خلي نحجي ع المكشوف……

و أكيد هم راح تكول هي مو انتخابات هي عرس وطني ..!!!!!! و تنطلق المسيرات و تلعلع الأصوات بالأهازيج و تُرفع البيارق لكل عشيرة و طائفة و محلة و خرابة و مولدة …. و تركص على هوسات المَهاويل* الي ما يقصرون بأهازيجهم بتمجيد تيجان الرؤوس و حماة العرض و الخطوط الحمراء

و أكيد راح يكون بيها عودة الى التأريخ السحيق للتفاخر و التباهي بالحضارة و التأريخ و السومريين و الاشوريين و البابليين و حمورابي و نبوخذ نصر

بس يا طيب أنت…. هاي الحضارات الي علمت البشرية الكتابة والقوانين وعلم الفلك والزراعة ما كانت تكون موجودة لان كان اكو حمورابي و نبوخذ نصر ووووووو بس ... لا حبيبي لا عيوني انت ...هاي الحضارات أنبنت لان كان اكو مواطنين عراقيين أحرار مو عبيد...اي وداعتك كان اكو عراقيين احرار مو عبيد

تعال جاي يا عراقي يا أبو الغيرة …تفتخر بقانون ذولاك زين انت تعرف قانونهم لو بس دبغبغ الكلام ترا قانونهم كان ينصر المظلوم و هسه قانونك يحمي الظالم و قانونهم كان يحمل العدالة و هسه قانونك القوي يأكل الضعيف والي عنده سلاح و مليشيات يحكم و يقتل ... قانونهم كان يعدم الحرامية و هسه قانونك يحمي الحرامية و ينطينهم حصانة

تفتخر بعد بحروفهم المسمارية الي كانت تنكتب على لوح من الطين بس كانوا يكتبونها بصدقهم و أمانتهم و يحملونها بعراقيتهم و هسه حروفك صفرا و مسمومة و كلماتك تحملها بكذبك و نفاقك و تحملها بحقدك تفتخر و تتباهى بالجنائن الي كانت بالعراق مُعلقة بس ما سألت نفسك و ين صارت ذيج الجنائن و انت تشوف عراقك صاير مزبلة …. ذولاك ما كان عدهم نفط و كان الفقير بيهم شبعان و هسه الفاسدين خلوا الموت يحصد من شبابنا و ما يشبع

أغاتي انت أخوية المواطن راح تزعل بس واجه نفسك هذه هي الحقيقة … ذولاك كانوا عراقيين صادقين
عزيزي انت و أغاتي وحبيب كلبي .. إحجي بصوت ضميرك و عَلَيْ الصوت الي بداخلك

اكلك تعرف ليش تتنفسج سبابتك و تركص و تهوس مو لأن جاي تنتخب من اجل العراق لا حبيبي لا أبدا أنت جاي تركص و تهوس لان راح تجيب الي هُمَ مثلك حرامية و عملاء و إنتهازيين راح تجيب الي يخدم مصالحك مو لان تحب طائفتك او قوميتك او إيمانك لا عزيزي لا هاي كلها شعارات و خزعبلات الانتخابات و لغوه فارغة …. لان الي يحب طائفته و قوميته يجيب الي يرفع من شانها و يعلي رايتها و يبيض وجه أبنائها و يشرفهم . مو الي يشوه السمعة و يدمر الطائفة والقومية و يسود الوجه

عزيزي أغاتي المواطن العراقي …. انت تجيب هاي النماذج حتى تحقق مصالحك الغير شرعية و رغباتك المريضة الغير قانونية لان لو تتنفسج سبابتك بصدق و محبة للعراق و تجيب الشريف و النزيه شحدك وشحدك و بعد شحدك توصل يمه بمصلحة غير شرعية و رغبة غير قانونية ... شحدك تكول كدام النزيه والشريف طائفتي و قوميتي و مصلحتي لذلك تجيب ناس على مرامك....و انت هم على مرامهم .... هيج شعب يلوكلهم هيج نماذج

أخوية العراقي لو كنت تحب العراق كان عرفت انك غلطت مرة و مرتين و بالثالثة المفروض سبابتك الي جابتهم ترفعها بوجوههم وتوكفهم عند حدهم .... لو عراقي كان انتخبت واحد مثل حمورابي لو مثل نبوخذنصر....و العراق به زلم حقيقيين بس انت الي ضيعتهم .....ضيعتهم وراح تضيع العراق بس انت هم راح تضيع يوم من الايام....راح تضيع وداعتك

تتباهى وتتفاخر بتأريخ اجدادك لان عافولك شيئ يستحق ان تتفاخر و تتباهى به بس سألت نفسك انت شراح تعوف لأجيالك من بعدك حتى يفتخرون و يتباهون بيك .. أصلا انت ما تكدر تفتخر بنفسك لان ما عندك شيئ و ما سويت شيئ و ما قدمت شيئ حتى تفتخر به ها و بالمناسبة بعد لا تلزك نفسك بذولاك الأجداد العراقيين الشرفاء لان ما إحترمت أرثهم و ما حافظتم على تأريخهم .......و ما تستحق أن تكون حفيد لهم

يمكن أنزعجت من الحجي و انت الي ما تنزعج حتى و انت تشوف العراق يحترك بس عادي ترا كلمن يسمع صوت ضميره إذا يصحى راح ينزعج و يضوج ..... بس مع ذلك ادري بيك مراح تزعل مني لان تحبني و تعرف انه أنا هم احبك وأريد الك الخير و السلام وداعتك احبك و حق نخلة العراق احبك و حق دجلة والفرات احبك

بس يا أخي مو بيدي أحب العراق أكثر منك و من اشوف العراق واكع لازم اصحيك حتى تصير عراقي حقيقي حتى أحبك مثل ما أحب العراق .. عيوني انت المواطن ..... أسأل نفسك .... انت تحب العراق لو دور مصلحتك بحجة الطائفة و القومية و الإيمان…. إذا تحب العراق ف اليوم المفروض نشوف عراقيتك و غيرتك و ترفع سبابتك بالحق و تخوفهم بغيرتك و خليها تتنفسج للي يستاهل لونها و خلي أجيالك يفتخرون بيك

وين غيرتك العراقية الي يضربون المثل بيها أخي العراقي … اختك اليزيدية يسبونها و اخوك المسيحي يهجروه و انت ساكت على المجرمين لا وبعد تحمل المسيحي منية و الله يابه شنو حررناك …. و تحمل للأيزيدي المنية و الله يابا شنو رجعنا بناتكم

….. أستحي شوية هي هاي الغيرة العراقية أن تحمل المنية … أستحي شوية إذا هيج صارت غيرتك …..فــــ ما راح أستغرب أذا شفتك ما تنتخب الشريف و النزيه و العراقي الحقيقي لان بعدها مراح تكدر تبوك و لا تغتصب و تضرب القانون بالقندرة و لا راح تكدر تهدد الفقير والشريف بمسدسك الي حاطوا ب……حزامك

روح أنتخب أخوية العراقي روح و أركص و هوس و كول طائفتي و قوميتي و عشيرتي بس أسمعها مني و حق شمس العراق الي أنطتك سمار وجهك صدكني أجيالك من بعدك راح يلعنون سلفا سلفاك….. وداعتك و وداعتك يلعنون سلفا سلفاك

المَهاويل جمع مهوال / وهو الشخص الذي يرتجل الأهازيج في المناسبات الإجتماعية و دواوين الشيوخ سابقا و حاليا… و في مقرات الأحزاب حاليا……..!!!!!!

بعيدا عن بغديدا 27 نيسان 2018

مشاركاتكم (0)