البطريرك الكلداني لويس ساكو: إعلاني كاردينالاً دعم كبير لكنيسة العراق      رئيس مجمع الكنائس الشرقية: التفاتة أبوية للكنيسة المتألمة في العراق      المجلس الشعبي يشارك في جلسة حوارية في وزارة الخارجية الأمريكية      رئيس الديوان يستقبل مديرة مكتب يونسكو العراق لويزا اكستهاوزن للتباحث في إعمار كنائس الطاهرة والساعة في الموصل ومزارات الايزيديين في سنجار      المدير التنفيذي للمرصد الآشوري لحقوق الإنسان يزور مديرية الثقافة السريانية في عنكاوا      مدير المرصد الآشوري يزور قداسة البطريرك مار كيوركيس الثالث صليوا بطريرك كنيسة المشرق الآشورية      المجلس الشعبي في امريكا يستقبل الناشط المدني كامل زومايا      غبطة البطريرك ساكو يتلقى التهاني من بطاركة الشرق والعديد من الشخصيات الكنسية والمدنية      مدير المرصد الآشوري لحقوق الإنسان يلتقي بمدير عام شؤون المسيحيين في إقليم كوردستان العراق      النتائج النهائية التفصيلية والخاصة باصوات مرشحي قوائم كوتا المسيحيين، حسب ما اعلنتها المفوضية العليا للانتخابات العراقية 2018      زلزال الليرة يصل قبرص التركية.. واقتصاد أنقرة بمهب الريح      وفدا الديمقراطي الكوردستاني والاتحاد الوطني يجتمعان في بغداد      حمم بركان هاواي تتسرب إلى محطة للطاقة الحرارية      حجب الإنترنت عن الأطفال قد يعيق تطورهم      قبل نهائي الأبطال.. "يويفا" يعاقب ليفربول      البطريرك ساكو يحتفل بعيد القديسة ريتا في كنيسة سلطانة الوردية في الكرادة      الصدر خلال لقائه مع وفد الديمقراطي الكوردستاني: على الحكومة القادمة ان تحل جميع المشاكل العالقة مع الكورد      روسيا ستزود الأرض بالإنترنت      بوفون: أحتاج أسبوعا لحسم وجهتي      إعلان قداسة البابا بولس السادس والمطران أوسكار روميرو في 14 تشرين الأول 2018
| مشاهدات : 444 | مشاركات: 0 | 2018-05-01 09:36:58 |

خلي نحجي ع المكشوف……

بشار جرجيس حبش

 

 

أخوية العراقي …. بلا وطنيات و شعارات فارغة و بلا كلاوات كلنا نعرفها و سامعينها من قبل… ف خلي نحجي وياك الحجي الي تفهمه و ما نعقدها عليك و نتعبَك…..

شلونك يا طيب شلونك يا غالي ... هي كم يوم و راح تروح تنتخب و ترفع سبابتك البنفسجية و تتباهى بيها و الله يابا شنو رحت إنتخبت و مارست حقي الديمقراطي… 

و أكيد هم راح تكول هي مو انتخابات هي عرس وطني ..!!!!!! و تنطلق المسيرات و تلعلع الأصوات بالأهازيج و تُرفع البيارق لكل عشيرة و طائفة و محلة و خرابة و مولدة …. و تركص على هوسات المَهاويل* الي ما يقصرون بأهازيجهم بتمجيد تيجان الرؤوس و حماة العرض و الخطوط الحمراء 

و أكيد راح يكون بيها عودة الى التأريخ السحيق للتفاخر و التباهي بالحضارة و التأريخ و السومريين و الاشوريين و البابليين و حمورابي و نبوخذ نصر 

بس يا طيب أنت…. هاي الحضارات الي علمت البشرية الكتابة والقوانين وعلم الفلك والزراعة ما كانت تكون موجودة لان كان اكو حمورابي و نبوخذ نصر ووووووو بس ... لا حبيبي لا عيوني انت ...هاي الحضارات أنبنت لان كان اكو مواطنين عراقيين أحرار مو عبيد...اي وداعتك كان اكو عراقيين احرار مو عبيد 

تعال جاي يا عراقي يا أبو الغيرة …تفتخر بقانون ذولاك زين انت تعرف قانونهم لو بس دبغبغ الكلام ترا قانونهم كان ينصر المظلوم و هسه قانونك يحمي الظالم و قانونهم كان يحمل العدالة و هسه قانونك القوي يأكل الضعيف والي عنده سلاح و مليشيات يحكم و يقتل ... قانونهم كان يعدم الحرامية و هسه قانونك يحمي الحرامية و ينطينهم حصانة

تفتخر بعد بحروفهم المسمارية الي كانت تنكتب على لوح من الطين بس كانوا يكتبونها بصدقهم و أمانتهم و يحملونها بعراقيتهم و هسه حروفك صفرا و مسمومة و كلماتك تحملها بكذبك و نفاقك و تحملها بحقدك تفتخر و تتباهى بالجنائن الي كانت بالعراق مُعلقة بس ما سألت نفسك و ين صارت ذيج الجنائن و انت تشوف عراقك صاير مزبلة …. ذولاك ما كان عدهم نفط و كان الفقير بيهم شبعان و هسه الفاسدين خلوا الموت يحصد من شبابنا و ما يشبع 

أغاتي انت أخوية المواطن راح تزعل بس واجه نفسك هذه هي الحقيقة … ذولاك كانوا عراقيين صادقين 
عزيزي انت و أغاتي وحبيب كلبي .. إحجي بصوت ضميرك و عَلَيْ الصوت الي بداخلك

