܪܝ! ܒܫܸܡܫܵܐ ܘܤܲܗܪܵܐ ܘܟܼܵܘܟ̈ܒܸܐ ܘܲܒܼܟܠܗܹܝܢ ܚܲܝ̈ܘܵܬܼܵܐ. ܐܵܪܵܐ ܟܲܝ ܠܵܐ ܚܵܙܸܐ ܐܲܢ݇ܬ ܠܗܘܿܢ ܕܐܲܡܝܼܢܝܼܢ ܒܬܸܫܡܸܫܬܵܟܼ؟ ܘܐܲܢ݇ܬ ܒܲܠܚܘܼܕܲܝܟ ܒܲܛܝܼܠ ܐܲܢ݇ܬ ܡܼܢ ܬܸܫܡܸܫܬܵـــܐ ܕܐܸܬܼܓܲܥܠܲܬ̤ ܠܵܟܼ. ܘܡܵܪܝ ܦܪܲܢܤܝܼܤ ܩܲܕܝܼܫܵܐ ܐܸܡܲܪ ܗ݇ܘ̣ܵܐ: ܕܥܲܝܝܼܩ ܐ݇ܢܵܐ ܘܟܲܪܝܵܐܠܝܼ ܟܲܕ ܚܵܙܸܐ ܐ݇ܢܵܐ ܠܬܲܓܵܪܸ̈ܐ ܕܤܵܒܼܠܝܼܢ ܒܝܼܫܵܬܼܵـܐ ܤܲܓܝܼ̈ܐܵܬܼܵـܐ: ܘܥܵܡܿܠܝܼܢ ܘܡܸܬܼܟܲܪܟܿܝܼܢ ܝܲܡܵܐ ܘܝܲܒܼܫܵܐ ܠܡܸܩܢܵܐ ܥܘܼܬܼܪܵܐ ܥܵܠܡܵܢܵܝܵܐ. ܘܐܸܢܵܐ ܠܵܐ ܤܵܥܲܪ ܐ݇ܢܵܐ ܠܗܵܕܸܐ ܠܲܡܩܲܕܵܝܘܼ ܡܲܠܟܘܼܬܼܵܐ ܕܫܡܲܝܵܐ ܘܠܲܡܫܵܘܙܵܒܼܘܼ ܠܢܲܦ̮ܫܵܬܼܵܐ ܡܼܢ ܐܲܒܼܕܵܢܵܐ ܕܲܚܛܝܼܬܼܵܐ. ܘܒܲܩܠܲܤܲܤ̈ܛܝܼܩܸܐ ܟܬܝܼܒܼ: ܕܒܝܼܠܝܼܓܝܼܵܐ ܟܲܕܼ ܥܓܼܝܼܢܵܐ ܗ݇ܘܵܬ̤ ܒܲܚܛܵܗܵܐ ܕܙܵܢܝܘܼܬܼܵܐ: ܒܚܲܕܼ ܡܼܢ ܝܵܘܡ̈ܝܼܢ ܥܸܒܼܪܲܬ̤ ܩܕܼܵܡ ܟܢܘܼܫܬܵܐ ܕܡܝܼܛܪ̈ܵܦܘܿܠܹܝܛܸܐ ܘܲܠܒܼܝܼܫܵܐ ܗ݇ܘܵܬ̤ ܠܒܼܘܼܫܸ̈ܐ ܦ̈ܐܲܝܵܐ ܘܲܗܕܼܝܼܪܸ̈ܐ ܘܚܸܫ̈ܠܵܬܼܵܐ ܕܕܲܗܒܼܵܐ ܘܲܙܡܲܪ̈ܓܕܸܐ: ܘܐܝܼܬܸܝܗ̇ ܗ݇ܘܵܬ̤ ܚܕܼܵܢܵܝܲܬ̤ ܙܲܒܼܢܵܐ ܒܫܘܼܦܪܵܐ ܘܗܸܕܼܪܵܐ ܘܲܤܩܝܼܠܘܼܬܼ ܐܲܦܸ̈ܐ. ܘܟܲܕ ܚܙܵܐܘܿܗ̇ ܡܝܼܛܪ̈ܵܦܘܿܠܹܝܛܸܐ: ܐܲܗܦܸܟܼܘ ܐܲܦܲܝܗܘܿܢ ܡܸܢܵܗ̇ ܡܼܢ ܕܸܚܠܲܬ ܪܸܓܬܼܵܐ. ܐܸܠܵܐ ܚܲܕܼ ܡܸܢܗܘܿܢ ܕܲܫܡܸܗ ܝܘܿܬܿܘܿܤ ܕܐܝܼܬܼܵܘܗ‌ܝ ܗ݇ܘ̣ܵܐ ܡܝܼܛܪܵܦܘܿܠܹܝܛܵܐ ܕܐܘܼܪܗܵ‌ܝ: ܐܸܬܼܒܲܩܝܼ ܗ݇ܘ̣ܵܐ ܒܗܵ‌ܝ ܐܲܢ݇ܬܿܬܵܐ ܤܲܒܼܥܵܐܝܼܬܼ: ܚܵܪ ܒܵܗ̇ ܥܲܩܘܼܒܼܬܼܵܢܵܐܝܼܬܼ: ܘܐܸܬܼܦܢܝܼ

ܠܘܵܬܼ ܚܲܒܼܪ̈ܵܘܗ‌ܝ ܘܫܲܐܸܠ ܐܸܢܘܿܢ ܘܐܸܡܲܪ: ܡܵܢܵܐ ܐܵܡܪܝܼܬܘܼܢ ܥܲܠ ܗܵܕܸܐ ܐܲܢ݇ܬܿܬܵܐ؟ ܘܲܫܬܸܩܘ ܟܠܗܘܿܢ. ܘܟܲܕܼ ܚܙܵܐ ܕܲܫܬܸܩܘ: ܐܲܪܟܹܢ ܪܸܫܸܗ ܘܫܲܪܝܼ ܒܵܟܸܐ ܚܢܝܼܓܼܵܐܝܼܬܼ. ܐܝܼܛܵܐ ܐܲܪܝܼܡ ܪܸܫܸܗ ܘܐܸܡܲܪ: ܕܲܚܕܝܼܬܼ ܒܚܵܘܪܵܐ ܕܦܲܪܨܘܿܦܵܐ ܕܐܲܢ݇ܬܿܬܵܐ ܗܵܕܸܐ: ܒܗܵ‌ܝ ܕܐܸܬܼܒܲܩܝܼܬ ܕܐܲܝܟܲܢܵܐ ܙܲܒܼܢܵܐ ܤܲܓܝܼܵܐܐ ܡܨܲܒܬܼܵܐ ܗ‌ܝ̤ ܠܵܗ̇ ܒܨܸܒܼܬܼܵܐ ܕܐܲܝܟܼ ܗܵܢܵܐ: ܕܢܸܨܛܠܘܿܢ ܠܸܒܵܘܵܬܼܵܐ ܕܲܒܼܢܲܝ̈ـܢܵܫܵܐ ܠܘܵܬܼܵܗ̇. ܘܢܸܫܬܿܒܘܿܢ ܪܸ̈ܥܝܵܢܲܝܗܘܿܢ: ܘܐܸܢܵܐ ܚܲܛܵܝܵܐ ܒܡܸܬܼܚܵܐ ܕܗܵܢܵܐ ܙܲܒܼܢܵܐ ܥܒܲܪܘ ܝܵܘ̈ܡܲܝ ܒܡܲܐܝܼܢܘܼܬܼܵܐ ܘܒܸܛܠܵܢܵܐ: ܘܠܵܐ ܝܸܨܦܸܬܼ ܠܲܡܨܲܒܵܬܼܘܼ ܢܲܦ̮ܫܝ ܠܐܲܠܵܗܵܐ ܗܵܘ ܕܐܸܫܬܵܘܕܝܼ ܠܝܼ ܛܵܒܼܵܬܼܵܐ ܕܲܠܥܵܠܡܝܼܢ. ܘܲܫܦܲܪ ܦܸܬܼܓܼܵܡܵܐ ܗܵܢܵܐ ܒܥܲܝܢܲܝ̈ ܟܠܗܘܿܢ: ܘܐܸܙܲܠ ܐ݇ܢܵܫ ܠܕܘܼܟܬܸܗ. ܗܘ̤ ܕܹܝܢ ܥܲܠ̣ ܠܩܸܠܵܝܬܸܗ: ܘܫܲܪܝܼ ܠܡܸܒܼܟܵܐ ܘܲܠܡܸܬܼܐܲܒܼܵܠܘܼ ܥܲܠ ܡܲܐܝܼܢܘܼܬܸܗ ܘܠܵܐ ܚܦܝܼܛܘܼܬܸܗ. ܘܲܡܛܵܐ ܛܸܒܵܐ ܠܘܵܬܼ ܗܵ‌ܝ ܙܵܢܝܼܬܼܵܐ: ܘܒܲܤܪܲܬ̤ ܥܲܠ ܠܒܼܘܼܫܹܝܗ̇ ܘܥܲܠ ܟܠܗܹܝܢ ܪ̈ܓܼܝܼܓܼܵܬܼܵـܐ: ܘܩܲܪܒܲܬ̤ ܬܝܵܒܼܘܼܬܼܵܐ ܘܐܵܘܕܝܲܬ̤ ܒܟܼܠܗܘܿܢ ܤܘܼܪ̈ܚܵܢܹܝܗ̇ ܓܡܝܼܪܵܐܝܼܬܼ: ܘܥܸܡܕܲܬ̤ ܘܲܗܘܵܬ̤ ܟܪܸܤܛܝܵܢܝܼܬܼܵܐ: ܘܲܪܕܵܬ̤ ܒܐܘܼܪܚܵܐ ܕܝܼܚܝܼܕܵܝܸܐ. ܘܐܸܙܲܠ݇ܬ̤ ܒܐܸܤܟܹ̇ܝܡܵܐ ܕܓܲܒܼܪܸ̈ܐ ܠܛܘܼܪܵܐ ܕܒܹܝܬܼ ܙܲܝܬܸ̈ـܐ ܕܩܲܪܝܼܒܼ ܠܐܘܿܪܸܫܠܸܡ: ܘܥܸܠܲܬ̤ ܠܲܡܥܲܪܬܼܵܐ. ܗܵܪ ܬܲܡܵܢ ܫܲܠܡܲܬ̤ ܚܲܝܸ̈ܝܗ̇ ܒܨܵܘܡܵܐ ܘܒܲܨܠܘܿܬܼܵܐ ܘܲܒܼܦܘܼܠܚܵܢܵܐ ܕܪܘܼܚ. ܘܐܸܬܼܟܬܸܒܼ ܫܡܵܗ̇ ܒܤܸܦܪܵܐ ܕܩܲܕܝܼ̈ܫܸܐ. ܨܠܘܿܬܼܵܗ̇ ܥܲܡܲܢ. ܘܲܥܗܲܕܢܲܢ ܠܬܲܫܥܝܼܬܼܵܐ ܗܵܕܸܐ ܕܢܸܕܲܥ ܟܠܢܵܫ ܐܲܝܟܲܢܵܐ ܙܵܕܸܩ ܠܸܗ ܠܡܸܬܼܚܲܦܵܛܘܼ ܘܠܲܡܫܲܡܠܵܝܘܼ ܪܲܗܛܸܗ ܒܬܸܫܡܸܫܬܵܐ ܕܒܵܪܘܿܝܸܗ. ܗܵܫܵܐ ܢܸܩܪܘܼܒܼ ܘܲܢܚܵܘܸܐ ܬܸܢܝܵܢܘܼܬܼ ܚܘܼܤܪܵܢܵܐ ܕܡܵܘܠܕܹܝܢ ܒܸܛܠܵܢܵܐ ܘܡܲܐܝܼܢܘܼܬܼܵܐ: ܟܲܕܼ ܐܵܡܪܝܼܢܲܢ: ܕܒܸܛܠܵܢܵܐ ܘܡܲܐܝܼܢܘܼܬܼܵܐ ܗ݇ܘ̤ܘ ܥܸܠܬܼܵܐ ܕܐܲܒܼܕܵܢܵܐ ܠܲܤܕܘܿܡ ܘܥܵܡܘܿܪܵܐ. ܘܕܵܘܝܼܕܼ ܐܸܠܘܼܠܵܐ ܒܲܛܝܼܠ ܗ݇ܘ̣ܵܐ: ܠܵܐ ܙܲܢܝܼ ܘܲܩܛܲܠ ܠܐܘܿܪܝܼܵܐ. ܘܫܸܡܫܘܿܢ ܟܡܵܐ ܕܲܥܢܸܐ ܗ݇ܘ̣ܵܐ ܒܲܩܪܵܒܼܵܐ ܕܥܲܡ ܒܥܸܠܕܒܼܵܒܸ̈ܐ: ܠܵܐ ܐܸܫܟܲܚ ܐ݇ܢܵܫ ܠܡܲܪܡܵܝܘܼ ܥܠܵܘܗ‌ܝ ܐܝܼ̈ܕܲܝܵܐ: ܘܟܲܕ ܫܟܸܒܼ ܥܲܠ ܒܘܼܪ̈ܟܸܐ ܕܐܲܢ݇ܬܿܬܸܗ: