|
المسرحـيـة الشعبية الـكومـيـديـة الـهــادفـــة عـتـريـس وأم خـمـيـس تأليف المخرج مـوفـق ســاوا كتبت عام 1998م - بغداد الشــخـصـيـــات ************** 1- باسم 2- راسم 3- قاسم 4- جاسم 5- عاسم 6- أم خميس : مدربة الفــريـق 7- الفتاة الاجنبية : مدربه جـديـدة 8- عـتـريـس : حـَـكـَـمْ 9- ونيس : أبـن عـتـريـس 10- أنيس : أبـن عـتـريـس - راقصات عـدد 2 او اكـثـر
المشهـــد الأول ( مباراة بكـرة الـقدم )
المشهـــد الـثـانـي ( في مـكـان الاسـتـراحـة ) راسم : ( يدخل مرددا أو مغنيا ) أريـد أعـرف شلـون خسرنــا أريـد أعـرف شلـون أنهزمنــا جاسم : (يدخل) وداعـتـك أحـنـه لـعـبـنـا أحسن لـعـب وشلون لـعب نـظيـف وشريـف وعـفـيـف قاسم : (يدخل) أحـنـه.. أحـنـه.. أحـنـه.. أديـنـا واجـبـنـا وشويــه زيــاده باسم : (يدخل) بـوري بـوري بـوري والله أنضربـنـه خوش بـوري وشلون بـوري ..أبـو العشريــن أنــج راسم : المهم كان هـذا أكـبـر درس قـاسي إلـنـا جاسم : من هسه ورايـح لازم ما نـنـلدغ باسم : صـح يا زميلي فالمؤمن لا يـُلدغ من جـحرِهِ مرتـيـن راسم : أنـسـو الـمـبـاراة وخـلـونـا نْــريـّـح أعصـابـنـا ونـلعـب فـد فـره دومـنـه (يجلسون ويلعبون) جاسم : لــو بـس أعـرف ليش المـدرب العـجـوز أصـر علـى خـطـتــِه ِالـفـاشـلـه قاسم : ( يلعب دومنه) هـــذا حَـبـِّي بَـيـاض الكل : هـــذا حـَـبـِّي بَـيـاض ( صفر في لعبة الدومنه) باسم : هـذا المـدرب هــم دكـتـاتـوري وهـم أعـور راسم : هــذا يـَـك ْ (يعني 1) الكل : هــذا يـَـكْ جاسم : مو صـوجه ..صـوج المساعدين إللي دايـر مـَدايـره مضــخـمي ومسويـي مـدرب عظيـم قاسم : وهـــذا شـيـش بــيــش باسم : أكـو نـاس لَـكـَّامـه .. مصـلحـجـيـَـه.. نَـفـعـيـيـن وصـولييـن يـحجـون بـوجـهيـن يـعـني بالـوجه مـرايـه وبـلـكـُفـه سلايـّـه راسم : بابا كل الناس هسه صايـره هـيـجـي جاسم : مو كل أصـابـعـك سوه . خلي الله بيـن عيـونـك وأكـعـد عـدل وأحـجي اعـوج. قاسم : (ضاحكا) الصَـحيـح ، أكـعـد اعـوج وأحـجي عـدل.أنتَ قلبتهـا باسم : قاسم .. الدنـيـا صـايـره بـالمـقـلـوبـي راسم : وهــذا الجـهـار (4) جاسم : وهــذا الدو (2) قاسم : وهــذا السي (3) باسم : هــذا الـبـيــش (5) راسم : ولـكم مـات الـدوشـيـش. المذيع : ( نسمع صوتـه بعد قطع الاغنيه) ايها المواطنون ...... نظرا للتطورات الجديده والتي سنوافيكم بيها بعد قليل لذا نوجه نداءنا الى اعضاء المنتخب الوطني للالتحاق فورا بالنادي الرياضي الكل : يَـلـّـه يـا شـبـاب بسرعة للنادي (يـخـرجـون عدا باسم ) باسم : ( مع الـمـذيـاع ) شـكـو ماكـو ...؟! المذيع : ( صارخا به) امشي لك بسرعه باسم : عـِلكـَـت والله ( يـخرج مسرعا ً) المذيع : ايها المواطنـون ايتها الجماهير الرياضية سنذيع عليكم بعد قليل بـلاغـا مهما صـادر عن مجلس الشباب الرياضي الوطني. ( ثم نــسمــع مقطع من نـشيــد الله اكـبــر) لقـد تم بعـون الله وبهمة الرجال الاخيار المؤمنين بالروح الرياضية العاليه على المتنتخب الوطني وقرروا مايلي:
اولا ً: تم الاطاحة العفو تم عزل المدرب العجوز المستورد من بـلاد القمـعـسـتـان وتـرحيلـه الى موطـنِـه ِالاصـلي. ثانيا : تـم تـعـيـن الـمدربـة الـوطـنـيـه أم خميس بدلا مـنـه. ( موسيقى وهــلاهـــل )
الـمشهــد الثالث المدربه : ( مشهـد سلويت . نشاهـد المدربه تقوم بتدريب الفريق مع اغنية - إلعَـب يابو جاسم- ثم نسمع صوت الصافره ..) وهـسه خـلـي نـنـطي فرصه للجمهـور الرياضي حتى يتعـرَّف على مـنـتخـبـنـا الـوطني راسم : ( يُـقـدم نـفـسه) انـــا الـــلاعب راســم باسم : ( يُـقـدم نـفـسه) انـــا الـــلاعب باســـم قاسم : ( يُـقـدم نـفـسه) انـــا الـــلاعب قاســـم جاسم : ( يُـقـدم نـفـسه) انـــا الـــلاعب جاســـم راسم : وهـذه ام خمـيـس مدربـة هـذا الفريـق وبنت هذه الديـره أم خميس : هَـسَّـه أخــذو راحـتـكـم ( تـخـرج) باسم : أيهـا الجمهور الرياضي العـزيز نتواصل معـكم ولكن انـتـظـرونا مع هـذا الـبـريـك الاعـلانـي راسم : صايـر مـذيع وأحـنـا ما نـعـرف باسم : مـذيع جـديـد بـس نـص ردن عـتريس : ( نسمع صوته مغـنـيـا ً من خارج الكواليس) يـالـلـي نسـيـتـونـــه يّـمـتـه تـذكـرونــــه يـَمـتــه نـجي عالـبال وتـساعـدون الـحـال يّـمـتـه تـذكـرونــــه عـفـتـونــــه يـا احــبـاب لا داعـي لا أســبـاب غـلـقـتـوا بوجهـنه الـباب رحـتــوا وعـفـتـونــه يّـمـتـه تـذكـرونــــه ( ثـــم يـدخـل ) لـيـش .. لـيـش .. لـيـش عـفـتـوني ولـبستـوني.. قابل أني ما عـندي حَـظْ وياكـم باسم : حـَظـَّك يـا صـاحـبـي منـحـوس حتى لو حَـطّـوا بـراسـك فانـوس قاسم : إنـتَ منـو.........؟! عتريس : انا عـتريـس ابو سـبع صنايـع والبخـت ضايـع الكل : ( مردديـن) والبخـت ضايـع عتريس : انا قَصّـاب الـديـره اذبـح الخـرفـان وآشـرب بـيـره الكل : ( مردديـن) ويـشـرب بـيـره عتريس : وانـا حائـك أحـوك الـزوالي حتى تـفـرشـوهـا جـواكم وانـا بعديـن أسحـبهـا من تحـت أقـدامكم الكل : ( مردديـن) يـسحـبهـا من تحـت أقـدامـنـا عتريس : وانـا صـياد اصنع الـشـبـج حـتـى اصـيـد بـيـهـا العـصافـيـر والـسـمـج الكل : ( مردديـن) يـصـيـد بـيـهـا العـصافيـر والـسـمـج عتريس : وانا فـيـتـرجي وسمـكري وبـنجـرجي وبهـاي (رافعا ًالصبانه)اشـد كُـلّ شـي راغـي وبهـذا (رافعـا ًألدرنـفـيس) أفُـل كـُلّ البـراغي وبهـذا ( مؤشـرا الى رأسه) اكـدر احـفـر إلكـُم بـيـر باســـم :( مغـنيا ً) يا حـافـر الـبـيــر لا تـغـمـج مساحـيهــا يا حافـر الـبـيــر مـَتـكُــلـّي شـلـك بـيهــــا خـوف الـفـلـك يـنـدار وانـتَ الـتـكـع بيهـــا جاسم : كـلت انـتَ أسمـك ابليـس عتريس : كـلا.. عـتريس ابــو ونــيــس وانــيــس.. قاســـم : وشتـريـد يا عـتـريـس ........؟! عتريس : أريــد العـَب ويـّاكــم واصـيـر واحـد مـنـكـم باســـم : أولاً ... اريــد اسعـلـك سُـوعـال عتريس : على بختك إسْعـَـل ميت سوعال باســـم : تـعـرف تـلـعـب ... عتريس : ( مقاطعـاً ) طـوبـه.. باســـم : لاء .. بـخـشـمـك عتريس : خـشـمـي..!! خـشـمـي شـنـو علاقـته بالـطوبـه..!! باســـم : ها... كلت شنو علاقـته خـشـمـي بالطوبه..!! خوش سوعال مهم ومنطقي. شـوف ابليـس عتريس : كـلـنـا عـتـريـس مـو أبليس باســـم : شوف عـتريس.. الخشـم له علاقه بالطوبه يعني اذا خشمك ...... عتريس : ( مقاطعـاً) إي ... باسم : وجعي ..خليني ألغي عتريس : تفضل الغي باســـم : وين وصلت القضيه عتريس : للخشـم باســـم : رحم الله خشمك ... اقصد رحم الله والديك .. فالخـشـم يا عزيزي ابليس .. عتريس : ( بعـصبـيـة) عـتريس عـتريس عـتريس باســـم : تاليهـا مـا راح تـكمل قضية الخشم..!! خليني أكمّـل خشمك عتريس : مـَا دكـولـّي أش جَـلـَّبـتْ بالخـشـم..؟! باســـم : لازم أجـلـّب بالخشـم لأنـّهُ مهم جدا ًوحساس وخاصةً في هـذه المرحله التي تمر بها الامة.. عتريس : ( مقاطعـاً) صـار أغاتي كـَمـّل خشمـك.... أقصد حـجـيـك ولا تلقي عليـنـا خطاب سياسي باســـم : فالخشـم ، كما قـلنا سابقا، له علاقـة وطيده بالجـو الداخلي والخارجي عتريس : أشو القضية وصلت للداخليـه والخارجيـه باســـم : جـا شلـون.. هـن َّ هـَـذولــه المهمـات عتريس : مهمات...!! باســـم : أي نعم مهمات..مثل حضرتك.. تلبس ملابس داخلـيــه وخـارجـيــه عتريس : الـمـوضـوع خـرج عـن قـضـيــّة الخــشـم ... رجــاءاً أدخـل بالخـشم مبـاشرة ً باســـم : أدخل بالخـشم ليش ما ادخل.. فالخشم مهم للاشخاص والدول الناميه.. عتريس: هـسه أني شنو علاقـتـي بالدول الـنـامـيـه..!! باســم : علاقـة أخـويـه وحدويـه. علاقة صميميه وعلاقه جـنـسـ ... عتريس: ( مقاطعـاً) تـره طولـتهـا وعـّرضـتـهـا باســم : تمام يا طويل العمر طولتها وعرضتها وثخـنـتهـا وخَمـشتها....... عتريس: ( صارخا ً) دِخَـشّـمـهـا باســم : أخـَشْـمّهـا .. بـس لا تـصـيـّـح أخاف تـفـزز السمره. فخلاصـة القول يا معزوز عـيني اذا الخشم ما مفـتـوح ما تكـدر تـشـم رائـحـة الاخـوه الاعـداء عتريس : ولـك من هـذي الناحـيـه خَـلـّيـنـي على يـمنـاك باســم : لـيـش انت يَـمَـنـي عتريس : نـعـم باســم : وهـم اني مـثـلـك ... بـس هـنـدي جاســم : مـَدكـولـّي اشبالـع مُـسـَجّــل خـومو مسجـل باســـم : لاء ... قـنـاة جـزيـرسـتـان قاســم : انتَ... أنت تـعـرف تـلـعـب ..... عتريس: ( مقاطعـا ً) بـالخـشــم ..!! قاســم : لا بالطـوبــه عتريس: نـعــم نـعــم نـعــم قاســم : خـوش.. دهـاك أشو إلـعـب عتريس: ( يلعـب ) ويعد الارقام بالانكليزي 1، 2، 3 ....) جاسم : بـويـه عمي أخويه هـذي الطريقه عـنكـلـيـزيـه.. حـِنـّه نلعـب على الطريـقـه.. على الطريـقـه.. على الطريـقـه......... باسـم : (مقتطعاً ) على الطريـقـه البـوذيـه ( يضحكون ) قاسـم : (لعتريس) روح بـابا روح أنـت ما تـعرف تلعب مثلنا عتريس : لـيـش يابا مـا أكـدرألـعـب مثـلكم.. والله العظيم اعـرف الـعـب بـيكـم طـوبـه راسـم : تـروح يا عتريس لـو ازرف خَـشمـك بالـدرنـفيس عتريس : أشــوف مـا اروح جاسم : اطـلـع لـك أبـلـيـس ( يحـاول ضـربـه ويفـر عـتريس خارجا ً) عتريس : ( يطل برأسه من خلف الكواليس) بــسـيـطـه راح دشوفـون مـنـو أنـي. باســم : اطلع لـك هَـي دَجـَّه دَبـنـج دَماغـســس على وزن شكرسـس (يحاول الركض وراءَه ُفيعود بعد سماع صافرة أم خميس) ام خميس: (تـدخل) يـلـَّه داومو بالتدريب ( وبعــد التدريـب) هـسّـه دربـتـكم احـسـن تـدريـب وصـار مَصـيـر المـنـتـخـب بـيديكم اذا فـزتـو بـالكأس ترفـعـون عاليا ً رايـة بـلادي الكـل : ( مغـنين) بـلدي بـلدي والشرطه أخذت اولادي أم .... : ولكم جــرحـتـم قـلبـي بـهـل الاغـنيــه قاسـم : جـرح القـلب تـره مثـل الـجـام مـا يـنـلـجـم أم : واذا خـسـرتـو، لاسامـح الله الكل : لا سامـح الله ... ام : تـنـتـكــس رايـة الـوطـن جاسم : اللــه اشـمـحـلاك يـا الـوطـن - : اللي مضيع ذهب بسوك الذهب يلكاه - : اللي مضيع ابنـه يمكـن بالسجـن يلكـاه - : اللي مضيع سيارته بالـتـفـصيـغ يمكـن يلكاها - : بس اللي مضيـع وطــن ويـن الـوطـن يلكاه أم.... : والان اقـرأ عليكم بعـض الـتعلـيمـات المهمـه.. أولاً الكل : اولا ً أم : اذا اخـتـرق فـريـق الخـصـم خَـطـكم الهجـومي ماذا تَـفعـلـون..؟ باســـم : بسـيطه وابسط منها ماكـو أم : شلــون..!! باسـم : نـشـلــّع كالغـزال وأبــوج الله يـرحـمـه أم : لاء .. يجـب على خـط الدفـاع ان يـصـمـد ... باسم : نعـم يجـب ان نـصـمـد ونـشـكـّل جـبـهـة الصـمود والتصـدي فـالنـصــر يَـصـنع الـصـمـود أم : يجـب على خـط الدفـاع ان يـصـمـد حـتى تـتـراجـع كـل الـخـطـوط لأسـنــادِه ِ باسـم : يعـني نـسنـد ظهـره ونـصـير إله حـزام ام : ثـانـيــا ً الكل : ثـانـيــا أم : أمـا أفـضـل وسـيله للــدفــاع هي .... باسـم : (مقاطعا) نكعـد ونـَـلـطـم لـلصــبـح ام : كـلا .. أفـضــل وســيـله لـلـدفـاع هي الهجـوم .. باسـم : عـليهـم اخـوتي عـليهـم ( مغـنياً) يا حـوم اتبـع لـو جـريـنـا ام : تهـجمـون وتـضـغـطـون عليهم حتى تسجلـون هدفـا ً مبكرا وبهـذا الهـدف الـمـبـكـر .. باسـم : (مقاطعا) نعـلـن بـريـك أعـلانـي... ام : كـلا .. بل بـهـذا الهـدف تـرتـفـع معـنـويـاتـكم عـالـيـا باسـم : ام خـمـيـس .. ام : نـعــم باسـم : نعـم الله عـلـيـج .. تـسـمـحـيـلي بـسُـعـال ( يعني سؤال) ام : تـفـضـل سـيـد بــاســــم باسـم : زاد فـضلـج عـيونـي. أولا ً أنا مو سـيّـد وثانـيا ًألى يـا درجه مسموح لمعـنـوياتـِنا ان ترتـفـع ام : الى ما لا نـهايـه باسم : يعـنـي الى حـد السمـاء ام : نـعـم ( باسم يسقـط ارضـا) جاسم : هـذا شـبي ..!! دكـوم بابا دكـوم باســـم : شلـون أكـوم واني مسـتـشهــد قاسـم : انـهـض فالشـهـداء نعم الشهـداء عـنـد ربـهـم يـرزقـون باســم : ( وهو ينهض) ولك وأنـا حـي ..الله سبحانه وتعالى ما رزقـني إلا بـركي وشــلون ركــي أبـيـض مثـل القــيـر راســم : باســـم...... باســـم : عـيون باســم راســم : ولك دمـك خُـوفـَـيّـف باســـم : دمي خـوفـيـف بس الجـنس اللطيف العـفـيف ما يـحـبونـي راســم : لـيـش..!! باســم : لأني ما اشبه دكتور شعلان البلام راســم : وهــذا يـاهـو باســم : أخو دكتور داوود بريسم جاسـم : شلون شلون ...!! شلون يصير شعلان أخو داوود باســم : بالرضاعــه وأبـوك الله يرحمه ام : ثـالـثـا الكـل : ثـالـثـا ام : عـندما تـسجـلون الهـدف الاول.. إسـتـثمـر هـذا الهدف بالهجـوم المـُرَكَّـز لخـلخـلـة خـطوطهم وصـولا باســم : (مقاطـعـا) الى حـيـفـا ويـافـا ام : كلا.. الى الهـدف الـثاني وهـكـذا دوالـيك واخـيـرا ًلا تحاولوا الاحـتـفـاظ بالـكـرة.. نَـاولهـا بـسـرعـه 1 ، 2 باسم : ( يصفع زميله) ولك مو كايـلـّك ألف مره لا تنام عالطوبه ام : اريد كل واحد منكم يصير عون للثاني افـتهمتو معناها باسـم : (مغنيا) نعـم يا حـبـيـبـي نعم وبـيـن شـفيـفـك نغـم ... ام : يعـني فاهـميهــا زيـــن ..؟! باســم : نفهمهـا وهـيّه طـايـره. مـاذا تـظـنـيـنـا صغـاراً أم بـغـالا ام : كلا انـتم ابـطالا كل واحد بيكم ما شاء الله يـوزن جـبل باسـم : والله بـس انـي وزنـي بكـد جـبـل حـرمـيـن وعليـج الحسـاب ام : (مصححة لزملائـه) يقصد جبل حمريـن..( يضكون) والان... كـلـكـم أريـدكـم تـصـيـرون بـقـلـب واحـد الكل : ( مردديـن) واحـد واحـد واحـد.. احـنـا كـلـنـا واحــد قاسم : اذا لـعـبـنـا سـوه مَـحـّد يكـدر يغـلـبـنـه. واذا لعـبـنـا مُـنقـسـمـين اكـيـد نـخـسـر 100% ام : وحـتى لا نـخـسر .عـليكـم.بالتـدريب ثـم التدريب ( يتدربـون) جاسم : أم خميس أحسن مدربـه بـالعالم .هـا اخـوتـي هـا الكل : هــا جاسم : إلمـا يـحـبهـا خـلـي يـنطـح راسـه بالحـايـط ( يـرددون الهـوسه ) قاسم : ام خـميس..