ܚܒܼܝܼܫܐ ܓܘ ܒܝܬـܐ ܕܚܢܢ ܓܘܼܪܐ ܕܟܗܢ̈ܐ

ܒܪܘܼܢܝܼ... ܡܘܼܩܸܡܠܝܼ ܚܲܢܵܢ ܓܘܼܪܵܐ ܕܟܵܗܢܸ̈ܐ: ܩܲܕ ܦܵܬܸܚ ܠܬܲܪ̈ܥܵܢܸܐ ܕܫܡܲܝܵܐ ܩܲܕ݇ܡ ܥܲܡܪ̈ܵܢܸܐ ܕܐܲܪܥܵܐ. ܐܝܼܢܵܐ ܒܪܸܥܝܵܢܸܗ ܚܸܫܟܵܢܵܐ ܘܒܠܸܒܵܐ ܥܲܡܛܵܢܵܐ ܩܲܕ݇ܡ ܚܵܒܼܸܫܠܝܼ ܓܵܘ ܒܲܝܬܸܗ. ܒܪܘܼܢܵܐ ܕܚܸܫܟܵܐ ܒܥܹܐܠܸܗ ܕܚܵܒܼܸܫܠܝܼ ܘܐܵܢܵܐ ܢܘܼܗܪܵܐ ܐܵܒܵܕܝܼܢܵܝܵܐ. ܒܪܘܼܢܵܐ ܕܚܸܫܟܵܐ ܒܥܹܐܠܸܗ ܕܥܵܒܼܸܕܠܝܼ ܓܘܼܢܗܵܟܲܪ ܘܐܵܢܵܐ ܕܲܝܵܢܵܐ ܟܹܐܢܵܐ. ܓܵܘ ܟܲܪܒܵܐ ܡܘܼܩܘܸܚܠܸܗ ܓܘܼܪܵܐ ܕܟܵܗܢܸ̈ܐ ܘܐ݇ܡܸܪܸܗ: (ܨܦܵܝ ܝܼܠܵܐ ܕܡܵܐܸܬ ܚܲܕ݇ ܡܼܢ ܓܝܼܢ݇ܒܵܐ ܕܟܠܵܗ̇ ܐܘܼܡܬܵܐ). ܫܪܵܪܵܐ ܡܗܘܼܡܙܸܡܠܸܗ: ܓܵܪܲܓ ܡܲܝܬܸܢ ܗ݇ܘ̣ܵܐ ܡܼܢ ܓܝܼܢ݇ܒܵܐ ܕܟܠܵܝ̈ܗ‌ܝ ܒܢܲܝ̈ـܢܵܫܵܐ. ܘܡܼܢ ܗܲܡܙܲܡܬܸܗ ܒܸܬ ܕܵܝܢܸܢܸܗ..ܒܸܬ ܡܲܝܬܸܢ ܒܘܼܬ ܕܝܼܸܗ ܘܒܘܼܬ ܟܠܵܝ̈ܗ‌ܝ ܒܢܲܝ̈ـܢܵܫܵܐ. ܒܲܤ ܩܵܡܘܼܕܝܼ ܝ݇ܠܸܗ ܡܲܤܠܘܼܝܸܐ ܠܦܘܼܪܩܵܢܝܼ؟... ܤܪܸܛܠܸܗ ܠܠܒܼܸܫܬܸܗ ܓܘܼܪܵــــــܐ ܕܟܵܗܢܸ̈ܐ ܘܐ݇ܡܸܪܸܗ (ܗܵــــܐ ܓܕܸܦܠܸܗ) ܘܠܵܐ ܕܥܹܐܠܸܗ ܕܫܠܸܚܠܸܗ ܡܸܢܸܗ ܠܟܵܗܢܘܼܬܵـــܐ ܕܠܸܘܝܼ!!!!!. ܤܪܸܛܠܸܗ ܠܒܼܸܫܬܸܗ ܘܒܛܸܠܸܗ ܡܼܢ ܬܸܫܡܸܫܬܵܐ ܕܟܵܗܢܘܼܬܵܐ.. ܘܤܲܪ̈ܒܵܙܸܐ ܠܵܐ ܤܪܸܛܠܘܼܢ ܠܨܘܼܕܪܝܼ ܤܵܒܵܒ ܟܵܗܢܘܼܬܝܼ ܟܲܠܝܵܢܬܵܐ ܝ݇ܠܵܐ ܠܥܵܠܲܡ. ܒܛܸܠܘܼܢ ܕܒܲܚܝܵܬܸ̈ـܐ ܕܗܲܝܘܵܢܸ̈ܐ: ܤܵܒܵܒ ܡܘܼܩܪܸܒܼܠܝܼ ܦܲܓܼܪܝܼ ܕܸܒܼܚܵܐ ܕܚܘܼܒܵܐ ܫܲܪܝܼܪܵܐ. ܦܝܼܠܵܛܘܼܤ ܒܥܹܐܠܸܗ ܕܤܲܙܓܸܪ ܥܲܡ ܗܸܪܘܿܕܸܤ ܘܵܐܠܝܼ ܕܓܠܝܼܠܵܐ. ܩܲܕ݇ܡ ܫܵܕܸܪܝܼ ܠܟܸܤܠܸܗ ܩܲܕ ܦܵܝܫܸܢ ܕܝܼܢܵܐ: ܤܵܒܵܒ ܓܠܝܼܠܵܝܵܐ ܝ݇ܘܸܢ. ܘܠܵܐ ܕܥܹܐܠܘܼܢ ܬܸܪ̈ܘܵܝ ܕܐܵܢܵܐ ܡܵܪܵܐ ܝ݇ܘܸܢ ܕܟܠܵܗ̇ ܒܪܝܼܬܵܐ!!!. ܗܘܸܐܠܝܼ ܫܬܝܼܩܵܐ ܡܼܢ ܕܝܼܘܵܢ ܠܕܝܼܘܵܢ. ܗܸܪܘܿܕܸܤ ܚܫܸܒܼܠܸܗ ܕܒܸܬ ܥܲܒܼܕܸܢ ܢܝܼܫܲܢܩܵܐ ܩܲܕ݇ܡܸܗ: ܚܫܸܒܼܠܸܗ ܕܐܸܬܝܵܐ ܝ݇ܘܸܢ ܕܡܲܚܙܸܢ ܚܲܝܠܝܼ. ܠܵܐ ܕܥܹܐܠܸܗ ܕܐܸܬܝܵܐ ܝ݇ܘܸܢ ܩܲܕ ܓܵܠܸܢ ܚܘܼܒܝܼ: ܠܵܐ ܕܥܹܐܠܸܗ ܕܨܠܲܒܼܬ‌ܝܼ ܢܝܼܫܲܢܩܵܐ ܝ݇ܠܵܗ̇ ܡܥܲܓ̰ܒܵܢܵܐ.

ܠܝܼܬܠܝܼ ܒܘܼܫ ܓܘܼܪܵܐ ܡܼܢ ܦܘܼܪܩܵܢܵܐ ܕܥܵܠܡܵܐ!!!. ܦܝܼܠܵܛܘܼܤ ܫܓܼܸܫܠܸܗ: ܕܩܲܕ݇ܡ ܚܵܙܸܐܠܝܼ ܡܲܟܝܼܟܼܵܐ، ܠܵܐ ܡܲܩܘܘܼܚܸܐ، ܘܩܵܐܠܝܼ ܠܵܐ ܦܝܵܫܵܐ ܫܸܡܥܝܵܐ. ܚܙܸܐܠܝܼ ܠܡܲܪܙܵܢܝܼ ܕܪܵܒܵܐ ܨܸܗܝܵܐ ܝ݇ܢܵܐ ܠܕܸܡܝܼ: ܕܦܝܼܫܵܐ ܝ݇ܢܵܐ ܡܘܼܠܦܸܐ ܒܤܵܛܵܢܵܐ ܒܝܼܫܵܐ ܗ̇ܘ ܕܡܨܸܐܠܸܗ ܠܡܲܤܡܘܼܝܸܐ ܥܲܝܢܵܬܵܝܗ‌ܝ ܘܠܚܲܫܟܘܼܢܸܐ ܠܸܒܵܘܵܬܵܝܗ‌ܝ. ܦܝܼܠܵܛܘܼܤ ܒܸܙܕܵܥܝܵܐ ܗ݇ܘ̣ܵܐ..... ܤܵܒܵܒ ܓܵܘ ܩܪܵܒܼܵܐ ܗ݇ܘ̣ܵܐ ܒܹܝܠ ܫܪܵܪܵܐ ܘܒܹܝܠ ܬܵܠܲܩܬܵܐ ܕܕܵܪܓܼܸܗ: ܘܟܲܕ ܠܵܐ ܡܘܼܫܡܸܥܠܸܗ ܦܝܼܠܵܛܘܼܤ ܠܫܪܵܪܵܐ: ܗܘܼܡܙܸܡܠܘܼܢ ܚܘܼܠܡܵܢܸ̈ܐ ܒܫܪܵܪܵܐ: ܗܘܼܡܙܸܡܠܘܼܢ ܚܘܼܠܡܵܢܸ̈ܐ ܥܲܡ ܒܲܟܼܬܸܗ. ܫܓܼܝܼܫܠܵܗ̇.. ܙܕܸܥܠܵܗ̇.. ܡܫܘܼܕܸܪܵܗ̇ ܠܟܸܤ ܓܲܒܼܪܘܿܗ̇ ܠܡܲܕܥܘܼܝܸܗ....... ܐܝܼܢܵܐ ܦܝܼܠܵܛܘܼܤ ܡܚܘܼܠܸܠܸܗ ܠܐܝܼܕܵܬܸ̈ܗ.. ܩܵܡܘܼ ܒܚܲܠܵܠܬܵܐ ܕܐܝܼܕܵܬܸ̈ܗ ܒܸܬ ܦܵܪܸܩ ܠܓܵܢܸܗ؟.... ܠܵܐ ܕܥܹܐܠܸܗ ܒܚܲܠܵܠܬܵܐ ܕܐܝܼܕܵܬܸ̈ܗ ܡܤܘܼܦܹܐܠܸܗ ܠܕܸܡܵܐ ܙܲܟܵܝܵܐ!!!!. ܒܝܵܘܡܵܐ ܕܐܸܫܬܵܐ ܒܪܸܐܠܝܼ ܠܒܵܒܘܼܟܼ ܐܨܕܵܡ ܘܝܸܡܘܼܟܼ ܚܵܘܵܐ: ܒܸܪܝܵܝܠܝܼ ܩܲܕ ܡܲܢܝܸܚܸܢ ܒܝܵܘܡܵܐ ܕܫܲܒܼܥܵܐ. ܘܡܲܢܝܵܚܬ‌ܝܼ ܐܝܼܠܵܗ̇، ܕܒܲܪܢܵܫܵܐ ܦܵܐܸܫ ܚܩܝܼܪܵܐ!!. ܒܝܵܘܡܵܐ ܕܐܸܫܬܵܐ ܦܝܼܫܠܝܼ ܨܠܝܼܒܼܵܐ: ܩܲܕ ܒܕܸܡܝܼ ܡܚܲܕܸܬܸܢ ܠܸܒܪܵܝܬܘܼܟܼ!!!. ܒܝܵܘܡܵܐ ܕܐܸܫܬܵܐ ܩܲܕ݇ܡ ܒܵܪܸܢܘܼܟܼ ܡܼܢ ܥܘܼܦܪܵܐ....ܒܲܪܢܵܫܵܐ. ܢܦܸܚܠܝܼ ܒܝܼܘܼܟܼ ܢܫܲܡܬܵܐ ܕܚܲܝܸ̈ܐ ܩܲܕ ܫܲܩܠܸܬ ܠܨܘܼܪܬܝܼ: ܩܲܕ݇ܡ ܡܫܲܠܛܸܢܘܼܟܼ ܥܲܠ ܐܲܪܥܵܐ ܘܝܵܡܵܬܸ̈ـܐ. ܩܲܕ݇ܡ ܡܲܩܸܡܸܢܘܼܟܼ ܡܲܠܟܵܐ ܓܵܘ ܥܵܠܡܵܐ ܫܲܦܝܼܪܵܐ: ܐܝܼܢܵܐ ܟܲܕ ܦܪܸܫܠܘܼܟܼ ܡܸܢܝܼ..... ܒܸܬ ܕܵܝܪܸܬ ܠܥܘܼܦܪܵܐ.. ܘܒܸܬ ܗܵܘܸܐ ܥܡܵܪܘܼܟܼ ܓܵܘ ܩܲܒܼܪ̈ܵܘܵܬܼܵـܐ.  ܒܝܵܘܡܵܐ ܕܐܸܫܬܵܐ، ܝܵܘܡܵܐ ܕܥܪܘܼܒܼܬܵܐ، ܒܥܹܐܠܸܗ ܥܘܼܦܪܵܢܵܐ ܕܫܲܚܠܸܦܠܝܼ ܠܥܘܼܦܪܵܐ: ܚܫܸܒܼܠܸܗ ܥܘܼܦܪܵܢܵܐ ܒܡܲܩܪܲܒܼܬ‌ܝܼ ܠܡܵܘܬܵܐ ܒܸܬ ܗܵܘܸܢ ܥܘܼܦܪܵܐ. ܠܵܐ ܕܥܹܐܠܘܼܢ ܕܫܡܲܝܵܢܵܝܵܐ ܝ݇ܘܸܢ ܘܒܸܬ ܕܵܝܪܸܢ ܠܫܡܲܝܵܐ.  ܫܒܼܘܼܩ ܩܲܦܚܝܼܠܝܼ...ܫܒܼܘܼܩ ܡܓ̰ܲܢܓ̰ܸܪܝܼܠܝܼ...ܫܒܼܘܼܩ ܪܵܝܩܝܼ ܓܵܘ ܦܲܬܘܵܬ̈ܝܼ..ܫܒܼܘܼܩ ܩܲܦܚܝܼܠܝܼ...ܫܒܼܘܼܩ ܡܲܬܒܼܝܼ ܟܠܝܼܠܵܐ ܕܟܸܬ̈ܒܸܐ ܥܲܠ ܪܸܫܝܼ...