منذ اسابيع يعاني سكان العاصمة اللبنانية بيروت وضواحيها من مشكلة تكدس اكوام القمامة بسبب عدم وجود مكان للتخلص منها مما جعل شركة النظافة الرئيسية (سوكلين ) تمتنع عن جمعها حتى وصل الامر بالشعب للتظاهر امام السراي الحكومي (مقر رئيس الوزراء ) مطلقين شعارات اهمها (طلعت ريحتكم ) احتجاجا على الوضع القائم .

وللوقوف على ملابسات الحدث التقت اذاعة صوت الخيال باحد المسؤولين الكبار في الدولة اللبنانية للوقوف على ملابسات الازمة .

المراسل : سيادة المسؤول ماهو سبب الازمة الحقيقي ؟

المسؤول : ازمة ؟ اي ازمة ؟ خيي مافيه ازمة ولا شي هاي كلها مبالغات اعلامية

المراسل : اي مبالغات ؟ واكوام القمامة في الشوارع ؟

المسؤول : خيي انا راح اقلك هيدي حملة توعية منشان نشجع الناس على تدوير القمامة في بيوتهن يعني يحطوا الورق في كيس والمعدن في كيس ثاني مثل اوروبا هاي كل القصة .

المراسل : سيدي اي تدوير مقالب القمامة امتلات وليس هناك مكان لرمي القمامة لماذا تلف وتدور ؟

المسؤول : يعني بدك الحقيقة سبب المشكل اهالي الناعمة رافضين زبالة بيروت تجي لعندن وهاي اخلاق مش منيحة وتخالف التعايش السلمي اللبناني والروح الوطنية القائمة على اصلين العيش المشترك والزبالة المشتركة .

المراسل : ولكن اهالي الناعمة معهم حق فجبال القمامة بلغت السماء والروائح اصبحت تهدد صحة اهالي المنطقة . والسؤال لماذا لم تفكروا في انشاء مصانع لتكرير القمامة ؟

المسؤول : مصانع شو ؟ تكرير قمامة ؟ يعني بدك نكب مصاري الدولة والشعب في الزبالة ؟ ياعيب الشوم عليك , مصاري الشعب لازم تنصرف على الوزراء والنواب والرؤساء وسياراتهن وسفراتهن وانت بدك نحطها في الزبالة ؟شو شايف لبنان بلد متخلف وفاسد .

المراسل : طيب وهاهي النتيجة اعتصامات ومظاهرات فماذا تقول ؟

المسؤول : ولك بالعكس نحنا مبسوطين شوف الشعب اللبناني فرقته السياسة والطائفية ولكن الزبالة جمعته مرة ثانية وطلعوا كلهن يتظاهروا مسيحي ومسلم وسني وشيعي .

ولك الزبالة نجحت في توحيد الشعب وهيدا انجاز كبير للحكومة نفتخر فيه ولك ما حدا قدر يعملها من عقود من الزمن الا نحنا .

المراسل : وما قصة شعار طلعت ريحتكم  الذي يردده المتظاهرين ؟

المسؤول : لا شعار ولا شي هاي دعاية لماركة شامبو جديدة نازلة في السوق وحياتك انا بتحمم باليوم مرتين وما فيني ريحة ولا شي تعال شمني اذا بدك تعا شم

المراسل (مبتعدا بقرف ): افهم من كلامك ان الزبالة ستبقى موجودة لوقت طويل

المسؤول : اي بتظل الزبالة شو عليه ؟ نحنا عزلنا السراي الحكومي بجدار اعلى من جدار برلين منشان الوقاية وباقي الشعب كل واحد يدبر حاله خيي والشعب اللبناني زكي (ذكي ) وبيعرف كيف يطلع منها يعني شعب ماهزمته الحرب الاهلية ولا الاحتلال الاسرائيلي راح تقضي عليه شوية زبالة ؟ خلاص انتوا الاعلاميين ما تكبروا الموضوع الشعب بيعرف كيف يتصرف .

* هذه المقابلة وشخصياتها واحداثها من وحي الخيال ولا علاقة لها بارض الواقع .