اسمعي.. شلـون قـصـايـد كـتـبـنـالج إلـبارحـه باســم : قَـصايـد عـمـوديـّه و شاقـولـيـّه وعـرضـيّـه قاسم : اسمعي يا ام خـمـيـس: رشـي الـدرب تـيـزاب حـافي أتـعـنـيـلـج جا شلـي بالـرجـلـيـنـات إلمـا تـجـيـلـج (تصفيق وهلاهل) باســم : أعـد بـروح أبـوك أعـد ( قاسم يـكـررهــا) راسم : رشي الــدرب تـيـزاب وازرعي ألــغـام يصيــر اللحـم طـشّـار وأوصَـلـج عـظـام أم : وأنـتـو.. انتو .... حـطـو بالـلـبـن تـيـزاب ممنـون أشربــه بـس لا أشـوفـكـم تخـسـرون ويّه الـغـربـه الكل : عـِـدْ عـيـنـاج يـا أم خـميـس باسـم : انت ِ الشمس والكمـر.. انت ِ الحايط والجـبـل.. انـتِ الهـوى والمـاي .. انـت ِ الشكـر والجـاي.. انت الـلـيـل والـنهـار .. انـت البـطيخ والخـيـار ... انت الـكــركـم والـبــريــانــي.. وكـتـبو أسمج بساحة الخلاني ام : المهـم أن تـفـوزو بالـكـأس قاسم : هـذه بـديـهـيـه مـا يـخـتـلـف عـلـيهـا اثـنـيـن باســم : تمام يـا طـويل الـعـمـر لا يـخـتـلـف عـليهـا لا اثـنـيـن ولا ثـلاثـاء ولا اربـعـاء ولا خميس راسم : أم خـمـيـس ... لـيـش سَــمـيـّتـي ابـنــج خـمـيـس..؟ باســم : غـبي.. اكـو واحـد ما يـعـرفـهـا راسم : يـعـني حـضـرتـك تـعـرفـهـا باســم : طـبعـا طـبعـا اعـرفـهـا..لأن ابـو خـمـيـس اسـمـه جـمـعــه ام : (بـحـدة) اسـمـعـونـي .. اسـمـعـونـي زيـن يـا شبـاب الكل : (مـردديــن) يـا شـبـاب أم : بـطـولـة العـالم على الابـواب الكل : (مـردديـن) بـطـولـة العـالم على الابـواب أم : ولازم تـصـيـرو كـُلـكـُم احـبـاب الكل : ((مـردديـن) نــصـيـر كـلــنــا احـبـاب أم : والـباجـر أحـسـبـو الـف حـسـاب الكل : (مـردديـن) نـحـسـبــهــا الـف حـسـاب ام : احـسبـوهـا وأفـحـصـوهـا بـالـعـيـن الكل : (مـردديـن) حـاسـبـيـن حـسابـنـا كـُلّ الـزيـن ام : بـس لا بالعـكـس وتـروحـون بـيهـا بـعــديـن باسـم : تخسا انا اخـوج ..اطمأنـي يا أم خمـيس .ها اخوتـي ها الكل : هــا باسـم : علـى راسـنـا أم خـميس، تـاج نـخـليهـا.. علـى راسـنـا تـاج نـخـليهـا.. ( يرددون الهوسه) ام : هم انـي احـبـكم وأريـد الـخـيـر إلـكم ( تـكـررهـا) باسم : نـحـبـج مـن الشـريـان الـى الـوريــد قاسم : وكـلـنـا راح نـصـيـر مـثـل الـفـولاذ والحـديــد جاسم : وام خـمـيس.. مـُدربـه لازم تـبـقـن ( يجلسونهـا على الكرسي) راسم : وأنـي مدرب لا يمكـن ان اصــيـر باســـم : لعـد صـيـر نـصــيـر راسم : هـذا ياهــو..! باســم : مـعـلم سـيـاقـه مـعـروف قاسم : وأحـنــا هـم معـروفـيـن جاسم : بـس اكـو جـماعـه مـا تـدري بـيـنــا باسم : الـيدري يـدري والمايدري خـلي يـشرب شوربة بالكأس راسم : احـنـا لازم نـفـوز بالـكـأس الكل : هـذا الكـأس يـلـمـع وعـيـونـهـم تــدمــع .... قاسـم : وهـسـه كـلشـي تـمام .. بـس المشكـله مشـكـلة الـكـابـتــن.. ام : الكـابـتـن كـلمة اجـنـبـيـة. احـنـا نـريـد مصـطـلحـات اصـلـيّـه باسـم : اذن لـنخـتـار كـلمـة الـزعــيـم.. بـس بـلـيـّه ركـن ام : خـوش . مـنـو يـريـد يـصـيـر زعـيــم ..؟
الكل : ( صـارخـين ) أني ..أني... أني ..أني... أم : عـيـن الله عـليـكم..... كـاتـلتكـم الـزعـامـات.. باسم : انـا الرجـل الـمـناسـب فـي الـمـكــان الـمـنـاسـب جاسم : لاء.. انـا الرجـل الـمـناسب فـي الـمـكـان الـمنـاسـب قاسم : كلا.. انـا الرجـل الـمـناسـب فـي الـمـكــان الـمـنـاسـب راسم : أشوف انـا الرجـل الـمـناسـب فـي الـمـكـان الـمـنـاسـب ( تحـدث معـركة بـيـنـهـم )
باسـم : هيجي صـارت عركه بالـدربـونـه بـيـن الـجلـب والبـزونـه ام : (صارخة) بَــس ( صمت) ألأنـتــخـابـات هي التي تـقـرر من يكون زعـيـم هـذا الفـريـق باســم : مـا صَــحَّ إلا الـصـحـيـح.. الكـل : ( بفـرح ) هييييييي هييييييي .... كـلـنا نحـب الانـتخابات ( يكررونها) ام : ولكم أنــي فـرحـانــه بـيكـم باســم : لـمـاذا... لـمـاذا يــا ام خـمـيــس...!! ام : لأنـكـم تــحـبـون تـمــارســون... باسـم : ( مقاطعـاً) نمـارس.. ليـش مـا نمـارس.. قـابـل احـنـه مـو كـَده. كـده وكـدود. والله أمارس تـمريـسا واطـحنهـا تـطحـيـنـا.... (لأم خمـيـس ) اكـلـّج يـرحـم والـديـج شـنـمـارس..؟! ام : الـديـمـقـراطـيـه باسـم : تـعـيـش الـديـمـقـطــاطـيـّـه..أكــول شـنــو مـعـنـاتـهـا قاسم : كـل هـل هـوســه ومـا تـعـرف مـعـنـاهــا..!! باسـم : والله سـامـع بــيـهــا مــن تــفـلـزيـون سـي جـي قـي ام : وهـسّـه خـلي نـروح نرتـاح ونـشـوف بـاجـر مـنـو هـَّوه الحكـم جاسم : احنا نـريـد حكم مُـنـتـخـب مـن قبل الجمهـور الرياضي باســم : بـس لا يـكـون حـكـم مـُـزوَّر مـن ســوك الـعــوره ام : الـفريـق استـاريح… أسـتـاعـد عـادة ً سـر ( يـخرجـون)
المشـهــد الـرابـــع إمرأة : ( نسمع طلق ناري ثم تدخل وهي تدفـع عربـه وبهـا رجل مـُغطى وتغـذيـه من قـنية كبيره مع غناء ورقص لفتاتين ) جينا جينا جينا وجـبـنا العَـروسه وجـيـنـا.. ( تـتـرك العـربـه لوحدها ويخرجون ) قاسم : (يـدخل مندهشاً) من هذا الذي اقتحم ملعـبـنا وقـت النهار .؟ باسم : لمن تعـود هـذه الـدبـابــه..!! راسم : لمن تعـود هـذه الصبانـه والدرنـفـيس جاسم : اكيـد هـيـَّه لـذاك الابلـيـس انيس : ( يـدخل ) ايهــا الحاضرون الغائبـون.. ونيس : ( يـدخـل ) ايهــا الاحيــاء والامـوات كلاهما : كـُلـّكم قيام..قيام. الكل : صـخام صـخام. انيس : قـلنا قـيام. الكل : واحنا قـلنا صـخام قاسم : منو انتــو ..؟! انيس : اني الاستاذ انيس أبن عتريس ... مراقب ايمن ونيس : اني الاستاذ ونيس أبن عتريس ... مراقـب ايسر باسم : ونيس في انيس يساوي ويس وخمس جعـاميـص جاسم : من اختاركم مراقـبـيـن يابـه..؟! كلاهما : بـابــا باسم : منو ..علي بــا بــا...!! ونيس : لا باسم : لعــد علي مـا مـا...!! انيس : ماما اقـصـد بابا عتريـس... الكل : عتريـس...لــو أبـلـيــس ...!! عتريس : ( من تحت الغطاء) هذا مـنـو ديـنـاقـش انيس : هــذا فد لاعــب عتريـس: ولـك نـفــذ ثــم نـاقــش قاسم : أخ .. هذا شلـون وصـل هـنـا ونيس : على هذه الدبــه أقـصـد على هذه العـربانـه عتريس : (يكشف الغطاء) ولك حيوان مو كلنا نفـذ ثـم نـاقـش اولادَهُ : بابا كــي.. بابا كـــي ( يعني بابا اجه) عتريس : اشو محـد ما صـفـقـلـي.. ( اولاده يصفقون) عتريس : شكرا..شكرا.. شكرا لهذه الشعور الهـيـاشــه انيس : بابا..جـيـّاشـه مو هـياشــه عتريس : ولك ما كايلـّـك الف مره لا تـقـاطعـنـي من ألـغـي انيس : صـار بابا إلـغـي عتريس : انا الحكم عتريس. لقد جابوني العفو اقصـد لقد جئت ُحكما من اجلكم ونـذرت نفسي وروحي وحالي ومالي وعيالي وجهالي واني بصفتي الكل بالكل. ووفقـا لشعاري هذا (يرفع صبانه ودرنفيس) سوف احكم بالعدل كل المبارات يعـنـي بهذه الصـبـانه افتـح براغي كلمـن يخـالف بالساحه وبـهـذا الدرنـفـيس اشـد براغي كلمن يعصي اوامري. وهسه مارسو..... باسم : احـنـا ما نمارس .... عتريس : هذا ياهـو يلغي .. تعال أكولـك ( يصفع باسم ) من الغي ما اريد جريـدي واحـد يـفـتـح حلـكــه. أفـتـهـمـت..؟! باسم : والله حتى الـثـور يفتهـم بهلراشدي عتريس : وهسه اريد منكم ان تمارسون الديمقراطيه. لان الديمقراطيه التي جئنـا من اجلها وهي منكم واليكم وبها نكدر نعـرف كل الاراء واحـنـا ناخذ الزيـن ونـذب بالشط الشيـن قاسم : كـولــي ... هـل انـت.