قصيدة الشاعر زهير الدجيلي في الذكرى الحادية والثمانين

                   لتأسيس الحزب الشيوعي العراقي

                        **      **        **

 

عَدوِّيَنا  يكرهون  الشيوعيين

لأن أحنا المحّبة التزهي بالآمال  ..

لأن أحنا سرايا الفجر  نطلع من بطون  الليل

وَيّ الصبح حتى أنبشِّر الأجيال ..

بُشرة خير :  الشيوعية  مصير الكون

حتى لو ألف  سنة هذا ألزمان الردي طال ..

حتى لو بعد  ألف سنة عشنه  المّذلة والظلم

وأستمر عصر الحرب عصر الذبح عصر المال ..

حتى لو حرّضّوا الدنيا علينا 

وضاقت الوسعة ابوجهنا , وعسّرَت بينا الأحوال ..

وحتى لو متنا و قضينا ,  ومابقت

غير الجذور النابتة من عدنا ما بين الأطلال ..

الفرج عند الشدّة , والشدّة وراها فرج 

قالوها  أهلنا بكل الأمثال ..

رغم القهر  نطلع .. والله نطلع .. زَرع الكًاع يطلع

 مثل مايطلع الثيلّ  بالحدايق

ومثل مايطلع "ورد ست الحسن " بين السهول وبين الأجبال ..

لأن أحنا الوعد .. وأحنا الصدق والشرف  والزينات

وأهل الوفا بالأقوال والأفعال ..

لأن أحنا الصبر عالضيم  محتسبين عند الشعب المظلوم

لوصار الوطن محبوس عند  الخاين المحتّال ..

 وياصبر الشيوعيين مأ أطوَلَك ..

ياأيوب  طول الدهر  .. مثل الجبل

تعوي الريح حوله وأبد ماينهال ..

عَدوّينا يكرهونا لأن أحنا  أهلها وناسها

وأحنا اللّي  أ نعدل  الحمل لومال ..

بعد ميّة  سنة  أنبيّن لَهَم كشف الحساب  

حتى كل  الناس تعرف  ليش شافت هالعذاب

 وهالخراب وهالحروب وهالأهوال ؟ ..

وحتى  كل الناس تعرف  منهو خان ألوطن

ومنهو السرق ثرواتها ؟ ومنهو الشرد  بالأموال ؟

أِجدَح يازناد الجدَحِت ميّة سنة , بنور الشيوعيين الأبطال ..

أِجدَح يازناد ابوجه دنياك الغدت هندِّس وظلمة  

وخلِيّ نورك في سماها  أيهِّل عليها مثل الأهلال ..

           **     **        **

عَدوّينا لنا قصة طويلة أوياهم

أنسولفها في عيد الحزب كلّ سنة لللأجيال ..

تقاسمنا ويّاهُم كلشي بالدنيا

وأخذ كلمن حلاله  والرأسمال ..

وشعوب الأرض شهدت على هالقسمة

ومضى التاريخ كل أوراقها  وقال :

لَنَا الشمس الضوّية وخضرة الكًاع

ولَنَا أحلى الأماني وأجمل الأمال ..

وَلَنَا كلشي حلو بالدنيا

وأحلى مامسموع فيها  , وأحلى شي ينقّال ..

ولَهُم سود الليالي وحسرة الأيام

والخيبات والكلمة القبيحة العيب تنقّال ..

ولَهُم الشوك والعاقول والصحرا

وعقاربها وأفاعيها وسموم الغدر  والأنذال ..

تقاسمنا أوياهم كلشي بالدنيا

 وأخذ كلمن نصيبه   والرأسمال ..

وغدا التأريخ شاهد على هالقسمة

ومضى بيده على كل الأوراق وقال :

لَنَا الموسيقى والألحان والألوان

واللّيّ أيفرِّح الأنسان واللّيّ أيضِّحِك الأطفال ..

ولنَا كل الفرح والبهجة والحب الجميل

وأغنيات العشكً والأزجال ..

وَلنَا كلّ االطَرَب  والشعر والفنّ والرسم

والمسرح , وكلمن كتب أبحّبّ الوطن موّال ..

ولَهَم كل المقابروالمجازر

 والحرايق والمذابح والأنفال ..

ولهَمُ كل البكي والنوح والأحزان

ولهَمُ السوس والجرذان والديدان

واللّي يدّمرّ  الأوطان

 ويجعلها  بيوت أمهّدمّة وأزبال  ..

ولهَم كل الطمع والبوق والبوّاق

 والمرتشي  والحيّال والنشّال ..

تقاسمنا أوياهم كلشي بالكون

 وأخذ كلمن حلاله والرأسمال ..

لنا كل الفقارة اللّي امخليّن الوطن عالبال  

من كادحين وفلح وعمّال ..

ولنا الأشجار والأثمار والأنهار والأمطار والشلال

ولَهُم كل الضباع وكل وحوش الأرض

 واليذبحون اليشر من مجرمين وقتلة وأنذال  ..

ولَهُم داعش وفاحش والزمان الجاهلي

وكل زمن يحمي المجرم القّتال ..

ولهم كل الكلكجية والكلاوات والفهلوي والغشّاش

والمايسوى تكّ أنعال ..

هاي قصتنا الطويلة وي عدوّينَا الأنذال ..

تقاسمنا ويّاهم كلشي بالكون

وأخذ كلمن حلاله والرأسمال ..

وغدا التأريخ شاهد على هالقسمة

ومضى بيده على كل الآوراق وشال ..

لكنهم  بقوا يردون كلشي اللّيّ لَنَا

يحرقوه ويدمروه ويخلوّه

ماينشاف وماينسّمع وماينقال !

هذي قصتنا أوياهم

كل سنة  أنبّين لهم كشف الحساب ..

حتى بلكت بستحون

 ولو بيّاع الكِذب مايستحي .. لابالأقوال ولا بالأفعال !

 **        **    **

زهير الدجيلي

آذار 2015