ܚܲܕܪܘܼܗ‌ܝ ܒܥܸܠܕܒܼܵܒܸ̈ܐ ܘܐܲܤܪܘܼܗ‌ܝ ܘܥܵܘܲܪܘ ܥܲܝ̈ܢܵܘܗ‌ܝ. ܘܲܫܠܹܝܡܘܿܢ ܚܲܟܝܼܡܵܐ ܟܡܵܐ ܕܲܥܢܸܐ ܗ݇ܘ̣ܵܐ ܒܒܸܢܝܵܐ ܕܗܲܝܟܠܵܐ: ܠܵܐ ܙܟܼܵܬܸܗ ܪܸܓܬܼܵܐ. ܘܟܲܕܼ ܒܛܸܠ ܡܼܢ ܦܘܼܠܚܵܢܵܐ ܐܸܫܬܲܠܛܲܬ̤ ܥܠܵܘܗ‌ܝ ܪܸܓܿܬܼܵـܐ. ܘܲܙܟܼܵܬܸܗ ܥܕܲܡܵܐ ܕܲܢܤܲܒܼ ܢܸܫܸ̈ܐ ܢܘܼܟܼܪ̈ܵܝܵܬܼܵـܐ ܘܐܸܫܬܿܡܲܥ ܠܗܹܝܢ ܒܤܤܓܼܕܬܵܐ ܕܲܠܟܼܵܡܘܿܫ ܘܲܠܒܲܥܠܵܐ. ܘܲܠܗܵܕܸܐ ܐܸܡܲܪ ܐܵܓܼܘܿܤܛܝܼܢܘܿܤ ܩܲܕܝܼܫܵܐ: ܐܸܬܼܚܲܦܲܛܘ ܚܲܒܝܼ̈ܒܲܝ! ܘܐܲܪܚܸܩܘ ܡܸܢܟܼܘܿܢ ܠܒܸܛܠܵܢܵܐ: ܡܸܛܠ ܕܠܵܐ ܡܝܲܬܿܪܝܼܬܿܘܿܢ ܡܼܢ ܕܵܘܝܼܕܼ: ܐܵܦܠܵܐ ܓܲܢ݇ܒܵܪ̈ܝܼܢ ܐܲܢ݇ܬܘܿܢ ܡܼܢ ܫܸܡܫܘܿܢ: ܐܵܦܠܵܐ ܚܲܟܝܼܡܝܼܢ ܐܲܢ݇ܬܘܿܢ ܡܼܢ ܫܠܹܝܡܘܿܢ. ܘܲܟܼܬܼܝܼܒܼ ܒܲܩܠܹܤܲܤ̈ܛܝܼܩܸܐ: ܕܡܸܛܪܵܦܘܿܠܹܝܛܵܐ ܕܲܦܠܘܿܪܲܢܤܵܐ ܕܲܫܡܸܗ ܐܲܢܛܘܿܢܝܼܘܿܤ: ܟܲܕܼ ܥܵܒܲܪ ܗ݇ܘ̣ܵܐ ܒܚܲܕܼ ܡܼܢ

ܝܵܘܡ̈ܝܼܢ ܒܫܘܼܩܸ̈ܐ ܕܲܡܕܝܼܢ݇ܬܵܐ: ܚܙܵܐ ܠܡܲܫܪܝܼܬܼܵܐ ܕܡܲܠܲܐܟܼܸ̈ܐ ܕܩܵܝܡܝܼܢ ܥܲܠ ܐܸܓܵܪܵܐ ܡܼܢ ܐܸܓܵܪܸ̈ܐ: ܘܲܬܼܡܲܗ ܗܵܘܢܸܗ ܡܼܢ ܬܸܕܡܘܼܪܬܵܐ. ܘܥܲܠ̣ ܠܒܲܝܬܵܐ ܗܵܘ ܘܐܸܫܟܲܚ ܐܲܢ݇ܬܿܬܼܵܐ ܐܲܪܡܲܠܬܼܵܐ ܕܐܝܼܬܼ ܠܵܗ̇ ܬܠܵܬܼ ܒ̈ــܢܵܢ ܕܲܨܪ̈ܝܼܟܼܵܢ ܛܵܒܼ ܘܝܵܬܼܒ̈ܵܢ ܚܕܼܵܪܹܝܗ̇ ܘܥܵܙܠܵܢ: ܘܲܫܐܸܠ ܒܲܫܠܵܡܗܹܝܢ. ܘܩܲܒܸܠܵܝܗ‌ܝ ܒܐܝܼܩܵܪܵܐ ܪܲܒܵܐ. ܘܚܵܤ ܥܠܲܝܗܹܝܢ ܘܐܲܦܸܩ ܠܟܼܝܼܤܸܗ ܘܝܲܗ݇ܒܼ ܠܗܹܝܢ ܙܸܕܩܬܼܵܐ ܫܦܝܼܥܬܵܐ ܘܲܢܦܲܩ. ܘܡܼܢ ܒܵܬܲܪ ܝܵܘܡ̈ܝܼܢ ܗܦܲܟܼ ܕܢܸܚܙܸܐ ܐܸܢܹܝܢ: ܘܲܚܙܵܐ ܥܲܠ ܐܸܓܵܪܗܹܝܢ ܡܲܫܪܝܼܬܼܵܐ ܕܫܸܐ̈ܕܼܸܐ ܕܩܵܝܡܝܼܢ ܚܠܵܦ ܡܲܠܲܐܟܼܸ̈ܐ: ܘܥܲܠ̣ ܠܘܵܬܼܗܹܝܢ ܠܒܲܝܬܼܵܐ. ܘܫܲܐܸܠ ܒܲܫܠܵܡܗܹܝܢ ܐܲܝܟܼ ܕܲܒܼܩܲܕܡܵܝܬܼܵܐ. ܗܸܢܹܝܢ ܕܹܝܢ ܩܲܒܠܵܝܗ‌ܝ ܒܐܝܼܩܵܪܵܐ: ܘܲܪܡܲܙ ܠܸܗ ܠܡܸܬܲܒܼ. ܘܫܲܐܸܠ ܐܸܢܹܝܢ ܘܐܸܡܲܪ ܡܵܢܵܐ ܥܒܲܕ̈ܬܹܝܢ ܘܲܒܼܡܵܢܵܐ ܐܸܬܼܥܢܝܼܬܹܿܝܢ؟ ܡܸܛܠ ܕܐܸܬܼܚܲܙܝܵܬ̤ ܠܝܼ ܨܒܼܘܼܬܼܵܐ ܬܡܝܼܗܬܵܐ. ܘܗܹܢܹܝܢ ܐܸܡܲܪ ܡܵܢܵܐ ܗ݇‌ܝܼ؟ ܘܐܸܫܬܲܥܝܼ ܠܗܹܝܢ ܗܵܘ ܡܵܐ ܕܲܚܙܵܐ ܒܩܲܕܼܡܵܝܬܵܐ ܘܒܲܐ݇ܚܪܵܝܬܵܐ: ܘܗܹܢܹܝܢ ܐܸܡܲܪ: ܕܠܵܐ ܪ̈ܓܼܝܼܫܵܢܲܢ ܒܤܘܼܪܚܵܢܵܐ ܡܸܕܸܡ ܤܛܲܪ ܡܼܢ ܒܸܛܠܵܢܵܐ: ܒܗܵ‌ܝ ܕܒܲܙܒܲܢܬܵܐ ܩܲܕܼܡܵܝܬܵܐ: ܐܲܟܼܡܵܐ ܕܲܚܙܵܝܬܘܿܢ: ܥܲܢܝܵܢ ܗܘܲܝܢ ܒܲܥܙܵܠܵܐ: ܘܟܲܕܼ ܐܲܛܐܸܒܼܬܿ ܠܲܢ ܒܙܸܕܸܩܬܼܵܐ ܫܦܝܼܥܬܵܐ: ܒܛܸܠܢܲܢ ܡܼܢ ܦܘܼܠܚܵܢܵܐ: ܘܲܗ̈ܘܲܝܢ ܐܵܟܼܠܵܢ ܘܫܵܬܼ̈ܝܵܢ ܘܡܸܨܛܲܒܼܬܼܵܢ. ܒܪܝܼܟܼܘܼ ܡܵܪܝܵܐ ܕܲܟܼܡܵܐ ܛܵܒܼܵܬܼܵܐ ܡܛܲܝܸܒܼ ܠܥܲܒܼܕܼܵܘܗ‌ܝ ܒܥܸܠܲܬܼ ܦܘܼܠܚܵܢܵܐ ܘܟܲܫܝܼܪܘܼܬܼܵܐ. ܘܠܝܼܛ ܤܵܛܵܢܵܐ ܕܲܟܼܡܵܐ ܬܘܼܟܸ̈ܐ ܘܚܘܼܤܪ̈ܵܢܸܐ ܡܵܘܠܸܕܼ ܒܲܢ ܡܼܢ ܡܲܐܝܼܢܘܼܬܼܵܐ ܘܒܸܛܠܵܢܵܐ. ܘܡܸܛܠ ܗܵܕܸܐ ܐܝܼܬܼ ܥܝܵܕܵܐ ܠܲܒܼܢܲܝ̈ ܦܪܲܢܤܵܐ: ܕܟܲܕܼ ܡܸܫܟܿܚܝܼܢ ܐ݇ܢܵܫ ܕܒܲܛܝܼܠ ܘܠܵܐ ܦܵܠܲܚ: ܡܥܲܩܒܼܝܼܢ ܥܠܵܘܗ‌ܝ ܕܡܼܢ ܐܲܝܟܵܐ ܗ݇ܘܼ ܬܘܼܪܤܵܝܸܗ ܘܤܲܝܒܵܪܬܸܗ. ܘܐܸܢ ܝܵܗܸܒܼ ܠܗܘܿܢ ܦܸܬܼܓܼܵܡܵܐ ܚܠܝܼܡܵܐ. ܘܐܸܢ ܠܵܐ: ܛܵܪܕܝܼܢ ܠܸܗ ܡܼܢ ܡܕܝܼܢ݇ܬܼܗܘܿܢ: ܒܗܵ‌ܝ ܕܚܘܼܤܪܵܢܵܐ ܗ݇ܘܼ ܕܓܼܵܘܵܐ. ܘܡܸܨܪ̈ܵܝܸܐ ܒܲܓܼܙܵܪ ܕܝܼܢܵܐ ܕܡܵܘܬܵܐ ܡܡܝܼܬܼܝܼܢ ܗ݇ܘ̤ܵܘ ܠܐܲܝܢܵܐ ܕܠܵܐ ܡܸܫܟܲܚ ܗ݇ܘ̣ܵܐ ܠܲܡܦܲܪܢܵܤܘܼ ܠܒܲܝܬܸܗ!! ܘܤܘܿܠܘܿܢ ܚܲܟܝܼܡܵܐ ܤܵܡ ܩܵܢܘܿܢܵܐ: ܕܲܒܼܪܵܐ ܐܲܝܢܵܐ ܕܠܵܐ ܐܲܠܦܸܗ ܐܲܒܼܘܼܗ‌ܝ ܐܘܼܡܵܢܘܼܬܼܵܐ ܡܸܕܸܡ: ܠܵܐ ܚܲܝܵܒܼ ܕܲܢܬܲܪܤܸܐ ܠܐܲܒܼܘܼܗ‌ܝ ܒܲܙܒܲܢ ܤܲܝܒܘܼܬܸܗ.

ܠܐܲܝܠܹܝܢ ܕܟܸܬܼܒܸܬܼ: ܥܗܲܕܼܘ: ܐܘܿ ܐܲܚܸ̈ܐ ܚܲܒܝܼܒܸ̈ܐ! ܘܲܒܼܗܹܝܢ ܗܪܘܿܓܼܘ: ܘܐܲܪܚܸܩܘ ܡܼܢ ܒܸܛܠܵܢܵܐ ܘܡܲܐܝܼܢܘܼܬܼܵܐ ܕܐܝܼܬܲܝܗܘܿܢ ܡܨܝܼܕܼܬܵܐ ܕܫܸܐ̈ܕܼܸܐ. ܘܐܸܬܼܚܲܦܲܛܘ ܐܲܝܟܼ ܡܵܪܟܼܘܿܢ ܕܬܸܫܬܿܘܘܿܢ ܠܛܘܼܒܼܵܐ ܕܲܡܠܸܟܼ ܠܲܚܦܝܼܛܸ̈ܐ ܘܲܠܟܲܫܝܼܪܸ̈ܐ ܘܐܵܦ ܤܨܝܘܿܡܵܐ ܥܲܡܟܼܘܿܢ. ܒܲܨܠܘܿܬܼ ܗܵ‌ܝ ܚܦܝܼܛܬܵܐ ܘܟܲܫܝܼܪܬܵܐ ܘܲܕܟܼܠܗܘܿܢ ܐܲܝܠܹܝܢ ܕܲܨܒܲܥܘ ܢܲܚܬܲܝܗܘܿܢ ܒܲܕܼܡܵܐ ܕܐܸܡܪܵܐ ܡܠܝܼܠܵܐ..ܐܵܡܹܝܢ܀܀܀܀

مشاركاتكم (0)