َ.... عتريس : ( مقاطعا ) منـو هـذا الـلي يـلغـي بكـيـفـه قاسم : اني .. عتريس : انت َ… مـنـو!!.... قاسم : اني قـاسـم عتريس : ( مع انـيـس ) تعال تعال ( يشاوره) انيس : لا لا لا .. لا بابا لا ..هـذا مـو هـذاك القاسم اللي انت تـقــصـده... هـذا فـد لاعـب طوبـه عتريس : ها.. فد لاعـب طوبـه..!! قاسم : تسمحلي عتـريـس عتريس : عتريس هيجي بليـّه استاذ ( كلامه لــ ونيس) روح شربه فـد استكان جـاي ونيس : يلا كدامي شلـون جاي راح أشربك ( يُخرَجه خارج المسرح ) عتريس : هسه تـكدرون تمارسون الانتخابات وبكل حريه. فانا ابا ًعن جد انسان ديمقطاطي ولا انفرد برأي ابدا . والان ايها الاخوان منو يريد يرشح نفسه بالفلتر خلي يرفع رجله اقصـد إيـده ( لم يرشح احدا ) لماذا انتم ساكتـون يـا قـوم..؟! جاسم : لأننا فقدنا زميلنا قاسم عتريس : شنـو ..!! حاسم : احنه لازم ما نسكت عالضيم احنه زلم خشنين ما نهاب الموت عتريس : ( لأنيس ) انيس راويلهم نجوم الضحى أنيس : صـار بـابـا ( يضرب طلقه في الهواء ..الكل يـسقط ارضــا ) عتريس : ( ضاحكا ) شلون زلم خـشنـه جـنـهم احزاب كارتـونـيه ونيس : ( يدخل مع قاسم ) بابا بابا هذا فد واحد لوتي ضربنـي اوتي وشربني جـاي من راس القوري عتريس : كـول الجاي شربتــه أبنـي انيس : اي والله بابا وداعتـك كـوله عتريس : لا قيم الركاع من ديـرت عفـج. خـوش ونيس وانيس عندي وهسه خلونا بصلب الموضوع. الباب مفتـوح واللى يريد ان يرشح نفسه خلي يتفـضل الكل : ( ترفع الايادي ) انا ارشح ..انا ارشح.. باسم : الكل تريد تصير زعيم بليه استثناء وبـليـه كيمياء وبليه احـيـاء جاسم : يا جماعة الخير .. احنه مثل اخوان بفريق واحد وما نختلف إلا بحرف الاول من اسمنـا باسم : تسمحلي استاذ ابلـيس . إلعـفـو عتريس. ان انفرد بزمبيلي ثـوينـات عتريس : لِمَ لا انفرد بـويـه انفرد ...كل واحد خلي ينفرد بزميله .. هذي هي ديقراطيتنا باسم : صار اغاتي ( ينفرد براسم ) اسمع يا ابا شلفعـه.إنهم يتصيدون بالماء العكر وينتهـزون الرفصـه تلو الرفصـه للانقضاض علينا ويريدون يموعـونا تمـويعـا ويمسحونـا تمسيحـا راسم : صـدقت يا ابـا شلغمـا عتريس : ( ينفرد بأم خميس) يا ام خميس من ونيت كتلج تعالي حسبالي أتـحـنيـن لو شفتـي حالي ام : يـابـه شبي حالـك ..!! عتريس : مصـخم وأريـد أجـدد شبابي ويا ليت الشباب يعود ُ....(صمت) أشو انتي ما تـحـجيـن عيـونــي ام : شـَحجي شكـول عتريس : أكـلج انت متـزوجـه ..؟ ام : ليش ما تعرف اني متـزوجـه عتريس : طبعا طبعا أعرف وشكو بيها وهم اني متزوج.. يله خلي نتـزوج هسه بلعـجـل قبل ما يفـوتـنـا قطار الليل ام : ولك عيب استـحي شويـه على نفسك عتريس : ولويش استحي . ما بيها شي. نثني ونثلث ونربع ونخمس ام : بــس عاد عتريس : ( بعصبية لباسم ) انتَ انت باسم : انت لو اني عتريس : اي اني لاء انت.. اسمك وعنوانك وتأريخ ميلادك باسم : شـلــك بيهــم هـذولـه..قـابـل راح دطـلعـلـي جـنسيـه عتريس : ( صارخا ) دا أكـلّـك شـسمـك..؟؟ باسم : سمسم..سوميسم ساسم اقصد باسم القصير عتريس : ( ضاحكا ) هــذا يا حمار سمـاك قصيـر باسم : اخـوك (ضحك ) عتريس : بــس . كـل واحـد يـكـعـد بمـكـانـه..شنـو احنـا قـابـل مطيـرجـيـّه باسم : استاذ عتريس : نعــم باسم : شنــو يعـني مـطيرجـيه ..؟! عتريس : يـعـنـي يـطيّـرون مـطايـا .. باسم : استـاذ.. عتريس : نعـم .. باسم : نعم الله عليك ..شنو مـعـنــى مطايا..؟! عتريس : يعني.. باسم : حمـار عتريس : لعــد اذا تـعـرفـهـا .لمـاذا تسأل يــا حمـار باسم : وانـت اخويـــه بالـرضـاعـه عتريس : ( موبـخا ) كافي عاد... شنو انـت حـلاق الثــرثـار باسم : لا اني بحيــرة الثـرثــار عتريس : تــره هسه اشك هدومي باسم : وتـطـلـع طـرزان عتريس : ( لأنيس ) أنيس خاتـر الله.. ما دشيله ودذبــه بالبحــر انيس : كـوم اطلع بـره باسم : عل بــرَّه لو عل جوَّه. نفر عل بـره نفر عل الـجـوه... استاذ .... عتريس : نعم باسم : نعـم الله عليـك .. انت كلت شيله وذبا بالبحر عتريس : تمام باسم : ( يصفع انيس ) ولك غيـر تـنفذ اوامر ابوك..شوفه دشوفه قابل مو بعينـك ..شوفه شطوله شعرضـه. يله شيلني وأشيلك. نصي عـَلـِّي ... عـَلـِّي نصّي... نصي عـَلـِّي ... عـَلـِّي نصّي (يكررها انيس) قف (انيس يبقى بوضع منحني فيجلس باسم على ظهره ويغني وهم يخرجون) : وديني على درب اليمرون أريد أكعد وانادي... عتريس : هم زين خلصنـه منـّه.. اشكـد يلغــي.. جنـّـه بالـع بالـع بالـع رايــدون مـونـتــو كــالــه ونيس : بـابـا.. بـابـا.. مو مونتــو كالــه...... منتــو كارلــو... عتريس : اسكـت لـك .أني جبـتـك عون طلعت فرعون.. صدك المثل اللي كال : جبـت الاكـرع ديونسني كشف راسه وخرَّعنـي.. صايـر مثل أمك معلمه براسي .. لو براسك خير جـان سموك خير الله شلا َّح
انيس : (يدخل ) بابا هـذا كام يـبـجي وبـلـل ظهـري عتريس : هـا ولـك سـوّيـتـهــا باسم : اي والله سويهـتهـا. ولـو انت بمكانـي جان دسويها عتريس : تعـال أنت تعـال ( لباسم) تعـال اكـعـد بـس بـليه لـغـوه باسم : هـا أهّـا راح أكعد بليه لغوه وبليه كهوه عتريس : سكوت ..راح تجـري الانتخابات امام الجمهور الرياضي وعلى الهواء مباشرة بس وين الحصافه أقصد الصحافه والمصورين وين التفلزيـون وين سي ان ان وال أس بي ان والسفن اب وينهم خلي يشوفـون الديـمقـطـاطيــه قاسم : استاذ ..مو من المفروض قبل الانتخابـات نـسوي دعايـه عتريس : كـلامـك مـنـطـقـي وعـقـلانـي.انطيكم مـجـال خمس دقائق حـتـى دسوّون دعـايه بمنتهى الحريــه جاسم : وعلى حساب منو هذه الدعايــه ..؟! عتريس : كل واحد على حسابه. يعني كلمن كهـوتـو من جيـسو راسم : والماعنده منين يـجيب باسم : (مغنيا) الماعنده منين يجيب يا خلك الله ....... صدك منين يجيـب...؟! عتريس : من خالتـك أم ستـوري باسم : ( مغنيا ) يا خاله ويا خاله.......... عتريس : احنا اشكلنـا باسم : انت كلت : أكـعد بليه لغوه.. واني ما لغيت بس غنيت عتريس : ( ضاحكا ) والله بـهـذي غلبـتـنـي باسم : ( للجمهور ) لقد فـزتُ عليــه فـوزا سحـيـقـا عتريس : ايهــا الشباب هــسـه داومــو داومو بالدعايــه قاسم : ( يخرج قصاصات ورق ويوزعها ) أيتها الجماهير الرياضيه أنا قاسم صديقكم وحبيبكم وأبن بلدكم .. إنتخبوني زعيما لهذا الفريق حتى أنقذهم من هذا الحـريـق
جاسم : انتخبونـي ارجوكم انتخبونـي... انتخبونـي يا خلك الله انتخبونـي واذكروني كل الاوقات اذكرونـي بس بسلة المهملات لا دذبوني راسم : انطوني اصواتكم انطوني وبوري أبو إنجيـن لا تضـربونـي باسم : انا وحداني حاعيش وحداني.. انا يتيم ..انا وحيد انا فريد الاطرش. زيدوني اصواتا زيدوني. صعدوني يا ناس صعدوني بس لا بلزبالة تنـزلونـي