ܫܒܼܘܼܩ ܡܲܠܒܼܝܼܫܝܼܠܝܼ ܐܲܪܓܘܵܢܵܐ ܩܵܐ ܡܲܤܚܘܼܪܸܐ ܒܝܝܼ...ܫܒܼܘܼܩ ܡܲܢܝܸܚܵܐ ܓܵܢܵܝܗ‌ܝ ܒܠܝܵܡܬ‌ܝܼ...  ܩܲܕ݇ܡ ܕܵܝܢܝܼܠܝܼ ܕܦܲܝܫܸܢ ܙܩܝܼܦܵܐ، ܩܲܕ ܗܵܘܸܢ ܡܬܘܼܢܕܸܠܵܐ: ܐܲܝܟܼ ܕܐܸܢ ܠܹܐ ܝ݇ܘܸܢ ܚܫܝܼܚܵܐ ܕܓ̰ܵܘܓ̰ܸܢ ܥܲܠ

ܐܲܪܥܵܐ: ܘܠܵܐ ܕܦܲܪܚܸܢ ܓܵܘ ܫܡܲܝܵܐ!!!. ܫܒܼܘܼܩ ܥܲܒܼܕܝܼ ܟܠ ܡܸܢܕܝܼ ܕܒܲܥܝܝܼ.. ܤܵܒܵܒ ܐܵܢܵܐ ܡܬܘܼܢܕܸܠܵܐ ܒܸܗܘܵܝܵܐ ܝ݇ܘܸܢ ܤܸܡܲܠܬܵܐ ܒܹܝܠ ܫܡܲܝܵܐ ܘܐܲܪܥܵܐ: ܘܒܝܝܼ ܒܸܬ ܐܲܤܩܝܼ ܥܘܼܦܪ̈ܵܢܸܐ ܠܡܲܢܙܝܼ̈ܠܸܐ ܐܲܠܵܗܵܝܸ̈ܐ. ܘܒܸܬ ܫܲܠܚܸܢ ܡܸܢܵܝ̈ܗ‌ܝ ܚܪܵܒܼܵܝܗ‌ܝ ܘܡܵܘܬܵܝܗ‌ܝ: ܩܲܕ ܚܲܝܝܼ ܚܩܝܼܪܸ̈ܐ ܠܥܵܠܲܡ. ܒܝܵܘܡܵܐ ܕܐܸܫܬܵܐ ܩܲܕ݇ܡ ܡܲܬܒܼܝܼܠܝܼ ܒܩܲܒܼܪܵܐ: ܘܠܹܐ ܡܵܨܸܗ ܡܵܘܬܵܐ ܕܫܲܚܠܸܦ ܦܲܓܼܪܝܼ ܠܥܘܼܦܪܵܐ: ܘܠܵܐ ܕܫܵܪܸܐ ܒܝܝܼ ܚܪܵܒܼܵܐ. ܒܪܘܼܢܝܼ.... ܕܒܼܸܩܠܝܼ ܒܐܝܼܕܘܼܟܼ ܩܲܕ ܡܚܲܕܸܬܸܢ ܠܨܘܼܪܬܘܼܟܼ ܒܪܘܼܚܝܼ ܩܲܕܝܼܫܵܐ: ܢܦܸܚܠܝܼ ܒܝܼܘܼܟܼ ܪܘܼܚܝܼ ܝܲܗ݇ܒܼܵܢܬܵܐ ܕܚܲܝܸ̈ܐ. ܒܝܵܘܡܵܐ ܕܐܸܫܬܵܐ ܨܠܹܐܠܝܼ ܠܩܲܒܼܪܵܐ: ܩܲܕ ܫܲܠܚܸܢ ܡܼܢ ܥܘܼܦܪ̈ܵܢܸܐ ܟܝܵܢܵܝܗ‌ܝ ܚܪܝܼܒܼܵܐ ܕܥܘܼܦܪܵܐ: ܩܲܕ ܚܘܼܘܵܐ ܕܥܲܬܝܼܩܬܵܐ ܠܵܐ ܡܲܫ̃ܟ̰ܚܵܐ ܓܵܘܵܝܗ‌ܝ ܡܸܐܟܼܘܼܠܬܵܐ ܘܐܲܟܼܠܵܐܠܘܼܢ!!!. ܤܵܒܵܒ ܬܲܢܒܵܐ ܕܚܘܼܘܵܐ ܐܝܼܠܵܐ (ܕܥܘܼܦܪܵــــܐ ܒܸܬ ܐܲܟܼܠܸܬ ܟܠܵܝ̈ܗ‌ܝ ܝܵܘܡܵܢܸ̈ܐ ܕܚܲܝܘܼܟܼ).    ܚܘܼܘܵܐ ܚܫܸܒܼܠܸܗ ܕܟܠܵܗ̇ ܒܲܪܢܵܫܘܼܬܵــــܐ ܒܸܬ ܗܵܘܝܼ ܥܘܼܦܪܵــــܐ ܩܲــــܕ ܐܵܟܼܸܠܘܼܢ: ܘܚܫܸܒܼܠܸܗ ܕܒܸܬ ܐܵܟܼܸܠܝܼ ܓܵܘ ܩܲܒܼܪܵܐ!!!.  ܤܦܸܪܸܗ ܩܲܕ ܗܵܘܸܢ ܥܘܼܦܪܵܐ: ܐܝܼܢܵܐ ܚܙܸܐܠܸܗ ܕܫܘܼܚܠܸܦܠܝܼ ܐ݇ܢܵܫܵܐ ܥܘܼܦܪܵܢܵܐ ܠܫܡܲܝܵܐ ܚܲܕܬܵܐ. ܒܪܘܼܢܝܼ....   ܡܚܝܼ ܓܵܘܤܵܐ ܒܨܠܝܼܒܼܝܼ: ܩܲܕ ܠܵܐ ܗܵܘܸܬ ܥܘܼܦܪܵܐ، ܘܡܹܐܟܼܘܼܠܬܵܐ ܩܵܐ ܚܘܼܘܵܐ ܕܥܲܬܝܼܩܬܵܐ. ܩܲܕ݇ܡ ܤܲܪܒܼܝܼܠܝܼ ܐܵܢܵܐ ܡܘܼܚܸܒܵܐ...ܝܘܼܗ݇ܒܼܸܠܝܼ ܦܸܪܤܲܬ ܕܬܝܵܒܼܘܼܬܵܐ ܩܵܐ ܕܸܐܒܸ̈ܐ. ܦܝܼܠܵܛܘܼܤ ܛܠܸܒܠܸܗ ܕܫܲܒܼܩܝܼܠܝܼ: ܐܝܼܢܵܐ ܐܵܢܝܼ̈ ܛܠܸܒܠܘܼܢ ܠܒܲܪ ܐܲܒܵܐ: ܘܐܵܢܵܐ ܦܵܝܫܸܢ ܙܩܝܼܦܵܐ!!.  ܠܹܐ ܝ݇ܠܵܐ ܡܥܲܓ̰ܒܲܢܬܵܐ ܕܛܲܠܒܝܼ ܤܵܛܵܢܵܐ ܕܗܵܘܸܐ ܒܵܒܵܝܗ‌ܝ؟ ܕܛܲܠܒܝܼ ܠܒܲܪ ܐܲܒܵܐ ܡܼܢ ܓܝܼܢ݇ܒܝܼ؟!!.  ܚܙܸܐܠܘܼܢ ܓܵܘ ܒܲܪ ܐܲܒܵܐ ܨܘܼܪܬܵܐ ܕܒܵܒܵܝܗ‌ܝ ܘܛܠܸܒܠܘܼܢ ܕܫܵܪܸܐܠܸܗ: ܠܵܐ ܒܥܹܐܠܘܼܢ ܒܲܗܪܵܐ: ܒܥܹܐܠܘܼܢ ܕܚܲܝܝܼ ܓܵܘ ܚܸܫܟܵܐ.  ܩܲܕ݇ܡ ܤܲܪܒܼܝܼܠܝܼ ܐܵܢܵܐ ܡܘܼܚܸܒܵܐ...ܘܛܠܸܒܠܘܼܢ ܠܓ̰ܵܠܵܠܝܼ ܩܲܕ ܬܵܠܸܩܠܘܼܢ ܠܐܵܒܵܕ.  ܗܘܝܼ ܪܥܝܼܫܵܐ ܒܪܘܼܢܝܼ...ܩܲܕ ܚܛܝܼܵܬ̈ܘܼܟܼ ܠܵܐ ܛܲܠܒܝܼ ܠܒܲܪ ܐܲܒܵܐ ܘܫܲܒܼܩܸܬ ܩܵܬ‌ܝܼ. ܚܠܘܼܠܵܐ ܝ݇ܠܸܗ ܩܵܬ‌ܝܼ ܐܝܼܡܵܢ ܕܩܲܕ݇ܡ ܫܲܠܚܝܼܠܝܼ ܡܼܢ ܠܒܸܫܬ‌ܝܼ ܘܩܲܕ݇ܡ ܡܲܪܡܝܼܠܝܼ ܥܲܠ ܩܲܝܤܵܐ. ܩܲܕ݇ܡ ܫܲܠܚܝܼܠܝܼ ܡܼܢ ܠܒܸܫܬ‌ܝܼ ܩܲܕ ܝܵܕܥܸܗ ܒܵܒܘܼܟܼ ܐܵܕܵܡ ܩܲܕ݇ܡܵܝܵܐ ܕܐܝܼܠܸܗ ܫܘܼܠܚܵܝܵܐ.

ܩܲܕ݇ܡ ܫܲܠܚܝܼܠܝܼ ܡܼܢ ܠܒܸܫܬ‌ܝܼ ܩܲܕ ܟܵܤܸܢ ܠܒܲܪܢܵܫܘܼܬܵܐ. ܩܲܕ ܟܵܤܸܢ ܫܘܼܠܚܵܝܘܼܬܵܐ ܕܒܲܪܢܵܫܵܐ ܒܠܒܼܫܬܵܐ ܕܚܠܘܼܠܝܼ. ܘܡܲܪܡܸܢܸܗ ܘܡܲܥܒܸܪܸܢܸܗ ܠܡܲܠܟܘܼܬ‌ܝܼ ܐܵܒܵܕܝܼܢܵܝܬܵܐ.  ܩܲܕ݇ܡ ܫܲܠܚܝܼܠܝܼ ܡܼܢ ܠܒܸܫܬ‌ܝܼ ܘܒܵܒܵܐ ܤܪܸܛܠܸܗ ܠܤܸܬܪܵܐ ܕܗܲܝܟܠܵܐ: ܩܲܕ ܛܵܪܸܕ ܠܐܘܼܡܬܵܐ ܒܝܼܫܬܵܐ ܡܼܢ ܓܵܘ ܩܕܘܼܫ ܩܘܼܕܫܸ̈ܐ. ܘܥܲܒܼܪܸܢ ܥܲܡ ܛܠܝܼܒܬ‌ܝܼ (ܥܹܕܬܝܼ) ܠܩܘܼܕܫܸ̈ܐ ܫܡܲܝܵܢܵܝܸ̈ܐ. ܘܓܵܘ ܦܲܠܓܵܐ ܕܓ̰ܘܼܢܓ̰ܵܪܝܼ ܡܫܘܼܕܸܪܝܼ ܠܕܘܼܡܵܟܼܘܼܤ ܓ̰ܵܠܵܠܝܼ ܠܦܲܪܕܵܝܤܝܼ. ܘܡܘܼܫܥܸܫܠܝܼ ܠܠܸܒܵܐ ܕܪܲܒ ܐܸܡܵܐܐ ܩܲܕ ܝܵܗ݇ܒܸܠ ܤܵܗܕܘܼܬܵܐ ܕܐܵܢܵܐ ܝ݇ܘܸܢ ܚܸܬܢܵܐ ܕܫܡܲܝܵܐ. ܒܪܘܼܢܝܼ.... ܡܸܢܕܝܼ ܕܐܝܼܬܠܝܼ ܕܕܸܝܘܼܟܼ ܐܝܼܠܸܗ.. ܬܵܐ ܥܲܡܝܼ ܓܵܘ ܐܘܼܪܚܵܐ ܕܓܵܓܼܘܼܠܬܵܐ.. ܟܠܝܼ ܟܸܤ ܨܠܝܼܒܼܵܐ ܘܓܲܫܸܩ ܒܚܘܼܒܝܼ.. ܟܠܝܼ ܥܲܡ ܬܲܠܡܝܼܕܝܼ ܝܘܼܚܲܢܵܢ ܘܡܵܢܕܝܼ ܕܐܝܼܬܠܝܼ ܒܸܬ ܝܵܗ݇ܒܸܢܘܼܟܼ. ܒܸܬ ܝܵܗ݇ܒܸܢܘܼܟܼ ܝܸܡܝܼ ܩܲܕ ܗܵܘܝܵܐ ܝܸܡܵܐ ܩܵܬܘܼܟܼ، ܘܐܲܢ݇ܬ ܗܵܘܸܬ ܒܪܘܼܢܵܐ ܩܵܬܘܿܗ̇.  ܒܸܬ ܝܵܗ݇ܒܸܢܘܼܟܼ ܒܘܼܫ ܙܵܘܕܵܐ ܡܼܢ ܕܐܲܢ݇ܬ ܛܲܠܒܸܬ.  ܟܪܸܒܠܸܗ ܫܸܡܫܵܐ ܐܝܼܡܵܢ ܕܚܙܸܐܠܸܗ ܠܥܘܼܦܪܵܢܵܐ ܒܸܙܩܵܦܵܐ ܠܒܵܪܘܼܝܸܗ. ܘܩܲܕ ܠܵܐ ܡܵܩܸܕܠܘܼܢ ܡܟܘܼܤܸܐܠܸܗ ܠܙܲܗܪܝܼܪܸ̈ܗ.  ܗܘܸܐܠܸܗ ܚܸܫܟܵܐ ܥܲܠ ܐܲܪܥܵܐ ܩܲܕ ܚܵܙܝܼ ܕܟܡܵܐ ܚܸܫܟܵܢܵܐ ܝ݇ܠܸܗ ܠܸܒܵܝܗ‌ܝ.  