اكلك تعرف ليش تتنفسج سبابتك و تركص و تهوس مو لأن جاي تنتخب من اجل العراق لا حبيبي لا أبدا أنت جاي تركص و تهوس لان راح تجيب الي هُمَ مثلك حرامية و عملاء و إنتهازيين راح تجيب الي يخدم مصالحك مو لان تحب طائفتك او قوميتك او إيمانك لا عزيزي لا هاي كلها شعارات و خزعبلات الانتخابات و لغوه فارغة …. لان الي يحب طائفته و قوميته يجيب الي يرفع من شانها و يعلي رايتها و يبيض وجه أبنائها و يشرفهم . مو الي يشوه السمعة و يدمر الطائفة والقومية و يسود الوجه

عزيزي أغاتي المواطن العراقي …. انت تجيب هاي النماذج حتى تحقق مصالحك الغير شرعية و رغباتك المريضة الغير قانونية لان لو تتنفسج سبابتك بصدق و محبة للعراق و تجيب الشريف و النزيه شحدك وشحدك و بعد شحدك توصل يمه بمصلحة غير شرعية و رغبة غير قانونية ... شحدك تكول كدام النزيه والشريف طائفتي و قوميتي و مصلحتي لذلك تجيب ناس على مرامك....و انت هم على مرامهم .... هيج شعب يلوكلهم هيج نماذج

أخوية العراقي لو كنت تحب العراق كان عرفت انك غلطت مرة و مرتين و بالثالثة المفروض سبابتك الي جابتهم ترفعها بوجوههم وتوكفهم عند حدهم .... لو عراقي كان انتخبت واحد مثل حمورابي لو مثل نبوخذنصر....و العراق به زلم حقيقيين بس انت الي ضيعتهم .....ضيعتهم وراح تضيع العراق بس انت هم راح تضيع يوم من الايام....راح تضيع وداعتك

تتباهى وتتفاخر بتأريخ اجدادك لان عافولك شيئ يستحق ان تتفاخر و تتباهى به بس سألت نفسك انت شراح تعوف لأجيالك من بعدك حتى يفتخرون و يتباهون بيك .. أصلا انت ما تكدر تفتخر بنفسك لان ما عندك شيئ و ما سويت شيئ و ما قدمت شيئ حتى تفتخر به ها و بالمناسبة بعد لا تلزك نفسك بذولاك الأجداد العراقيين الشرفاء لان ما إحترمت أرثهم و ما حافظتم على تأريخهم .......و ما تستحق أن تكون حفيد لهم 

يمكن أنزعجت من الحجي و انت الي ما تنزعج حتى و انت تشوف العراق يحترك بس عادي ترا كلمن يسمع صوت ضميره إذا يصحى راح ينزعج و يضوج ..... بس مع ذلك ادري بيك مراح تزعل مني لان تحبني و تعرف انه أنا هم احبك وأريد الك الخير و السلام وداعتك احبك و حق نخلة العراق احبك و حق دجلة والفرات احبك 

بس يا أخي مو بيدي أحب العراق أكثر منك و من اشوف العراق واكع لازم اصحيك حتى تصير عراقي حقيقي حتى أحبك مثل ما أحب العراق .. عيوني انت المواطن ..... أسأل نفسك .... انت تحب العراق لو دور مصلحتك بحجة الطائفة و القومية و الإيمان…. إذا تحب العراق ف اليوم المفروض نشوف عراقيتك و غيرتك و ترفع سبابتك بالحق و تخوفهم بغيرتك و خليها تتنفسج للي يستاهل لونها و خلي أجيالك يفتخرون بيك

وين غيرتك العراقية الي يضربون المثل بيها أخي العراقي … اختك اليزيدية يسبونها و اخوك المسيحي يهجروه و انت ساكت على المجرمين لا وبعد تحمل المسيحي منية و الله يابه شنو حررناك …. و تحمل للأيزيدي المنية و الله يابا شنو رجعنا بناتكم

….. أستحي شوية هي هاي الغيرة العراقية أن تحمل المنية … أستحي شوية إذا هيج صارت غيرتك …..فــــ ما راح أستغرب أذا شفتك ما تنتخب الشريف و النزيه و العراقي الحقيقي لان بعدها مراح تكدر تبوك و لا تغتصب و تضرب القانون بالقندرة و لا راح تكدر تهدد الفقير والشريف بمسدسك الي حاطوا ب……حزامك

روح أنتخب أخوية العراقي روح و أركص و هوس و كول طائفتي و قوميتي و عشيرتي بس أسمعها مني و حق شمس العراق الي أنطتك سمار وجهك صدكني أجيالك من بعدك راح يلعنون سلفا سلفاك….. وداعتك و وداعتك يلعنون سلفا سلفاك

المَهاويل جمع مهوال / وهو الشخص الذي يرتجل الأهازيج في المناسبات الإجتماعية و دواوين الشيوخ سابقا و حاليا… و في مقرات الأحزاب حاليا……..!!!!!!

                                            بعيدا عن بغديدا 27 نيسان 2018               

 








شارك برأيك
  



اربيل عينكاوه

  • رقم الموقع: 07517864154
  • رقم إدارة القناة: 07504155979
  • البريد الألكتروني للإدارة:
    info@ishtartv.com
  • البريد الألكتروني الخاص بالموقع:
    web@ishtartv.com
    article@ishtartv.com
جميع الحقوق محفوظة لقناة عشتار الفضائية © 2007 - 2018
Developed by: Bilind Hirori
تم إنشاء هذه الصفحة في 0.9619 ثانية