عتريس : ( يصفر بالصافر ) انتـهت المحكمه باسم : يا محكمة يا بـطيـخ كطعت كلبي عتريس : العفو اغاتي.العفو عيوني خطئنا وكل الناس تخطأ وسبحان المايخطأ . وقد جـاء في الكتاب الـــ... قاسم : (مقاطعاً ) استاذ. انتَ حكم عتريس مو مـلّـه ولا قسيس عتريس : هذولــه منـو ..؟! باسم : مطربين شباب واكفين بالباب منتظرون تكه وكباب عتريس : ( يصفر) هسه جيبـو الاوراق حتى نقرأ الاسماء( يقرأ) باسم جاسم راسم قاسم ..الخ ( والاولاد يسجلون وبعد قراء ة الاسماء ) لقد حاز اقصــد فاز اللا..اللا .. اللاعب سم ( لونيس ) ولك هاي شنو..! ونيس : بابا هاي ايدك مخليها على كلمة بـا.. يعني با + سم = باسم باسم : (راقصا بفرح) شيلوني رحمه لوالديكم شيلوني فانا الان الزعيم عبد البسيم. يــا ايهـا الجمهور العظيم انني منكم واليكم وسوف ازور قريه قريه وشارع شارع وبيت بيت وسوف اجيبلكم الكهربا والماي وكل واحد نهدي مره حلوه شكره . واخلي الوليدات يوزعون تفلزيون عليكم حتى تشوفوني في كل عام وفي كل شهر في كل يوم في كل ساعه وفي كل دقيقه وفي كل ثانيه عتريس : انا لا أُوافـق باسم : انا اوافق.. عتريس : انا لا اوافق على زعامتك لهذا الفريـق باسم : وانا لا اوافق على زعيقك في هذا الطريق عتريس : انا بكيفي باسم : وأني هم بكيفي عتريس : ( لأبنه انيس) شوف شغلك انيس : ( يحاول ضرب باسم) إنزل حتى أضربـك باسم : اذا انت رجال أصعـد انيس : ( صارخا) تنزل لو أضرب بالمسدس باسم : أنزل عيني أنزل ( ينحني) هلو .. شلونكم.. شلون احوالكم اشو ماكو مي بهذا الطابق الارضي انيس : ( يصفع باسم) يلا أصعـد باسم : باي باي ..( لعتريس) لعد ويـن الديمقطاطيه اللي تـحـجـي عـنـهـا عتريس : بس اني عندي حـق الـفـيـديـو باسم : حـق الـفـيـديـو شنو يابا..؟!! عتريس : يعني الغي اي قرار انا ما اقتنـع بــه قاسم : ورأي الجمهور عتريس : يا جمهور ...!! قاسم : هذا الجمهـور عتريس : هذوله ... ليش اكو واحد يكدر يفتـح حلكـه باسم : من هيجي البلاستر ماكو بالسوك.. أثاري ساد حلوك الجمهـور ...زيـن ام خميس شنو موقعهـا من الاعراب..؟ عتريس : ام خميس صارت في خبر كان .. ما دجر عربانه وما تحل قيطان .... وهسه اني راح أحسم الموضوع وأُعين زعيم للفريـق..اعين را..را..راس.. باسم : (مقاطعا) راس بصـل عتريس : راس بصـل اقصـد راسم وهذا قراري القطعـي ( الأولاد يصفقون ) وانتم ليش ما صفكتم .. المايصفك نقطع اذنـه باسم : صفكو يابا صفكـو ...حافظو على اذانكم حافظو عتريس : تعال راسم تعال أدي اليمين امامي وامام الجمهور الوفي.. تعال خلي ايدك هنا ( على الصبانه والدرنفيس) وكول شما اكول...: باسمي وباسم امي وابويه ( راسم يكررها) اشك حلك اخويه اذا ما صبغني بالبويــه( راسم يكررها) يعيش عتريس انيس وونيس ( يكررها) مبروك مبروك... تعال وين رايح تعال .. انت بطل هذه الفريق وتستاهل نوطة شجاعه ( يعلق على صدر راسم صبانه صغيره ) الاولاد : شايـف خير ومستاهلهـا عتريس : بـس ( موبخا اياهم) يـلـه يا اولاد خلي نشوف شغلنا.أودعناكم يا لـ.....و....ا.....ع.....ي......ب (يخرج عتريس مع اولاده)
باسم : نـعـلـه تـالله عليـك راسم : عليَّ ..؟! باسم : لاء ..على ذاك الأبليس ..والله هذا لازم نـشيله. عتريس : ( يعود ) ويـن دشيلـه..؟! باسم : على راسي وراس الخلفونـي عتريس : عفيه هيجي اريـدك باسم : لماذا عدت يا حبيبي..!! عتريس : لأني نسيت حذائي .. هل لك مانـع باسم : مانع .... كلا والف كلا عتريس :(وهو يخرج) اودعناكم باسم : الله معاك .الله ياخذ ياخذ ياخذ رو ..( نرى رأس عتريس) روحي .... (لزملائه) شوفو راح ..؟! قاسم : راح راح ولـى ... من راحت روحـه باسم : ان شاء الله ان شاء الله ان شاء الله اشوفــه بالنار جاسم : لازم نـاوي تـروح للـنـار باسم : طبعا ًطبعا ً قاسم : ولويــش ًطبعا ً باسم : لان الـجنــه مقبطه ... حاجـزيهـا اهل البتـرول ام : ( تدخل ) السلام عليكم باسم : منو عمو بابا...!! ام : خطيــه قاسم : مـنـو أني ..!!! م : لاء .. عمو بابا جاسم : مات...؟! م : زينـو صفـر ... الكل : زينـو صفـر...!!!! أم : اكـولـي .. الكل : كولي أم : ويـن وصلت الانتخابـات..؟! قاسم : لباب الطوب جاسم : لباب الشرجي باسم : لكراج النهضـه أم : منو فاز بالانتخابات..؟! ( لا جواب ) منو فاز بالانتخابات.. ( لا جواب ) منو فاز بالانتخابات...؟! باسم : فـد طلـي أم : يا طلي..؟! جاسم : راسم ام : ( تهلهل) مبروك مبروك ان شاء الله تشوفون كل الخيـر قاسم : ما نشوف لا خير ولا بطيـخ .. ام : ليش..؟! جاسم : لان هذا زعيم .... بس مو زعيم ام : يعني شنو ..؟! باسم : لانه صـار زعيم من الاعلى وليس من الاسفل يعني صـار زعيم مزور وما مطموغ بطمغة الشعب ( نسمع تصفيق وهلاهل) راسم : مطموغ ما مطموغ.. المهم اني هسه زعيم .يعجبك يعجبك ما يعجبك روح انطح راسك بالحايط باسم : اخترم نفسك تره هذا اسلوب ارهابي راسم : دروح جنـك بستـوكـه باسم : وانت جنـك بـصـطـال راسم : وانت جنـك يــَطـخ باسم : والله جنـك قـصـعــه راسم : والله انت جنك ابو قاسم الطنبوري راسم : انـي ابو قاسم الطنبوري..!! لعد انت جنك عـزة الـدوري باسم : تره اذا ما تسكـت اضـربـك بـوكـس اوصلك لباب اللـوكـس راسم : وأني أضرب جـلاق أوصلك لباب الحـلاق باسم : تعال اشوف تعال اذا انت حلاق قصدي رجال راسم : لاء تعال انت باسم : لاء تعال انت راسم : لاء تعال انت باسم : لاء تعال انت عتريس: ( يدخل ) شنو هل الهوسه.. شنو هل الفوضى ام خميس.. ام : دا يتـعـاركـون عتريس : على شنو..؟! أم : على المنصب.. عتريس : منصبي..!! ام : لا عتريس : عبالي على منصبي لأن اني محد يكدر يزحزحني من مكاني.لازم هلكرسي بسنونـي لزم..ومخلي عليه جير.. يا ايها الجمهور لقد حدثت معركـة في ظل ولايتي والسبب..انت انتِ السبب ( للام خميس) انت راس البلوى .انتِ مثل حيه أم راسين طبيتي بجدريتي وتريدين تلدغيـن رجلي وتاكليـن كتفي. لا لا والف لا ..راح أتغدَّا بـيـج قبل ما تتـعشيـيـن بيـَّه (يصفـر ويـخـرج كرت احمر ) يـلـَّـه كـدامـي دا اراويــج نـجـوم الـضـُحــى ( يخرج) (مجموعه تدخل للمسرح بسرعة ويحملون ام خميس خارجا ونسمـع صراخها من خلف الكواليس وباسم يسقط أرضـــا ) راسم : ( لباسم ) كـوم بابا كـوم .. شبـيـك وكـعـد باسم : (وهو ينهض) رد فعل رد فعل (نسمع اغنية راحت وانكضت ايامنا الحلوه..وهم يشكلون حاجزا وسط المسرح ) قاسم : راحـت راحـت أم خميس وانـكـطعـت انفاسهـا .. عُـكب كل هل العشره اشلون دغيبها ( يخرج) راسم : ليش يا عتريس ليش هيجي سويت شنهـو ذنبهـا إحنــه اللي تـعـاركنـا وهي راحـت بـيها ( يخـرج ) جاسم : ألأبـلـيس ابليس... ويـن ما يـنـزل يـبـيـع نـذالــه. وكـل النـاس، والله والله، صـارو إلـه عــداوه ( يخـرج ) باسم : عليـج أم خميس كـلبـي تـَـفـَـطـَّـر شوفــو يا ناس وجهـي اشلون صــار أصــفـر مثل الـنـهـر دمـوعـي صَــبّــن بالبـحــر ( يخـرج )
المشـهــد الـخامس