ܫܥܸܫܠܵܗ̇ ܐܲܪܥܵܐ ܘܒܥܹܐܠܵܗ̇ ܕܒܲܠܥܵܐܠܘܼܢ ܠܨܲܠܒܼܵܢܸ̈ܐ. ܘܩܲܒܼܪ̈ܵܘܵܬܸܐ ܦܬܸܚܠܘܼܢ ܩܲܕ ܚܵܙܝܼ ܨܲܠܒܼܵܢܸ̈ܐ ܩܝܵܡܬܵܐ ܕܡܝܼܬܸ̈ـܐ. ܦܩܸܕܠܝܼ ܕܐܵܙܠ݇ܝܼ ܠܐܘܿܪܸܫܠܸܡ، ܩܲܕ ܡܲܢܟܼܸܤܝܼ ܠܚܵܝܸ̈ܐ ܥܲܠ ܚܛܝܼܵܬܵܝܗ‌ܝ، ܘܦܠܸܛܠܘܼܢ ܡܝܼܬܸ̈ــــܐ ܡܗܲܠܘܼܠܸܐ ܘܡܬܲܫܒܘܼܚܸܐ. ܡܘܼܕܥܹܐܠܘܼܢ ܩܵܐ ܚܵܝܸ̈ܐ ܕܫܘܼܪ̈ܵܢܸܐ ܕܫܝܘܼܠ ܬܠܸܚܠܘܼܢ ܘܡܕܝܼܢ݇ܬܵܐ ܕܡܵܘܬܵܐ ܬܠܸܚܠܵܗ̇ ܘܒܛܸܠܵܗ̇.  ܡܘܼܚܦܸܠܘܼܢ ܓܘܼܪ̈ܵܢܸܐ ܕܝܗ݇ܘܼܕܵܝܸ̈ܐ ܡܼܢ ܢܵܡܘܼܤܵܐ ܕܗܲܡܙܘܼܡܵܐ ܗ݇ܘ̣ܵܐ ܒܘܼܬ ܕܝܝܼ: ܘܠܵܐ ܫܡܸܥܠܘܼܢ ܠܒܪܵ ܩܵܠܵܐ ܕܐܲܒܼܵܗܵܬܵܝ̈ܗ‌ܝ ܘܢܒܼܝܼܵܝ̈ܗ‌ܝ. ܥܟ̰ܸܡܠܘܼܢ ܠܥܲܝܢܵܬܵܝܗ‌ܝ ܘܢܲܬܝܵܬܵܝܗ‌ܝ ܩܲܕ ܠܵܐ ܚܵܙܝܼ ܠܢܝܼܫܲܢܩܝܼ ܘܫܲܡܥܝܼ ܠܩܵܠܝܼ. ܗܵܐ ܒܪܝܼܬܵܐ ܒܸܫܥܵܫܵܐ ܕܒܲܠܟܵܐ ܠܸܒܵܘܵܬܵܝܗ‌ܝ ܫܲܓܼܫܝܼ ܥܲܡܘܿܗ̇. ܩܲܒܼܪ̈ܵܘܵܬܸـܐ ܦܬܸܚܠܘܼܢ ܩܲܕ ܪܵܝܥܫܝܼ ܡܼܢ ܫܸܢܬܵܐ ܕܡܵܘܬܵܐ. ܤܸܬܪܵܐ ܕܗܲܝܟܠܵܐ ܤܪܸܛܠܸܗ ܩܲܕ ܝܵܕܥܝܼ ܕܠܝܼܬ ܤܢܝܼܩܘܼܬܵܐ ܠܕܒܼܵܚܝܵܬܸ̈ـܐ ܕܗܲܝܘܵܢܸ̈ܐ: ܘܠܵܐ ܤܢܝܼܩܘܼܬܵܐ ܠܟܲܗܢܘܼܬܵܐ ܕܠܸܘܝܼ!!!!!!!!!!!!!.

ܒܪܘܼܢܝܼ.. ܠܵܐ ܦܵܝܫܸܬ ܡܘܼܕܡܝܼܵܐ ܒܝܼܵܝܗ‌ܝ. ܫܸܡܥܝܵܐ ܝ݇ܘܸܬ ܒܘܼܬ ܐ݇ܢܵܫܵܐ ܙܩܝܼܦܵܐ ܕܟܸܐ ܗܲܡܙܸܡ ܒܥܸܕܵܢܵܐ ܕܤܵܦܵܝܬܵܐ ܕܪܘܼܚܸܗ؟ ܡܘܼܩܘܸܚܠܝܼ ܘܤܘܼܦܹܐܠܝܼ ܪܘܼܚܝܼ. ܡܘܼܩܘܸܚܠܝܼ ܩܲܕ ܦܵܬܚܝܼ ܩܵܕ݇ܡܝܼ ܬܲܪ̈ܥܵܢܸܐ ܕܫܝܘܼܠ ܘܥܲܒܼܪܸܢ ܐܲܝܟܼ ܡܲܠܟܵܐ ܙܲܟܵܝܵܐ. ܘܫܲܩܠܸܢ ܥܲܠ ܪ̈ܘܼܥܫܵܢܝܼ ܪܵܒܵܐ ܤܠܲܒܝܵܬܸ̈ـܐ. ܐܵܕܵܡ ܡܛܘܼܫܸܐܠܸܗ ܓܵܢܸܗ ܤܵܒܵܒ ܐ݇ܟܼܸܠܸܗ ܡܼܢ ܛܥܘܼܢܬܵܐ ܕܐܝܼܠܵܢܵܐ. ܐܝܼܢܵܐ ܐܵܢܵܐ ܒܫܘܼܒܼܚܵܐ ܡܘܼܩܘܸܚܠܝܼ ܩܲܕ ܡܲܕܥܸܢ ܩܵܐ ܫܡܲܝܵܐ ܠܬܲܡܲܡܬܵܐ ܕܦܘܼܪܩܵܢܵܐ. ܡܘܼܩܘܸܚܠܝܼ ܒܚܲܝܠܵܐ ܩܲܕ ܡܫܲܒܚܝܼ ܚܲܝܠܵܘܵܬܸ̈ـܐ ܕܫܡܲܝܵܐ.   