(نسمع اغنية لعزيز علي.. كلهه منه.. .مصايبنا وطلايبنا .. كلهه منه) قاسم : ما باقي علينا إلا عتريس الابليس راسم : خسرناج يا ام خميس جاسم : ضاعت ام خميس باسم : ذابت مثل الشكر بالجـاي جاسم : والان ايها الاخوان.. ما العمل...؟! الكل : بالأتحاد قـوه راسم : أنا كرين دايزر قاسم :انا الرجل الحديدي جاسم : وانا سـبايـدرمان باسم : وانا ميكي ماوس ام : ( صوتها) عليكم بالتدريب الكل : التدريب ثم التدريب راسم : المنتخب ..اثبت ..استاعد استاريح ..يلا داومو بالتدريب ( الكل يتدرب ما عدا جاسم ) جاسم ليش واكف جاسم : ما عندي مزاج راسم : مزاجك خلي بصفحه ..هسه احنا بوحده تدريبيه جاسم : يا تدريب يا بطيخ..هم حاسب نفسك زعيم راسم : نعم.. وَلــمَ لا جاسم : لانك مو الرجل المناسب في المكان المناسب باسم : صح انه مو رجل .... (لجاسم ) اكلك شلون عرفت هو مو رجل راسم : المصيبه ليست بالمناصب يا زملاء باسم : نعم نعم نعم يا زملاء..المنصب للأغنـيـاء الجهــلاء راسم : والله هذا المنصب ما بي امتياز جاسم : صح ما بي امتياز..بس انت اللي راح تصـدر الاوامر بالملعب وانت راح تستلم الكاس وترفعه فووك..واحنه نشيلك على اكتافنا ونبقى احنا مهمشين باسم : كلا..لا نتهمش انهماشا بل ننـكمش انكماشا راسم : والله يا جماعه هذا المنصب شكلي باسم : خويه اذا هو شكلي عوفه لأخوك المكرود عتريس : ( يدخل مع اولاده ) هذا ياهو ديـعارض.. مو اني كنست المعـارضه كنس وملَّـخـتـهـم تـمـلـيـخـا وحمـصـتـهـم تـمـحـيـصــا..وملحتهم تمليحا. انـت( لجاسم ) مـا يـصـيـرلـك جـاره .دواك عنـدي. جـيـبــو ورايــا ( يخرج وأَولاده يسحبون جاسم بالقوه ) باسم : والان يا اخوان حـدث شرخـاً ( لأحدهم ) أكلـك شرخاً لو شرخ ٌ( لا جواب) !؟ المهم كلها يك حساب وكل الطرق تؤدي للكباب ( نسمع اطلاق النار ..باسم يسقط ارضا) قاسم : رغم هذا الشرخ وهو طبيعي في كل المنتخبات إلا ان معنوياتنا ما زالت عاليه باسم : بابا يا عالي يا ناصي ..اني معنوياتي وصلت الى 98% تحت الصفر وانبطحت ارضا.ً. وراح انجمد واصير نصي ثلج ونصي بخار راسم : هاي شنو..؟! باسم : أغنية جديده بالباكيت ما مسجله على فديـو جليب راسم : هسه مو وكت الشقه..احنه الان في ورطه ..المنتخب بليه مدرب وبليه زميل باسم : اذن ايها الزومـلاء والزميـلات..اشو ماكو ولا زميله. قاسم : لابد ان نبحث عن زميله اقصد عن زميـل ومدرب باسم : خلي نستـوردهـم بس نفحصهم أخاف يحملـون افكاراً هـَـدّامـه راسم : لا لا اني اقتـرح نهدمهـا... اقصد ان نعلنها في الجرايد وابوك الله يرحمه . باسم : أكـلـَّـك .. هـذا الاعـلان مـنـو راح يـوقعـه...؟! راسم : طبعــا انـي. باسم : لا ء ..انــي أوقـعـه راسم : لا ء ..انــي أوقـعـه باسم : لا ء ..انــي أوقـعـه راسم : لا ء ..انــي أوقـعـه.. لـيـش انـت ابـو زيـد الـهـلالـي باسم : لعـد انت منــو ..؟! جـبـار أبـو الـشـربـت ..!! راسم : لاء.. اني كـلـنـتـون باسم : وانــي مـونـيـكـا قاسم : (صارخا) بس لغوه.. نـنـشر الاعـلان بأسـم ام خـميـس راسم : انــا.. مــا عـنـدي مـانـع.( يخـرج ) باسم : انــي عـنـدي مـانــع قاسم : باسم .. يعني انت ما تحـبهـا ام خميس باسم : عمت عيني اذا ما احبها ( يغني) احبنها...احبنها... تـعـيـش ام خميـس.. يسقـط ابلـيـس. (للجمهور) لا تجلخـون عليَّ وايـر. أنـي كـلـت يسقـط ابلـيـس مـو عتـريس (يـخـرج ) قاسم : اذن هـيـا نـعلنهــا بالجرايــد. ( يـخـرج )
المشـهــد الـــسادس
( بار غربي ..هناك عربة مركونة في يمين المسرح..مجموعة من الفتياة يشربن الخمـر ..عاسم جالس لوحده بدشداشته وعقاله الشرقي وبيده مسبحة وهو يغني موالا عراقيا ً) فـتـاة : (تدخل بملابس الكابوي) Sharp what is this...!! عاسم : موال عراقي عراقي.. يشفي الكلب والجلاوي فـتـاة : (تضع يدها عليه ) What……………..!! عاسم : أويلاخ يابا شنو هل الحراره ..كهرباء كهرباء..إي والله كهرباء كهرباء موجوده بجسمي وهناك بوطني مكطوعه (ترفع يدها) لا لا لا..لا بروح أبوج خليها ولا تشيليها..حرام تكطعي الكهرباء علينـا ..خلينا نشوف الدنيا الحلوه اللي أنحرمنا منها سنين ُعـُجاف...أعملي معـروف وخليهـا تـشفي جروح السنين اللي مضـت وانكضت بلـيّـه دجاج وبليه خروف فـتـاة : Sit down………… عاسم : Sit down.. Sit down (يجلس على الكرسي وترضعه بقنية كبيرة ) هـذا شنو حليب سباع ( وتخلع عقاله) ولج عيب هاي شنو ... تـره هاي عليها حشــم (الفتاة تضع يدها على رأسه) لا لا ما عليها لا حشم ولا بطيخ ( ترفع يدها) والله اكبر عيب تره هسه اطكج طك (تضع يدها ) أنا اطكج ..بروح أمي اطك روحي طك (تسكب شرابها على رأسه ثم تمسحه بمنديلها) هاي شدسويـن..؟! فـتـاة : Silent… Don’t Speak……..….. عاسم : شنو هاي..!! هـا... كلينـر (Cleaner).. منـّا منا ما كو شغل كلينر فـتـاة : Stand up………..… عاسم : (ينهض) لا تصيحيـن عليَّ تـره اني بيه فزه .. انطيني بوسه فـتـاة : Take off your clothes……. عاسم : كتلها انطيني بوسه دكلي انزع هدومك..لعـد لو... فـتـاة : Take off your clothes………. عاسم : صخام على وجهك عاسم ..شلون أنزع واني غريب عن الوطن فـتـاة : Take off your clothes…………. عاسم : والله هاي مصممه دسويني طرزان ..أكلج انزعي انت الأول فـتـاة : (صارخة)........Sharp عاسم : Sharp Sharp (يبدأ بنزع الدشداشه) انزع ليش ما انزع اشو كل الناس تنزع هـيه بقت عليه ...بس رحم على والديـج هـذنـّي ما أنزعها (للملابس الداخليه) لهنا وبس (مع نفسه) منو يدري اليوم نزعت دشداشتي وباجر شدتـنـزع ...! فـتـاة : (تعطيه ملابس ) Take this clothes عاسم : هذوله ملابسكم ...ما تـشبه ملابـسنـا فـتـاة : Oh my darling ( تـلمسه) عاسم : والله تـشبهـا طبق الاصل ...تمام..؟! فـتـاة : Yes……… عاسم : لعد أنطيني بـوسه فـتـاة : (صارخة)........Sharp عاسم : صار عيوني صار راح البسها والبس ابوها وجدها.. تعالي يايمه شوفي ابنج شلون راح يصير ..جـَنـّي بريجيده باردو ( تضع قبعة كابوي على رأسه) وهاي شنو يابا..!! جنهه قعـَّاده مال تواليت .. يله حالنه من حالهم .. ومثل ما يكول المثل: اللي يعيش مع القوم اربعينا يوما يصير مثلهم ( وبأشارة من أصبعها نسمع موسيقى غربيه..) فـتـاة : Come on dancing with me…………….. عاسم : (راقصا معها) تعال يا حبيبي تعال إشبجني وخليني انام واحلم فـتـاة : ………… Sit down here ( وتـسقيه بيدها ) عاسم : ( وهو يجلس بالعربـه)هاي شلون دلال. راح اصير ملك موزنبيق فـتـاة : Listen to me….Do you will be my wife عاسم : (يستغرق في الضحك) أني..أني أصير your wife..يعني اني اصير زوجج ...!! لا لا لا ما يصيــر ( تضع يدها عليه) يمعود شلون ما يصير .. يصير ونص .. يعني اني اصير رجلج وانت ايدي اقصد مرتي ( يغني : يا يمه انطيني الدربين....) يمعودين أني بحلم لو بعلم فـتـاة : We can go now عاسم : وين لديرة عفـج فتاة : Listen to me ( تـُشـاوره ) عاسم : شـنهـيـّه الخـطـه (الفتاة تصـفـعـه) عاسم : افـيـش جـنـّة هـلي .. عسل هـذه الايــد عسـل فتاة : Now we can go….. عاسم : ( ضاحكا ) متأكده تكـدرين توصلـيــن وتوصـليـنـا الفتاة : Yes عاسم : والله صـدك تحكمـيـن ..كـده وكـدود فتاة : O.K عاسم : O.K أمـرج مـُطاع يـا اميرتــي يـا حبـيـبـتـي يـا قلبـي..يا فتاة : (تدفع العربه ) I will do what I want Sharp…Come on ( وتـخـرج.. تدخل عربة ادريس يدفعها انيس وونيس وتخرج ثم تدخل عربة الفتاة وتخرج ....مع موسيقى تـُـنـبـأ بـحدث ما )
المشـهـــد السابــع عتريس: (يدخل..ونيس وأنيس يدفعوه بالعربه مع اغنية احنا مشينا..) أشو مـاكـو ولا واحـد.. هاي وين مولين.. ويـن اللـواعيب الملاعيـن... لـويــش الدنيـا صايــره حمره .. ! انيس : اعتقد هذوله الهنـود الحمر هجمـوا عليـنا ونيس : لا لا انا اعتقد الجيش الاحمر وصل للبحر الاخضـر عتريس: ( لأولاده ) روحو بابا روحو شوفو شنو القضيه .. وقدمولي تقرير عاجل وفوري وعلى الهواء مباشرة .. يله امشو بالعجل.. ( يخرجون ...ثم يرفع الصبانه) ألو الو نعم مدا أسمـع زيـن.. علـِّي صـوتـك عبد الحسين.شنو هل الهوسه. شنو.اللواعيب ديهوسون فـرحـانيـن...!! شنو.. شنو...!! أجووو ..منو أجو.. وأنـي ويـن أولـي..؟! جا وين أولي وين ارروح...شلون .. يجـوز أطيـر..!! قابل اني طير .والله مـا أطير حتى لو اندفن بـالقـيـر انيس : ( يدخل ) هلو بابا عتريس : شكو ماكو . انيس : راح اقرالـك هذا الـتقريـر (يخرج ورقة من جيبه) يكولـون: سوف تجتاحنا عاصـفـة رعناء هوجاء وصفراء وزرقاء وخضراء .... عتريس : اشو حمراء ماكو ...!! انيس : لا بابا .. وهاي صاعقة عارمة ماحقة لاحقة وساحقه ... عتريس : ولك شبيك مجلب بماحقة ولاحقة وساحقه أدخل بالموضوع انيس : بابا راح أدخل..هذه الموجه لا يعلم بها الا الله سبحانه تعاله وهذه الموجه هـوجـاء قادمـة من بلاد Overseas عتريس : شنو..؟! صبانه ودرنفيس انيس : هــذولــه Your Friend ونيس :( يدخل ) بابا الـكهرباء يكولون راح تنكطع ( تنطفأ الكهرباء) عتريس : ولكم اشعلو اللـوكــسات .. فـوانـيـس...!! أنيس : بــابــا... مـاكـو نـفـط .. عتريس : لـماذا يــا ولــدي ..؟! انيس : لأنــَّه احـتـرك يا بابا ( نسمع اصوات القنابل.. الأولاد يـفرون ) ها ولكم ويـن رحتـم وعفتـونــي ليش رحتم ليش (فيغني) راحـو راحـو راحـو وعافونـي..... ( نسمع موسيقى مارشال عسكري مع دخول الفتاة وهي تدفع عربة وبـهـا عاسم وتـزيــح عـربـة عتريس ثم ترفـع له بطاقـة حمراء اللـون كبيرة الحجم ) عتـريس: ( يترجل من عربته ) بـَدِّل كـيـر يـا عتريس وانـزع البـويمباغ واشلـع قبل ما يــروح جـلـدك للـدبــاغ (يفر هاربا ً... يدخل اللواعيب) قاسم : صدك المثل من كال : كل شارب وأله مقص اخر : وكل لشه تتعلك من كراكينها ( ثم نسمع هذه الاغنيه) جْــيـت حكـم بالعـربـانـه...... سرت بـدروب خـربـانـــه خـلّـيـت بطونـه جوعـانـه .... والناس بالشط غركـانــه وروحـك بـس هيَّ فرحانــــه اسويـت بـيـنـه يا عتريس...... جيت بـهـدوم القديـس ومـن جـوَّه إنـتَ إبـليــس......وبيدك صبانه ودرنفيـس مـزَّقـتْ حـلم أم خميس ( ويـخرجون )
المشهـد الـثـامــن (.يدخلون الواحد بعد الاخر وهم يقرأون الصـحف) قاسم : لـيـهـسه مـحـد إنـضـم لفريـقـنـا باسم : بابا بـعـدهـم يـخـافـون راسم : من منـو ..؟! قاسم : مـن جماعة عتريس وابليس مسويـن جبهة ضد اللواعيب راسم : رغـم أن عتريس قد إخـتـفـى ... باسم : لا ... لقـد طارا وارتـفـع ثم راح يـسقط أو سقط قاسم : وليهسه ما سمعنـا عـنـه لا صوت ولا خبر .. ) مغـنيـن : لاخبـر لا جـفـيـه لا حامـض حلـو لا شربـت) عاسم : ( يـدخل ) السلام عليكـم ورحمـة الله وبـركاتـه الكل : وعـلـيـكم السـلام باسم : اهلا وسهلا..شلونك عيني شلونك وشمخلي على عيونك قاسم : باســم .. باسم : شـكـو..!! قاسم : كـولـي تــعـرفــه باسم : لا والله مــا شـايـفـه لا سابقا ً ولا لاحـقـا ً راسم : احنـه ما نـعـرفــه باسم : (لعاسم) منو دازك..هل مخابـرات البيـبسي كولا لـو سفن اب.احـجـي بسرعه وإلا اصـيـحـلـك الـواوي عتريس.. الرجل : في الـحـقـيـقــه والـواقـع .. قاسم : ادخـل بـالـمـوضــوع رجــاء ً الرجل : انـا.. أنـا الـلاعـب الـجـديـد من مديـنـة جـيـم راسم : مـن نـفـس مـديـنـة جـاسـم الرجل : الله يـرحـمــه باسم : اويـلاخ يابا ... اويـلاخ يابا .. اويـلاخ يابا .. مــات..!! الرجل : دا أكــلــه الله يــرحـمــه... يــكـلـي مـات.... باسم : اسف زميلي الـجديـد.البقيه بـحياتك.هاي شنو ..؟ الرجل : سيكاره .. تفضـل باسم : زاد فضلك عيوني ..... مـا هـذا إنـَّه بــوري مـال النفط قاسم : ( لعاسم ) ممكـن هويـتـك الرجل : تـفـضـل قاسم : اسمـه عـاسـم بن لا..لا .. لاسم وضمـن حـدودنـا . تـفـضـل هـويتـك... عاسم : شكرا قاسم : هـا... يا زمـلاء هـل تـوافـقـون راسم : انــي اوافــق باسم : وأنـي ...... مـوافــج ..... بــس انـطـيـنـي بـوســه عاسم : ( بفـرح ) يـمـعـود انـطـيـك الـف بـوســه....تـعـال بــوس باسم : أنسـى راسك اقصـد البـوس قاسم : هسه صــرت واحـد منـا باسم : يعـني واحـد مــن زمـلائـنــا وزميلاتنـا عاسم : لـي الشرف العـظـيـم ان اكـون احـد اعـضـاء هـذا الفـريـق قاسم : وهسـه يـنـقـصـنــا المــدرب عاسم : سهلـه جـداّ .. ومـاكـو اسـهـل منهـــا راسم : عـلى كـيـفـك يــابـا.. ويـن انــت بسـوك الهـرج والمـرج عاسم : اسـف زمـيلـي باسم : اخـذ بــوشـه راسم : انـي هـنـانـا الـزعـيم .. باسم : ماكـو زعيـم إلا كـريـم قاسم : شبيك باسم باسم : تخبلت يعني تسودنت راسم : (لعاسم) مـن تـحجـي كـول تسـمحلـي يـا سيـادة الزعيـم عاسم : (يحنـي رأسه ) تسـمـحلي يـا سيـادة الـعميـد راسم : الـزعـيـم عاسم : نـفـس الـشـي راسم : لاء اشو الا الزعيم عاسم : يـابـا زعيـم زعيم .. الـمـهـم أنـي عـنـدي الـحـل باسم : انـت مـا تـحـل ولا تـربـط عاسم : عـندي مـفـاجــأه إلـكــم الكل : مـُفـاجــأه..!! عاسم : نعــم مُـفـاجأة .. اني لاكـيلـكم مـدربـة وشلون مدربه الكل : مـدربــه...!! عاسم : نعم مدربه راسم : مدربه من صدك لو جذب عاسم : هو ..اقصد هي هي باسم : هي وهاي وهوه....... عاسم : هي مدربه رائعه وعظيمه وانسانه بمعنى الكلمه باسم : يعني هي من الجنس اللطيف الخفيف العفيف عاسم : المدربه هي .. هي.. هي ... زوجتي الكل : زوجـتـك ..!! عاسم : نعـم قاسم : كولي هي متعلمه ..؟! عاسم : شلون...؟ باسم : قاسم يقصد هي هي تعرف تقره وتكتب عاسم : نعم نعم مخلصه دراسه عاليـه باسم : إي وهم أني مخلص دراسه.. عاسم : شمخلـّص عيني..؟! باسم : دراسه ناصيه عاسم : أني كلت زوجتي مخلصه دراسه عاليه باسم : شنو يعني مخلصه روضه لو ابتدائيه عاسم : دا أكولـَّك زوجـتـي عـدها شهـادات باسم : كلنا عدنه هوايا شهادات مثل شهادة الميلاد وشهادة الوفاة وشهادات متروسه بسوك العوره جم كيلو تريد..؟! عاسم : دا أكلك عدها شهادات جامعيه باسم : بسيطه هم الجـلـب مـالـي عـنـده شهـاده... عاسم : شهاده بشنـو باسم : شهادة مال التلقيــح عاسم : زوجـتـي عـدها شهـاده بـالـلـيـاقـه الـبدنيه من امريكا وبـريطـانـيـا وانـكلـتـرا ولـنـدن وبـلجـيـكـا وهـون كـونـك ومالـيـزيا وموزنـبـيـق واستراليا .... راسم : زوجـتـك مـن يـا عشيـره ومن يـا فـخـذ ومـن يـا ظهر ومن يا بطن ومن يا رجل... عاسم : زوجـتـي اجـنـبـيــه باسم : صخــام على وجهـك صخــام..شلون زوجـتك اجـنبـيـه..ما يصيـر .. حنة امة اليعربي ..هذا الشي ما نبي لازم هـسـه نـطـكـك طـك عاسم : ليش يابا ..؟! باسم : اخاف زوجتك عدها علاقات من جوه العبايه عاسم : شنو قصـدك..؟! باسم : قصـدي شريف وعفيف ..يعني ما فهمت قصدي..؟ عاسم : لا والله باسم : من الله ياخذ روحك. اقصد زوجتك ماعده ارتباط مع المخابرات الببسي كولا مثلا ً مثلا ً..؟! عاسم : لا ماعده اي علاقه... بس ويايا باسم : وما هي هذه العلاقـه عاسم : علاقة اخويـه باسم : شلون..؟!! عاسم : علاقه المـرأة مع الرجال باسم : يعني انتَ المره وهي الرجال عاسم : نعـم باسم : عندك شهادة الوفاة العفو شهادة الزواج راسم : باسم باسم : عيون باسم راسم : كافي عاد مو طوختهـا باسم : دعني ابحث عن ما في داخله ِ .. دعني ابحث عن سمراء او شقراء او عـذراء او .. راسم : عاسم .. خـلي نـجـتـمــع وبـعـديـن نـقـرر الكل : ( يتشـاورن ونسمع ) اوافق لا اوافق اوافق... لا اوافق باسم : مبروك ..... احنا ما وافقنـا راسم : دا يتشاقه وياك ..مبـروك احنا وافقنـا وبالاجماع باسم : شوف هذي الديمقطاطيه مالنــا قاسم : هسه وينهـا زوجتك ..؟! عاسم : موجـوده باسم : بس أول شـي ... خـلـي نــضــوكـهــا عاسم : منو دضـوك ..؟ باسم : زوجتـك أقصـد المدربـه عاسم : شلون شلون….!! شـد ضـوك مـنـهــا يـابـا قاسم : هــاي شـبـيـك صـرت عـبـصــي راسم : المنتخـب اثـبـت استـاعد استاريـح .عادةّ سـر( يخرجون ) (نسمع اغنية عشنا وشفنا وبعد نشوف .... )
المشهـــد الـتــاســع راسم : ( يدخل) هـاي ويــن صــارت المـدربــه الـجـديـده...؟! قاسم : ( يدخل ) أعـتـقـد هي على جـيـّه باسم : ( يدخل ) وأنــا لا اعـتقـد... عاسم : صفكو للمدربه الجديده.. المدربه : ( تـدخـل ) Hi... How are you...Come on boys dancing with me? ( موسيقى ..الكل يرقـص معهــا..عــدا قاسم) Why don’t you dancing with me… قاســم : شــنــو...!! عاسم : دكــول لـيـش مـا تـدرب ويــَّانــا قاسم : لأن هـيـجـي تــدريـب مـا شايـف ولا أريـد ان أشـوف مدربه : is very good for you This Practice عاسم : دكـول هـذا الــتـدريــب كـُلش زيــن إلـكـم قاسم : لا والله هذه الطريـقه مـا تـوالـمنـا. يعني ثـوبهـا مـا مفصـل لطولنا ولا لعـرضـنـا عاسم : هـذي طـريـقـه ســَنـسـكـر يـتـيَّــه… راسم : يرحـم والـديـك..شـنـو مـعـنـى هذه اللي كلتها...؟! باسم : انا أوُضـحهـا بـالـتـفلـيـص ..سن يعني مفرد مال سنون .. وسكر يعني شكـرسس.. يـتـيــه.. يـعـنـي دايــح صـايـع مدربه : ( تـضـع يـدهـا علـى كـتف قــاسم ) Please play with me قاسم : شـيـلـي أيـدج مـن كـتـفـي أولاً.. وثـانـيـا هـذا الاسـلـوب غـيـر لائـق بـنـا باسم : صــح ... هـذا الاسلوب غـير لائـق بـنا حنا أُمة اليعربي ... فدوه أروحلـج ... دخـلـيـهـا هـنـا أيــدج وفـضــيـهــا مدربه : ( تضـع يـدهـا على بـاسم ) هـازي التـريـكـه تـنـشـط خـلايـا مـال جسـم انـتـــي باسم : الله اكبر.الله اكبر. ولكم هـاي اشعة ديـزر تـنشطت لياقتي وقيافتي وقامتي.. كلّي يا حلو منين الله جابـك جرح الكلب حـزن من فركـاك مدربه : I came from over seas باسم : شنــو دكول ….أكـفـر بـأبـليس..!! عاسم : لا.. دكـول....جــئــت عبر الشـطـ باسم : ( مغنيا )عـبـرت الشـط ( والـمـدربـه ترقــص ) مدربه : ( صارخــةً ) Stop .....هازي اغنيه قـديـمـه .. باسم : ولـج هاي قديمه ..!! اذا قـديـمـه لـعد لـيـش هزيتي هـز مدر به : (لباسم ) This is very old. Please dance slowly with me باسـم : لـِــمَ لا أرقــص معاج داتــسـن لــوري راسم : هـاي شلون لـزكـه.. بــابــا عـوفــي الـرجـال باسم : فـدوه زمـبـيـلـي عـوفـنـي هـسـه أنـي فـي عالـم تـاني... مـنشـع تـنشيـعـا..تـعال هـم انـت أُخـذلـك داتسن لـوري ( نسمع اصوات بعد سماع صوت الانفجار..الكل تـهرب وتعود ) قنبله سياره مفخخه. صاروخ. قصف مدفعي ...الخ مدربه : (موبـخـة( Why you leave me عاسم : دكول : ليش عفتونــي باسم : والله في الحقيقه والواقع بهذا الزمان كلمن يـخاف على روحه وهـم هــيّ شلعت تشليعــا مدربه : O.K… I will do what I want ( تخرج وتـجلب المحكـان ) باسم : هــاي شـنـو بـيـدج ...!! مدربه : Water for you…come on give your head باسم : شنو اني قابل شجره دا تسكيني ( تصب ماء فوق رأسه) مدربه : Anther one راسم : هذا مـغـذي حتى يقوى جسمنا( تصب ماء فوق رأسه) مدربه : Anther one قاسم : ولج هذا مي مالح( تصب ماء فوق رأسه) مدربه : Anther one عاسم : هم اني مدربه : yes عاسم : why.. ? مـو اني سكيتيني من جنا هناك مدربه : Don't Worry عاسم : O.K don't worry.. Don't worry داومي بالغسل عيوني داومي ( المدربه تخرج ) باسم : راحـت دجيـبلنـا جوكليت عاسم : وشلون جوكليت.. يـخبـل قاسم : ( لعاسم ) ولك اكو واحد يعاشر هيجي ناس عاسم : اي اكو هوايا مثلي معاشريهم.. وشبيهـا. جنهـه ورده باسم : مين .. ورده الليبيـه..؟! مدربه : ( تدخل جالبة اوتي) باسم : اجـا عزرائيل . شكرا شكرا ..أني ما أكوي هـدومـي أوتـي مدربه : بـلـيـس أنـزع راسم : لاء ... أنزعي أنت الاول مدربه : ( تصـرخ به) أنــزعI am Side راسم : أنـزع . ليش ما أنـزع. كل الناس تنـزع بقـت عليّ ( ينزع وهـو يعـد ) 1 ..2...3..( وقبل ان ينزع أخر لباسه ) باسم : سـتـوب . لـهـنــا وبـس . ( يُخـرج مـن جـيـبـه لباسه) راسم : شوفي عيب راح تبـيّـن كل الغرف.وخاصة غٌرفـة الاستقبال ..أخذي هدومي أضربـيهـا أوتـي مدربه : O.K (تأخذها وترميها وتكـوي راسم) راسم : أويلاخ يابا..( تكويه ) الله أكبر . إنجوت الزلم في عـقر دارهـا مدربه : Anther one قاسم : (تكويه ) أٌفـيـش خربـت ديـرتــي مدربه : Anther one باسم : ( تكويه) اويـلاخ يابا .. عاسم : ( تحاول أن تكويه ) ولج أنــي زوجـج مدربه : Don't Worry ( المدربه تكويه وهو يصـرخ) باسم : تستاهل .. عـوافي.. منو كايلك تلعب طوبـه .... مدربه : ( وهي تخرج) Sea you ……. عاسم : هـا ويـن رايـحه ... أخـذيـني ويـّـاج أخـذيـني وهنا لا تعوفيني مدربه : ( لعاسم ) أنـت َطـالــك ( تـخـرج ) باسم : صــرت أكـسبايــر عاسم : (مغنياً) أنــه مـن أكـولــن آه واذكــر ايــامــي ولفي طلـع بـالــذات خـان وجـفـانــي ذبـنـي بسكم وبـضـيـم مـحـد درى بـحـالـي خـلانـي كـالـمـجـنـــون مـتـعـذب احــــوالـي قاسم : لـقد مـصـّـت دمـنـا وأكـلـت لـحمنـا وذبـتـنـا عـظم باسم : ( يخرج ورقة من جيبه) ايتها الجماهير الرياضية.. أن العظم كما هو مكتوب هنا له فوائد كثيرة ومهمة وحسب ما يقول مستر أس جي دي وهو طبيب بيطري .. يقول ان النفط يمكن إستخراجه من العظام.. فنحن لابـد ان نحتفظ بعظامنا لذا يجب ان تسلكو ا سلوكنا السخيف من اجل زيادة البترول راسم : الفريق .... استاعد استاريـح ...الى الامام سر.... باسم : ويـن الى الامام سر... هسه الملعب الكبير قد دُمـِّـرَه عن بكرة ابيه قاسم : الملعب ملعبنا واحنا لازم نبنيـه باسم : بربي انت ورده بس مو ورده التونسيه قاسم : يله نخلي ايد بأيد ونبني ملعبنا من جده وجديد راسم : بابا ميـخلـونـا نبني الملعب مثل ما نريـد باسم : احنا نريد ملعب حــر وفـريـق سعيـد راسم : ما يـعـوفـونـا جماعة عتريس وابو طبـر الجـديــد قاسم : يلـه ورايـا نـعـمـر ملـعـبـنـا الكـبـيــر . الكل : يــَـلـّــــه ( يخرجون مع سماع اغنية بلادي بلادي بلادي لك حبي وفؤادي)
طبعت عام 2004 في سيدني |