ܚܙܝܼ ܠܕܸܦܢܝܼ ܦܬܝܼܚܬܵܐ ܒܪܘܼܡܚܵܐ: ܩܲܕ ܥܲܒܼܪܵܗ̇ ܒܲܪܢܵܫܘܼܬܵܐ ܘܫܲܪܝܵܗ̇ ܓܵܘ ܦܲܓܼܪܝܼ. ܘܦܲܬܚܝܼ ܩܲܕ݇ܡܵܝܵܝܗ‌ܝ ܬܲܪ̈ܥܵܢܸܐ ܕܦܲܪܕܵܝܤܵܐ ܕܕܒܼܝܼܪܵܝܠܸܗ ܐܵܕܵܡ. ܦܝܼܫܠܝܼ ܡܒܘܼܙܡܸܪܵܐ ܥܲܠ ܨܠܝܼܒܼܵܐ.. ܩܲܕ ܒܒܸܙܡܵܪܸ̈ܐ ܤܲܪܛܸܢ ܠܐܸܫܛܵܪܵܐ ܕܒܝܼܵܗ̇ ܙܒܼܝܼܢܵܝܠܸܗ ܤܵܛܵܢܵܐ. ܘܥܲܒܼܕܸܢܘܼܢ ܚܸܐܪܸ̈ܐ ܡܼܢ ܫܘܼܠܛܵܢܵܐ ܕܒܝܼܫܵܐ ܡܕܲܒܪܵܢܵܐ ܘܓܘܼܪܵܐ ܕܥܵܠܡܵܐ. ܡܘܼܩܘܸܚܠܝܼ: ܩܲܕ ܫܲܩܠܝܼ ܩܝܼܬܼܵܪ̈ܵܝܗ‌ܝ ܟܠܵܝ̈ܗ‌ܝ ܐܲܒܼܵܗܵܬܸ̈ـܐ ܘܟܵܗܢܸ̈ܐ ܘܢܒܼܝܸ̈ܐ ܘܡܗܘܼܝܡܢܸ̈ܐ. ܘܫܲܒܚܝܼ ܠܗ̇ܘ ܕܒܸܐ݇ܬܵܝܵܐ ܝ݇ܠܸܗ ܡܼܢ ܡܵܘܬܵܐ ܒܓܼܵܠܝܼܒܘܼܬܵܐ. ܒܲܪܢܵܫܵܐ ܠܹܐ ܝܵܕܥܸܗ ܠܚܲܝܠܵܐ ܕܓܵܘ ܨܠܝܼܒܼܝܼ. ܐܝܼܡܵܢ ܕܬܲܦܩܵܚ ܒܐܘܼܕܵܠܸ̈ܐ ܒܪܸܫ ܥܲܝܒܼܸ̈ܐ: ܐܝܼܡܵܢ ܕܚܵܙܸܬ ܚܲܝܠܵܘܵܬܸ̈ـܐ ܕܫܡܲܝܵܐ ܡܚܘܼܪܕܝܼܘܼܟܼ: ܘܡܫܵܒܘܼܚܸܐ ܒܘܼܬ ܚܵܬܸܪ ܕܚܠܘܼܠܵܐ ܐܵܒܵܕܝܼܢܵܝܵܐ: ܘܐܝܼܡܵܢ ܕܐܵܙܸܠ݇ܬ ܘܫܲܘܬܸܦܸܬ ܓܵܘ ܫܘܼܒܼܚܝܼ: ܗܲܝܓܵܗ̇ ܒܸܬ ܒܲܗܪܸܢ ܨܠܝܼܒܼܵܐ ܩܲܕ݇ܡ ܥܲܝܢܵܬ̈ܘܼܟܼ: ܘܒܸܬ ܚܵܙܸܬ ܠܚܲܝܠܸܗ ܡܥܲܓ̰ܒܵܢܵܐ.  ܘܼܢܝܼ.. ܠܵܐ ܢܲܚܦܸܬ ܡܼܢ ܨܠܝܼܒܼܵܐ.. ܘܥܲܡ ܦܵܘܠܘܼܤ ܫܠܝܼܚܵܐ ܐܲܡܪܸܬ (ܠܝܼܬܠܝܼ ܫܘܼܒܼܗܵܪܵܐ ܐܸܠܵܐ ܒܨܠܝܼܒܼܵܐ ܕܡܵܪܲܢ ܝܼܫܘܿܥ ܡܫܝܼܚܵܐ). ܒܸܬ ܥܲܒܼܕܸܢܘܼܟܼ ܫܸܡܥܘܼܢ ܩܝܼܘܪܝܼܢܵܝܵܐ ܚܲܕܼܬܵܐ: ܒܸܬ ܝܵܗ݇ܒܸܢܘܼܟܼ ܕܦܵܝܫܸܬ ܨܠܝܼܒܼܵܐ ܥܲܡܝܼ: ܘܗܲܝܓܵܗ̇ ܒܸܬ ܚܵܙܸܬ ܚܲܝܠܵܐ ܘܚܲܕܘܼܬܵܐ ܕܩܝܵܡܬ‌ܝܼ܀܀܀܀܀

ܒܝܕ ܡܫܡܫܢܐ: ܝܘܤܦ ܢܘܼܪܘܼ